Ovakulunhuongalo ohava longo shike meongalo?

Melongelokalunga letu kamu na ovakwatelikomesho hava futwa. Ponhele yaasho, meongalo keshe ohamu nangekwa ovapashukili va pyokoka opo ‘va life eongalo laKalunga,’ ngaashi ashike sha li hashi ningwa momaongalo opaKriste opefimbo lonale. (Oilonga 20:28) Ovapashukili ovo, ile tu tye ovakulunhuongalo, ove li ovalumenhu ovo ve na ekwatafano lopofingo naKalunga nohava kwatele komesho omaongalo nokulifa oufita, ndele ‘hakefininiko, hamolweliko la kaka, ndelenee onehalo liwa.’ (1 Petrus 5:1-3) Ohava longo oilonga ilipi omolwetu?

Ohave tu file oshisho noku tu pashukila. Ohava yandje ewiliko lopamishangwa nohava kwafele eongalo li kale li na ekwatafano liwa naKalunga. Molwaashi oshinakuwanifwa osho ove shi lineekelelwa kuKalunga, ihava pangele eongalo laye, ndele ponhele yaasho ohave li kwafele li kale la paluka nawa pamhepo nola hafa. (2 Ovakorinto 1:24) Ngaashi ashike omufita weedi ha kendabala okufila oshisho odi yaye keshe, ovakulunhuongalo navo ohava kendabala okukala ve shii oshilyo keshe sheongalo pauhandimwe. — Omayeletumbulo 27:23.

Ohave tu hongo nghee tu na okulonga ehalo laKalunga. Ohava kwatele komesho okwoongala kweongalo oshivike keshe opo va pameke eitavelo letu. (Oilonga 15:32) Ovalumenhu ovo ovadiinini ohava kwatele komesho moilonga yokuudifa, tava longo pamwe nafye noku tu deula meembinga adishe dokuudifa.

Ohave tu tu omukumo pauhandimwe. Otashi dulika ve tu talele po komaumbo etu ile va popye nafye pOlupale lOuhamba opo ve tu kwafele tu kale nekwatafano la kola naKalunga ile oku tu hekeleka nOmishangwa.— Jakob 5:14, 15.

Kakele koinakuwanifwa yavo yomeongalo, ovakulunhuongalo vahapu ohava longo yo oilonga yokulikongela omboloto nove na oinakuwanifwa i na sha nomaukwaneumbo avo. Otwa pumbwa shili okufimaneka ovalumenhu ovo molwaashi ohava longo noudiinini.— 1 Ovatessaloniki 5:12, 13.

• Ovakulunhuongalo otava dana onghandangala ilipi meongalo?

• Omeenghedi dilipi ovakulunhuongalo hava ulike kutya ove na ko nasha nafye pauhandimwe?