Jefta ta ningile Jehova eudaneko

Ovaisrael ova li va efa po natango Jehova ndele tava hovele okulongela oikalunga. Eshi Ovaammoni va li ve va lwifa, oikalunga oyo va li tava longele kaya li ye va kwafela. Ovaisrael ova kala tava mono oixuna oule womido dihapu. Hauxuuninwa, ova li va ilikana Jehova va ti: ‘Otwa nyona. Tu xupifa kovatondi vetu.’ Opo nee Ovaisrael ova li va hanauna po oikalunga yavo ndele tava tameke okulongela Jehova. Jehova ka li a hala a mone tava twikile okumona oixuna.

Omukwaita wedina Jefta okwa li a hoololwa opo a kwatele komesho oshiwana eshi tashi ka lwifa Ovaammoni. Okwa li a lombwela Jehova ta ti: ‘Ngeenge owe tu kwafa tu findane molwoodi eli, ohandi ke ku pa omunhu oo ta piti tete meumbo lange eshi handi shuna keumbo.’ Jehova okwa li a pwilikina keilikano laJefta ndele te mu kwafele a findane molwoodi.

Eshi Jefta a shuna keumbo, okwa li a shakenekwa tete kokamonakadona kaye, okaana oko oko akeke a li e na. Oka li taka tane nokushika okaxumba. Mbela Jefta okwa li ta ka ninga po shike? Okwa li a dimbuluka eudaneko olo a li a ninga ndele ta ti: ‘Akutu omona wange, owa nyikifa nge oluhodi. Onda ningila Jehova eudaneko. Opo ndi li wanife po, ondi na oku ku tuma u ye u ka longe ketwali kuSilo.’ Omonakadona okwa li e mu nyamukula a ti: ‘Tate, ngeenge owa udanekela Jehova, wanifa po eudaneko loye. Onda hala ashike ndi ka kale nookahewa kange keemhunda eemwedi mbali. Opo nee handi ka ya.’ Omonakadona waJefta okwa kala ta longo noudiinini ketwali onghalamwenyo yaye aishe. Omudo keshe, ookahewa kaye ova li hava i kuSilo ve ke mu talele po.