Jehova ta tale Jona onheni

Ovanhu vomoshilando shaAssiria shedina Ninive ova li ovakolokoshi. Jehova okwa li a lombwela omuprofeti Jona a ye kuNinive a ka londwele ovanhu kutya nava lundulule eenghedi davo. Ashike Jona okwa faduka po ndele ta i nondjila imwe i lili. Okwa ya moshikepa imwe ya li ta i i kuTarsis ndele ta i nayo.

Fimbo e li molweendo noshikepa, opa li pa holoka oshikungulu shinene, novaendifuta ova li va tila neenghono. Opo nee ova li va ilikana koikalunga yavo nokupula tava ti: ‘Omolwashike mbela eshi tashi ningilwa?’ Hauxuuninwa, Jona okwe va lombwela a ti: ‘Aame ndi na ondjo. Ohandi i onhapo osho Jehova a lombwela nge ndi ninge. Ekelei nge mefuta, opo oshikungulu shi oke.’ Ovaendifuta kava li va hala okweekela Jona mefuta, ashike Jona okwa li e va kondjifa. Eshi ve mu ekela mo, oshikungulu osha oka.

Jona okwa li e shii ota fi. Eshi a enda ta ningine mokule mefuta, okwa kala ta ilikana kuJehova. Opo nee Jehova okwa li a tuma oshi inenenene ndele tai pona po Jona, ashike Jona ina fya. Fimbo Jona a li medimo loshi, okwa li a ilikana ta ti: ‘Ohandi udaneke kutya ohandi ka dulika alushe kwoove.’ Jehova okwa li a amena Jona fimbo a li medimo loshi oule womafiku atatu ndele ta tumu oshi i ka kungile Jona koukukutu.

Eshi Jehova a xupifa Jona, mbela osho osha li sha hala okutya Jona ka li vali e na okuya kuNinive? Ahowe. Jehova okwa li vali a lombwela Jona a ye kuNinive. Pomhito oyo, Jona okwa li a dulika. Okwa ya ndele ta lombwele ovanhu ovo ovakolokoshi ta ti: ‘Konima yomafiku 40, Ninive otashi ka hanaunwa po.’ Opo nee opa li pa ningwa oshinima inashi teelelwa. Ovaninive ova li va pwilikina ndele tava lundulula eenghedi davo. Ohamba yaNinive oya li ya lombwela ovanhu vayo ya ti: ‘Ilikaneni Kalunga nokulidilulula. Pamwe ite ke tu hanauna po ngoo.’ Eshi Jehova a mona kutya ovanhu ove livela ombedi, ka li a hanauna po Ninive.

Jona okwa li a handuka eshi oshilando inashi hanaunwa po. Diladila ashike: Jehova okwa ungaunga naJona nonheni nokwe mu fila onghenda, ashike Jona ka li a fila onghenda ovanhu vomuNinive. Ponhele yaasho, okwa li a kala omutumba kondje yoshilando momudile woshimeno. Konima yefimbo, oshimeno osho osha ka fya ndele Jona ta handuka. Opo nee Jehova okwa li e mu lombwela a ti: ‘Ou na ko ashike nasha noshimeno ponhele yovanhu vomuNinive. Onde va fila onghenda nova xupa.’ Mbela Jehova okwa li a hala okutya shike? Ovanhu vomuNinive ova li va fimanenena ve dule oshimeno keshe.