Oolyelye Ve Li Ovakalele Vakalunga Kunena?

“Okuwana kwetu kwomuKalunga, ou e tu longekida yo, tu kale ovayakuli vehangano lipe.”—2 OVAKORINTO 3:5, 6, OB-1954.

1, 2. Omoshinakuwanifwa shilipi Ovakriste aveshe vomefelemido lotete va kufa ombinga, nongahelipi oinima ya lunduluka?

MEFELEMUDO lotete Oshivalo sheedula doPaife, Ovakriste aveshe okwa li hava kufa ombinga moshinakuwanifwa sha fimana—oshilonga shokuudifa onghundana iwa. Aveshe vomuvo ova li ovavaekwa nova li ovakalele vehangano lipe. Vamwe ova li noinakuwanifwa ya wedwa po, ngaashi okuhonga meongalo. (1 Ovakorinto 12:27-29; Ovaefeso 4:11) Ovadali ova li noshinakuwanifwa sha kula moukwaneumbo. (Ovakolossi 3:18-21) Ndele aveshe ova kufa ombinga moilonga ya fimana yokuudifa. MOshigreka omo Omishangwa dopaKriste da shangwa tete, oshinakuwanifwa eshi okwa li hashi ifanwa di·a·ko·niʹa—oshilongayakulo ile oukalele.—Ovakolossi 4:17.

² Eshi pa pita efimbo, oinima oya lunduluka. Opa holoka ongudu ya shiivika nedina ovakwamhepo ovo ve lipa oufembanghenda wokuudifa. (Oilonga 20:30) Ovakwamhepo ova li okangudu kanini koohandimwe ovo have liufana vo vene Ovakriste. Omuvalu munene wovanhu owa kala wa shiivika nedina ovakwaneongalo. Nande ovakwaneongalo va kala hava hongwa kutya ove na oinakuwanifwa yonhumba, ya kwatelwa mo okuumba eengalo omolwokufiloshisho ovakwamhepo, ngeenge tashi ya poshinima shokuudifa, vahapu vomuvo ova ninga ashike ovapwilikini vongaho.

3, 4. (a) Ongahelipi oohandimwe mOukwakriste hava ningi ovakalele? (b) Olyelye ha talika ko e li omukalele mOukwakriste, nomolwashike oinima i li shimwe shi lili mokati kEendombwedi daJehova?

³ Ovakwamhepo otava popi kutya vo ovakalele (sha dja koshitya omukalele, etoloko lOshilatina loshitya di·aʹko·nos, “omuyakuli”).a Opo va ninge ovakalele ove na okukala ve na onghatu okudja keekolidji ile keeseminali nohava yapulwa. The International Standard Bible Encyclopedia otai ti: “ ‘Okuyapula’ nosho yo ‘eyapulo’ luhapu ohashi ulike kondodo ye likalekelwa oyo hai pewa ovakalele ile ovapristeri okupitila meenghedindjikilile domavilikilo opambelewa, oo a kwatakanifwa kumwe nomadiviliko oufemba wokuudifa Ondjovo ile okukwatela komesho omasakramenti ile okulonga aishe ivali.” Olyelye ha yapula ovakalele? The New Encyclopædia Britannica otai ti: “Meengeleka odo di na ondodo youbishofi, okuyapula ovakalele alushe ohaku ningwa komubishofi. Meengeleka doPresbiteria, eyapulo ohali ningwa kovakalele ovo ve na ondodo yokuyapula.”

⁴ Hano, meengeleka dOukwakriste, oufembanghenda wokukala omukalele owa kala wa ngabekwa neenghono. Ndelenee, eshi hasho shi li ngaho mokati kEendombwedi daJehova. Omolwashike? Omolwaashi kasha li yo ngaho meongalo lopaKriste lomefelemido lotete.

Oolyelye ve li shili ovakalele vaKalunga?

5. PaMbibeli ovo tava longo ve li ovakalele ova kwatela mo oolyelye?

⁵ PaMbibeli, aveshe ovo tava longele Jehova—meulu nokombada yedu—ovo ovakalele. Ovaengeli ova yakula Jesus. (Mateus 4:11; 26:53; Lukas 22:43) Ovaengeli otava ‘yakula yo ovo tava ka fyuulula exupifo.’ (Ovaheberi 1:14; Mateus 18:10) Jesus okwa kala omukalele. Okwa popya ta ti: ‘Omona wOmunhu ine uya okuyakulwa, ndele okuyakula.’ (Mateus 20:28; Ovaroma 15:8) Onghee hano molwaashi ovashikuli vaJesus okwa li ve na ‘okushikula oshikoti shaye,’ itashi kumwifa kutya navo ove na okukala ovakalele.—1 Petrus 2:21.

6. Jesus okwe shi ulika ngahelipi kutya ovahongwa vaye ove na okukala ovakalele?

⁶ Okafimbo manga ina londa meulu, Jesus okwa lombwela ovahongwa vaye ta ti: “Indeni . . . ka ningeni ovanhu [vomoiwana aishe] ovalongwa vange, noku va [ninginifa] medina laXe nolOmona nolOmhepo Iyapuki, noku va longa okudiinina aishe ei nde i mu lombwela.” (Mateus 28:19, 20, yelekanifa NW.) Ovahongwa vaJesus okwa li ve na okukala ovaningi vovahongwa—ve li ovakalele. Ovahongwa vape okwa li ve na okulihonga okudiinina omalombwelo aeshe aJesus, mwa kwatelwa oshipango shokutwikila komesho nokuninga ovanhu ovahongwa. Kutya nee omulumenhu ile omukainhu, omukulunhu ile okaana, omuhongwa washili waJesus Kristus oku na okukala omukalele.—Joel 2:28, 29.

7, 8. (a) Omishangwa dilipi po tadi ulike kutya Ovakriste aveshe vashili ovakalele? (b) Omapulo elipi taa pendulwa e na sha neyapulo?

⁷ Metwokumwe naashi, mefiku lOpentekoste 33 O.P., ovahongwa vaJesus aveshe ovo va li opo, ovalumenhu novakainhu, ove limbwanga mumwe mokupopya “oilonga inene yaKalunga.” (Oilonga 2:1-11) Natango vali, omuyapostoli Paulus okwa shanga ta ti: “Okwiitavela nomutima otaku yukipalifa, nokuhepaulula nokanya otaku xupifa.” (Ovaroma 10:10) Paulus ina popya eendjovo edi ta lombwele ongudu wonhumba ye likalekelwa yovakwamhepo, ndele okwa lombwela ‘ovaholike vaKalunga aveshe muRoma.’ (Ovaroma 1:1, 7) Sha faafana, ‘ovayapuki aveshe ava ve li muEfeso ovaitaveli muKristus Jesus’ okwa li ve na okukaleka ‘nelilongekeko tali di mevangeli lombili li ninge eenghaku keemhadi davo.’ (Ovaefeso 1:1; 6:15) Nosho yo aveshe ovo va pwilikina onhumwafo oyo ya shangelwa Ovaheberi okwa li ve na okukala va ‘diinina ehepaululo leteelelo lavo ve he nomatengauko.’—Ovaheberi 10:23.

⁸ Hano, onaini omunhu ha ningi omukalele? Noitya imwe, onaini ha yapulwa? Nolyelye he mu yapula?

Onaini omunhu e na okuyapulwa a ninge omukalele?

9. Onaini Jesus a yapulwa, nokwa yapulwa kulyelye?

⁹ Shi na sha nokutya onaini nonokutya omunhu oha yapulwa kulyelye, konakona oshihopaenenwa shaJesus Kristus. Ka li e na odjapo yeyapulo ile odigili okudja koseminali yonhumba okuulika kutya ye omukalele, navali ka li yo a yapulwa komunhu wonhumba. Hano, omolwashike hatu dulu okupopya kutya okwa li omukalele? Omolwaashi eendjovo daJesaja da nwefwa mo oda wanifilwa muye: ‘Omhepo yOmwene oi li kombada yange, osheshi Ye okwa vaeka nge ndi udife evangeli.’ (Lukas 4:17-19; Jesaja 61:1) Eendjovo odo, nope he na omalimbililo otadi ulike kutya Jesus okwa pewa elombwelo a udife onghundana iwa. Kulyelye? Molwaashi omhepo yaJehova oye mu vaeka omolwoilonga, osha yela kutya Jesus okwa yapulwa kuJehova Kalunga. Eshi osha ningwa naini? Doshili omhepo yaJehova oye uya kombada yaJesus eshi a ninginifwa. (Lukas 3:21, 22) Onghee hano, okwa yapulwa peninginifo laye.

10. Olyelye ha ningi omukalele Omukriste a kale ‘a wana’?

¹⁰ Ongahelipi kombinga yovashikuli vaJesus vomefelemido lotete? Ondodo yavo yokukala ovakalele nayo oya dja kuJehova. Paulus okwa ti: “Okuwana kwetu okwomuKalunga, ou e tu longekida yo, tu kale ovayakuli vehangano lipe.” (2 Ovakorinto 3:5, 6, OB-1954) Ongahelipi Jehova ha longekida ovalongeli vaye va kale va wana okuninga ovakalele? Konakona oshihopaenenwa shaTimoteus, oo a ifanwa kuPaulus “omukalele waKalunga monghundana iwa i na sha naKristus.”—1 Ovatessaloniki 3:2, NW.

11, 12. Ongahelipi Timoteus a ninga exumokomesho a ninge omukalele?

¹¹ Eendjovo edi da lombwelwa Timoteus otadi tu kwafele tu ude ko nghee ye a ninga omukalele: “Ndelenee ove kala muei we i longwa [nomwaayo ye ku tomha u itavele, NW], osheshi u mu shii ou e i ku longa, ndele omishangwa diyapuki ou di shii nghee wa dja mounona woye, edi di neenghono doku ku longa eendunge, u xupifwe mokwiitavela Kristus Jesus.” (2 Timoteus 3:14, 15) Ekanghameno leitavelo laTimoteus, olo kwa li li na oku mu linyengifa opo a udife moipafi, ola li eshiivo lOmishangwa. Mbela okulesha paumwene oko akuke kwa li kwa pumbiwa mwaasho? Hasho. Timoteus okwa li a pumbwa ekwafo opo a dule okumona eshiivo lashili nosho yo eudeko lopamhepo laasho a lesha. (Ovakolossi 1:9) Kungaha, Timoteus okwa li a ‘tomhwa a itavele.’ Molwaashi okwa li a shiiva Omishangwa okudja “mounona,” osha yela kutya ovahongi vaye votete ova li ina nosho yo inakulu molwaashi xe ka li omwiitaveli.—2 Timoteus 1:5.

¹² Ndelenee, okuninga omukalele kwaTimoteus okwa li kwa kwatela mo shihapu. Oshinima shimwe osho eshi kutya eitavelo laye ola pamekwa kokweendafana nOvakriste vakwao vomomaongalo opopepi. Otu shi shii ngahelipi? Molwaashi eshi Paulus a shakeneka Timoteus, omulumenhu omunyasha ou okwa li ta “popiwa nawa kovamwatate ovo va kala muListra nomuIkonio.” (Oilonga 16:2) Natango vali, momafimbo oo ovamwatate vonhumba okwa li hava shangele omaongalo eenhumwafo nelalakano loku a twa omukumo. Novapashukili okwa li have a talele po nelalakano loku a twa omukumo. Omafiloshisho a tya ngaha okwa kwafela Ovakriste ngaashi Timoteus opo va ninge exumokomesho lopamhepo.—Oilonga 15:22-32; 1 Petrus 1:1.

13. Onaini Timoteus a yapulwa a ninge omukalele, nomolwashike to dulu okutya exumokomesho laye lopamhepo inali xulila ashike opo?

¹³ Mokutala kelombwelo laJesus olo la shangwa muMateus 28:19, 20, ohatu dulu okukala noushili kutya efimbo lonhumba eitavelo laTimoteus ole ke mu linyengifa opo a hopaenene Jesus ndele ta ninginifwa. (Mateus 3:15-17; Ovaheberi 10:5-9) Naashi osha li edidiliko lokuliyandja kwaTimoteus kuKalunga nomutima aushe. Timoteus okwa ninga omukalele eshi a ninginifwa. Okudja opo, onghalamwenyo yaye, eenghono daye nakeshe shimwe okwe shi yandja kuKalunga. Eshi osha li oshitukulwa sha fimana shokulongela Kalunga kwaye, “oshilonga shiyapuki.” Ndele nande ongaho, Timoteus ina kala e wete aishe e i wanifa po eshi a ninga omukalele. Okwa twikila okuninga exumokomesho pamhepo nokwa ninga omukalele Omukriste a kula pamhepo. Eshi osha holoka po omolweendafano lopofingo laTimoteus nOvakriste ovo va kula pamhepo ngaashi Paulus, ekonakono laye lopaumwene nosho yo oilonga yaye yokuudifa nouladi.—1 Timoteus 4:14; 2 Timoteus 2:2; Ovaheberi 6:1.

14. Kunena, ongahelipi umwe oo a e na “oikala ya yuka nokuya momwenyo waalushe” ha xumu komesho a ninge omukalele?

¹⁴ Kunena okuyapulwa omolwoukalele wopaKriste okwa faafana. Omunhu oo e “na oikala ya yuka nokuya momwenyo waalushe” oha kwafelwa e lihonge shi na sha naKalunga osho yo omalalakano aye okupitila mekonakonombibeli. (Oilonga 13:48, NW) Omunhu ohe lihongo okulongifa omafinamhango Ombibeli monghalamwenyo yaye nosho yo okwiilikana kuKalunga e na elalakano. (Epsalme 1:1-3; Omayeletumbulo 2:1-9; 1 Ovatessaloniki 5:17, 18) Oha endafana novaitaveli vakwao noha longifa ouwa womafiloshisho nosho yo omalongekido haa ningwa ‘komupiya omudiinini nomunaendunge.’ (Mateus 24:45-47; Omayeletumbulo 13:20; Ovaheberi 10:23-25) Kungaha ota ningi exumokomesho momulandu wehongo oo wa tulwa po.

15. Oshike hashi ningwa po ngeenge omunhu ta ninginifwa? (Tala yo eshangelo lopedu.)

¹⁵ Hauxuuninwa, omukonakonimbibeli eshi a kulika ohole yokuhola Jehova Kalunga nosho yo eitavelo la kola mekuliloyambo, oha kala a hala okuliyandjela filufilu Xe yomeulu. (Johannes 14:1) Eliyandjo ohe li ningi meilikano lopaumwene opo nee ta ninginifwa shi li edidiliko lomoipafi longhatu oyo a katuka paumwene. Okuninginifwa kwaye oko eyapulo laye molwaashi kungaha opo ashike ha valulwa e li omupiya waKalunga e liyandja filufilu, e li di·aʹko·nos. Oku na okukala a yooloka ko kounyuni. (Johannes 17:16; Jakob 4:4) Okwe liyandja ye mwene nomutima aushe e li “eyambo liyapuki li nomwenyo, la wapalela Kalunga.” (Ovaroma 12:1)b Oku li omukalele waKalunga, ta hopaenene Kristus.

Oukalele wopaKriste oshike?

16. Imwe yomoinakuwanifwa oyo Timoteus kwa li e na e li omukalele ilipi?

¹⁶ Oukalele waTimoteus okwa li wa kwatela mo shike? Okwa li e na oshilonga she likalekelwa e li omweendi pamwe naPaulus. Naashi a ninga omukulunhuongalo, Timoteus okwa longa noudiinini mokuhonga nomokupameka Ovakriste vakwao. Ndele ngaashi yo sha li moukalele waJesus nowaPaulus, oshitukulwa sha fimana shoukalele waye osha li okuudifa onghundana iwa nokuninga ovanhu ovahongwa. (Mateus 4:23; 1 Ovakorinto 3:5) Paulus okwa lombwela Timoteus ta ti: “Ndelenee ove kala omulidiliki moinima aishe, humbata oudjuu, longa oshilonga shomuudifi wevangeli, wanifa nawa oshilongayakulo shoye.”—2 Timoteus 4:5, eendada ofye twe di shanga da endama.

17, 18. (a) Ovakriste ohava kufa ombinga moukalele washike? (b) Oilonga yokuudifa oya fimana shi fike peni komukalele Omukriste?

¹⁷ Eshi osha faafana novakalele Ovakriste kunena. Ohava kufa ombinga moukalele womoipafi, oshilonga shokuudifa, okuulikila vamwe kexupifo le likolelela keyambo laJesus nokuhonga ovo ve li ovalininipiki va ifane edina laJehova. (Oilonga 2:21; 4:10-12; Ovaroma 10:13, NW) Ohave shi ulike okudja mOmbibeli kutya Ouhamba oo auke eteelelo kovanhu aveshe ovo tava mono oixuna nokuulika kutya nokuli nopaife oinima oi li xwepo ngeenge tu li metwokumwe nomifikamhango daKalunga. (Epsalme 15:1-5; Markus 13:10) Ndele omukalele Omukriste iha udifa ashike evangeli loilonga yokukwafela ovanhu. Mepingafano naasho, oha hongo kutya ‘etilokalunga oli na eudaneko lomwenyo wopaife nowokomesho.’—1 Timoteus 4:8.

¹⁸ Doshili, ovakalele vahapu ove na oilonga ya wedwa oyo ve na okulonga, oyo tashi dulika i kale ya yoolokafana pokati kOmukriste ou nOmukriste mukwao. Vahapu ove na oinakuwanifwa youkwaneumbo. (Ovaefeso 5:21–6:4) Ovakulunhuongalo novayakuliongalo ove na oilonga oyo ve na okulonga meongalo. (1 Timoteus 3:1, 12, 13; Titus 1:5; Ovaheberi 13:7) Ovakriste vahapu otava kwafele mokutunga Omalupale Ouhamba. Vamwe ove na oufembanghenda wa denga mbada wokulonga ve li ovaliyambi mulimwe lomomaumbo aBetel Ehangano loWatch Tower. Ndele nande ongaho, ovakalele Ovakriste aveshe ohava kufa ombinga meudifo longhundana iwa. Kape na ou a patelwa pondje. Okukufa ombinga moilonga ei oko haku ulike moipafi kutya omunhu oku li omukalele washili Omukriste.

Oikala yomukalele Omukriste

19, 20. Ovakalele Ovakriste ove na okukulika oikala ilipi?

¹⁹ Vahapu vomovakalele vOukwakriste ohava teelele okupewa efimaneko le likalekelwa nove na nee omadinafimaneko ngaashi “omufitaongalo” nosho yo “pata.” Ndelenee omukalele Omukriste oku shii kutya Jehova oye aeke a wana okupewa efimano. (1 Timoteus 2:9, 10) Kape na omukalele Omukriste ta pula a pewe efimano lopombada la tya ngaho ile a lalakanene omadinafimaneko e likalekelwa. (Mateus 23:8-12) Oku shii kutya eityo lopehovelo loshitya di·a·ko·niʹa olo “oshilongayakulo.” Oshityalonga osho tashi kwatakanifwa nasho omafimbo amwe mOmbibeli osha longifwa shi na sha noilongayakulo yopaumwene ngaashi okuwaitela poitaafula yokulila. (Lukas 4:39; 17:8; Johannes 2:5) Ndele nande okulongifwa kwoshitya di·aʹko·nos mekwatafano noukalele wopaKriste otaku ulike ondodo yopombada unene, natango tuu otashi ulike komupiya.

²⁰ Kape na omukalele Omukriste e na etomheno okukala e udite kutya ye okwa fimana. Ovakalele vashili Ovakriste—nokuli naavo ve na oinakuwanifwa ye likalekelwa meongalo—ove li ovapiya ve lininipika. Jesus okwa ti: “Ndelenee ou womunye a hala a ninge munene mokati keni, ye na kale omuyakuli weni, naau womokati keni a hala a kale wokomesho, ye na kale omupiya waaveshe.” (Mateus 20:26, 27) Eshi a ulikila ovahongwa vaye va kulike oikala ya yuka, Jesus okwa kosha eemhadi davo, a longa oilonga yomupiya ou e li pedu inaku shiya vali. (Johannes 13:1-15) Kashi fi tuu oshilonga shelininipiko! Hano ovakalele Ovakriste ohava longele Jehova Kalunga naJesus Kristus nelininipiko. (2 Ovakorinto 6:4; 11:23) Mokuyakulafana otava ulike elininipiko lokomutima. Naashi tava udifa onghundana iwa, otava yakula ovanhu vakwao ovo ve he fi ovaitaveli tave shi ningi panghedi yokuhelihola mwene.—Ovaroma 1:14, 15; Ovaefeso 3:1-7.

Lididimikila oukalele

21. Ongahelipi Paulus kwa li a pewa ondjabi omolwokulididimika moukalele?

²¹ KuPaulus, opo a kale omukalele osha pula elididimiko. Okwa lombwela Ovakolossi kutya okwa mona oixuna neenghono opo a dule oku va udifila onghundana iwa. (Ovakolossi 1:24, 25) Ndele molwaashi okwa li e lididimika, vahapu ova tambula ko onghundana iwa nova ninga ovakalele. Ova dalululwa ve li ovanamati vaKalunga novamwaxe vaJesus Kristus, ve na eteelelo loku ka ninga ovashitwa vopamhepo ovo tava ka kala pamwe naye meulu. Ei kai fi tuu ondjabi yoshinge omolwokulididimika kwavo!

22, 23. (a) Omolwashike ovakalele Ovakriste va pumbwa elididimiko kunena? (b) Oshiimati shikumwifi shilipi hashi di melididimiko lopaKriste?

²² Elididimiko ola pumbiwa kunena kwaavo ve li shili ovakalele vaKalunga. Vahapu otava kondjo efiku keshe nomikifi ile omauyahame oo haa etwa koukulupe. Ovadali otava longo noudiinini—vahapu vomuvo kave na kaume komohombo—va tekule ounona. Ounona kofikola otava ekeleshi nouladi omanwefemo a puka oo e va dingilila. Ovakriste vahapu otava kondjo omolwouxupilo oo mwii. Natango, vahapu otava hepekwa ile tava mono oixuna ‘omolwomafimbo madjuu okukaliwa muo’ kunena. (2 Timoteus 3:1, NW) Heeno, konyala ovakalele vaJehova omamiliyona ahamano otava dulu okupopya metwokumwe nomuyapostoli Paulus tava ti: “Moinima aishe ohatu liholola ofye ovayakuli vaKalunga: omelididimiko linene.” (2 Ovakorinto 6:4) Ovakalele Ovakriste ihava sholola. Doshili, ove na okupandulwa omolwokulididimika kwavo.

²³ Kakele kaasho, ngaashi sha li moshinima shaPaulus, okulididimika ohaku eta oiimati ikumwifa. Okupitila mokulididimika ohatu kaleke po ekwatafano letu lopofingo naJehova nohatu hafifa omutima waye. (Omayeletumbulo 27:11) Ohatu pameke eitavelo letu vene nosho yo ohatu ningi ovanhu ovahongwa noku va weda moumwainafana wopaKriste. (1 Timoteus 4:16) Jehova okwa kala ta pameke ovakalele vaye nokwa nangeka noupuna oukalele wavo momafiku aa axuuninwa. Oshidjemo, ovo va xuuninwa vomo 144 000 ova ongelwa, nosho yo omamiliyona mahapu oku na eteelelo loku ka hafela omwenyo waalushe moparadisa kombada yedu. (Lukas 23:43; Ehololo 14:1) Doshili, oukalele wopaKriste oo euliko longhenda yaJehova. (2 Ovakorinto 4:1) Atusheni natu u diinine nokukala nehafo molwaashi oshiimati shao otashi kalele.—1 Johannes 2:17.

[Omashangelo opedu]

[Efano pepandja 15]

Eninginifo oli li edidiliko lokuliyandja kuKalunga noli li edidiliko kutya omunhu okwa yapulwa e li omukalele

[Efano pepandja 17]

Timoteus okwa li a hongwa Eendjovo daKalunga okudja kouhanana. Eshi a ninginifwa okwa ninga omukalele a yapulwa

[Efano pepandja 18]

Ovakalele Ovakriste ohava yakula nehalo liwa

[Efano pepandja 18]

Oto dulu okuyelifa?

• Ovakriste aveshe vomefelemido lotete okwa li va kufa ombinga moshinakuwanifwa shilipi?

• Onaini omukalele Omukriste e na okuyapulwa, noha yapulwa kulyelye?

• Omukalele Omukriste oku na okukulika oikala ilipi?

• Omolwashike omukalele Omukriste e na okulididimika ngeenge ta hangika komaudjuu?