Jehova ta hoolola Josua

Moses okwa li e li pokufya konima eshi a kala ta wilike oshiwana shaIsrael oule womido dihapu. Jehova okwa li e mu lombwela a ti: ‘Haave to ka twala Ovaisrael mEdu lEudaneko, ohandi ke ku ulikila ashike edu olo.’ Opo nee Moses okwa li a pula Jehova a hoolole omuwiliki mupe a kwatele komesho oshiwana. Jehova okwa li e mu lombwela a ti: ‘Inda kuJosua, ndele to mu lombwele kutya oye ta ka kala ta kwatele komesho oshiwana.’

Moses okwa li a lombwela oshiwana kutya oku li pokufya, na Jehova okwa hoolola Josua oye e va twale mEdu lEudaneko. Opo nee Moses okwa li a lombwela Josua ta ti: ‘Ino kala wa tila, Jehova ote ke ku kwafela.’ Diva konima yaasho, Moses okwa li a ya koxulo yomhunda yaNebo, ndele Jehova te mu ulikile edu olo a udanekela Abraham, Isak naJakob. Opo nee Moses okwa fya e na omido 120.

Jehova okwa li a lombwela Josua ta ti: ‘Tauluka omulonga waJordan ndele to i kuKanaan. Ohandi ke ku kwafela ngaashi ashike nda kwafela Moses. Shimha ashike to kala to lesha Omhango yange keshe efiku. Ino kala wa tila. Kala wa nyatipala, ndele to i nokuninga naanaa ngaashi nde ku lombwela.’

Okudja opo, Josua okwa tuma eendadi mbali koshilando Jeriko. Mehokololo tali landula, ohatu ke lihonga shihapu kutya oshike sha li sha ningwa po. Eshi eendadi da aluka, oda li da popya kutya osha li efimbo liwa lokuya kuKanaan. Efiku la landula ko, Josua okwa lombwela oshiwana shi longele oinima yasho. Opo nee okwa li a tuma ovapristeri ovo va li va humbata oshikefa shehangano ve va tetekele komulonga waJordan. Omulonga owa li tau kunguluka omeva. Ndele eshi ovapristeri va lyata momeva, omeva okwa li a kanghama ndele taa pwiinine po. Opo nee ovapristeri ova ya pokati komulonga ndele tava fikama omanga oshiwana ashishe shaIsrael tashi taulukile kombinga ikwao. Mbela oshikumwifilonga osho osha li ngoo she va dimbulukifa osho Jehova a li a ninga pEfuta Litilyana?

Hauxuuninwa, Ovaisrael ova li va ya mEdu lEudaneko olo va kala va teelela omido dihapu. Ova li tava dulu okutunga omaumbo avo noilando. Ova li tava dulu okulima omapya, okuninga oikokola yomiviinyu noikunino yoiimati. Oshilongo osha li tashi kunguluka omashini nomaadi eenyiki.