Paulus naTimoteus

Timoteus okwa li omumwatate omunyasha womeongalo laListra. Xe okwa li Omugreka, ofimbo ina a li Omujuda. Ina Eunike, nainakulu Loide, ova honga Timoteus kombinga yaJehova okudja kounona waye.

Eshi Paulus a talela po muListra pefimbo lolweendo laye litivali lokuudifa, okwa li a didilika kutya Timoteus oku hole shili ovamwaxe nokwa li a halelela oku va kwafela. Paulus okwa li a pula Timoteus a ye pamwe naye molweendo lokuudifa. Mokweendela ko kwefimbo, Paulus okwa kala ta deula Timoteus a kale omuudifi nomuhongi wonghundana iwa a pyokoka.

Omhepo iyapuki oya li ya wilika Paulus naTimoteus keshe opo va li va ya. Oufiku umwe, omulumenhu umwe okwa li a lombwela Paulus memoniko a ye kuMakedonia e ke va kwafele. Onghee Paulus, Timoteus, Silas naLukas ova li va ya kuMakedonia va ka udife nova ka tote po omaongalo.

Ovalumenhu novakainhu vahapu muTessalonika, oshilando shi li muMakedonia, ova li va ninga Ovakriste. Ashike Ovajuda vamwe ova li va twila ondubo Paulus navakwao. Ova li ve va ongalela ndele tava kokololele ovamwatate kovapangeli voshilando, tava ingida tava ti: ‘Ovalumenhu ava ove tonde epangelo laRoma!’ Eemwenyo daPaulus naTimoteus oda li moshiponga, nomolwaasho ova li va ya onhapo kuBerea oufiku.

Ovanhu vomuBerea ova li va halelela okulihonga kombinga yonghundana iwa, molwaashi Ovagreka nOvajuda ova li va ninga ovaitaveli. Ashike eshi Ovajuda vamwe va dja kuTessalonika ndele tava etifa edundakano, Paulus okwa li a ya kuAtena. Timoteus naSilas ova li va fyaala muBerea opo va pameke ovamwaxe. Konima yefimbo, Paulus okwa li a tuma Timoteus a shune kuTessalonika a ka kwafele ovamwaxe va dule okuungaunga nomahepeko manene. Lwanima, Paulus okwa li a tuma Timoteus a ka talele po omaongalo makwao mahapu noku a twa omukumo.

Paulus okwa lombwela Timoteus a ti: ‘Ovo va hala okulongela Jehova otava ka hepekwa.’ Timoteus okwa li a hepekwa nokwa tulwa modolongo omolweitavelo laye. Okwa li a hafa eshi a li a mona omhito yokuulika oudiinini waye kuJehova.

Paulus okwa lombwela Ovafilippi ta ti: ‘Ohandi tumu Timoteus kunye. Ote ke mu honga kutya okweenda moshili osha hala okutya ngahelipi, note ke mu deulila oukalele.’ Paulus okwa li e shii kutya ota dulu okulineekela Timoteus. Ova kala ookaume novalongi pamwe oule weedula dihapu.