“Lixupifa Ove Mwene Naava Tave Ku Pwilikine”

1, 2. Mbela oshike osho tashi linyengifa Ovakriste vashili va twikile noilonga yavo yokuxupifa eemwenyo?

MOMUKUNDA u li koshekasheka kolundume laThailand, ovalihomboli ve li Eendombwedi daJehova ova kendabala okulongifa elaka lipe olo opo ve lihongo opo va dule okupopya nomuhoko wokoikulundudu. Opo va dule okutukulilafana onghundana iwa yOuhamba waKalunga novakalimo vomomukunda, ovalihomboli ava omafiku aa ova tameka okulihonga elaka lOshilahu.

² “Oshidjuu okuhokolola ehafo nombili oyo tu na apa i fike, okulonga mokati kovanhu ovo ve na ohokwe,” omushamane osho a hokolola. “Otu udite lela twa kwatelwa mewanifo lEhololo 14:6, 7, eshi hatu udifile evangeli ‘ovanhu vomoiwana aishe novomihoko adishe novomomalaka aeshe.’ Inapa fyaala nande oitukulwa ihapu omo onghundana iwa inai fika ko, naashi oshi li lela shimwe shomoitukulwa oyo inai longwa. Otu na hanga omakonakonombibeli e dulife pwaao hatu dulu okukala nao.” Osha yela kutya ovalihomboli ava inava hala ashike okulixupifa voo vene ndele naavo yo tave va pwilikine. Tu li Ovakriste, inatu hala mbela okuninga sha faafana?

“Lipashukila ove mwene”

3. Opo tu xupife vamwe, oshike osho tu na okuninga tete?

³ Omuyapostoli Paulus okwa pa Timoteus omayele oo ta ti: “Lipashukila ove mwene nenongeko loye,” nokwa yeleka yo kOvakriste aveshe. (1 Timoteus 4:16) Doshili, opo tu kwafele vamwe va ka mone exupifo, otu na okulipashukila tete fye vene. Mbela ongahelipi hatu dulu oku shi ninga? Oshinima shimwe oshosho kutya, otu na okukala oupafi shi na sha nefimbo olo tu li mulo. Jesus okwa yandja edidiliko olo la kwatela mo oiningwanima i lili naku lili opo ovashikuli vaye va kale ve shii kutya “exulilo longhalelo yoinima” oli li popepi. Ndele Jesus okwa ti yo inatu pumbwa okushiiva lelalela kutya onaini exulilo tali uya. (Mateus 24:3, 36, NW) Mbela ohatu ke linyenga ngahelipi koushili wa tya ngaha?

4. (a) Oikala ilipi tu na okukala tu na shi na sha nefimbo olo la xupa ko longhalelo ei? (b) Otu na okuhenuka oikala ilipi?

⁴ Keshe umwe womufye ota dulu okulipula: ‘Mbela ohandi longifa ngoo omhito keshe oyo ya xupa ko kefimbo eli longhalelo yoinima youkolokoshi okulixupifa ame mwene naava tava pwilikine nge? Ile pamwe ohai diladila kutya: “Fimbo tu he shii lelalela kutya exulilo otali uya naini, inashi pumbiwa ndi lipule nasho”?’ Okukala noikala ya tumbulwa xuuninwa oshi li oshiponga. Eshi otashi kondjifa lela ekumaido laJesus olo tali ti: “Kaleni mwe lilongekida, osheshi Omona wOmunhu te uya efimbo tuu olo inamu mu teelela.” (Mateus 24:44) Doshili, eli kali fi efimbo lokukanifa ouladi wetu moilonga yaJehova ile pamwe tu tale kounyuni omolweameno ile ehafo.—Lukas 21:34-36.

5. Oihopaenenwa ilipi ya tulwa po keendombwedi daJehova odo da tetekela efimbo lOukriste?

⁵ Omukalo mukwao omo hatu dulu okuulika kutya ohatu lipashukile fye vene omokulididimika noudiinini tu li Ovakriste. Ovapiya vaKalunga vefimbo lonale okwa li ve lididimika, kutya nee exupifo lavo okwa li tali uya diva ile kakwa li tali uya diva. Konima yokutumbula oihopaenenwa yeendombwedi donale odo da tetekelela efimbo lOukriste ngaashi Abel, Henok, Noa, Abraham naSara, Paulus okwa ti: “Vo inava mona eshi sha udanekwa, ndelenee ove shi tala ashike kokule nokwiitavela, nove shi kunda, nove lihepaulula nokutya, ovo ovanailongo novaenda kombada yedu eli.” Vo inave liefela nandenande momahalo okukalamwenyo kupu, noinave liyandja nande komafininiko opaenghedi inadi koshoka oo kwa li e va dingilila, ndele ova kala va tala komesho ‘okumona eshi sha udanekwa.’—Ovaheberi 11:13; 12:1.

6. Ongahelipi exupifo lOvakriste vomefelemido lotete la nwefa mo onghedi yavo yokukalamwenyo?

⁶ Ovakriste vomefelemido lotete okwa li ve litala ko ve li ‘ovanailongo’ mounyuni ou. (1 Petrus 2:11) Nokuli nokonima yokuxupifwa mehanauno laJerusalem 70 O.P., Ovakriste vashili inava efa okuudifa ile okushuna ngeno monghedi yokukalamwenyo kwounyuni. Vo ova kala ve shi shii kutya exupifo olaavo ashike tave lididimike. Doshili, nokuli mo 98 O.P., omuyapostoli Johannes okwa shanga: “Ounyuni otau xulu po pamwe nokahalu [kao]; ndelenee ou ta longo ehalo laKalunga oye ta kala alushe.”—1 Johannes 2:17, 28.

7. Ongahelipi Eendombwedi daJehova domefimbo lonena da ulika elididimiko?

⁷ Kunena Eendombwedi daJehova odi li yo da diinina moilonga yopaKriste, nonande oda kala nokushakeneka omahepeko onyanya. Elididimiko lado mbela otali ka kala loshimha? Hasho nandenande, molwaashi Jesus okwe tu shilipaleka: “Ou te lididimike fiyo exulilo, oye ta xupifwa,” kashi na nee mbudi kutya pamwe olo exulilo longhalelo yoinima yopaife ile exulilo longhalamwenyo yomunhu. Penyumuko, Jehova ota ka dimbuluka ovapiya vaye aveshe ovadiinini ovo va fya note ke va pa ondjabi.—Mateus 24:13; Ovaheberi 6:10.

8. Ongahelipi hatu dulu okuulika olupandu letu shi na sha nelididimiko lOvakriste vefimbo la pita?

⁸ Kakele kaasho, fye otwa hafa mokushiiva kutya Ovakriste ovadiinini vonale inava kala ashike ve na ko nasha nexupifo lavo vene. Doshili, fye ovo twe lihonga kombinga yOuhamba waKalunga okupitila meenghendabala davo otwa pandula eshi ve lididimika mokuwanifa oshilonga osho va pewa kuJesus: “Indeni hano ka ningeni ovanhu [vomoiwana aishe, NW] ovalongwa vange, . . . noku va longa okudiinina aishe ei nde i mu lombwela.” (Mateus 28:19, 20) Shamha omhito ye tu yeulukila, ohatu dulu okuulika olupandu letu mokuudifila vamwe ovo inava uda onghundana iwa natango. Ndelenee okuudifa oku li ashike onghatu yotete yokutameka okuninga ovanhu ovalongwa.

‘Pashukila enongeko loye’

9. Mokukala netaleko liwa, otali tu kwafa ngahelipi tu tameke omakonakonombibeli?

⁹ Oshinakuwanifwa shetu inashi kwatela mo ashike okuudifa ndele otu na yo okuhonga. Jesus okwe tu lombwela tu longe ovanhu okudiinina aishe oyo e tu lombwela. Oshoshili kutya moitukulwa imwe omu na ashike ovanhu vanini ovo va hala okulihonga kombinga yaJehova. Ndele mokukala tu na etaleko lokutya oshitukulwa oshikukutu, otashi dulu shi ye moshipala eenghendabala detu dokutameka omakonakonombibeli. Yvette, omukokolindjila moshitukulwa osho vamwe va ti kutya ihashi imike oiimati, okwa mona kutya ovaudifi vamwe ovo ve uya okulonga moshitukulwa eshi ovo ve he na oikala ya tya ngaha, ova tameka nale nokuli omakonakonombibeli opeumbo. Konima eshi a kala yo e na oikala iwa, Yvette naye okwa mona ovanhu ovo va hala okukonakona Ombibeli.

10. Tu li ovahongi vOmbibeli otu na oshinakuwanifwa sha fimana shilipi?

¹⁰ Ovakriste vamwe otashi dulika va ongaonge okuyandja ekonakonombibeli kwaavo ve na ohokwe molwaashi otava diladila kutya itava dulu okukonakona navo. Doshili, ounghulungu wetu owa yoolokafana. Ndele inatu pumbwa okumona ehongo lopombada opo tu shi endife nawa tu li ovahongi vEendjovo daKalunga. Etumwalaka la yela lOmbibeli oli na eenghono, na Jesus okwa ti kutya ovo va fa eedi ove shii ondaka yOmufita washili ngeenge tave i udu. Hano oshinakuwanifwa shetu osho ashike okutandaveleka etumwalaka lOmufita Muwa, Jesus, panghedi ya yela ngaashi hatu dulu.—Johannes 10:4, 14.

11. Ongahelipi to dulu okupondola mokukwafela omukonakonimbibeli?

¹¹ Ongahelipi mbela to dulu okuyandja etumwalaka laJesus nomupondo? Shotete, kala u shii osho Ombibeli tai ti kombinga yaasho tamu kundafana. Ou na okuuda ko oshinima ove mwene fimbo ino tameka oku shi honga vamwe. Natango, kendabala okukaleka po omhepo youkaume pefimbo lekonakono, ashike shi ninga nefimaneko. Ovakonakoni, mwa kwatelwa ovanyasha, ohave lihongo nawa ngee tava kaliwa navo neenghedi diwa nosho yo ngee omuhongi te va ulikile efimaneko nokukala navo nombili.—Omayeletumbulo 16:21.

12. Ongahelipi to dulu okukala noushili kutya omukonakoni oku udite ko osho to mu hongo?

¹² U li omuhongi, ino hala ashike okuhonga omukonakoni oinima opo a dule okuyandja ashike omanyamukulo momutwe. Mu kwafela a ude ko nawa osho te lihongo. Ehongo olo omukonakoni a mona, oimoniwa yaye monghalamwenyo nosho yo kutya Ombibeli oku i shii shi fike peni otashi ka nwefa mo eudeko laye li nasha naasho to ti. Onghee hano, ou na okulipula ove mwene: ‘Mbela oku udite ko ngoo efimano lomishangwa odo da etwa moshitukulwa osho hatu konakona?’ Oto dulu okuteka mo osho shi li momutima waye nomapulo oo itaa dulu ashike okunyamukulwa nenyamukulo la nafangwa heeno ile ahawe, ndele oyoo a pumbwa okuyelifwa. (Lukas 9:18-20) Mepingafano naasho, ovakonakoni vamwe ohava tila okupula ovahongi vavo omapulo. Onghee hano, otava dulu okukala tava tu kumwe naasho tava hongwa nope he na oku shi uda ko nawa. Ladipika omukonakoni a pule omapulo ndele ne ku lombwele oshitwa shonhumba kondadalunde osho e he udite ko nawa.—Markus 4:10; 9:32, 33.

13. Ongahelipi to dulu okukwafela omukonakoni a ninge omuhongi?

¹³ Elalakano la kula lokuninga ekonakonombibeli olo okukwafela omukonakoni a ninge yo omuhongi. (Ovagalati 6:6) Opo eshi shi ningwe, oto dulu okuninga eendululo laasho mwa konakona moku mu pula a yelife oshinima neendjovo dipu, a fa naanaa ta yelifile umwe oo opo te shi udu oshikando shotete. Konima yefimbo, eshi ta ka kala a wana okulonga moilonga yomomapya, oto dulu oku mu shiva mu ye pamwe naye moilonga oyo. Ota ka kala e udite nawa okulonga naave, otashi ke mu kwafa fiyo a fika pondodo opo ta dulu okulonga kuye mwene, e lifikamena.

Kwafela omukonakoni a pange

oukaume naJehova

14. U li omuhongi, elalakano loye lotete olilipi, noshike osho tashi dulu oku ku kwafela u li hange?

¹⁴ Elalakano la kula lomuhongi Omukriste keshe olo okukwafela omukonakoni a pange oukaume naJehova. Ito shi ningi ashike mokupopya kwoye ndele nomokutula po oshihopaenenwa shoye. Okuhonga omunhu okupitila moshihopaenenwa shoye otaku nwefa mo unene omitima dovakonakoni. Oilonga otai dulu okupopya shili i dule osho hatu popi, unene tuu ngeenge tashi ya mokufindila mo omaukwatya opaenghedi nosho yo okunwefa mo omukonakoni a kale e na ouladi. Ngee okwa mono kutya osho to popi nosho yo oilonga yoye otai ulike ekwatafano liwa naJehova, otashi ke mu linyengifa naye a kulike ekwatafano la tya ngaho.

15. (a) Omolwashike sha fimana opo omukonakoni a kale nelinyengotomheno liwa lokulongela Jehova? (b) Ongahelipi to dulu okukwafela omukonakoni a twikile nokuninga exumokomesho lopamhepo?

¹⁵ Owa hala omukonakoni a longele Jehova hasheeshi ashike ngeno ina hala oku ka hanaunwa po puHarmagedon ndele omolwaashi e mu hole. Moku mu kwafela a kulike elinyengotomheno eli la koshoka, oto ka tunga noitungifi ihai pi oyo tai dulu okuxupa po pefimbo leyeleko leitavelo laye. (1 Ovakorinto 3:10-15) Elinyengotomheno la puka ngaashi okukala nehalo la pitilila loku ku hopaenena ile lokuhopaenena ovanhu vamwe ve lili, itali ke mu pa eenghono okukondjifa omanwefemo e he fi opaKriste noku mu pa omukumo a ninge osho sha yuka. Dimbuluka, ove ito ka kala omuhongi waye fiyo alushe. Fimbo u na omhito, mu ladipika a ehene popepi naJehova mokulesha Eendjovo daKalunga keshe efiku nokudiladila kwaasho a lesha. Momukalo wa tya ngaha ota ka twikila nokulipalula ‘noshihopaelelwa sheendjovo odo diwa’ okudja mOmbibeli nosho yo moileshomwa ye likolelela kOmbibeli nande opa pite efimbo lile konima eshi wa mana okukonakona naye.—2 Timoteus 1:13.

16. Ongahelipi to dulu okuhonga omukonakoni a ilikane tashi di komutima?

¹⁶ Oto dulu yo okukwafela omukonakoni a kulike ekwatafano naJehova moku mu honga a ilikane tashi di komutima. Mbela ongahelipi to dulu oku shi ninga? Oto dulu oku mu ukifa koshihopaenenwa sheilikano laJesus, osho yo komailikano mahapu a dja komutima oo a shangwa mOmbibeli, ngaashi oo e li momapsalme. (Omapsalme 17, 86, 143; Mateus 6:9, 10) Natango, ngee omukonakoni woye ta udu to ilikana wa manguluka nowe likolelela kekonakono, ota mono nghee ove wu udite shi na sha naJehova. Onghee hano, ou na alushe okwiilikana nomutima aushe nonoushili, osho yo nondjele yopamhepo noyopamaliudo.

Longa u xupife ounona voye

17. Ongahelipi ovadali tava dulu okukwafela ounona vavo va landule ondjila yexupifo?

¹⁷ Doshili, mokati kaavo twa hala okuxupifa, omu na oilyo youkwaneumbo wetu. Omwaalu wa kula wounona vovadali Ovakriste ou na omitima diwa nowa “pama meitavelo.” Ndele vamwe, oshili inai mena omidi momitima davo. (1 Petrus 5:9; Ovaefeso 3:17; Ovakolossi 2:7) Vahapu vomovanyasha ohava fiye po ondjila yOukriste ngeenge tava hange ile va fika moukulunhu. Ngee ou li omudali, oshike mbela osho to dulu okuninga opo u kelele oilanduliko ya tya ngaha? Shotete, ou na okulonga u tule po omhepo iwa moukwaneumbo. Oukwaneumbo muwa otau tula po ekanghameno lokufimaneka eenghonopangelo, okupandula omifikamhango diwa nosho yo okukala nekwatafano liwa navamwe. (Ovaheberi 12:9) Onghee hano, ekwatafano lopofingo moukwaneumbo oli li ngaashi oshinhenga omo ounona tava dulu okukulika oukaume naJehova. (Epsalme 22:10) Oukwaneumbo wa kola ohau ningi oinima pamwe wa hangana—kutya nee ovadali ove na okulongifa efimbo olo kwa li ngeno tava dulu okulongifa okulilikolela omauwa opaumwene. Monghedi ya tya ngaha oto dulu okutula po oshihopaenenwa tashi hongo ounona voye va ninge omatokolo a yuka monghalamwenyo. Ovadali, osho ounona va pumbwa kunye unene kashi fi ashike eemhumbwe dopambelela, ndele onye—efimbo leni, eenghono deni nosho yo ohole yeni. Mbela oho yandje tuu aishe ei kounona voye?

18. Ovadali otava dulu okukwafela ounona vavo va nyamukule omapulo elipi?

¹⁸ Ovadali Ovakriste inava diladila nandenande kutya nounona vavo otava ka ninga yo Ovakriste nope he na okuningwa sha. Daniel, omukulunhuongalo naxe younona vatano, okwa ti: “Ovakulunhu ove na okukufa efimbo va kufe mo omalimbililo oo ounona vavo hava mono kofikola nokeenhele dimwe di lili oo itaa dulu okuhenukwa. Ove na okukwafela ounona vavo nolukeno va pondole okunyamukula omapulo ngaashi aa: ‘Mbela otu li ngoo shili mefimbo lexulilo? Mbela ope na ngoo shili elongelokalunga lashili limwe alike? Omolwashike omunafikola mukwao ta monika muwa shi he fi shiwa okweendafana naye? Mbela enangalafano komesho yohombo ola puka ngoo shili alushe?’ ” Ovadali, otamu dulu okukala noushili kutya Jehova ota ka nangeka noupuna eenghendabala deni, osheshi naye oku na ko nasha nonghalonawa younona veni.

19. Omolwashike mbela shi li nawa ovadali va konakone nounona vavo?

¹⁹ Ovadali vamwe ohava kala ve udite kutya inava wana okukonakona nounona vavo. Ndelenee inamu pumbwa okudiladila ngaha, osheshi kape na nande oumwe e li ngeno ponghatu i li xwepo okuhonga ounona voye e ku dule. (Ovaefeso 6:4) Okukonakona nounona voye ove mwene otashi ke ku kwafa u shiive osho shi li momitima davo nomomadiladilo avo. Mbela okupopya kwavo otaku di tuu shili komutima ile okwo kombada ashike? Mbela ova itavela ngoo shili osho tave lihongo? Mbela Jehova ove mu tala ko ngoo e li omunhu woshili? Oto dulu okumona omanyamukulo komapulo aa a fimana ngee oho konakona nounona voye ove mwene.—2 Timoteus 1:5.

20. Ongahelipi ovadali tava dulu okuninga ekonakono loukwaneumbo lihafifa notali kwafa?

²⁰ Ongahelipi mbela to dulu okudiinina elandulafano lekonakono loukwaneumbo woye konima yoku li tameka? Josef, omukulunhuongalo nokuli xe yokamati nokakadona, okwa ti: “Ngaashi omakonakonombibeli aeshe, ekonakono loukwaneumbo nalo oli na okukala lihafifa, nakeshe umwe ota dulu okukala a hala ngeno ola fika. Opo tu hange eshi moukwaneumbo wetu, katu na okukala twa kwata moiti unene shi na sha nefimbo. Shito ekonakono letu ohashi dulika li kwate oule wovili, ndele omafimbo amwe nande otu na ashike ominute omulongo, ohatu dulu natango okukonakona. Oshinima shimwe osho hashi ningi ekonakono letu li kale oshinima shi holike unene moshivike kounona omolwaashi ohatu dana oinyandwa oyo i li mEmbo Lyandje lyOmahokololo gOmbimbeli.a Eshi ohashi nwefa mo unene ounona nohashi yandje eudeko olo la fimana neenghono shi dulife okumana ko outendo vahapu.”

21. Onaini ovadali ve na okuhonga ounona vavo?

²¹ Doshili, itashi ti kutya ou na okuhonga ounona voye ashike pefimbo lekonakono loukwaneumbo. (Deuteronomion 6:5-7) Ondombwedi muThailand oyo ya tumbulwa petameko loshitukulwa oya ti: “Ohai dimbuluka nawa nghee Tate kwa li ha i naame moilonga yokuudifa koshitukulwa shokokule sheongalo letu, tu li kombashikela. Osha yela, oshihopaenenwa shiwa shovadali vetu nomahongo avo oo ve tu honga meenghalo adishe okwe tu kwafela tu tokole okuya moukalele wefimbo liyadi. Osho va honga nge inai shi dimbwa nande. Ohai twikile okulonga natango moitukulwa yokokulekule yepya!”

22. Oshidjemo shilipi tashi ka kala po ngee to ‘lipashukile ove mwene nenongeko loye’?

²² Mafiku, pefimbo la wapala, Jesus ote ke uya okuwanifa etokolo laKalunga lokutokola onghalelo ei yoinima youkolokoshi. Opo nee oshiningwanima eshi shinene otashi ka ninga shimwe shomoinima ya ningwa nale mondjokonona yeshito alishe, ndele ovapiya ovadiinini vaJehova otava ka kala noku mu longela fiyo alushe ve na eteelelo lexupifo laalushe. Mbela ino hala u kale umwe womuvo, pamwe nounona voye novakonakoni voye? Hano ou na okudimbuluka: “Lipashukila ove mwene nenongeko loye; dama mulo! Osheshi ngenge to shi ningi, oto lixupifa ove mwene naava tave ku pwilikine.”—1 Timoteus 4:16.

[Omashangelo opedu]

[Efano pepandja 27]

Okulihonga ohaku xumifwa komesho komhepo yefimaneko noyoukaume

[Efano pepandja 30]

Oto dulu okuyelifa?

• Oikala yetu oi na okukala ya tya ngahelipi, nonande katu shii efimbo lolelalela letokolo laKalunga?

• Omomikalo dilipi hatu dulu ‘okupashukila enongeko letu’?

• Ongahelipi to dulu okukwafela omukonakoni a pange oukaume naJehova?

• Omolwashike sha fimana ovadali va tule po efimbo lokuhonga ounona vavo?

[Efano pepandja 31]

Okudana oinyandwa oyo ye likolelela komahokololo Ombibeli, ngaashi osho shaSalomo ta tokola eembwada mbali, ohaku ningi ekonakono loukwaneumbo lihafifa