Etukulwa etimulongo netitatu
Ongudu inene ya taalela olukalwapangelo laJehova
1. (a) Fimbo ovapiya vaKalunga ovo va tetekelela efimbo lOukriste ile ovo vo 144 000 inava mona ondjabi yavo, oshike shi na okuningwa po shi na sha navo? (b) Oshike tashi ka shiiva okuningwa shi na sha ‘nongudu inene’ oyo i li ko kunena?
OVAPIYA vaKalunga ovadiinini okudja kuAbel fiyo okuJohannes Omuninginifi ova li va pitifa komesho okulonga ehalo laKalunga monghalamwenyo yavo. Ndele nande ongaho, aveshe ova fya, va teelela okunyumuninwa kwavo omwenyo kombada yedu mounyuni mupe waKalunga. Omuvalu wo 144 000, ovo tava ka pangela pamwe naKristus mOuhamba waKalunga womeulu, navo ove na okufya fimbo inava mona ondjabi yavo. Ndele Ehololo 7:9 otali ulike kutya momafiku aa axuuninwa, opa li tapa ka kala “ongudu inene” ya dja moiwana aishe oyo itai ka fya, ndele otai ka kala netimaumbwile lokukala fiyo alushe kombada yedu. Mbela ou li umwe womuvo?
Nghee ongudu inene ya didilikwa mo
2. Oshike sha etifa eudeko la yela li na sha nokudidilika mo ongudu inene yomEhololo 7:9?
2 Mo 1923, ovapiya vaJehova ova didilika kutya “eedi” domeyele laJesus olo tali hangwa muMateus 25:31-46 nosho yo “eedi dimwe” odo a popya ngaashi sha shangwa muJohannes 10:16 (OB-1954), odi li ovanhu ovo tava ka kala ve na omhito yokukala nomwenyo fiyo alushe kombada yedu. Mo 1931, ovo va hokololwa muHesekiel 9:1-11 va didilikwa meembaba doipala yavo, navo ova monika kutya ove na eteelelo lokombada yedu. Opo nee mo 1935, okwa li sha monika kutya ongudu inene oyo ongudu yeedi dimwe odo Jesus a popya. Kunena, ongudu inene oyo ya hokiwa oi fike pomamiliyona.
3. Omolwashike outumbulilo “ova li ofika va taalela olukalwapangelo” itau ulike kongudu yomeulu?
3 MEhololo 7:9, ongudu inene inai monika i li meulu. ‘Okukala ofika kwayo ya taalela olukalwapangelo’ laKalunga itashi va pula va kale meulu. Ove li ashike moipafi yaKalunga. (Epsalme 11:4) Oushili oo kutya ongudu inene, oyo “ya nyengana okuvalwa,” kai fi ongudu yomeulu owa ulikwa kokuyelekanifa omuvalu wayo inau tumbulwa kondadalunde naasho sha shangwa mEhololo 7:4-8 nosho yo Ehololo 14:1-4. Omo omuvalu oo wa kufwa kedu tau i meulu owa hololwa kutya ou fike po 144 000.
4. (a) Ongudu inene otai ka xupa “moudjuu munene” ulipi? (b) Ngaashi sha popiwa mEhololo 7:11, 12, oolyelye tava tale ongudu inene nohava longele Kalunga pamwe nongudu oyo?
4 Ehololo 7:14 otali popi shi na sha nongudu inene tali ti: “Ava ovava va dile [moudjuu munene, NW].” Otava ka xupa moudjuu munene oo inau monika nale mondjokonona yovanhu. (Mateus 24:21) Eshi tava ka popya nolupandu kutya exupifo lavo ola dja kuKalunga nokuKristus, oishitwa aishe idiinini meulu otai ka hangana navo mokutya: “Amen. Ehambelelo nefimano nounongo nepandulo nefimaneko nepangelo neenghono odaKalunga ketu alushe fiyo alushe! Amen.”—Ehololo 7:11, 12.
Oi na okuulika kutya oya wana okuxupa
5. Ongahelipi hatu dulu okushiiva osho tashi pulwa opo omunhu a kale oshitukulwa shongudu inene?
5 Okuxupifwa kwongudu inene moudjuu munene otaku ningwa metwokumwe nomifikamhango douyuki daJehova. Omaukwatya oo taa didilikifa ovo tava ka xupifwa okwa kundafanwa nawa mOmbibeli. Onghee hano, ovaholi vouyuki otava dulu okukatuka paife nelalakano lokuulika kutya ova wana okuxupa. Mbela ovanhu va tya ngaho ove na okuninga shike?
6. Omolwashike ongudu inene tai dulu lela okufaafanifwa needi?
6 Eedi odi na ombili nohadi dulika. Onghee hano, eshi Jesus a popya kutya oku na eedi dimwe odo di he fi dongudu yomeulu, okwa li ta popi shi na sha novanhu ovo tava ka kala ve na ehalo okukala fiyo alushe kombada yedu nokudulika yo komahongo aye. Okwa ti: “Eedi dange ohadi udu ondaka yange, naame ondi di shii, ndele odo tadi shikula nge.” (Johannes 10:16, 27) Ovo ovanhu ovo hava pwilikine shili nohava dulika kwaasho Jesus ta ti, sha hala okutya ohava ningi ovahongwa vaye.
7. Omaukwatya elipi ovashikuli vaJesus va pumbwa okukulika?
7 Omaukwatya amwe elipi keshe umwe womovashikuli vaJesus ovo a pumbwa okukulika? Eendjovo daKalunga otadi nyamukula tadi ti: “Mu nokulidula omunhu mukulu, ou mwe mu shikula nale, . . . nye mu djale omunhu mupe a shitwa a [fa] Kalunga omouyuki nomouyapuki woshili.” (Ovaefeso 4:22-24) Ohava kulike omaukwatya oo taa xumifa komesho oukumwe wovapiya vaKalunga—“ohole, ehafo, ombili, onheni, oukaume, ouwa, oudiinini, engungumano, elididimiko.”—Ovagalati 5:22.
8. Ongudu inene otai ka shakeneka shike eshi tai yambidida oshixupe?
8 Ongudu inene otai yambidida omuvalu munini waavo ve na eteelelo lomeulu, ovo tava kwatele komesho oilonga yokuudifa. (Mateus 24:14; 25:40) Eedi dimwe otadi yambidida, nonande odi shi shii kutya otadi ka shakeneka omapataneko, molwaashi pehovelo lomafiku aa axuuninwa, Kristus Jesus nosho yo ovaengeli vaye ova umba mo Satana neendemoni daye meulu. Osho osha hala okutya “[owoo kedu] osheshi ondiaboli ya kulukila kunye nehandu linene, osheshi i shi shii i nokafimbo kaxupi kongaho.” (Ehololo 12:7-12) Onghee hano, Satana ota hapupalifa omapataneko okupataneka ovapiya vaKalunga eshi exulilo longhalelo ei tali ehene popepi.
9. Ovapiya vaKalunga ova pondola shi fike peni mokuudifa onghundana iwa, nomolwashike?
9 Nonande ope na omahepeko onyanya, oilonga yokuudifa otai twikile okuxuma komesho. Pexulilo lOita yoTete yOunyuni opa li ovaudifi vOuhamba omayovi manini, ndele paife oku na omamiliyona, omolwaasho Jehova okwa udaneka kutya: “Oshilwifo keshe tashi hambulwa shi ku lwife, otashi nyengwa.” (Jesaja 54:17) Nokuli noshilyo shomhangu yopombada yOvajuda osha li sha dimina kutya oilonga yaKalunga itai dulu okufindwa. Osha lombwela Ovafarisai mefelemudo lotete shi na sha novahongwa sha ti: “Efeni ovalumenhu ava, va kale ngaha, eudafano eli noshilonga eshi ngenge osha dja movanhu, otashi ka xula po. Ndelenee ngenge osha dja muKalunga, nye itamu dulu oku va nyonauna po. Litaleni, mu ha monike nokuli, onye ovakondjifi vaKalunga mwene.”—Oilonga 5:38, 39.
10. (a) ‘Edidiliko’ olo ongudu inene ya didilikwa nalo otali ti ngahelipi? (b) Ongahelipi ovapiya vaKalunga tava dulika ‘kondaka yomeulu’?
10 Ovo vongudu inene ova fanekwa va didilikwa omolwexupifo. (Hesekiel 9:4-6) “Edidiliko” oli li euliko kutya ove liyapulila Jehova, va ninginifwa ve li ovahongwa vaJesus, notava kendabala okukulika omaukwatya opaKriste. Ohava dulika ‘kondaka yomeulu’ oyo tai popi shi na sha nouhamba waSatana womounyuni aushe womalongelokalunga oipupulu tai ti: “Djeni mo musho, nye ovanhu vange, mu ha kwatafane noulunde washo, mu ha hangike komahepeko asho.”—Ehololo 18:1-5.
11. Omonghedi ilipi ya fimana ovo vongudu inene tava ulike kutya ove li ovapiya vaJehova?
11 Natango, Jesus okwa lombwela ovashikuli vaye a ti: “Opo tuu opo aveshe tave mu koneke kutya, nye ovalongwa vange, ngenge mu holafane.” (Johannes 13:35) Mekondjifafano naasho, oilyo yomalongelokalunga ounyuni ou ohai dipaafana moita, luhapu molwaashi ashike ya dja moiwana ya yoolokafana. Eendjovo daKalunga otadi ti: “Opo tuu opo tapa shiivika ovana vaKalunga novana vaSatana. Keshe tuu ou iha longo ouyuki, oye ke fi womuKalunga, naau e he hole omumwaxe. . . . Fye otu nokuholafana, tu ha fe Kain, ou a dja momunawii nokwa dipaa ondenge yaye.”—1 Johannes 3:10-12.
12. Poudjuu munene, Jehova ota ka ningila shike ‘omiti’ dopamalongelokalunga odo tadi imi oiimati ii?
12 Jesus okwa ti: “Omuti keshe muwa ohau ima oiimati iwa, ndele omuti mwii ohau ima oiimati ii; Omuti muwa itau dulu okwiima oiimati ii, ngaashi omuti mwii itau dulu okwiima oiimati iwa. Okeshe tuu omuti ihau ima oiimati iwa, otau kewa po ndee tau ekelwa momundilo. Onghee hano otamu va koneke koiimati yavo.” (Mateus 7:17-20) Oiimati oyo hai imi momalongelokalunga ounyuni ou otai va konekifa ve li ‘omiti’ dii, odo mafiku tadi ka hanaunwa po kuJehova poudjuu munene.—Ehololo 17:16.
13. Ongahelipi ongudu inene tai ulike kutya oya hangana i li ‘ofika ya taalela olukalwapangelo’ laJehova?
13 Ehololo 7:9-15 otali yukifa elitulemo koinima oyo tai ningifa ongudu inene i xupifwe. Oya monika ya hangana ‘i li ofika ya taalela olukalwapangelo’ laJehova, tai yambidida ounamapangelo waye weshito alishe. Oya ‘kosha oikutu yayo, ndele ye i yelifa mohonde yOdjona,’ tai ulike kutya oya dimina okudima po omatimba kweyambo laJesus. (Johannes 1:29) Oye liyapulila Kalunga noye shi ulika mokuninginifwa momeva. Onghee hano, otai hafele okuhokiwa kuKalunga, oko kwa fanekwa koikutu itoka, notai mu longele “oilonga iyapuki omutenya noufiku.” (NW) Mbela ope na eenghedi omo to dulu okukaleka onghalamwenyo yoye metwokumwe filufilu naasho sha yelifwa apa?
Omauwa oo taa dulu okumonika kunena
14. Omauwa e likalekelwa elipi taa monika kovapiya vaJehova nokuli nokunena?
14 Otashi dulika wa mona omauwa e likalekelwa oo taa monika nokuli nopaife kwaavo tava longele Jehova. Pashihopaenenwa, eshi we lihonga shi na sha nomalalakano ouyuki aJehova, owa uda ko kutya ope na eteelelo likumwifi li na sha nonakwiiwa. Onghee paife ou na elalakano lashili monghalamwenyo—okulongela Kalunga kashili u na etimaumbwile lihafifa li na sha nomwenyo waalushe moparadisa kombada yedu. Heeno, Ohamba Jesus Kristus otai “twala [ongudu inene] keefifiya domeva di nomwenyo.”—Ehololo 7:17.
15. Ongahelipi Eendombwedi daJehova tadi mono ouwa mokudiinina omafinamhango Ombibeli e na sha noinima yopapolotika nosho yo yopaenghedi?
15 Omauwa makumwifi oo taa hafelwa kongudu inene oo ohole, oukumwe nosho yo elongelokumwe olo tali hangwa mokati kovapiya vaJehova mounyuni aushe. Molwaashi atushe ohatu li eendja dopamhepo da faafana, ohatu dulika keemhango nokomafinamhango a faafana oo taa hangwa mEendjovo daKalunga. Omolwaasho inatu tukaulwa komahongo opapolitika ile opashiwana. Natango, ohatu diinine omifikamhango dopombada dopaenghedi odo Kalunga ta pula koshiwana shaye. (1 Ovakorinto 6:9-11) Onghee hano, ponhele yokukala nomashilafano, omatukauko nosho yo oluhaelo oyo i li apeshe mounyuni, oshiwana shaJehova otashi hafele osho tashi dulu okwiifanwa oparadisa yopamhepo. Didilika nghee sha hokololwa muJesaja 65:13, 14.
16. Nonande ope na omaupyakadi oo haa holoka po luhapu monghalamwenyo, ovo vongudu inene ove na eteelelo lilipi?
16 Doshili, ovapiya vaJehova vopanhu inava wanenena. Ohava hangwa yo komaupyakadi oo haa holoka po luhapu monghalamwenyo mounyuni ou, ngaashi okuhangwa komaudjuu ile okuninga oihakanwa i he na ondjo moita yoiwana. Ohava ehama yo, hava mono oixuna nohava fi. Ndele ove na eitavelo kutya mounyuni mupe, Kalunga “ota [ka] feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali.”—Ehololo 21:4.
17. Kashi na nee mbudi kutya oshike tashi tu ningilwa paife, onakwiiwa ikumwifi ilipi ya tuvikililwa ovo tava longele Kalunga kashili?
17 Nokuli nongeenge owa kanifa omwenyo woye paife omolwoukulupe, ouyahame, oshiponga ile omahepeko, Jehova ote ke ku nyumunina omwenyo mOparadisa. (Oilonga 24:15) Opo nee oto ka twikila okuhafela oitendele yopamhepo pefimbo lEpangelo lEyovimudo laKristus. Ohole yoye yokuhola Kalunga otai ka kula eshi to mono omalalakano aye taa wanifwa monghedi ikumwifi. Nomanangeko noupuna opalutu oo Jehova ta ka yandja otaa ka kulika ohole yoye yoku mu hola. (Jesaja 25:6-9) Kai fi tuu onakwiiwa ikumwifi oyo ya tuvikililwa oshiwana shaKalunga!
Eenghundafana dokweendulula
• Oshiningwanima shikumwifi shilipi Ombibeli tai kwatakanifa kumwe nongudu inene?
• Ngeenge otwa hala shili okukwatelwa mongudu inene oyo ya hokiwa kuKalunga, otu na okuninga shike paife?
• Omanangeko noupuna oo taa hafelwa paife kongudu inene notai ke a hafela natango mounyuni mupe waKalunga okwa fimana shi fike peni kwoove?
[Efano pepandja 123]
Omamiliyona ongudu inene otaa longele Kalunga kashili moukumwe