Okumona oixuna akushe otaku ka xula po mafiku!
Otashi dulika pefimbo lonhumba monghalamwenyo yoye wa li we lipula kutya: ‘Omolwashike pe na okumona oixuna kuhapu?’ Oule womido omayovi, ounhu owa mona oixuna neenghono koita, koluhepo, koiponga inene, kekaulonyanga, kokuhenouyuki, komikifi nefyo. Oule womido omafele da pita, opa kala okumona oixuna neenghono shi dulife nale. Mbela onaku ka xule po ngoo filufilu?
Enyamukulo tali hekeleke olo kutya, okumona oixuna otaku ka xula po, notashi ka ningwa mafiku! Eendjovo daKalunga, Ombibeli, otadi ti: “Omuhenakalunga ita kala po vali . . . Ndelenee ovananheni vo otava ka fyuulula edu, ndee tava ka hafela ombili inene.” Mbela oule wefimbo li fike peni ovananheni tava ka kala kombada yedu nokukala nombili? “Ovayuki, vo otava ka fyuulula [edu], ndee tava kala mo alushe.”—Epsalme 37:10, 11, 29, yelekanifa nOmbibeli yOshindonga yo 1986.
Konima eshi Kalunga a xulifa po oukolokoshi nokumona oixuna, edu otali ka lundululilwa moparadisa. Opo nee ovanhu otava ka dula okukala momwenyo waalushe, ve na oukolele wa wanenena nove na ehafo. Eendjovo daKalunga otadi xunganeke tadi ti: “[Kalunga] ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali.”—Ehololo 21:4.
Mounyuni oo mupe, nokuli noonakufya otava ka nyumuninwa momwenyo, opo va ka dule yo okuhafela omanangeko noupuna oo, molwaashi: “Otaku ka kala enyumuko lovayuki nolovalunde.” (Oilonga 24:15) Nomolwaasho Jesus Kristus okwa li a dula okulombwela omukolokoshi oo a li e livela ombedi nokwa li a holola eitavelo muye, a ti: “[Oto] ka kala pamwe naame muParadis.”—Lukas 23:43.
Okumona oixuna okwa hovela ngahelipi?
Ngeenge Kalunga okwa lalakanena ovanhu va kale nonakwiiwa ikumwifi ya tya ngaho, omolwashike a efela okumona oixuna ku hovele? Omolwashike e ku efa ku kale po efimbo lile?
Eshi Kalunga a shita Adam naEva, okwe va shita nomalutu nosho yo nomadiladilo a wanenena. Okwa li e va tula moshikunino shoparadisa nokwa li e va pa oilonga ihafifa. Ombibeli otai ti: “Kalunga a tala aishe ei e i ninga, ndele yo ya li ya wapala unene.” (Genesis 1:31) Ngeno ova li va dulika kuKalunga, ngeno ova ka dala ounona va wanenena, nedu alishe ngeno ola ka ninga oparadisa omo ovanhu ngeno va ka kala fiyo alushe mombili nove na ehafo.
Kalunga okwa li a shitila muAdam naEva oshali ikumwifi yemanguluko lokuninga omatokolo i li oshitukulwa shoukwatya wavo. Kava li va fa oihauto oyo i he na omadiladilo, oyo hai yuka ashike oko ovashingi tave i yukifa. Ndele nande ongaho, okukala kwavo nehafo okwa li kwe likolelela kokulongifa nawa emanguluko lavo lokuninga omatokolo—mokudulika keemhango daKalunga. Kalunga okwa ti: “Aame Omwene Kalunga koye, ou handi ku longo eshi tashi ku wapalele, ndele handi ku tula mondjila ei u nokweenda nayo.” (Jesaja 48:17) Okulongifa nai kwovanhu emanguluko lavo lokuninga omatokolo otaku eta oiponga inene, molwaashi ovanhu kava li va shitwa va dule okupondola nope he na ekwafo laKalunga. Ombibeli otai ti: “Ondjila yomunhu ihai kala mepangelo laye mwene, ile mepangelo lomulumenhu, nhumbi ta ende, nhumbi ta yukifa eenghatu daye.”—Jeremia 10:23.
Mupya munene, ovakulunhu vetu votete ova li ve udite kutya otava dulu okukala va manguluka ko kuKalunga ndele tava pondola. Ndele okudja eshi va efa okudulika kepangelo laKalunga, Kalunga okwa efa oku va yambidida nomolwaasho ova kanifa ewaneneno. Onghee hano, ova hovela okuxutuka palutu, fiyo hauxuninwa va kulupa ndele tava fi. Molwaashi otu li oludalo lavo, otwa fyuulula kuvo okuhawanenena nosho yo efyo.—Ovaroma 5:12.
Omhata inene i na sha nounamapangelo
Omolwashike Kalunga ina hanauna po Adam naEva nokushita po vali ovalihomboli vamwe? Omolwaashi ounamapangelo weshito alishe waKalunga ile oufemba waye wokupangela owa li wa shongwa. Epulo ola li apa kutya: Olyelye e na oufemba wokupangela, nepangelo lalyelye la yuka? Kakele kaasho, mbela ovanhu ova li ngoo tava ka dula okukala monghalo iwa ngeenge itava pangelwa kuKalunga? Kalunga okwa pa ovanhu efimbo la wana va hetekele okulipangela va manguluka ko kuye filufilu, opo a ulike filufilu ngeenge otava kala monghalo iwa koshi yepangelo laye ile ongeenge tave lipangele vo vene. Efimbo olo ola li li na okukala lile sha wana, opo ovanhu va hetekele omilandu di lili noku lili dopapolotika, dopanghalafano, dopamaxupilo nosho yo dopalongelokalunga, nope he na ewiliko laKalunga.
Oilanduliko ilipi ya ka holoka po? Omido omayovi dondjokonona yovanhu otadi yandje oumbangi kutya opa kala okumona oixuna kuhapu neenghono. Mefelemudo la pita, ounhu owa mona oixuna inene shi dulife nale. Ovanhu omamiliyona ova dipawa pefimbo lOita Itivali yOunyuni. Ovanhu ve dule pomamiliyona 100 ova fila moita i lili noku lili. Ekaulonyanga nelongifo leenghono oi li apeshe. Elongifo loingangamifi ola tandavela apeshe neenghono. Omikifi odo hadi tandavele pamilele otadi twikile okutandavela. Ovanhu omamiliyona omilongo otava fi omudo keshe kondjala nokomikifi. Onghalamwenyo youkwaneumbo nosho yo omifikamhango dopaenghedi oda xutuka keshe pamwe. Kape na epangelo lopanhu olo tali dulu okukandula po omaupyakadi oo. Kape na nande olimwe lomuo la pondola okuxulifa po oukulupe, omikifi nosho yo efyo.
Eenghalo dovanhu odi li naanaa ngaashi Ombibeli ya xunganeka shi na sha nomafimbo etu. Eendjovo daKalunga oda holola kutya efimbo letu oli li ‘omafiku axuuninwa’ onghalelo ei yoinima omo ‘omafimbo madjuu a li tae ke uya.’ Ngaashi ashike Ombibeli ye shi popya, ‘ovanhu vai novakengeleledi ova ehena komesho mowii.’—2 Timoteus 3:1-5, 13.
Okumona oixuna oku li pokuxula po
Oumbangi aushe otau ulike kutya otu li popepi nexulilo lokulipangela kwovanhu va manguluka ko kuKalunga, oko kwa etifa oluhodi linene. Oshi liwetikile mo nawa kutya okulipangela kwovanhu va manguluka ko kuKalunga itaku dulu okupondola nandenande. Epangelo laKalunga olo ashike tali dulu okweeta ombili, ehafo, oukolele wa wanenena nosho yo omwenyo waalushe. Onghee hano, Jehova oku li pokuxulifa po oukolokoshi nokumona oixuna. Mafiku Kalunga ota ka ya olunyala moinima yovanhu mokuhanauna po onghalelo aishe ei yoinima ii.
Exunganeko limwe lOmbibeli otali ti: “Pomafiku eehamba dinya [omapangelo opanhu oo e li ko kunena] Kalunga ou komeulu ota ka dika ouhamba [meulu] itau ka teka po fiyo alushe . . . Ndele [wo] otau ka nyanyaula notau ka teyaula omauhamba aeshe [omapangelo oo e li ko paife] noku a xulifa po, ndelenee owo vene tau ka kala fiyo alushe.” (Daniel 2:44) Okuyukipalifwa kwounamapangelo waJehova ile oufemba waye wokupangela, okupitila mOuhamba waye womeulu, oko ehongo la fimanenena mOmbibeli. Mokuxunganeka oshitukulwa sha fimanenena shedidiliko ‘lomafiku axuuninwa,’ Jesus okwa ti: “Evangeli eli louhamba otali udifilwa ounyuni aushe li ningile oiwana aishe ondombwedi, opo nee taku uya exulilo.”—Mateus 24:14.
Ngeenge exulilo ole uya, oolyelye tava ka xupa po? Ombibeli otai nyamukula tai ti: “Ovanashili tava ka nangala [edu], naava ve he noshipo tava ka kala mo. Ndelenee ovahenakalunga tava ka dudwa [ko kedu].” (Omayeletumbulo 2:21, 22, yelekanifa noNew World Translation.) Ovanashili ovovo have lihongo kombinga yehalo laJehova noku li wanifa po. Jesus Kristus okwa ti: “Nomwenyo waalushe owo tuu ou, vo ve ku shiive, Oove auke Kalunga kashili, naau we mu tuma, Jesus Kristus.” (Johannes 17:3) Heeno, “ounyuni otau xulu po . . . ; ndelenee ou ta longo ehalo laKalunga, oye ta kala alushe.”—1 Johannes 2:17.
Kakele kaayo ya ulikwa shimwe shi lili, oitofwamo aishe yOmishangwa oya kufwa mOmbibeli yOshikwanyama.