OSHILESHWA 21

Obetel oshike?

Eendombwedi mbali tadi longo moshikondo shokufaneka mObetel — Oshikondo shokufaneka, mOilongo ya Hangana yaAmerika

Umwe womEendombwedi daJehova ta longo moshikondo shokupilinda shaBetel moNdowishi — Ndowishi

Umwe womEendombwedi daJehova ta longo monhele yokukoshela oikutu mObetel moKenya — Kenya

Ovayakuli tava tula nawa oinima poitaafula monhele yokulila mObetel yokoColombia — Colombia

Betel edina lOshiheberi tali ti “Ongulu yaKalunga” ile tu tye, Eumbo laKalunga. (Genesis 28:17, 19) Kunena, omatungo Eendombwedi daJehova, oo e li mounyuni aushe, omo hamu kala ovo tava wilike oilonga yokuudifa nohamu longelwa oilonga ikwao oyo ya nuninwa okuxumifa komesho eudifo longhundana iwa ohaa ifanwa Eebetel, naasho osha yeleka molwaashi oilonga oyo tava longo oyaKalunga. Olutuwiliki ohali longele keembelewa da kula moshitukulwalongo shaNew York, mOilongo ya Hangana yaAmerika, nohali pashukile oilonga oyo tai longwa moitaimbelewa mounyuni aushe. Ovanhu ovo hava longo meenhele da tya ngaho ohava ifanwa oukwaneumbo waBetel. Ngaashi ashike omaukwaneumbo akwalukeshe, oukwaneumbo waBetel ohau kala metungo limwe, ohau longo pamwe, ohau lile pamwe nohau konakona Ombibeli pamwe nowa hangana. — Epsalme 133:1.

Betel onhele ye likalekelwa, noukwaneumbo waBetel owa fikama po movaliyambi. MObetel keshe omu na ovalumenhu novakainhu Ovakriste ovo ve liyamba opo va kale tava longo ehalo laKalunga nokuxumifa komesho oinima yOuhamba efimbo li yadi. (Mateus 6:33) Kape na nande oumwe womuvo ha longele ondjabi yokomwedi, ndele aveshe ohava pewa omulele noikulya nokamaliwa kanini kokulanda oipumbiwa yonghalamwenyo. Omubetel keshe oha kala e na kutya openi ta longo, kutya nee omombelewa, omokombifa ile omolupale lokulila. Vamwe ohava longo nomashina okupilinda ile okutula kumwe omambo, ile okuwapaleka meenduda, okukosha nokukangula oikutu, okuwapeka oinima nokupangela oyo ya nyika okuteka ile ya teka, nosho tuu.

Obetel onhele ye lipyakidila omo hamu longwa oilonga oyo tai yambidida eudifo longhundana iwa yOuhamba. Elalakano la fimanenena lObetel keshe olo okwaandjakaneka oshili yOmbibeli kovanhu vahapu ngaashi tashi dulika. Oshileshomwa eshi oshimwe shomoileshomwa oyo ya nyanyangidwa nelalakano olo. Osha shangwa mewiliko lOlutuwiliki, tashi tuminwa paelektronika keengudu dovatoloki omafele mounyuni aushe, tashi pilindwa komashina oo haa pilinda konhapo yopombada moinyanyangido yaBetel i lili noku lili nokutuminwa nee komaongalo e dulife po 110 000. Pomhito keshe, omaukwaneumbo aBetel ohaa dana onghandangala ya fimanenena mokuyambidida oilonga oyo ya endelela kuhe na vali yokuudifa onghundana iwa. — Markus 13:10.

Oolyelye hava longo kObetel, nohava filwa oshisho ngahelipi?
Oilonga ya endelela ilipi Obetel keshe hai yambidida?