Jesus okwe tu honga nghee tu na okwiilikana

MBELA oho popi ngoo naJehova Kalunga? —  Jehova okwa hala u kale ho popi naye. Okupopya naKalunga ohashi ifanwa eilikano. Jesus okwa li ha popi alushe naXe womeulu. Omafimbo amwe okwa li ha kala a hala okukala oye aeke ngeenge ta popi naKalunga. Ombibeli oya ti kutya pomhito imwe, ‘okwa li a londa komhunda e likalela a ilikane. Hano eshi kwa ninga onguloshi okwa li ko oye aeke.’ — Mateus 14:23.

Mbela openi to dulu okuya u ke likalele opo u ilikane kuJehova? —  Oto dulu okulikalela opo u popye naJehova fimbo ino ka nangala. Jesus okwa ti: “Ngenge to ilikana, inda monduda yoye, idila po oshivelo shoye, u ilikane Xo.” (Mateus 6:6) Mbela oho ilikana alushe kuJehova onguloshi keshe fimbo ino ka nangala? — Osho u na okukala ho ningi ngaho.

Jesus okwa li yo ha ilikana pamwe novanhu vakwao. Eshi kaume kaye Lasarus a li a fya, Jesus okwa li a ilikana pamwe novanhu ovo va li ponhele opo kwa li pa pakwa Lasarus. (Johannes 11:41, 42) Jesus okwa li yo ha ilikana ngeenge a li a ongala pamwe novahongwa vaye. Mbela oho kala pokwoongala opo hapa ilikanwa? —  Pokwoongala luhapu ovakulunhu ovo hava ilikana. Onghee hano, ou na okukala ho pwilikine nawa molwaashi omukulunhu oo ta ilikana ota popi naKalunga noponhele yoye. Opo nee oto ka dula okutya “Amen” pexulilo leilikano. Mbela ou shi shii kutya otashi ti shike okutya “Amen” pexulilo leilikano? —  Otashi ti kutya owa hokwa eilikano olo. Otashi ti yo kutya owa twa kumwe neilikano olo.

Jesus okwa li yo ha ilikana fimbo ina lya. Okwa li ha pandula Jehova omolwoikulya. Mbela oho ilikana ngoo alushe fimbo ino lya? —  Osha wapala okukala hatu pandula Jehova okupitila meilikano omolwoikulya fimbo inatu lya. Ngeenge hatu lile pamwe navamwe, umwe otashi dulika oye e tu ilikanene fimbo inatu lya. Ndele mbela ongahelipi ngeenge oto li oove auke? Ile mbela ongahelipi ngeenge to li pamwe naavo ihava pandula Jehova omolwoikulya? —  Ou na okwiilikana eilikano loye paumwene.

Mbela ou na alushe okwiilikana mokule? Ile pamwe Jehova ota ka uda eilikano loye olo to ilikana momutima? —  Ohatu ka mona enyamukulo kepulo olo, ngeenge otwa tale kwaasho sha li sha ningilwa Nehemia. Nehemia okwa li ha longele Jehova, nokwa li ha longo mombala yohamba yaPersia, Artasasta. Efiku limwe, Nehemia okwa li a nyika oluhodi neenghono, molwaashi okwa li a uda kutya omakuma aJerusalem, oshilando sha kula shoshiwana shavo, okwa li a teyaulwa po.

Eshi ohamba oyo ya li ya pula Nehemia kutya omolwashike a li a nyika oluhodi, Nehemia okwa li a ilikana tete momutima. Opo nee Nehemia okwa li a lombwela ohamba kutya omolwashike a li a nyika oluhodi nokwa li a pula ohamba ngeenge ota dulu okuya kuJerusalem opo a ka tungulule omakuma asho. Mbela oshike sha li sha ningwa po? — 

Kalunga okwa li a nyamukula eilikano laNehemia. Ohamba okwa li ya lombwela Nehemia kutya ota dulu okuya kuJerusalem. Nehemia okwa li nokuli a pewa omiti dihapu kohamba opo a ka tungulule omakuma aJerusalem. Osho otashi ulike kutya Kalunga ota dulu shili okuuda omailikano etu, nonande ohatu ilikana momutima. — Nehemia 1:2, 3; 2:4-8.

Paife diladila nee kwaashi, mbela ou na okwiilikana wa nyongama? Ile mbela ou na okutwa eengolo? Oto diladila ngahelipi? —  Omafimbo amwe, Jesus okwa li ha tu eengolo ngeenge ta ilikana. Omafimbo amwe okwa li ashike ha kala ofika, ile a tale keulu, ngaashi a li a ninga eshi a li ta ilikanene Lasarus.

Mbela osho osha hala okutya shike? —  Osho otashi ulike kutya onghedi omo omunhu e li ngeenge ta ilikana hayo ya fimana. Omafimbo amwe oshiwa okunyongama nokufifikina ngeenge to ilikana. Omafimbo amwe oto dulu okutwa eengolo, ngaashi Jesus a li a ninga. Ndele dimbuluka yo kutya ohatu dulu okwiilikana kuKalunga efimbo keshe, kashi na nee mbudi kutya omutenya ile okonguloshi, Kalunga ota ka uda omailikano etu. Oshinima sha fimanenena shi na sha neilikano oshosho kutya otwa itavela filufilu kutya Jehova oha pwilikine ngeenge hatu mu ilikana. Mbela owa itavela kutya Jehova oha udu omailikano oye? — 

Ngeenge hatu ilikana mbela otu na okulombwela Jehova shike? —  Lombwele nge kutya oho lombwele Kalunga shike meilikano? —  Jehova ohe tu pe oinima ihapu iwa, nosha wapala oku mu pandula omolwoinima oyo, hasho mbela? —  Ohatu dulu oku mu pandula omolwoikulya. Mbela owa pandulile ngoo nale Kalunga omolwevalelwa limbulau, omiti nosho yo eengala diwa? —  Jehova oye a shita oinima oyo.

Pomhito imwe, ovahongwa vaJesus ova li ve mu pula e va honge okwiilikana. Omuhongi Munene okwa li e va honga, nokwa li e va lombwela kutya oinima ya fimanenena ilipi oyo ve na okwiilikana kombinga yayo. Mbela ou shi shii kutya oinima oyo oilipi? —  Pandja Ombibeli yoye kuMateus etukulwa 6. Movelishe 9 fiyo 13, omu na eilikano olo ovanhu vahapu hava ti Eindilo lOmwene. Natu leshe eevelishe odo.

Meevelishe odo ohatu lihongo mo kutya Jesus okwa ti kutya otu na okukala hatu ilikana shi na sha nedina laKalunga. Okwa ti kutya otu na okwiilikana opo edina laKalunga li yapulwe. Mbela edina laKalunga olyelye? —  OJehova, notu na okukala tu hole edina olo.

Oshitivali, Jesus okwe tu honga tu kale hatu ilikana opo Ouhamba waKalunga u uye. Ouhamba oo owa fimana, molwaashi otau ka etifa po ombili kombada yedu nokulundululila edu moparadisa.

Oshititatu, Omuhongi Munene okwa ti kutya otu na okwiilikana opo ehalo laKalunga li longwe kombada yedu, ngaashi meulu. Ngeenge ohatu ilikana shi na sha naasho, otwa pumbwa okuninga osho Kalunga te tu lombwele tu ninge.

Jesus okwe tu honga yo kutya otu na okwiilikana opo tu pewe oikulya yefiku keshe. Okwa ti yo kutya otu na okukala hatu yandje ombili kuKalunga ngeenge tu na osho twa ninga sha puka. Otu na yo okukala hatu indile Kalunga e tu dimine po. Ndele tete otu na okukala hatu dimine po vamwe ovo ve tu ninga nai, opo nee naKalunga ote ke tu dimina po. Mbela oshipu kwoove okuninga ngaho? — 

Lwaxuuninwa, Jesus okwa ti kutya otu na okwiilikana kuJehova Kalunga opo e tu amene komunawii, Satana Ondiaboli. Aishe oyo oinima iwa oyo hatu dulu okulombwela Kalunga meilikano.

Otu na okwiitavela kutya Jehova oha udu omailikano etu. Ndele kakele kokukala ashike hatu mu pula e tu kwafele, otu na yo okukala hatu mu pandula. Kalunga oha kala a hafa ngeenge hatu kala metwokumwe naasho hatu ilikana nohatu pula osho sha yuka. Kungaho, ota ka nyamukula omailikano etu. Mbela owe shi itavela? —