Ope na vamwe ovo ve tu dule

ONDE lineekela kutya owa dimina kutya ope na vamwe ovo ve tu dule nove na eenghono ve tu dule. Mbela olyelye e tu dule noku na eenghono e tu dule? —  OJehova Kalunga. Ongahelipi shi na sha nOmona waye, Omuhongi Munene? Mbela naye oku tu dule? — Heeno, oku tu dule.

Jesus okwa kala pamwe naKalunga meulu. Okwa li Omona waKalunga wopamhepo, ile tu tye omweengeli. Mbela Kalunga okwa li a shita vali ovaengeli vamwe, ile ovanamati vopamhepo? —  Heeno, okwa shita ovaengeli omamiliyona mahapu. Ovaengeli ovo navo ove tu dule nove na eenghono ve tu dule. — Epsalme 104:4; Daniel 7:10.

Mbela oto dimbuluka edina lomweengeli oo a li a popya naMaria? — Okwa li Gabriel. Gabriel okwa li a lombwela Maria kutya okahanana kaye otaka ka kala Omona waKalunga. Kalunga okwa li a lundululila omwenyo wOmona waye wopamhepo moshidalelo shaMaria opo a dalwe e li okahanana kombada yedu. — Lukas 1:26, 27.

Mbela owa itavela ngoo oshikumwifilonga osho sha li sha longwa kuKalunga? Mbela owa itavela kutya Jesus okwa li pamwe naKalunga meulu? —  Jesus okwa popya kutya okwa li pamwe naKalunga meulu. Mbela Jesus okwa li a shiiva ngahelipi oinima oyo? Jesus otashi dulika a li a lombwelwa fimbo a li okamati kuMaria kombinga yaasho omweengeli Gabriel a li a popya. Josef naye otashi dulika a li a lombwela Jesus kutya Kalunga oye a li Xe lela.

Eshi Jesus a li a ninginifwa, Kalunga okwa li a popya okudja meulu a ti: “Ou Omona wange.” (Mateus 3:17) Onguloshi yaxuuninwa fimbo Jesus ina fya, okwa li a ilikana a ti: “Tate, fimanekife nge puove mwene nefimano olo, nda li ndi li kwete, eshi nda kala puove, ounyuni fimbo inau shitwa.” (Johannes 17:5) Jesus okwa li a pula opo a ka kale vali pamwe naKalunga meulu. Ngahelipi mbela? —  Okwa li ta ka dula vali oku ka kala pamwe naKalunga meulu, ngeenge Kalunga okwe mu ningi vali oshishitwa shopamhepo ihashi monika, ile omweengeli.

Paife onda hala oku ku pula epulo la fimana. Mbela ovaengeli aveshe ohava longo ouwa? Oto ti ngahelipi? —  Ovaengeli aveshe ova li hava longo ouwa, molwaashi Jehova oye a li e va shita, nakeshe osho a shita oshiwa. Ndele umwe womovaengeli okwa ka ninga omukolokoshi. Osha enda ngahelipi mbela opo a ninge omukolokoshi?

Opo tu mone enyamukulo kepulo olo, natu ka tale kehokololo li na sha nefimbo olo eshi Kalunga a li a shita omulumenhu nomukainhu wotete, Adam naEva. Ovanhu vamwe ohava ti kutya ehokololo li na sha naAdam naEva ongano ashike. Ndele Omuhongi Munene okwa li e shii kutya ehokololo olo oloshili.

Eshi Kalunga a li a shita Adam naEva, okwa li e va tula moshikunino shiwa shedina Eden. Osha li oparka, oparadisa. Okwa li tava dulu okudala ounona vahapu, sha hala okutya, oukwaneumbo munene nokukala mOparadisa fiyo alushe. Ndele ova li ve na okulihonga oshilihongomwa sha fimana. Oshilihongomwa osho otwe shi kundafana nale. Natu tale ngeenge ohatu shi dimbuluka.

Jehova okwa li a lombwela Adam naEva kutya otava dulu okulya oiimati aishe oyo va hala komiti odo da li moshikunino. Ndele opa li omuti umwe oo kwa li vehe na okulya ko kuo. Kalunga okwa li e va lombwela osho tashi ke va ningilwa ngeenge ova li ko komuti oo. Okwa ti kutya otava “ka fya shili.” (Genesis 2:17) Mbela Adam naEva ova li ve na okulihonga oshilihongomwa shilipi? — 

Ova li ve na okulihonga eduliko. Opo tu kale nomwenyo, otwa pumbwa okukala hatu dulika kuJehova Kalunga. Kasha li ashike sha wana kuAdam naEva okupopya kutya otava ka dulika kuKalunga, okwa li yo ve na oku shi ulika okupitila mwaasho tava ningi. Ngeno ova dulikile kuKalunga, ngeno ova ulika kutya ove mu hole nova li va hala oye a kale Omupangeli wavo. Nokungaho, ngeno ova dula okukala mOparadisa fiyo alushe. Ndele mbela okwa li tashi ka ulika shike ngeenge ova li ko komuti? — 

Okwa li tashi ka ulika kutya kava li lela ve na olupandu laasho Kalunga a li e va pa. Ngeno opo wa li, ngeno owa dulika ngoo kuKalunga? —  Potete, Adam naEva ova li va dulika. Ndele opa li umwe e va dule oo a li a pukifa Eva. Okwa li a ningifa Eva aha dulike kuJehova. Mbela oye lyelye? — 

Ombibeli otai ti kutya opa li eyoka olo la li la popya naEva. Otu shii kutya eyoka ihali popi, mbela osha li sha enda ngahelipi opo eyoka li popye naEva? — Omweengeli wonhumba oye kwa li a popya okupitila meyoka. Omweengeli oo okwa li a hovela okudiladila oinima ii. Okwa li a hala Adam naEva ve mu longele. Omweengeli oo okwa li a hala Adam naEva va kale hava dulika kuye. Okwa li a hala a kufe po ondodo yaKalunga.

Onghee hano, omweengeli oo okwa li a ningifa Eva a diladile oinima ii. Okwa li a lombwela Eva okupitila meyoka a ti: ‘Kalunga ine mu lombwela oshili. Itamu ka fya shili ngeenge omwa li ko komuti oo. Otamu ka kala ovanaendunge ngaashi Kalunga.’ Mbela ngeno okwa li oove, ngeno owa itavela osho to lombwelwa keyoka? — 

Eva okwa li a hovela okukala a hala oshinima shonhumba osho a li a kelelwa kuKalunga. Okwa li a lya oshiimati shokomuti oo va li va dilikwa, nokwa li yo a pa Adam a lye oshiimati osho. Adam ka li a itavela osho sha li sha popiwa keyoka, ndele okwa li a hala okuhafifa Eva ponhele yokuhafifa Kalunga. Onghee hano, naye okwa li a lya oshiimati shokomuti oo. — Genesis 3:1-6; 1 Timoteus 2:14.

Mbela oshike sha li sha ningwa po? —  Adam naEva kava li vali va wanenena, ova li va hovela okukulupa ndele tava fi. Molwaashi kava li vali va wanenena, ovana vavo aveshe navo kava li va wanenena nova hovela okukulupa nokufya. Kalunga ka li a popya oipupulu. Opo tu kale nomwenyo, otwa pumbwa okukala hatu dulika kuye shili. (Ovaroma 5:12) Ombibeli otai ti kutya omweengeli oo a li a lombwela Eva oipupulu oha ifanwa Satana Ondiaboli, novaengeli vakwao ovo va ka ninga ovakolokoshi ohava ifanwa eendemoni. — Jakob 2:19; Ehololo 12:9.

Mbela paife ou udite ko nee kutya omolwashike omweengeli muwa oo Kalunga a li a shita a ka ninga omukolokoshi? —  Omolwaashi okwa li a diladila oinima ii. Okwa li a hala okukala a fimana. Okwa li e shii kutya Kalunga okwa li a lombwela Adam naEva va dale ounona, nokwa li a hala aveshe va kale tave mu longele. Ondiaboli oya hala okuningifa ovanhu aveshe va kale ihava dulika kuJehova. Onghee hano, ohai kendabala oku tu diladilifa oinima ii. — Jakob 1:13-15.

Ondiaboli otai ti kutya kape na oo e hole Jehova shili. Otai ti kutya fye naave katu hole Kalunga noinatu hala shili okuninga osho Kalunga te tu lombwele. Ondiaboli otai ti yo kutya ohatu dulika ashike kuJehova ngeenge oinima tai tu endele nawa. Mbela Ondiaboli otai popi oshili? Mbela osho tu li ngaho shili?

Omuhongi Munene okwa ti kutya Ondiaboli omunaipupulu. Jesus okwa li a ulika kutya oku hole Jehova shili eshi a li a dulika kuye. Jesus ka li ashike ha dulika kuKalunga ngeenge sha li shipu, ndele okwa li ha dulika alushe, nokuli naashi vamwe va li ve shi ninga shidjuu kuye. Okwa kala omudiinini kuJehova fiyo omefyo. Nomolwaasho Kalunga a li e mu nyumuna a kale nomwenyo fiyo alushe.

Mbela olyelye omutondi wetu munenene? —  Heeno, oSatana Ondiaboli. Mbela ohatu dulu oku mu mona? —  Ahowe! Ndele otu shii kutya oko e li, kutya oku tu dule nonokutya oku na eenghono e tu dule. Ndele mbela olyelye e dule Ondiaboli? —  OJehova Kalunga. Onghee hano, Kalunga ota dulu oku tu amena.