Kala popepi nehangano laJehova

OMUHONGWA Jakob okwa ti: “Eheneni kuKalunga, opo nee Ye ta ehene kunye.” (Jak. 4:8) Jehova ke fi omulinenepeki noha kala a halelela okupwilikina kwaasho hatu mu lombwele nonande inatu wanenena. (Oil. 17:27) Ongahelipi hatu dulu okweehena popepi naKalunga? Ohatu dulu okuninga ngaho mokupameka ekwatafano letu naJehova okupitila meilikano. (Eps. 39:12) Ohatu dulu yo okukulika ekwatafano letu naKalunga mokukala hatu konakona Eendjovo daye, Ombiibeli. Kungaho, ohatu ka shiiva Jehova Kalunga, elalakano laye nosho yo ehalo laye li na sha nafye. (2 Tim. 3:16, 17) Onghee hano, ohatu lihongo okukala tu mu hole nokukala tu na etilokalunga la yuka opo tuhe mu nyemateke. — Eps. 25:14.

² Okukala popepi naJehova otashi shiiva ashike okupitila mOmona waye, Jesus. (Joh. 17:3; Rom. 5:10) Kape na nande omunhu ta dulu oku tu honga kombinga yaJehova e dule Jesus. Jesus okwa li e na ekwatafano la kola naXe, nomolwaasho a popya a ti: “Kaku na ou ta shiiva Omona, Tate Oye tuu aeke, ndele kaku na ou ta shiiva Tate, Omona Oye tuu aeke, naau Omona a hala oku mu hololela.” (Luk. 10:22) Onghee hano, ngeenge hatu konakona Omavangeli tu lihonge nghee Jesus a li ha diladila nanghee kwa li ha kala e udite, ohatu lihongo nghee Jehova ha diladila nanghee ha kala e udite. Eshiivo la tya ngaho ohali tu kwafele tu ehene popepi elela naKalunga.

³ Koshi yewiliko lOmona waJehova, ohatu pameke ekwatafano letu naJehova mokukala popepi noshitukulwa shehangano laYe li wetike olo hali tu kwafele tu lihonge nghee hatu dulu okulonga ehalo laYe. Ngaashi sha xunganekwa muMateus 24:45-47, Omwene, Jesus Kristus, okwa nangeka po “omupiya omudiinini nomunaendunge” a yandje “oikulya pefimbo [la wapala, NW]” kovaitaveli vashili. Kunena, omupiya omudiinini ohe tu pe eendja dopamhepo dihapu. Jehova ohe tu pe omayele okupitila mehangano laye tu kale hatu lesha Eendjovo daye efiku keshe, hatu kala pokwoongala pandjikilile nosho yo tu kale hatu udifa nouladi “onghundana iwa youhamba.” (Mat. 24:14; 28:19, 20; Jos. 1:8; Eps. 1:1-3) Inatu hala nande tu kale tu na etaleko lopanhu li na sha nomupiya omudiinini. Natu kendabale tu kale popepi noshitukulwa shi wetike shehangano laJehova nokudulika kewiliko lasho. Osho otashi ke tu ehenifa popepi elela naKalunga ketu, Jehova, notashi ke tu pameka noku tu amena nonande ope na omayeleko.

OMOLWASHIKE OMAYELEKO TAA HAPUPALA?

⁴ Otashi dulika wa kala moshili eedula dihapu. Ngeenge osho, ou shii kutya otashi ti shike okulididimika ngeenge oudiinini woye tau yelekwa. Ashike nonande opo wa shiiva Jehova nokweendafana noshiwana shaye, ou shii kutya Satana Ondiaboli oha pataneke keshe umwe oo ta dulika kounamapangelo waJehova. (2 Tim. 3:12) Onghee hano, kutya nee owa kala to lididimike efimbo lile ile olixupi, ino kala wa tila ile wa teka omukumo. Jehova okwa udaneka kutya ote ke ku kwafela noku ku xupifa noku ku pa omwenyo waalushe monakwiiwa. — Heb. 13:5, 6; Eh. 2:10.

⁵ Atusheni otashi dulika tu hangwe komayeleko momafiku aa a xupa ko onghalelo yaSatana. Okudja eshi Ouhamba waKalunga wa dikwa po mo 1914, Satana ka li vali a pitikilwa mo meulu. Okwa umbilwa kombada yedu, oko ye novaengeli vaye ovakolokoshi va ngabekelwa. Okuhapupala kwomaupyakadi kombada yedu, mwa kwatelwa okuhepekwa nonyanya kwovapiya vaJehova, oya etifwa kehandu laSatana notashi ulike kutya otu li momafiku axuuninwa epangelo laye loukolokoshi. — Eh. 12:1-12.

⁶ Satana okwa handuka neenghono molwaashi ke na eteelelo lasha noku shii kutya oku na ko ashike okafimbo kaxupi. Ye neendemoni daye ohava ningi eenghendabala opo va ye moshipala oilonga yokuudifa Ouhamba nosho yo okunyona po oukumwe wovapiya vaJehova. Osho oshe tu ningifa tu kale tu li molwoodi lopamhepo ngaashi la popiwa kutya “ekondjo letu kali fi okukondjifa ombelela nohonde, ndelenee otu nokulwifa oovene novanaenghono, novapangeli vounyuni ou womilaulu, neemhepo dowii mevalelwa.” Opo tu findane tu li ovapiya vaJehova, katu na okusholola molwoodi olo ndele natu twikile okukondja twa djala oilwifo yopamhepo. Otu na “okufikamena ekonda” lOndiaboli. (Ef. 6:10-17) Osho otashi pula elididimiko.

KULIKA ELIDIDIMIKO

⁷ Elididimiko otashi ti “okudula okukala omudiinini momaudjuu ile momaupyakadi.” Meityo lopamhepo, elididimiko olo oukwatya wokukala wa tokola toko okulonga osho sha yuka ngeenge wa taalela oudjuu, omapataneko, omahepeko, ile keshe tuu osho tashi dulu oku ku efifa po oudiinini woye kuKalunga. Elididimiko lopaKriste ola pumbwa okukulikwa nonande ohashi pula efimbo. Okuninga exumokomesho lopamhepo ohaku tu kwafele tu dule okulididimika. Okulididimikila omayeleko manini eitavelo oo hae tu hange eshi opo twa hovele okulongela Jehova, ohaku tu ningifa tu kale twa pama, hatu dulu okulididimikila omayeleko a kwata moiti oo tae ke tu hanga. (Luk. 16:10) Inatu pumbwa okuteelela omayeleko manene e uye opo tu ninge etokolo okukala twa pama meitavelo. Otu na okuninga tete etokolo ofimbo omayeleko inae uya. Omuyapostoli Petrus okwa popya kutya elididimiko oli na okukulikwa pamwe nomaukwatya makwao opaKriste, a ti: “Lalakaneni yo neenghono adishe okuholola meitavelo leni ouwa, mouwa eshiivo, meshiivo elipangelo, melipangelo elididimiko, melididimiko etilokalunga, metilokalunga ohole yokuhola ovamwatate nomohole yokuhola ovamwatate ohole yokuhola aveshe.” — 2 Pet. 1:5-7; 1 Tim. 6:11.

⁸ Jakob okwa divilika nghee sha fimana okukulika elididimiko monhumwafo yaye a ti: “Ovamwatate, hafeni shili, ngenge tamu hangika komahongaulo opahapu, osheshi omu shi shii kutya, okuyelekwa kweitavelo leni otaku longo elididimiko. Ndelenee elididimiko nali kale li noshilonga sha wana, opo mu kale mwa wana mu he noshipo nomu he na eshi mwe shi pumbwa.” (Jak. 1:2-4) Jakob okwa ti Ovakriste ova pumbwa okutambula ko omayeleko nokukala va hafa molwaashi ohae tu kwafele tu lididimike. Mbela naave osho ho ningi ngaho? Jakob okwa popya kutya elididimiko oli na okulonga mokuyukifa ounhu wetu wopaKriste noku tu ningifa tu kale twa hokiwa kuKalunga. Elididimiko letu ohali kulu efiku nefiku eshi hatu shakeneke omayeleko noku a finda. Ohali tu kwafele yo tu kulike omaukwatya makwao oo twa pumbwa.

⁹ Elididimiko letu ohali hafifa Jehova notali mu linyengifa e tu pe ondjabi yomwenyo waalushe. Jakob okwa weda ko vali a ti: “Omulumenhu omunelao oye ou te lididimikile eshindo, osheshi ngee a ningi omuduli walo, ota ka pewa oshishani shomwenyo, ou Omwene a udanekela ava ve mu hole.” (Jak. 1:12) Ohatu lididimike tu na etimaumbwile loku ka mona omwenyo. Itatu dulu okukala moshili ngeenge katu na elididimiko. Ngeenge otwe liyandje komafininiko ounyuni, otashi ke tu ningifa tu shune mounyuni. Nopehe na elididimiko, itatu dulu okukala tu na omhepo yaJehova noitatu ka kulika oiimati yayo monghalamwenyo yetu.

¹⁰ Ngeenge otwa hala okutwikila okulididimikila omafimbo aa madjuu, otwa pumbwa okukulika oikala ya yuka i na sha nokumona oixuna tu li Ovakriste. Dimbuluka eendjovo daJakob odo tadi ti: “Hafeni shili.” Otashi dulika osho shi kale shidjuu okuninga, notashi dulika mwa kwatelwa okumona oixuna palutu nopamadiladilo. Ashike dimbuluka kutya onakwiiwa oi li moshiponga. Oshimoniwa shovayapostoli otashi tu kwafele tu mone nghee hatu dulu okukala twa hafa ngeenge hatu mono oixuna. Ehokololo olo otali hangwa membo lOilonga, notali ti: “Ova ifanena mo ovayapostoli, ndele tave va dengifa nove va lombwela, vaha popye vali medina laJesus, nove va efa va ye. Vo eshi va dja mo moshiongalele shovakulunhu, ova hafa eshi va talwa va wana okushekelwa edina laJesus.” (Oil. 5:40, 41) Ovayapostoli ova li ve udite ko kutya okumona oixuna kwavo okwa li oumbangi kutya ova kala tava dulika koshipango shaJesus nosho yo kutya ova hokiwa kuJehova. Konima yomido, eshi Petrus a li ta shange onhumwafo yaye yotete ya nwefwa mo, okwa li a popya kutya okumona oixuna omolwouyuki oshi na ondjabi. — 1 Pet. 4:12-16.

¹¹ Oshimoniwa shikwao osha kwatela mo Paulus naSilas. Eshi vali tava wanifa po oilonga yavo youtumwa muFilippi, ova li va kwatwa po nokulundilwa kutya otava etifa omapiyaano moshilando nokuudifa eenghedi dihe li paveta. Ova li va dengwa nokutulwa modolongo. Ehokololo lOmbiibeli otali tu lombwele kutya ofimbo va li natango modolongo noipute yavo inai hakulwa, “pokati koufiku Paulus naSilas ova ilikana ndele tava fimaneke Kalunga nomaimbilohambelelo, ovakwatwa ove va pwilikina.” (Oil. 16:16-25) Paulus nomulongi pamwe naye ova li ve shii kutya okumona oixuna kwavo omolwaKristus kasha li ashike tashi yandje oumbangi kutya ove li ovadiinini kuKalunga nokovanhu ndele otaku yandje yo oundombwedi kwaavo tashi dulika va hala okupwilikina konghundana iwa. Omwa li mwa kwatelwa eemwenyo davamwe. Oufiku oo tuu oo, omunangeli wodolongo noukwaneumbo waye ova li va pwilikina ndele tava ningi ovahongwa. (Oil. 16:26-34) Paulus naSilas ova li ve lineekela muJehova, meenghono daye nosho yo kutya okwa hala oku va kwafela eshi tava mono oixuna. Kava li va teka omukumo nandenande.

¹² Nokunena, Jehova ohe tu pe keshe osho twa pumbwa opo e tu kwafele pefimbo lomayeleko. Okwa hala tu lididimike. Okwe tu pa Eendjovo daye da nwefwa mo di tu pe eshiivo lashili li na sha nelalakano laye. Osho ohashi pameke eitavelo letu. Otu na omhito yokweendafana novaitaveli vakwetu nokulonga oilonga iyapuki. Otu na yo oufembanghenda wokukaleka po ekwatafano letu naJehova okupitila meilikano. Oha pwilikine keendjovo detu doku mu tanga nosho yo kwaasho hatu mu pula opo tu kale twa koshoka koshipala shaye. (Fil. 4:13) Okukala hatu dilonga kombinga yeteelelo li na sha nonakwiiwa nako ohaku tu pameke. — Mat. 24:13; Heb. 6:18; Eh. 21:1-4.

OKULIDIDIMIKILA OMAYELEKO E LILI NOKU LILI

¹³ Omayeleko oo hatu shakeneke kunena okwa faafana naao a li a shakenekwa kovahongwa vaJesus Kristus vonale. Kunena, Eendombwedi daJehova ohadi shekwa nokuhepekwa palutu kovapataneki ovo va pukifwa. Ngaashi ashike pefimbo lovayapostoli, omapataneko mahapu otaa xwaxwamekwa kovatondi vopalongelokalunga ovo omahongo avo oipupulu noilonga yavo ya nyanekwa pomutenya mEendjovo daKalunga. (Oil. 17:5-9, 13) Omafimbo amwe, oshiwana shaJehova ohashi mono epepelelo mokushikula omilandu dopaveta odo da tulwa po komapangelo opapolotika. (Oil. 22:25; 25:11) Ashike ovapangeli navo ohava shilike oilonga yetu, tava kendabala okukangheka oukalele wetu wopaKriste. (Eps. 2:1-3) Ngeenge tu li meenghalo da tya ngaho, ohatu shikula oshihopaenenwa shovayapostoli ovadiinini, ovo va popya va ti: “Okudulika kuKalunga ku dule okudulika kovanhu.” — Oil. 5:29.

¹⁴ Molwaashi omhepo youkwamuhoko oi li apeshe mounyuni, ovaudifi vonghundana iwa ohava fininikwa neenghono va efe po oilonga yokuudifa oyo va pewa kuKalunga. Ovapiya vaKalunga aveshe ohava pandula neenghono omalondwelo oo e li mEhololo 14:9-12 e na sha ‘nokulinyongamenena oshilyani noshiyelekela shasho.’ Otwa mona oushili weendjovo daJohannes odo tadi ti: “Apa otapa pulwa elididimiko lovayapuki, laava hava diinine oipango yaKalunga neitavelo laJesus.”

¹⁵ Omayeleko oo hae uya omolwoita, eenhamanana, ile omahepeko nosho yo okushilikwa otaa dulu oku shi ningifa shidjuu okulongela Kalunga wa manguluka u li Omukriste. Otashi dulika mu kale itamu dulu okwoongala mu li eongalo. Otashi dulika yo shi kale shidjuu okukwatafana noshitaimbelewa. Omatalelepo omupashukilishikandjo nao otashi dulika a iwe moshipala. Otashi dulika mu kale ihamu mono vali oishangomwa. Mbela ngeenge opa ningwa shimwe shomoinima oyo, oto ka ninga po shike?

¹⁶ Ninga keshe osho to dulu koshi yeenghalo da tya ngaho. Oto dulu okuninga ekonakono lopaumwene. Otamu dulu okwoongala moungudu vanini momaumbo opaumwene opo mu konakone. Oishangomwa oyo ya longifwa monakudiwa nosho yo Ombiibeli yo vene otai dulu okulongifwa pokwoongala kwa tya ngaho. Ino kala wa limbililwa ile wa tila unene. Olutuwiliki otali ka ninga eenghendabala opo li kwatafane novamwatate ovo ve na oshinakuwanifwa moule wefimbo lixupi.

¹⁷ Nonande owe lihange wa tukuka ko kovamwatate aveshe, kaleka momadiladilo kutya ino tukuka ko kuJehova nokOmona waye, Jesus Kristus. Natango oto dulu okukala u na eteelelo la twa. Jehova ota dulu okuuda natango omailikano oye, nota dulu yo oku ku pameka nomhepo yaye. Konga ewiliko kuye. Dimbuluka kutya ou li omupiya waJehova nomuhongwa waJesus Kristus. Onghee hano, longifa omhito keshe u yandje oundombwedi. Jehova ota ka nangeka noupuna eenghendabala doye, navahapu otave ke ku waimina melongelokalunga lashili. — Oil. 4:13-31; 5:27-42; Fil. 1:27-30; 4:6, 7; 2 Tim. 4:16-18.

¹⁸ Ndele ngaashi ovayapostoli nosho yo vamwe, ngeenge oto ningilwa omatilifo kutya oto dipawa, kala we lineekela “Kalunga, ou ta nyumuna ovafi.” (2 Kor. 1:8-10) Eitavelo loye mefiloshisho laye li na sha nenyumuko otali dulu oku ku kwafela u lididimikile omapataneko a kwata moiti. (Luk. 21:19) Kristus Jesus okwe tu tulila po oshihopaenenwa molwaashi oku shii kutya oudiinini waye koshi yomayeleko owa li tau ka pameka vamwe navo ve lididimike. Naave oto dulu okukala odjo yokupameka ovamwaxo monghedi ya faafana. — Joh. 16:33; Heb. 12:2, 3; 1 Pet. 2:21.

¹⁹ Kakele komahepeko nomapataneko, otashi dulika wa pumbwa okulididimikila eenghalo dimwe vali didjuu. Pashihopaenenwa, vamwe ova teka omukumo omolwokuhenakonasha kwovanhu moshitukulwa shavo. Vamwe otave lididimikile omikifi dopalutu ile dopamaliudo ile omangabeko oo haa etifwa kokuhawanenena kwopanhu. Omuyapostoli Paulus naye okwa li e lididimikila omayeleko onhumba oo a li a piyaaneka oukalele waye ile e shi ninga shidjuu omafimbo amwe. (2 Kor. 12:7) Epafroditus wokuFilippi, Omukriste womefelemudo lotete, naye okwa li a “djaalela” ile a polimana ‘eshi a kundana kutya ookaume kaye ova uda kutya okwa li ta vele.’ (Fil. 2:25-27) Okuhawanenena kwetu nosho yo kwavamwe otaku dulu okweetifa omaupyakadi madjuu okulididimikila. Otashi dulika pa holoke okuhaudafana pokati ketu nOvakriste vakwetu ile noilyo yomaukwaneumbo. Ashike omaupyakadi oo otaa dulu okulididimikilwa nomupondo nokufindwa kwaavo hava dulika komayele Eendjovo daJehova. — Hes. 2:3-5; 1 Kor. 9:27; 13:8; Kol. 3:12-14; 1 Pet. 4:8.

KALA WA TOKOLA TOKO OKUKALA OMUDIININI

²⁰ Otu na okukala ovadiinini kuJesus Kristus, oo a nangekwa po kuJehova a kale Omutwe weongalo. (Kol. 2:18, 19) Otwa pumbwa okukala hatu longele kumwe filufilu ‘nomupiya omudiinini nomunaendunge’ nosho yo ovapashukili va nangekwa po. (Heb. 13:7, 17) Ngeenge otwa kala hatu dulika filufilu komalongekido ehangano nokulongela kumwe naavo tava kwatele komesho, ohatu ka kala twa unganekwa tu longe ehalo laJehova. Otwa pumbwa okulongifa pauyadi oufembanghenda weilikano. Dimbuluka kutya nokuli nomakuma odolongo ile okulitulilwa modolongo itashi tu imbi okupopya naTate yetu womeulu omunahole ile shi nyone po oukumwe wetu novalongelikalunga vakwetu.

²¹ Natu twikile okulididimika nokukala twa tokola toko tu ninge ngaashi hatu dulu tu wanife po oshilonga shetu shokuudifa osho omunyumunwa Jesus Kristus a pa ovashikuli vaye a ti: “Indeni hano ka ningeni ovanhu aveshe ovalongwa vange, noku va [ninginifa, NW] medina laXe nolOmona nolOmhepo Iyapuki, noku va longa okudiinina aishe ei nde i mu lombwela.” (Mat. 28:19, 20) Natu lididimikeni ngaashi Jesus. Eteelelo lOuhamba nolomwenyo waalushe nali kale la twa momadiladilo etu. (Heb. 12:2) Tu li ovahongwa vaKristus va ninginifwa, otu na oufembanghenda wokukufa ombinga mewanifo lexunganeko laye li na sha ‘nexulilo lefimbo lounyuni.’ Okwa ti: “Evangeli eli louhamba otali udifilwa ounyuni aushe li ningile oiwana aishe ondombwedi, opo nee taku uya exulilo.” (Mat. 24:3, 14) Ngeenge otwa kala hatu longo oilonga oyo noudiinini pefimbo eli, ohatu ka kala nomwenyo waalushe mounyuni mupe waJehova wouyuki.