Etukulwa etimulongo
Ouhamba oo “itau ka teka po fiyo alushe”
1. Oushili ulipi wa divilikwa koiningwanima younyuni mondjokonona aishe yovanhu?
OININGWANIMA younyuni efiku keshe otai divilike oushili oo kutya ovanhu inava mona elao eshi va ekelashi ounamapangelo waJehova nokukendabala okulipangela vo vene. Kape na omulandu wepangelo lopanhu wa etela ovanhu ouwa nope he na onhondo. Nonande ovanhu ova xumifa komesho eshiivo lavo lopaunongononi ponghatu inai monika nale, inava dula okufinda omikifi ile va xulife po efyo, inava dula nokuli noku shi ningila omunhu nande oumwe. Epangelo lopanhu inali xulifa po oita, elongifo leenghono, ekaulo lonyanga, enyonauko ile oluhepo. Omapangelo omakwanyanya otaa pangele natango ovanhu moilongo ihapu. (Omuudifi 8:9) Outeknologi, olwisho nosho yo okuhenakonasha otai etifa enyateko ledu, lomeva nosho yo lomhepo. Okuhakwata nawa eliko kwovanambelewa otaku shi ningi shidjuu kuvahapu okumona oipumbiwa yonghalamwenyo. Omido omayovi dokupangela kwovanhu oda ulika oushili oo kutya: “Ondjila yomunhu ihai kala mepangelo laye mwene, ile mepangelo lomulumenhu, nhumbi ta ende, nhumbi ta yukifa eenghatu daye.”—Jeremia 10:23.
2. Oshike ashike shi li ekandulepo lomaupyakadi ovanhu?
2 Mbela ekandulepo olilipi? Ouhamba waKalunga, oo Jesus a honga ovashikuli vaye ve u ilikane kutya: “Ouhamba woye nau uye; ehalo loye nali wanifwe kombada yedu yo ngaashi meulu.” (Mateus 6:9, 10) Ouhamba waKalunga womeulu owa hokololwa mu 2 Petrus 3:13 u li “eulu lipe,” olo tali ka pangela ‘edu lipe,’ olo li li oulikumwe wovanhu wouyuki. Ouhamba waKalunga womeulu owa fimanenena, nomolwaasho Jesus okwa li e u ninga enenediladilo lokuudifa kwaye. (Mateus 4:17) Okwa ulika ondodo oyo u na okukala u na monghalamwenyo yetu, e tu ladipika a ti: “Kongeni tete ouhamba waKalunga nouyuki waye.”—Mateus 6:33.
3. Omolwashike okulihonga kombinga yOuhamba waKalunga shi li oshinima sha endelela neenghono paife?
3 Okulihonga kombinga yOuhamba waKalunga oshinima sha endelela neenghono paife, molwaashi mafiku Ouhamba oo otau ka katuka eenghatu okulundulula epangelo lokupangela edu eli fiyo alushe. Daniel 2:44 ota xunganeke ta ti: “Pomafiku eehamba dinya [omapangelo oo taa pangele paife] Kalunga ou komeulu ota ka dika ouhamba [meulu] itau ka teka po fiyo alushe, nepangelo lawo itali ka yandjwa koshiwana shimwe [ovanhu itava ka pangela nande vali edu]. Ndele owo otau ka nyanyaula notau ka teyaula omauhamba aeshe [oo e li po paife] noku a xulifa po, ndelenee owo vene tau ka kala fiyo alushe.” Kungaha, Ouhamba otau ka xulifa po omafiku aa axuuninwa mokuhanauna po onghalelo ei aishe yoinima youkolokoshi. Okupangelwa kwedu kOuhamba womeulu otaku ka kala kwoshili. Katu na tuu okukala twa pandula eshi epepelelwo olo tau ka eta li li popepi elela paife!
4. Oshike sha ningwa po meulu mo 1914 shi na nasha nOuhamba, nomolwashike osho sha fimana kufye?
4 Mo 1914, Kristus Jesus okwa li a nangekwa po e li Ohamba nokwa li a pewa eenghonopangelo a ‘pangele mokati kovatondi vaye.’ (Epsalme 110:1, 2) Nomomudo omo, ‘omafiku axuuninwa’ onghalelo ei yopaife yoinima youkolokoshi okwa tameka. (2 Timoteus 3:1-5, 13) Pefimbo opo tuu opo, oiningwanima oyo Daniel a mona memoniko lopaxunganeko oya ningwa shili meulu. ‘Omuxungu,’ Jehova Kalunga, okwa yandja kOmona womunhu, Jesus Kristus, “eenghono nefimano noshilongo. Noiwana aishe omaludi nomalaka tae mu longele.” Mokuhokolola shi na sha nemoniko olo, Daniel okwa shanga a ti: “Eenghonopangelo daye odo eenghonopangelo daalushe, kadi na apa tadi xulu po. Ndele oshilongo shaye osho oshilongo itashi ka teywa po.” (Daniel 7:13, 14) Okupitila mOuhamba oo womeulu momake aKristus Jesus, Kalunga ota ka dulifa ovo ve hole ouyuki va hafele oinima iwa ihapu oyo kwa li e na momadiladilo eshi a tula ovakulunhu vetu votete vopanhu mOparadisa.
5. Omauyelele elipi e na sha nOuhamba mahokwifa neenghono kufye, nomolwashike?
5 Mbela owa hala okukala omupangelwa omudiinini wOuhamba? Ngeenge osho, oto ka kala u na ohokwe okushiiva nghee epangelo olo lomeulu la unganekwa nonghee tali longo. Oto ka kala wa hala okushiiva osho tali ningi paife naasho tali ka wanifa monakwiiwa nosho yo osho tali pula u ninge. Eshi to konakona Ouhamba nawanawa, olupandu loye li na sha nao oli na okukula. Ngeenge owe liufa kepangelo lao, oto ka kala wa longekidwa nawa okulombwela vamwe shi na sha noinima ikumwifi oyo Ouhamba waKalunga tau ka ningila ovanhu ovaduliki.—Epsalme 48:13, 14.
Ovapangeli vOuhamba waKalunga
6. (a) Omishangwa otadi ulike ngahelipi kutya ounamapangelo walyelye tau ulikwa okupitila mOuhamba wopaMessias? (b) Otu na okukumwa ngahelipi kwaasho hatu lihongo kombinga yOuhamba?
6 Oshinima shotete osho okukonakona oko taku holola osho kutya Ouhamba oo wopaMessias ou li euliko lounamapangelo waJehova mwene. Jehova oye a yandja “eenghono nefimano noshilongo” kOmona waye. Konima eshi Omona waKalunga a pewa eenghono opo a hovele okupangela e li Ohamba, okwa li sha wapala eshi omawi meulu a ingida taa ti: “Ouhamba wounyuni ou wa ninga wOmwene wetu [Jehova Kalunga] naKristus waye, ndele [Jehova] ta ka pangela alushe fiyo alushe.” (Ehololo 11:15) Onghee hano, keshe osho hatu didilike shi na sha nOuhamba oo naasho tau wanifa po otashi dulu oku tu ehenifa popepi naJehova. Osho hatu lihongo oshi na okufindila mufye ehalo lokudulika kounamapangelo waye alushe fiyo alushe.
7. Omolwashike shihokwifa unene kufye eshi Jesus Kristus e li Omupedupangeli waJehova?
7 Diladila yo oushili oo kutya Jehova okwa tula Jesus Kristus kolukalwapangelo e li Omupedupangeli waye. E li Omulongi Onghulungu oo Kalunga a longifa okushita edu novanhu, Jesus oku shii nawa eemhumbwe detu e dule keshe umwe womufye. Natango, okudja kehovelo londjokonona yovanhu, okwa ulika kutya okwa “nyakukilwa ovana vovanhu.” (Omayeletumbulo 8:30, 31; Ovakolossi 1:15-17) Omolwohole yaye inene yokuhola ovanhu, okwe uya ye mwene kombada yedu ndele ta yandje omwenyo waye u li ekulilo omolwetu. (Johannes 3:16) Kungaha, okwe shi ninga tashi shiiva tu manguluke koulunde nefyo notu kale nomhito yokumona omwenyo waalushe.—Mateus 20:28.
8. (a) Mekondjifafano nomapangelo opanhu, omolwashike epangelo laKalunga tali ka kalelela? (b) Ekwatafano lilipi “omupiya omudiinini nomunaendunge” e na nepangelo lomeulu?
8 Ouhamba waKalunga oo epangelo ihali lunduluka notali kalelele. Oukwatya wao tau kalelele owa shilipalekwa koushili oo kutya Jehova iha fi. (Epsalme 146:3-5, 10) Mekondjifafano neehamba dopanhu, Jesus Kristus, oo e lineekelelwa ouhamba kuKalunga, naye ita dulu vali okufya. (Ovaroma 6:9; 1 Timoteus 6:15, 16) Ovo tava ka kala pamwe naKristus koipangelapundi yomeulu otava ka kala 144 000, ovapiya vaKalunga ovadiinini va dja “mukeshe oludi nelaka novanhu noiwana.” Naavo ova pewa omwenyo ihau fi. (Ehololo 5:9, 10; 14:1-4; 1 Ovakorinto 15:42-44, 53) Vahapu vomuvo ove li nale meulu, noshixupe shavo osho shi li natango kombada yedu oshi li “omupiya omudiinini nomunaendunge,” oo ta xumifa komesho noudiinini oinima yOuhamba oku kombada yedu.—Mateus 24:45-47.
9, 10. (a) Omanwefemo haa eta olutandu nenyonauko elipi taa ka kufwa po kOuhamba? (b) Ngeenge inatu hala okuninga ovatondi vOuhamba waKalunga, eemwiyo dilipi tu na okuhenuka?
9 Mafiku, pefimbo laJehova la wapala, ota ka tuma etanga laye lovakwaita lehanauno va katuke onghatu va koshole edu. Otava ka hanauna po fiyo alushe ovanhu ovo va hoolola okuhadimina ounamapangelo waye naavo va dina omafiloshisho opahole oo ha yandje okupitila muJesus Kristus. (2 Ovatessaloniki 1:6-9) Osho otashi ka kala efiku laJehova, efimbo olo la kala la teelelwa eshi ta ka yukipalifwa e li Omunamapangelo weshito alishe. “Tala, efiku lOmwene otali uya nokuli li noixunahalukifo noupyuhandu nehandu la hanya . . . noli kombe po ovalunde aveshe filu filu.” (Jesaja 13:9) “Efiku olo efiku loupyuhandu, efiku loluhepo noloudjuu, efiku lehanauno nolenyonauko, efiku lomilaulu noloshiwiwili, efiku loilemo nolomidimbi.”—Sefanja 1:15.
10 Omalongelokalunga aeshe oipupulu nomapangelo aeshe opanhu nosho yo omatanga ovakwaita ao, ovo va kala tava longifwa komupangeli omunawii wounyuni ou iha monika, otava ka xulifwa po fiyo alushe. Aveshe ovo tava endafana nounyuni mokulalakanena onghedi yokukalamwenyo yokulihola mwene, yokuhenouyuki noya nyata otava ka hanaunwa po. Satana nosho yo eendemoni daye itava ka kala vali tava endaenda kedu, otava ka mangelwa mombwili filufilu omido eyovi. Opo nee Ouhamba waKalunga otau ka kala tau pangele edu alishe. Osho itashi ka kala tuu epepelelwo kwaaveshe ovo ve hole ouyuki!—Ehololo 18:21, 24; 19:11-16, 19-21; 20:1, 2.
Nghee omalalakano Ouhamba taa ka wanifwa
11. (a) Ongahelipi Ouhamba wopaMessias tau ka wanifa po elalakano laJehova li na sha nedu? (b) Epangelo lOuhamba otali ka tya shike kovanhu ovo ve li kombada yedu pefimbo olo?
11 Ouhamba wopaMessias otau ka wanifa po filufilu elalakano laKalunga lopehovelo li na sha nedu. (Genesis 1:28; 2:8, 9, 15) Fiyo okunena, ovanhu ova dopa okuyambidida elalakano olo. Ndelenee “ounyuni ou tau uya” otau ka pangelwa kOmona womunhu, Jesus Kristus. Aveshe ovo tava ka xupa po eshi Jehova ta ka hanauna po onghalelo ei ya kulupa otava ka longa va hangana koshi yOhamba Kristus, tava ka kala va hafa okulonga keshe osho ta ti, opo edu alishe li ninge oparadisa. (Ovaheberi 2:5-9) Ovanhu aveshe otava ka hafela oilonga yomake avo notava ka mona ouwa filufilu moilongomwa yedu.—Epsalme 72:1, 7, 8, 16-19; Jesaja 65:21, 22.
12. Ongahelipi ewaneneno lopamadiladilo nolopalutu tali ka etelwa ovapangelwa vOuhamba?
12 Eshi Adam naEva va shitwa, ova li va wanenena, nosha li elalakano laKalunga opo edu li yadifwe noludalo lavo, aveshe tava hafele ewaneneno lopamadiladilo nolopalutu. Elalakano olo otali ka wanifwa panghedi iwa elela koshi yepangelo lOuhamba. Osho otashi pula oidjemo aishe youlunde i kufwe po, nomolwaasho Kristus ita longo ashike e li Ohamba ndele oku li yo Omupristeri Omukulunhu. Ota ka kwafela nelidiiniko ovapangelwa vaye ovaduliki va mone ouwa mongushu yokudiminwa po omatimba yeyambo lomwenyo waye wopanhu.
13. Omauwa opalutu elipi taa ka monika koshi yepangelo lOuhamba?
13 Koshi yepangelo lOuhamba, ovakali kombada yedu otava ka mona omauwa makumwifi opalutu. “Omesho ovapofi otaa ka pashuka nomatwi ovafitamatwi otaa ka fituluka. Mefiku olo oshingudu otashi ka nuka ngaashi omenye nelaka laau ha kokoma, otali imbi nokukuwilila.” (Jesaja 35:5, 6) Omalutu oo a ipikwa koukulupe ile komikifi otaa ka nyashuka e dule oo ounona, nomaunghundi oshinamenena otaa ka pingenwa po koukolele. “Opo nee olutu laye tali ka fuluka vali eenghono dounyasha, ye ota shuna vali momafiku ounyasha waye.” (Job 33:25) Efimbo otali ke uya eshi pe he na vali oo ta ka tya: “Aame oshingone.” Omolwashike mbela? Omolwaashi ovanhu ovatilikalunga otava ka kala va mangululwa komutengi woulunde nosho yo woidjemo yao ya kwata moiti. (Jesaja 33:24; Lukas 13:11-13) Heeno, Kalunga ota ka “feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali, osheshi eshi shotete osha xula po.”—Ehololo 21:4.
14. Okumona ewaneneno lopanhu okwa kwatela mo shike?
14 Ndelenee okumona ewaneneno okwa kwatela mo shihapu shi he fi ashike okukala nolutu nomadiladilo e na oukolele. Okwa kwatela mo okuulika lela omaukwatya aJehova, molwaashi otwa shitwa ‘oshifeka shaYe, twe mu fa.’ (Genesis 1:26) Opo osho shi ningwe, ehongo lihapu otali ka kala la pumbiwa. Mounyuni mupe, “[otamu] ka kala ouyuki.” Onghee hano, ngaashi Jesaja a xunganeka, “ovakwaunyuni otave lilongo ouyuki.” (2 Petrus 3:13; Jesaja 26:9) Oukwatya oo otau eta ombili—pokati kovanhu vomihoko adishe, pokati kookaume vopofingo, momaukwaneumbo, nokomesho yaaishe opokati komunhu naKalunga. (Epsalme 85:11-14; Jesaja 32:17) Ovo tave lihongo ouyuki otava ka hongwa kanini nakanini kutya ehalo laKalunga olilipi. Eshi ohole yavo yokuhola Jehova tai kulu momitima davo, otava ka landula eenghedi daye mukeshe oshinima osho tava ningi monghalamwenyo yavo. Otava ka dula okupopya ngaashi Jesus a popya kutya: ‘Ohandi longo ashishe eshi sha wapalela Tate.’ (Johannes 8:29) Onghalamwenyo itai ka kala tuu ihafifa ngeenge osho sha wanifilwa ovanhu aveshe!
Osho sha pondolwa kOuhamba oshi li wetikile nale
15. Mokulongifa omapulo oo e li mokatendo aka, divilika oinima oyo ya pondolwa kOuhamba nokuulika osho tu na okuninga paife.
15 Oinima ikumwifi oyo ya pondolwa kOuhamba waKalunga nosho yo ovapangelwa vao oi liwetikile. Omapulo taa landula nosho yo omishangwa otai ke ku dimbulukifa imwe yomoinima oyo ya pondolwa nale kOuhamba nosho yo oinima oyo ovapangelwa aveshe vOuhamba tava dulu nove na okuninga paife.
Oolyelye va katukilwa onghatu tete kOuhamba, noshidjemo otashi ka kala shilipi? (Ehololo 12:7-10, 12)
Okwoongelwa kwoixupe yongudu ilipi kwa kala taku pewa elitulemo okudja eshi Kristus a ya kolukalwapangelo? (Ehololo 14:1-3)
Oilonga ilipi Jesus a xunganeka kutya ota ka longa konima yokuholoka kwoudjuu munene, ngaashi ya shangwa muMateus 25:31-33?
Oilonga oyo i na okulongwa tete ilipi tai longwa kunena? Oolyelye tava kufa ombinga muyo? (Epsalme 110:3; Mateus 24:14; Ehololo 14:6, 7)
Omolwashike ovapataneki vopapolitika novopamalongelokalunga inava dula okukelela oilonga yokuudifa? (Sakaria 4:6; Oilonga 5:38, 39)
Omalunduluko elipi a ningwa monghalamwenyo yaavo hava dulika kepangelo lOuhamba? (Jesaja 2:4; 1 Ovakorinto 6:9-11)
Ouhamba womido eyovi
16. (a) Kristus ota ka pangela oule wefimbo li fike peni? (b) Oinima ikumwifi ilipi tai ka ningwa pefimbo olo nosho yo konima yalo?
16 Konima yokutulwa mombwili kwaSatana neendemoni daye, Jesus Kristus nosho yo ovafyuululi pamwe naye 144 000 otava ka pangela ve li eehamba novapristeri omido eyovi. (Ehololo 20:6) Pefimbo olo, ovanhu otava ka etwa mewaneneno, oulunde nosho yo efyo oyo ya etifwa kuAdam otai ka kala ya xulifwa po filufilu. Pexulilo lEpangelo lOmido Eyovi, eshi Jesus a wanifa po oshilonga shaye e li Ohamba nOmupristeri wopaMessias, ota “yandje ouhamba” kuXe, “Kalunga opo a kale omunashishe moinima aishe.” (1 Ovakorinto 15:24-28) Pefimbo opo, Satana ota ka mangululwa oule wokafimbo opo a yeleke ovanhu ovakulilwa shi na sha nokuyambidida kwavo ounamapangelo waJehova weshito alishe. Konima eshi eyeleko olo laxuuninwa la pwa, Jehova ota ka hanauna po Satana nosho yo ovanashibofa ovo tava ka ama kombinga yaye. (Ehololo 20:7-10) Ovo tava ka yambidida ounamapangelo waJehova, sha hala okutya, oufemba waye wokupangela, otava ka ulika filufilu oudiinini wavo ihau tengauka. Opo nee otava ka etwa mekwatafano liwa naJehova, tava ka tambulwa ko kuye ve li ovanamati novanakadona vaye, va talwa ko kuye va wana okumona omwenyo waalushe.—Ovaroma 8:21.
17. (a) Oshike tashi ka ningilwa Ouhamba pexulilo lomido eyovi? (b) Omeityo lilipi shi li shoshili kutya Ouhamba “itau ka teka po fiyo alushe”?
17 Onghee hano, onghandangala yaJesus nosho yo yo 144 000 otai ka lunduluka shi na sha nedu. Otava ka longa shike monakwiiwa? Ombibeli inai shi popya. Ndele ngeenge ohatu yambidida ounamapangelo waJehova noudiinini, ohatu ka kala nomwenyo pexulilo lEpangelo lOmido Eyovi opo tu ka mone kutya Jehova okwa lalakanena shike shi na sha navo nosho yo shi na sha neshito laye alishe likumwifa. Ndele nande ongaho, omido eyovi depangelo laKristus otadi ka kala “daalushe” nOuhamba waye ‘itau ka teywa po.’ (Daniel 7:14) Omeityo lilipi mbela? Oshinima shimwe osho kutya, eenghonopangelo itadi ka yandjwa momake avamwe ovo ve na omalalakano e lili, molwaashi Jehova ota ka kala Omupangeli. Natango, Ouhamba “itau ka teka po fiyo alushe,” molwaashi okupondola kwao otaku ka kala fiyo alushe. (Daniel 2:44) NOhamba Omupristeri wopaMessias nosho yo ovapangeli pamwe naye eehamba novapristeri otava ka tumbalekwa fiyo alushe omolwoudiinini wavo wokulongela Jehova.
Eenghundafana dokweendulula
• Omolwashike Ouhamba waKalunga oo auke u li ekandulepo lomaupyakadi ovanhu? Ohamba yOuhamba waKalunga oya hovela naini okupangela?
• Oshike unene shihokwifa kwoove shi na sha nOuhamba waKalunga nosho yo osho tau ka longa?
• Oinima ilipi ya pondolwa kOuhamba tu wete nale, nohatu dana onghandangala ilipi muo?
[Efano pepandja 92, 93]
Koshi yOuhamba waKalunga, ovanhu aveshe otave ke lihonga ouyuki