Oshikumwifilonga pEfuta Litilyana

Diva ashike eshi Farao a uda kutya Ovaisrael ova fiya po Egipti, okwa li e lipa oushima kutya omolwashike e va efela va ye. Ndele ta lombwele etangakwaita laye ta ti: ‘Longekideni omatemba ange oita aeshe, tu ke va landuleni. Katwa li tu na okweefa va ye.’ Farao novakwaita vaye ova li va tameka okulandula Ovaisrael.

Jehova okwa kala ta wilike oshiwana shaye mokulongifa oluudi loshilemo omutenya, noufiku oluudi lomundilo. Okwa li e va wilika va yuke kEfuta Litilyana ndele te va lombwele va onge onhanda.

Opo nee Ovaisrael ova li va mona Farao pamwe netangakwaita laye tave va shikula. Ovaisrael ova li pokati kefuta netangakwaita laEgipti. Ova li va lombwela Moses tava ti: ‘Ohatu ka fya, ngeno owa efele ashike tu kale muEgipti.’ Moses okwa li e va nyamukula ta ti: ‘Inamu tila. Kaleni mwa teelela mu tale nghee Jehova te ke mu xupifa.’ Osho otashi ulike kutya Moses okwa li e lineekela filufilu muJehova.

Jehova okwa li a lombwela Ovaisrael va kufe po onhanda. Oufiku okwa li a tula oluudi loshilemo pokati kOvaegipti nOvaisrael. Kombinga yOvaegipti okwa li omilaulu, omanga kOvaisrael kwa li ouyelele.

Jehova okwa li a lombwela Moses a yelule odibo yaye kombada yefuta. Opo nee Jehova okwa li a pepifa omhepo i na eenghono oufiku aushe. Omeva efuta okwa li a tukauka pokati ndele pokati kao tapa kala ondjila. Ovaisrael omamiliyona ova li va enda poukukutu, pokati komakuma omeva ndele tava i kombinga ikwao.

Etangakwaita laFarao ola li la shikula Ovaisrael eshi va li tava ende poukukutu pokati kefuta. Opo nee Jehova okwa li a ngwangwaneka etangakwaita olo. Omaulu omatemba avo okwa li a tameka okuwako. Ovakwaita ova li va ingida tava ti: ‘Natu shuneni, Jehova ota kondjele oshiwana shaye.’

Jehova okwa li vali a lombwela Moses ta ti: ‘Yelula eke loye kombada yefuta.’ Diva, omeva efuta okwa li a shuna kumwe nokulidenga metangakwaita laEgipti, ndele Farao novakwaita vaye tava file mo aveshe.

Ongudu yOvaisrael oyo ya li kombinga ikwao yefuta oya li tai tange Kalunga neimbilo tai ti: ‘Ame onda hala okwiimbila Jehova molwaashi okwa tumbala. Onghambe nomulondi wayo okwe i umbila mefuta.’ Fimbo va li tava imbi, ovakainhu ova li tava ndanisha nokushika oungoma. Keshe umwe okwa li a hafa neenghono eshi va manguluka filufilu.