Jesus te lihololele ovayuli veeshi

Konima eshi Jesus a li e lihololela ovayapostoli vaye, Petrus okwa li a tokola oku ka kwata eeshi mEfuta laGalilea. Tomas, Jakob, Johannes novahongwa vakwao ova li va ya pamwe naye. Ova li va kendabala okuyula eeshi oufiku aushe ndele inava kwata sha.

Ongula inene, ova li va mona omunhu a fikama komunghulofuta. Okwe va ingida ta ti: ‘Omwa kwata ngoo eeshi?’ Ove mu nyamukula tava ti: ‘Ahowe.’ Omulumenhu okwa ti: ‘Ekeleni onete yeni kolulyo lowato.’ Eshi ve shi ninga, onete oya li ya yada eeshi dihapu neenghono ndele kava li tava dulu oku i nanena komunghulofuta. Johannes okwa li a didilika diva kutya omunhu oo oJesus, ndele ta ti: ‘Omwene!’ Diva Petrus okwa nukila momeva ndele ta yoo a yuka komunghulofuta. Ovahongwa vakwao ova li ve mu landula nowato.

Eshi va fika komunghulofuta, ova mona omungome neeshi di li pomakala. Jesus okwe va lombwela va ete dimwe domeeshi odo va kwata opo nado di yofwe. Opo nee okwa ti: ‘Ileni mu lye oshuumbululwa.’

Konima eshi va lya oshuumbululwa, Jesus okwa pula Petrus a ti: ‘Ou hole nge ngoo shi dule eshi u hole okukwata eeshi?’ Petrus okwa ti: ‘Heeno Omwene, ou shii kutya ondi ku hole.’ Jesus okwa ti: ‘Hano lifa eedjona dange.’ Jesus okwa ti vali: ‘Petrus, ou hole nge ngoo?’ Petrus okwa ti: ‘Omwene, ou shii kutya ondi ku hole.’ Jesus okwa ti: ‘Lifa eedjona dange.’ Jesus okwe mu pula oshikando oshititatu, ndele Petrus ta kala a nyika oluhodi neenghono. Okwa ti: ‘Omwene, oinima aishe ou i shii. Ou shii kutya ondi ku hole.’ Jesus okwa ti: ‘Lifa eedjona dange.’ Opo nee okwa lombwela Petrus ta ti: ‘Twikila okulandula nge.’