OSHITUKULWA 5

Alukileni “kOmufita nokOmutekuli weemwenyo deni”

Mbela naave owa li wa hangwa keshongo limwe ile kuamwe a fela kwaao a kundafanwa mokambo aka? Ngeenge osho, haave auke. Ovapiya vaKalunga vahapu ovadiinini navo ova shakeneka omashongo a faafana, kutya nee ovopefimbo lOmbiibeli ile ovokunena. Ndele Kalunga ota dulu oku ku kwafela naave u pite mo momashongo oo ngaashi ashike a li e shi ningila vamwe.

Jehova okwe lilongekida oku ku tambula ko ngeenge owa alukile kuye

KALA wa shilipalekwa kutya Jehova okwe lilongekida oku ku tambula ko eshi to alukile kuye. Ote ke ku kwafela u ungaunge noisho, u efe po omaliudo mai, u mone ombili yopamadiladilo nou kale neliudo la koshoka. Osho otashi ke ku linyengifa u waimine ovalongelikalunga vakweni mokulongela Jehova. Onghalo yoye otashi dulika ya fa yOvakriste vomefelemudo lotete ovo omuyapostoli Petrus a shangela a ti: “Nale mwa li mwa kana mwa fa eedi, ndelenee paife mwa alukila kOmufita nokOmutekuli weemwenyo deni.” — 1 Petrus 2:25.

Okwaalukila kuJehova osho oshinima sha denga mbada osho to dulu okuninga. Omolwashike mbela? Omolwaashi oto ka hafifa omutima waJehova. (Omayeletumbulo 27:11) Eenghatu detu ohadi kumu Jehova molwaashi oku na omaliudo. Ashike ihe tu fininike tu kale tu mu hole notu mu longele. (Deuteronomion 30:19, 20) Omuhongwanhu umwe wOmbiibeli okwa ti: “Omutima womunhu itau dulu okupatululwa okudja kombada, ndele omunhu oye mwene e na oku u patulula.” Ohatu patulula omitima detu mokulongela Jehova hatu linyengifwa kohole. Moku mu longela noudiinini, ohatu mu pe osho sha denga mbada, naasho ohashi hafifa lela omutima waye. Kakele kaasho, ohashi tu etele yo ehafo linene. — Oilonga 20:35; Ehololo 4:11.

Omumwameme oo a kala ine lipyakidila vali ta hambelelwa meongalo

Natango, ngeenge owa hovele vali okulongela Kalunga, eemhumbwe doye dopamhepo otadi ka wanifwa po. (Mateus 5:3) Ngahelipi mbela? Ovanhu mounyuni aushe ohave lipula kutya: ‘Omolwashike tu li kombada yedu?’ Ova halelela okushiiva omanyamukulo e na sha nelalakano longhalamwenyo. Kalunga okwa shita ovanhu nomhumbwe yokushiiva omanyamukulo oo. Okwa hala tu kale twa hafa eshi hatu mu longele. Kape na vali apa hatu dulu okuhanga ehafo ngaashi olo hali di mokulongela Jehova Kalunga nehalo liwa. — Epsalme 63:1-5.

Alikana shiiva kutya Jehova okwa hala u alukile kuye. Ongahelipi to dulu okukala noushili oo? Didilika: Okambo aka oka longekidwa noukeka pamwe neilikano. Otashi dulika we ka pewa komukulunhuongalo ile kOmukriste mukweni. Osho oshe ku linyengifa u ka leshe nou ninge omalunduluko. Oinima aishe oyo ya tumbulwa mokambo aka oi li oumbangi kutya Jehova ine ku dimbwa. Onghee hano, Jehova ote ku indile u alukile kuye. — Johannes 6:44.

Ohatu dulu okumona ehekeleko mokushiiva kutya Jehova iha dimbwa eedi daye odo da kana. Omumwameme Donna okwa mona oushili woshinima osho. Okwa ti: “Onda enda handi fiye po oshili kanini nakanini, ashike onde ke lihanga handi dilonga kEpsalme 139:23, 24, olo tali ti: ‘Kalunga, konakone nge, u koneke omutima wange! Yeleke nge, u dilakane omadiladilo ange, opo u mone, ngeenge ondi li mondjila yepukifo, Ove u endife nge mondjila, ei tai twala moukwaalushe.’ Onda li ndi shii kutya mounyuni itandi wapalele mo, nonda mona kutya mehangano laJehova omo ashike nda pumbwa okukala. Onda ka didilika kutya Jehova ina efa nge; Aame ashike nda li ndi na okukatuka eenghatu ndi alukile kuye. Paife onda hafa eshi nda alukila kuye!”

“Onda ka didilika kutya Jehova ina efa nge; Aame ashike nda li ndi na okukatuka eenghatu ndi alukile kuye”

Ohatu ilikana opo natango u mone “ehafo mOmwene.” (Nehemia 8:10) Ito ke livela ombedi ngeenge owa alukile kuJehova.

Omanyamukulo komapulo e na sha nokwaalukila kuJehova

ONDI NA OKUHOVELA PENI?

Omunhu oo ehe na oukolele nawa oha hovele okweendela ko kanini nakanini fiyo osheshi a kala nawa. Sha faafana, naave oto dulu okukala ho kendabala okulipalula pamhepo kanini nakanini efiku keshe. Ino diladila kutya owa pumbwa okuninga oinima aishe poshikando shimwe. Pashihopaenenwa, oto dulu okukala ho longifa ominute dinini opo u leshe ile u pwilikine kelesho lOmbiibeli la kwatwa momawi, okukonakona shimwe shomoishangomwa yetu, okuya konhele yetu yokointaneta ko-jw.org ile u tale ko-TV yehangano (o-JW broadcasting) ko jw.org. Shimwe vali, kendabala u ye kokwoongala diva ngaashi tashi dulika. Osho sha fimanenena, okwiilikana kuJehova e ku kwafele. Ombiibeli otai ti: “Noshisho sheni shi mu dikeni, osheshi Oye te mu file oshisho.” — 1 Petrus 5:7.

Eeva okwa ti: “Konima eshi nda kala inandi lipyakidila vali, onda kala handi fi ohoni okwiilikana. Eshi nde litwa omukumo ame mwene ndi ilikane, omukulunhuongalo umwe okwa li e uya okutalela nge po. Okwa li a kwafela nge ndi mone kutya Jehova ina efa nge. Omukulunhuongalo oo okwa li a lombwela nge ndi kale handi lesha Ombiibeli efiku keshe. Eshi nda kala handi lesha Ombiibeli efiku keshe, osha li sha pameka nge opo ndi dule okushuna keongalo. Mokweendela ko kwefimbo, onda li vali nda hovela okuudifa. Onda hafa neenghono eshi Jehova ina efa nge.”

EONGALO OTALI KA TAMBULA NGE KO NGAHELIPI?

Kala u na oushili kutya eongalo otali ke ku tambula ko nehafo. Ponhele yokukala tali ku konenene ile li ku pangule, otali ka ulika ohole noku ku twa omukumo. — Ovaheberi 10:24, 25.

Javier okwa ti: “Onda li nda fya ohoni okuya kOlupale lOuhamba. Onda li handi lipula nanghee ookaume kange tava ka ungaunga naame. Omumwameme umwe omunamido, oo a kala meongalo letu oule womido 30, okwa hambelela nge ta ti: ‘Owa ninga nawa mumati wange eshi wa alukila keongalo!’ Osho osha li sha kuma nge neenghono, nonda li nda hafa eshi nda alukila keumbo.”

Marco okwa ti: “Eshi nda ya mOlupale lOuhamba, onda li nda kala omutumba konima elela opo ovanhu vaha dimbuluke nge. Ashike ovo va li shii nge eshi nda li okaana, ova dimbuluka nge. Ova hambelela nge nokupapatela nge, nonda li ndi udite ombili inene. Onda li nda fa omunhu a alukila keumbo.”

OVAKULUNHUONGALO OTAVA KA KWAFELA NGE NGAHELIPI?

Ovakulunhuongalo otava ka ungaunga naave nonghenda. Otave ke ku pandula eshi wa hala okuxwameka vali “ohole yoye yotete.” (Ehololo 2:4) Otave ke ku kwafela pahole opo u pukulule omapuko oo wa ninga, ashike otave ke ku pukulula “nomhepo yonheni.” (Ovagalati 6:1; Omayeletumbulo 28:13) Ovakulunhuongalo otashi dulika va unganeke umwe a konakone naave tashi dulika embo Nghee to dulu okuhafela onghalamwenyo fiyo alushe! ile Ehena popepi naJehova. Kala u na oushili kutya ovakulunhuongalo otave ke ku hekeleka nokuyambidida eenghendabala doye. — Jesaja 32:1, 2.

Victor okwa ti: “Ovakulunhuongalo ova kala hava talele nge po omido adishe hetatu odo nda kala inandi lipyakidila. Efiku limwe, omukulunhuongalo umwe okwa li a ulikila nge omafano oo a li e tu faneka. Osho osha li sha ningifa nge ndi djuulukwe ehafo olo nda li ndi na nale eshi nda li handi longele Jehova. Ovakulunhuongalo ova kwafela nge pahole ndi kale vali nde lipyakidila pamhepo.”

“Jehova ote ke ku pameka”

Meimbilo letu, Natu imbileni Jehova, omu na omaimbilo a tunhula oo tae ku hekeleke notae ku tu omukumo eshi to hovele vali okukala we lipyakidila pamhepo. Pashihopaenenwa, tala keendjovo deimbilo 60, olo la kanghamena ku 1 Petrus 5:10, noli na oshipalanyole tashi ti: “Jehova ote ke ku pameka.”

Kalung’ okwe ku pa ouyelele waye,

Opo u dul’ okweenda moshili.

Okwa mona kutya owa halelela

Okushiiva nokulong’ ouyuki,

U wanife po ehalo laye.
Ite ku efa; ote ku kwafele.

Kalung’ okwe ku pa Omona ewifa;

Onghee, okwa hala u pondole.

Ino limbililwa kuty’ ote ku kwafa;

Ote ke ku pameka ashike.

Ita ka dimbwa ohole yoye.

Ota kala te ku pashukile.

(KOOR)

Okwe ku landa ondilo nOmona waye.

Te ku yambidida note ku pameke.

Ote ke ku amena note ku wilike.

Te ku yambidida note ku pameke.

Opo u pwilikine komusika yeimbilo eli nosho yo yomaimbilo makwao, inda ko jw.org.