Pefimbo lEyelu laNoa, oolyelye va li va pwilikina kuKalunga noolyelye va li inava pwilikina kuye?

Ovanhu vahapu pefimbo laNoa ova li hava longo owii. Genesis 6:5

Adam naEva ova li va dala ounona, nokudja opo ovanhu ova enda tava hapupala kombada yedu. Mokweendela ko kwefimbo, ovaengeli vamwe ova li va waimina Satana mounashibofa.

Ovaengeli ovo ova li ve uya kombada yedu nokulundulukila momalutu opanhu, ndele tava hombola novakainhu. Ovakainhu ovo ova li va dala ovanamati ovo va li ve na eenghono di dule dovanhu vakwao nova li ovakwanyanya.

Okudja opo, kombada yedu okwa li kwa yada ovanhu ovo hava longo owii. Ombibeli oya ti: “Owii wovanhu kombada yedu [owa] li uhapu, nomauko omadiladilo omitima davo okwa li [mai] efimbo alishe.”

Noa okwa li a pwilikina kuKalunga ndele ta tungu ongulu yomomeva. Genesis 6:13, 14, 18, 19, 22

Noa okwa li omulumenhu oo ha longo ouwa. Jehova okwa li e mu lombwela kutya ota ka hanauna po ovakolokoshi aveshe neyelu linene.

Kalunga okwa li yo a lombwela Noa a tunge owato inene, oyo ya li hai ifanwa ongulu yomomeva, noku tule mo ovaneumbo laye noinamwenyo yomaludi aeshe.

Noa okwa li a londwela ovanhu shi na sha nEyelu olo la li tali ke uya, ndele ovanhu kava li va pwilikina. Vamwe ova li tave mu yolo, ofimbo vamwe va li ve mu tonde.

Eshi ongulu yomomeva ya li ya pwa okutungwa, Noa okwa li a tula mo oinamwenyo.