Ouhamba waKalunga oshike?

Etumwalaka la fimanenena mOmbiibeli oli na sha nOuhamba waKalunga. Jehova ota ka longifa Ouhamba waye, opo a wanife po elalakano laye lopehovelo li na sha nedu. Mbela Ouhamba oo oshike? Otu shi shii ngahelipi kutya otau pangele nale? Owa wanifa po shike fiyo opapa? Otau ka ninga shike monakwiiwa? Omapulo oo otaa ka nyamukulwa moshileshwa eshi nosho yo moileshwa ivali ya shikula ko.

1. Ouhamba waKalunga oshike, nolyelye e li Ohamba yao?

Ouhamba oo epangelo olo la dikwa po kuJehova Kalunga. Jesus Kristus, e li Ohamba yao, ota pangele meulu. (Mateus 4:17; Johannes 18:36) Ombiibeli oya popya shi na sha naye ya ti: “Ota ka pangela e li Ohamba . . . fiyo alushe.” (Lukas 1:32, 33) E li Ohamba yOuhamba waKalunga, ota ka pangela ovanhu aveshe kombada yedu.

2. Jesus ota ka pangela pamwe noolyelye?

Jesus Kristus ita ka pangela oye aeke. Ota ka pangela pamwe novanhu “va dja momapata, momalaka, movanhu nomoiwana aishe . . . notava ka pangela ombada yedu ve li eehamba.” (Ehololo 5:9, 10) Ota ka pangela pamwe novanhu vangapi? Okudja eshi Jesus a li e uya kombada yedu, ovanhu omamiliyona ova enda tava ningi ovashikuli vaye. Ndele ovanhu ashike 144 000 vomuvo tava i meulu va ka pangele pamwe naye. (Lesha Ehololo 14:1-4.) Ovakriste vakwao aveshe otava ka kala kombada yedu ve li ovapangelwa vOuhamba.— Epsalme 37:29.

3. Omolwashike Ouhamba waKalunga u dule kokule omapangelo opanhu?

Nonande ovapangeli vopanhu ova kendabale okulonga ouwa, kave na eenghono dokulonga keshe osho va hala. Mokweendela ko kwefimbo, ohava pingenwa po kovapangeli vamwe, ovo tashi dulika ve lihole vo vene notashi dulika va kale inava hala okukwafela ovakwashiwana. Ashike Jesus, e li Omupangeli wOuhamba waKalunga, ke na efiku a ka pingenwe po nande okomunhu. Kalunga okwa ‘dika po ouhamba itau ka teka po fiyo alushe.’ (Daniel 2:44) Jesus ota ka pangela kombada yedu alishe, nota ka ungaunga novanhu aveshe shi fike pamwe. Oku li omunahole, omunalukeno noku hole ouyuki, nota ka honga ovanhu va kale hava ungaunga navakwao monghedi ya faafana, sha hala okutya tava ungaunga navo nohole, nolukeno nosho yo pauyuki.— Lesha Jesaja 11:9.

4. Epangelo enaenghono olo tali ka pangela kombada yedu alishe

Jesus Kristus oku na eenghonopangelo dinene e dule ovapangeli aveshe mondjokonona. Lesha Mateus 28:18, ndele tamu kundafana epulo tali shikula:

• Omolwashike taku dulu okutiwa kutya Jesus oku na eenghonopangelo dinene e dule ovapangeli vopanhu?

Omapangelo opanhu luhapu ohaa ningi kwa di eli, kwe uya likwao, nomupangeli keshe oha pangele ashike oshitukulwa shonhumba shedu. Ongahelipi shi na sha nOuhamba waKalunga? Lesha Daniel 7:14, ndele tamu kundafana omapulo taa shikula:

• Omolwashike shihokwifa okushiiva kutya Ouhamba waKalunga ‘itau ka teywa po’?

• Omolwashike shihokwifa okushiiva kutya otau ka pangela edu alishe?

5. Omapangelo opanhu okwa pumbwa okupingenwa po

Omolwashike Ouhamba waKalunga wa pumbwa okupingena po omapangelo opanhu? Dana okavidio, ndele tamu kundafana epulo tali shikula.

OKAVIDIO: Ouhamba waKalunga oshike?— Okatukulwa kaxupi (1:41)

• Oidjemo ilipi ya etifwa po komapangelo opanhu?

Lesha Omuudifi 8:9, ndele tamu kundafana omapulo taa shikula:

• Eshi to tale, mbela omapangelo opanhu okwa pumbwa ngoo okupingenwa po kOuhamba waKalunga? Omolwashike to tile ngaho?

6. Ovapangeli vOuhamba waKalunga ove udite ko eenghalo detu

Molwaashi Ohamba yetu, Jesus, oya li omunhu kombada yedu, oi tu “uditile oukwao wananghali omolwomaunghundi etu.” (Ovaheberi 4:15) Kakele kaasho, Jehova okwa hoolola ovalumenhu novakainhu ovadiinini 144 000, okudja “momapata, momalaka, movanhu nomoiwana aishe,” va ka pangele pamwe naJesus.— Ehololo 5:9.

• Mbela ku wete tashi hekeleke okushiiva kutya Jesus novapangeli pamwe naye ove shii eenghalo dovanhu? Omolwashike to tile ngaho?

7. Ouhamba waKalunga ou na eemhango da denga mbada

Omapangelo ohaa tula po eemhango odo taa diladila kutya otadi amene nokweetela ovakwashiwana ouwa. Ouhamba waKalunga nao ou na eemhango odo ovapangelwa vao ve na okushikula. Lesha 1 Ovakorinto 6:9-11, ndele tamu kundafana omapulo taa shikula:

• Mbela oto diladila kutya ounyuni otau ka kala wa tya ngahelipi, eshi aveshe ovo tava ka kala kombada yedu tava ka dulika keemhango daKalunga douyuki?a

• Mbela oto diladila kutya osha yuka ngoo eshi Jehova a teelela ovapangelwa vOuhamba va dulike keemhango odo? Omolwashike to tile ngaho?

• Oshike tashi ulike kutya ovanhu ovo ihava dulika keemhango odo otava dulu okulunduluka?— Tala ovelishe 11.

ENGONGO

Ouhamba waKalunga epangelo lolela olo li li meulu notali ka pangela edu alishe.

Eendululo

• Oolyelye ve li ovapangeli vOuhamba waKalunga?

• Omolwashike Ouhamba waKalunga u dule kokule omapangelo opanhu?

• Oinima ilipi Jehova a teelela ovapangelwa vOuhamba va wanife po?

TALA OUYELELE WA WEDWA PO

onakona kombinga yaasho Jesus a popya shi na sha naapo Ouhamba u li.

“Mbela Ouhamba waKalunga ou li momutima woye?” (Oshitukulwa shi li ko jw.org)

Omolwashike Eendombwedi daJehova da hoolola okukala didiinini kOuhamba waKalunga, ponhele yokukala didiinini komapangelo opanhu?

Ova tokola okukala ovadiinini kOuhamba waKalunga (1:43)

Konakona nghee Ombiibeli ya yelifa kombinga yovanhu 144 000, ovo Jehova a hoolola va ka pangele pamwe naJesus.

“Oolyelye tava i meulu?” (Oshitukulwa shi li ko jw.org)

Oshike sha kwafela omukainhu umwe oo a li modolongo a kale a tomhwa kutya Ouhamba waKalunga oo ashike tau dulu okweetifa po ouyuki mounyuni?

“Paife ondi shii nghee okuhenouyuki taku ka xulifwa po” (Kala oupafi!, Novemba 2011)