ETUKULWA 25

Ongahelipi handi dulu okuxulifa po okulidanena koilyo yoludalo?

“Onda hovela okulidanena koilyo yoludalo ndi na omido hetatu. Konima yefimbo onda ka shiiva kutya Kalunga ohe shi tale ko ngahelipi. Onda li handi kala ndi udite nai neenghono shimha nde lidanene vali. Onda li handi lipula kutya, Ongahelipi Kalunga ta kala e hole omunhu ngaashi ame?”—Luiz.

NGEENGE wa fiki meedula domulongo nasha, omahalo opamilele ohaa kala e na unene eenghono. Osho otashi dulika shi ningife omunhu a hovele okukala he lidanene koilyo yoludalo.a Vahapu oshi na oupu va tye kutya osho oshinima shongaho. Otashi dulika va tye, “itashi yahameke omunhu.” Ashike ope na etomheno liwa lokuhenuka oshinima osho. Omuyapostoli Paulus okwa shanga a ti: “Dipaeni omahalo eni mai opambelela ngaashi oluhaelo.” (Ovakolossi 3:⁠5) Okulidanena koilyo yoludalo ihaku dipaa omahalo opambelela, ndele ohaku a pimbilifa. Shikwao vali, diladila kwaashi:

● Okulidanena koilyo yoludalo ohaku ningifa omunhu a kale e lihole mwene. Pashihopaenenwa, ngeenge omunhu te lidanene koilyo yoludalo, oha kala a pwila momaliudo aye mwene.

● Okulidanena koilyo yoludalo ohaku ningifa omunhu a tale ko ovanhu voukashike kookanhu wa yooloka ko kuwaye va fa ashike oinima, ile oilongifo yokuliudifa nawa.

● Okudiladila kwokuliholamwene oko kwa findilwa momunhu eshi a kala he lidanene koilyo yoludalo, otaku dulu okuningifa omunhu a kale iha wanenwa pamilele mohombo.

Ponhele okulidanena koilyo yoludalo opo u liwanifile po omahalo opamilele, kendabala okukulika elipangelo. (1 Ovatessalonika 4:​4, 5) Opo u pondole okuninga ngaho, Ombiibeli otai ku ladipike u kale ho henuka eenghalo odo tadi dulu okupendula omahalo omilele. (Omayeletumbulo 5:​8, 9) Ndele ongahelipi ngeenge owa pikwa kokulidanena koilyo yoludalo? Otashi tulika wa kendabala oku shi efa po, ndele owa nyengwa. Oshi na oupu u fike pexulifodiladilo kutya ito dulu vali okulunduluka, noito dulu okukala metwokumwe nomifikamhango daKalunga. Osho osho naanaa okamati kedina Pedro ka li ke udite. Oka ti: “Ngeenge onda hovele vali, onda li handi kala ndi udite nai neenghono.” Oka ti vali: “Onda li handi diladila kutya nghi na fiku ndi ka diminwe po osho nda ninga. Onda li handi mono shidjuu okwiilikana.”

Ngeenge osho u udite ngaho, ino sholola. Onghalo oyo itai ti kutya kape na vali ekwafo lasha. Ovanyasha vahapu novakulunhu ova finda onghedindjikilile yokulidanena koilyo yoludalo. Naave oto shi dulu!

Okuungaunga nokukala u udite etimba

Ngaashi twe shi mona nale metetekelo, luhapu ovo hava wile momwiyo wokulidanena koilyo yoludalo, ohava kala va wililwa po komaliudo okukala ve udite etimba. Nopehe na omalimbililo, okukala ‘noluhodi li li metwokumwe nehalo laKalunga’ otashi dulu oku ku linyengifa u kondjife onghedindjikilile oyo. (2 Ovakorinto 7:​11) Ashike okukala u udite etimba sha pitilila itaku ku kwafele u ninge ngaho. Otaku ku shololifa neenghono, ndele ito ka dula vali okuninga eenghendabala. — Omayeletumbulo 24:10.

Onghee hano, kendabala okukala u shii nawa osho sha kwatelwa mo. Okulidanena koilyo yoludalo inashi koshoka. Otaku dulu oku ku ningifa u kale wa ‘pikwa komahalo e lili noku lili nosho yo komalihafifo,’ naasho ohashi etele omunhu oikala ii. (Titus 3:3) Ashike okulidanena koilyo yoludalo inaku faafana nomanyono makwao a kwata moiti, ngaashi oluhaelo. (Judas 7) Ngeenge ou na oupyakadi wokulidanena koilyo yoludalo, ino fika pexulifodiladilo kutya owa nyona enyono itali dulu okudiminwa po. Osho tashi dulu oku ku kwafela okukondjifa omahalo nokuhasholola!

Oshipu okuteka omukumo ngeenge owa hovele vali okulidanena koilyo yoludalo. Ngeenge osho osha ningwa, diladila keendjovo dOmayeletumbulo 24:16, odo tadi ti: “Luheyali omuyuki ta punduka ndele ta penduka vali, ndelenee ovahenakalunga tava ka wila momupya.” Okunyengwa pakafimbo itashi ti kutya ove omunhu mwii. Onghee hano, ino sholola. Ponhele yaasho, konakona kutya oshike hashi ku ningifa u kale wa hala okulidanena vali, nokukendabala okuhaendulula oshinima osho.

Longifa efimbo u dilonge kohole nokonghenda yaJehova. Omupsalme David oo naye a li e na omaunghundi opaumwene, okwa ti: “Ngaashi xe ta file ounona vaye onghenda, Omwene osho ha file onghenda ava have mu tila. Osheshi oye ta shiiva oshitwe yetu, nhumbi tu li; ota dimbuluka, nokutya fye ondwi yedu.” (Epsalme 103:13, 14) Heeno, Jehova oku shii okuhawanenena kwetu ‘noku yadi ekufilo.’ (Epsalme 86:5) Shikwao vali, okwa hala tu twikile okuninga eenghendabala tu ninge omalunduluko. Eenghatu dilipi to ka katuka opo u kondjife onghedindjikilile yoye?

Konakona nawa omalihafifo oye. Mbela oho tale eemuvi, ile eeprograma doko-TV, ile oho i keenhele dokointaneta odo tadi pendula omahalo opamilele? Omupsalme umwe okwa li a ilikana kuKalunga a ti: “Omesho ange a alula ko, aha tale koinima yongaho.”b — Epsalme 119:37.

Omadiladilo oye a kondjifila koinima imwe i lili. Omukriste umwe wedina William okwa yandja omayele kutya: “Fimbo ino ya u ka nangale, lesha oshinima sha kanghamena kOmbiibeli. Osha fimana okuxuuninifa momadiladilo oye oinima yopamhepo.” — Ovafilippi 4:8.

Lombwela umwe oupyakadi woye. Ohoni otai dulu oku shi ningifa shidjuu kwoove okukundafana oupyakadi woye naumwe. Ashike nande ongaho, okuninga ngaho otaku ku kwafele u finde onghedindjikilile oyo. Osho osho Omukriste wedina David a mona. Okwa ti: “Ohandi kundafana natate paumwene. Nghi na efiku ndi ka dimbwe osho a popya. Okwa li a shilipaleka nge kutya oku na ko nasha naame eshi a popya ta menye mo, ta ti: ‘Owa ningifa nge ndi kale ndi ku uditile etumba.’ Okwa li e shii kutya osha pula nge ouladi opo ndi popye naye kombinga yoshinima osho. Kape na eendjovo da twa nge omukumo nondi kale nda tokola toko da fa odo.

“Tate okwa li a ulikila nge omishangwa donhumba di kwafele nge ndi mone kutya kandi li monghalo omo itandi dulu vali okuninga po sha, nokwa li yo a ulikila nge omishangwa odo tadi kwafele nge ndi ude ko kutya oshinima osho handi ningi osha kwata moiti shi fike peni. Okwa pula nge tu shi efe manga, fiyo pa pita efimbo lonhumba, opo tu ke shi kundafane vali. Okwa lombwela nge ndiha sholole ngeenge onde lihange nda hala vali okulidanena koilyo yoludalo, ndele nandi kendabale ndi pitife po efimbo inandi liyandja vali komahalo oo. David okwa fika pexulifodiladilo lilipi? Okwa ti: “Okukala ndi na umwe oo e shii oupyakadi wange nota kwafele nge, osha kwafela nge neenghono.”c

[Omashangelo opedu]

OMUSHANGWA WENENEDILADILO

“Inda onhapo okahalu kounyasha, ndele to lalakanene ouyuki, eitavelo, ohole nombili, pamwe naavo hava ifana edina lOmwene nomutima wa yela.” — 2 Timoteus 2:22.

EETEPO

Ilikana fimbo omahalo inaa pimbila. Pula Jehova Kalunga e ku pe “eenghono di dule dopaushitwe” opo u kondjife eyeleko. — 2 Ovakorinto 4:7.

OWE SHI SHIIVA TUU . . . ?

Omunhu keshe a nyika ouvaya ote ke liyandja komahalo opamilele. Ashike otashi pula omulumenhu elela, ile omukainhu elela opo e lipangele, nokuli nongeenge e li oye aeke.

OSHO WA DILADILA OKUNINGA!

Ohandi kala handi diladila koinima oyo ya koshoka ngeenge ․․․․․

Ponhele yokuliyandja, ohandi ka ․․․․․

Osho nda hala okupula ovadali vange, ile omudali wange shi na sha noshikundafanwa eshi osheshi ․․․․․

OTO TI NGAHELIPI?

● Omolwashike sha fimana okukala u shii kutya Jehova ‘oku yadi ekufilo’? — Epsalme 86:5.

● Ngeenge Kalunga ou a shita omahalo opamilele oye ta ti ou na okukala u na elipangelo, mbela oku na elineekelo lilipi mwoove?

[Eendjovo da divilikwa pepandja 182]

‘‘Okudja eshi nda finda oupyakadi, onda kala ndi na eliudo la yela koshipala shaJehova, noinandi hala oku shi pingena po noshimwe shi lili.’’ — Sarah

[Efano pepandja 180]

Ngeenge owe lidenge po fimbo to tondoka, inashi hala okutya ou na oku ka djuulula ko, nongeenge owe lihange vali wa hovela okulidanena koilyo yoludalo, inashi hala okutya eenghendabala edi wa kala to ningi inadi tya sha