Omunangeli wodolongo e lihonga oshili

MuFilippi omwa li okakadona okapiya oko ka li ke na ondemoni. Ondemoni oya li hai ningifa okakadona oko ka xunganeke, noka li haka etele oovene vako oimaliwa ihapu mokuxunganeka. Eshi Paulus naSilas ve uya muFilippi, oka li ke va landula keshe pamwe oule womafiku mahapu. Opo nee ondemoni oye ka ningifa ka ingide taka ti: ‘Ovalumenhu ava ovapiya vaKalunga Omukombadambada.’ Paulus okwa lombwela ondemoni a ti: ‘Dja mo muko medina laJesus!’ Ondemoni oya dja mo mokakadona.

Eshi oovene vokakadona va mona kutya itava ka mona vali oimaliwa okupitila muko, ova li va handuka neenghono. Ova li va kokololela Paulus naSilas komhangu, ndele tava ti: ‘Ovalumenhu ava otava nyono omhango notava piyaaneke oshilando ashishe.’ Ovapanguli ova li va yandja elombwelo opo Paulus naSilas va dengwe nova tulwe modolongo. Omunangeli wodolongo okwa li e va tula monhele i li mokule lela mwa laula ndele te va tula meti.

Paulus naSilas ova kala tava imbi omaimbilohambelelo okutanga Jehova, ofimbo ovanadolongo vakwao tava pwilikine. Ombadilila, opa li pa holoka ekakamo ledu linene mokati koufiku ndele tali kakamifa odolongo okudja pombada fiyo opedu. Omivelo dodolongo oda li da yeuluka, nomalyenge nomati ovanadolongo okwa yululuka. Omunangeli wodolongo okwa li a tondokela kodolongo ndele ta mono kutya omivelo oda yeuluka. Molwaashi okwa li ta diladila kutya ovanadolongo aveshe ova ya onhapo, okwa li a kufa eongamukonda e lidipae ngeno.

Diva Paulus okwe mu lombwela a ti: ‘Ino liningila owii washa. Atushe omo tu li.’ Omunangeli wodolongo okwa tondokela mo ndele ta wile puPaulus naSilas. Okwe va pula a ti: ‘Ondi na okuninga shike opo ndi xupifwe?’ Ove mu lombwela va ti: ‘Owa pumbwa okwiitavela Jesus pamwe noukwaneumbo woye.’ Okudja opo Paulus naSilas ove va honga eendjovo daJehova, nomunangeli wodolongo novaneumbo laye aveshe ova ninginifwa.