Exupifo laavo va hoolola ouyelele
“Omwene, Oye ouyelele wange nexupifolao lange; Olyelye ndi tile ngeno?”—EPSALME 27:1.
JEHOVA oye Odjo youyelele weenhe detango odo hadi ningi okukalamwenyo ku kale taku shiiva kombada yedu. (Genesis 1:2, 14) Oku li yo Omushiti wouyelele wopamhepo, oo tau kufa po omilaulu defyo dounyuni waSatana. (Jesaja 60:2; 2 Ovakorinto 4:6; Ovaefeso 5:8-11; 6:12) Ovo va hoolola ouyelele otava dulu okupopya pamwe nomupsalme tava ti: “Omwene, Oye ouyelele wange nexupifolao lange; Olyelye ndi tile ngeno?” (Epsalme 27:1a) Ndelenee ngaashi sha ningilwe mefimbo laJesus, ovo va hoolola omilaulu otava dulu ashike okuteelela etokolo lii.—Johannes 1:9-11; 3:19-21, 36.
2. Momafimbo onale, oshike sha ningilwa ovo va ekelashi ouyelele waJehova nosho yo ovo va pwilikina keendjovo daye?
2 Momafiku aJesaja, vahapu vomoshiwana shehangano laJehova ova ekelashi ouyelele. Oshilanduliko, Jesaja okwa mona ehanauno louhamba wokolundume woshiwana shaIsrael. Opo nee mo 607 K.O.P., Jerusalem notembeli yasho oya hanaunwa po novakalimo vaJuda ova twalwa moukwatwa. Ndelenee, ovo va pwilikina keendjovo daJehova ova pamekwa ve he liyandje koushunimonima wopefimbo opo. Shi na sha no 607 K.O.P., Jehova okwa udaneka kutya ovo va pwilikina kuye otava ka xupa. (Jeremia 21:8, 9) Kunena, fye ovo tu hole ouyelele ohatu dulu okulihonga shihapu mwaasho sha ningwa nale.—Ovaefeso 5:5.
Ehafo laavo ve li mouyelele
3. Kunena, ohatu dulu okukala nelineekelo lashike, notu hole “oshiwana shiyuki” shilipi, ‘noshiwana’ eshi oshi na “oshilando sha pama” shilipi?
3 “Fye otu na oshilando sha pama, [Kalunga] exupifo ote li ningi ngaashi omakuma noluumbo [lomamanya]. Yeululeni oivelo, oshiwana shiyuki opo shi shiive okuya mo, eshi sha kala oshidiinini.” (Jesaja 26:1, 2) Edi eendjovo dihafifa kovanhu ovo va li ve lineekela muJehova. Ovajuda ovadiinini vopefimbo laJesaja ova li va tala kuJehova e li oye aeke Odjo yashili yeameno, ndele hakoikalunga yovanhu vakwao vomoshilongo shavo. Kunena otu na elineekelo la faafana. Kakele kaasho, fye otu hole “oshiwana shiyuki” shaJehova—‘Israel yaKalunga.’ (Ovagalati 6:16; Mateus 21:43) Jehova naye oku hole oshiwana eshi omolwelihumbato lasho loudiinini. Molwenangeko noupuna laye, Israel yaKalunga oku na “oshilando sha pama,” ehangano la fa oshilando olo tali shi yambidida noku shi amena.
4. Ohatu ningi nawa ngeenge hatu kulike oikala yopamadiladilo ilipi?
4 Ovo ve li ‘moshilando’ eshi ove shii kutya ‘ou e na eendunge da pama, Jehova ote mu diinine mombili, heeno, ombili, osheshi okwe mu lineekela.’ Jehova oha yambidida ovo ve na ehalo loku mu lineekela nokukala metwokumwe nomafinamhango aye ouyuki. Kungaha, ovadiinini vomuJuda ova li va pwilikina elondwelo laJesaja tali ti: “Lineekeleni Omwene alushe osheshi Omwene Kalunga Oye emanya laalushe.” (Jesaja 26:3, 4, Epsalme 9:11; 37:3; Omayeletumbulo 3:5) Ovo ve na elineekelo la tya ngaha ohava tale ‘kOmwene’ e li Emanya leameno. Otava hafele ‘ombili yaalushe’ naye.—Ovafilippi 1:2; 4:6, 7.
Okuxutulwa kwovatondi vaKalunga
5, 6. (a) Ongahelipi Babilon shonale sha xutulwa? (b) Omonghedi ilipi “Babilon Shinene” sha xutulwa?
5 Mbela oshike ngeenge ovo ve lineekela muJehova tava mono oixuna koudjuu? Inava pumbwa okutila. Jehova okwa pitika ashike oinima ya tya ngaho oule wokafimbo, ndele konahiya ota ka eta ehekeleko, naavo tava eta oupyakadi ova taalela etokolo laye. (2 Ovatessaloniki 1:4-7; 2 Timoteus 1:8-10) Diladila koushili woshinima ‘oshilando she litumba.’ Jesaja ota ti: “[Jehova] okwa xutula poshi oonakukala pombada, noshilando she litumba pombada, Ye e shi finda poshi [nokwe] shi ngumauna poshi fiyo mondwi. Omhadi otai shi lyataula, eemhadi deehepele nomanha ovaxupi.” (Jesaja 26:5, 6) Oshilando she litumba sha tumbulwa apa otashi dulika shi kale Babilon. Doshili, oshilando osho osha hepeka oshiwana shaKalunga. Ndelenee mbela oshike sha ningilwa Babilon? Mo 539 K.O.P., osha findwa kOvamedia nOvapersia. Okuxutulwa oku fike peni!
6 Mefimbo letu, eendjovo dexunganeko laJesaja otadi yelifa nawa osho sha ningilwa ‘Babilon Shinene’ okudja mo 1919. Oshilando osho she litumba pombada osha fifwa ohoni modula oyo eshi kwa li sha fininikwa shi mangulule oshiwana shaJehova moukwatwa wopamhepo. (Ehololo 14:8) Eshi sha ka landula ko osha li okuxutulwa kwa kula. Okangudu aka kOvakriste kanini oka “lyataula” ovo kwa li ve ka tula moukwatwa. Mo 1922 ova hovela okuudifa exulilo lOukwakriste olo tali uya, ova xumifa komesho omatumwalaka ane eshiko lomanghuma oo a shikwa kovaengeli mEhololo 8:7-12 nosho yo eewoo di li nhatu da xunganekwa mEhololo 9:1–11:15.
“Elila lomuyuki ola yuka”
7. Ovo tava taalele kouyelele waJehova otava mono ewiliko lilipi, ove na eteelelo mulyelye, nove hole unene shike?
7 Jehova oha yandje exupifo kwaavo tave liameke kouyelele waye, noha wilike elila lavo, ngaashi Jesaja ta twikile oku shi ulika ta ti: “Elila lomuyuki ola yuka, elila lomuyuki, Ove to li yelakanifa. Heeno, otwe ku teelela yo mondjila yomatokolo oye. Akutu Omwene, omwenyo wetu tau djuulukwa edina loye noku li dimbulukwa.” (Jesaja 26:7, 8) Jehova oKalunga omuyuki, naavo tave mu longele ove na okudiinina omifikamhango douyuki waye. Eshi tave shi ningi, Jehova ote va wilike nota yelakanifa elila lavo. Mokupwilikina ewiliko laye, ovalininipiki ava otava ulike kutya ove lineekela muJehova nove hole edina laye—“edimbulukifo” laye—nomutima aushe.—Exodus 3:15, NW.
8. Jesaja okwa tula po oikala ya tya ngahelipi i shii kuhopaenenwa?
8 Jesaja okwa li e hole edina laJehova. Eshi oshi wetike meendjovo daye da shikula ko tadi ti: “Omwenyo wange ohau ku djuulukwa oufiku, heeno, nomhepo yange meni lange otai ku kongo, osheshi omatokolo oye, ngenge taa hange edu, ovakwaunyuni otave lihongo ouyuki.” (Jesaja 26:9) Jesaja okwa kala e hole Jehova ‘nomwenyo waye’—sha hala okutya, nomutima waye aushe. Kala nee wa fa u wete omuprofeti eshi ta longifa omafimbo elimweneneno okonguloshi a ilikane kuJehova, ndele ta popi omadiladilo aye omoule nokukonga ewiliko laJehova nomutima aushe. Kashi fi tuu oshihopaenenwa shiwa! Kakele kaasho, Jesaja okwe lihonga ouyuki moilonga yaJehova yokutokola. Mwaashi, ote tu dimbulukifa omhumbwe yokukala twa vendjavendja nokukala oupafi tu shiive ehalo laJehova.
Vamwe ova hoolola omilaulu
9, 10. Oilonga yolune yashike Jehova a longa shi na sha noshiwana shaye shi he fi shidiinini, nokwa li she linyenga ngahelipi?
9 Jehova okwa ulika olune li na ohole inene kOvajuda, ndelenee mupya munene haaveshe kwa li ve linyenga. Vahapu ova hoolola ounashibofa noushunimonima ponhele youyelele woshili yaJehova. Jesaja okwa ti: “Ou e he na Kalunga nande na filwe onghenda, ite lilongo okushiiva ouyuki, medu louyuki oha kolokosha, ndele iha mono oshinge shOmwene.”—Jesaja 26:10.
10 Pefimbo laJesaja, eshi eke laJehova la amena Juda kovatondi vaye, vahapu ova anya oku shi dimina. Eshi e va nangeka noupuna nombili yaye, oshiwana inashi ulika olupandu. Onghee hano, Jehova okwe shi efa shi longele “oovene vamwe,” nohauxuuninwa okwa efa Ovajuda va twalwe moukwatwa muBabilon mo 607 K.O.P. (Jesaja 26:11-13) Ndelenee, konahiya oshixupe shoshiwana osho sha li sha handukilwa, osha alukila kedu lasho.
11, 12. (a) Oonakukwatako Juda ova li nonakwiiwa yashike? (b) Mo 1919 onakwiiwa okwa li i kwetele shike oonakukwata vonale vovapiya vaJehova ovavaekwa?
11 Ongahelipi shi na sha noonakukwatako Juda? Jesaja ota nyamukula paxunganeko ta ti: “Ovo ova fya, itava ningi ovanamwenyo, ovo nomididimbe itava nyumuka. Ove we va handukila, we va hanauna po, ndele wa dima po edimbuluko lavo.” (Jesaja 26:14) Heeno, konima yetekepo laye mo 539 K.O.P., Babilon ka li e na onakwiiwa yasha. Meni lefimbo, oshilando osha li itashi ka kala po vali. Okwa li tashi ka ‘hanaunwa po,’ nouhamba washo wa kula okwa li tau ka ninga oshinima shomomambo ondjokonona. Kali fi tuu elondwelo kwaavo ve lineekela movanaenghono vounyuni ou!
12 Oitukulwa i na sha nexunganeko eli oya wanifwa eshi Kalunga a pitika ovapiya vaye ovavaekwa va ye moukwatwa wopamhepo mo 1918 nokwe va mangululifa mo 1919. Okudja opo, onakwiiwa yoonakushikwatako nale, unene Oukwakriste, oya li i he na eteelelo. Ashike omanangeko noupuna oo kwa li a tuvikililwa oshiwana shaJehova okwa li mahapu shili.
“Ove wa hapupalifa oshiwana”
13, 14. Ovapiya vaJehova ovavaekwa ova hafela omanangeko noupuna ashike okudja mo 1919?
13 Kalunga okwa nangeka noupuna omhepo yelivelombedi yovapiya vaye ovavaekwa, nomo 1919 okwe va hapupalifa. Tete, elitulemo ola li la yandjwa keongelo loilyo yaxuuninwa yaIsrael yaKalunga, nokonima okwa hovelwa okwoongela “ongudu inene” ‘yeedi dimwe.’ (Ehololo 7:9; Johannes 10:16, OB-1954) Omanangeko noupuna aa okwa xunganekwa mexunganeko laJesaja tali ti: “Akutu Omwene, Ove wa hapupalifa oshiwana, oshiwana we shi hapupalifa, ndele wa holola oshinge shoye, ndele wa tandavelifa eengaba doshilongo. Omwene, moudjuu otave ku kongo, omailikano avo ove a tilashi, outekuhandu woye eshi we va hanga.”—Jesaja 26:15, 16.
14 Kunena, eengaba daIsrael yaKalunga oda tamunuka mo keembinga adishe dedu, nongudu inene oyo ya wedwa po paife i fike pomamiliyona ahamano otai kufa ombinga nouladi moilonga yokuudifa onghundana iwa. (Mateus 24:14) Kali fi tuu enangeko noupuna la dja kuJehova! Naashi inashi fimanekifa tuu edina laye! Kunena edina olo otali udika moilongo 235—ewanifo linene lomaudaneko aye.
15. Enyumuko lopafaneko lashike la ningwa mo 1919?
15 Juda okwa li a pumbwa ekwafo laJehova opo a dje moukwatwa muBabilon. Kava li tava dulu oku shi ninga kuvo vene. (Jesaja 26:17, 18) Sha faafana, emangululo laIsrael yaKalunga mo 1919 ola li euliko lekwafo laJehova. Kakwa li tali dulu okuningwa nope he na ekwafo laye. Onghalo yavo oya lunduluka ombaadilila unene, omolwaasho Jesaja okwe i faafanifa nenyumuko: “Ovafi voye otava ka ninga ovanamwenyo, oimhu yange otai ka nyumuka. Dudulukeni, nye mu nyakukwe, onye amushe ava mwa nangala mondwi, osheshi omume yoye oyo omume youyelele, nedu otali ka eta mo ovafi [va dalululwa, NW].” (Jesaja 26:19; Ehololo 11:7-11) Heeno, ovo ve li meenghono defyo, otava ka dalululwa, opo va tameke vali oilonga!
Eameno momafimbo oshiponga
16, 17. (a) Mo 539 K.O.P., oshike osho Ovajuda va li va pumbwa okuninga opo va dule okuxupa metekepo laBabilon? (b) ‘Eenduda’ osha yela kutya otadi faneke shike kunena, nongahelipi hatu mono mo ouwa?
16 Ovapiya vaJehova ova pumbwa alushe eameno laye. Ndelenee diva ota ka nana eke laye oshikando shaxuuninwa okukondjifa ounyuni waSatana, novalongeli vaye otava ka kala va pumbwa ekwafo laye shi dulife nale. (1 Johannes 5:19) Shi na sha nefimbo eli loshiponga, Jehova ote tu londwele ta ti: “Hano oove, oshiwana shange, liidilila monduda yoye, u ka hondame okafimbo kanini, fimbo oupyuhandu tau pitilile po. Osheshi tala, Omwene ta ka fikama a dje monhele yaye nonghone, a ka pule oilonga ii yoonakukala kombada yedu, nedu eli la pona ohonde otali i holola, ndele itali tuvike vali oonakudipawa valo.” (Jesaja 26:20, 21; Sefanja 1:14) Elondwelo eli ola ulikila Ovajuda nghee ve na okuxupa metekepo laBabilon mo 539 K.O.P. Ovo va pwilikina kulo ova dula okukala momaumbo avo, va amenwa kovakwaita ovafindani momapandavanda.
17 Kunena, ‘eenduda’ dexunganeko osha yela kutya otadi faneke omaongalo omayovi omilongo oshiwana shaJehova mounyuni aushe. Omaongalo a tya ngaha oku li eameno nokuli nopaife, onhele omo Ovakriste tava mono eameno mokati kovamwaxe, koshi yefiloshisho lopahole lovakulunhuongalo. (Jesaja 32:1, 2; Ovaheberi 10:24, 25) Eshi oshoshili unene tuu moku shi talela kexulilo longhalelo yoinima ei olo li li popepi eshi exupifo tali ka kala le likolelela kokudulika.—Sefanja 2:3.
18. Ongahelipi Jehova ta ka “dipaa” diva ‘ongadu yomefuta’?
18 Shi na sha nefimbo olo, Jesaja ota xunganeke: “Mefiku tuu olo Omwene ota ka tokola, ndee ta tu neongamukonda laye la pama nolinene nolidjuu, Leviatan, eyoka li nonhapo, naLeviatan, eyoka hali ngolyauka, nongadu yomefuta ote i dipaa po.” (Jesaja 27:1) Mbela “Leviatan” wonena oshike? Osha yela kutya olo “eyoka likulu,” Satana ye mwene pamwe nonghalelo yaye yoinima ya nyonauka, oyo ta longifa okushingila oita Israel yaKalunga. (Ehololo 12:9, 10, 17; 13:14, 16, 17) Mo 1919, Leviatan okwa kanifa eenghono daye kombada yoshiwana shaKalunga. Konima yefimbo, otashi ka halakana po filufilu. (Ehololo 19:19-21; 20:1-3, 10) Kungaha, Jehova ota ka ‘dipaa ongadu yomefuta.’ Pokati opo, kape na nande osha osho Leviatan ta kendabala mokukondjifa oshiwana shaJehova tashi ka pondola. (Jesaja 54:17) Kashi hekeleka tuu okukala twa shilipalekwa kombinga yaasho!
‘Oshikokola shomaviinyu mawa’
19. Onghalo yoshixupe oi li ngahelipi kunena?
19 Mokutala komauyelele aeshe aa a dja kuJehova, mbela katu na etomheno keshe lokuhafa? Heeno, osho! Jesaja ota hokolola nawa ehafo loshiwana shaJehova eshi a shanga ta ti: “Mefiku tuu olo otapu tiwa: Ope na oshikokola shomiviinyu, shomaviinyu mawa, shi imbeni! Aame Omwene, omunangeli washo: Ohandi shi tekele omafimbo aeshe; ohandi ke shi amena oufiku nomutenya, opo shi ha mone nande oshiponga.” (Jesaja 27:2, 3) Jehova okwa fila oshisho “oshikokola shomiviinyu” shaye, oshixupe shaIsrael yaKalunga, osho yo oilonga yavo youdiinini. (Johannes 15:1-8) Oshidjemo osha li sha eta oiimati oyo ya tumbalekifa edina laye noya etifa ehafo linene mokati kovapiya vaye kombada yedu.
20. Ongahelipi Jehova ha amene eongalo lopaKriste?
20 Ohatu dulu okukala twa hafa eshi ehandu laJehova lonale okuhandukila ovapiya vaye ovavaekwa—molwoku va efa va ye moukwatwa wopamhepo mo 1918—la lota. Jehova okwa popya ye mwene ta ti: “Muame kamu na ehandu. Ngeno ndi mone omakiya neeshosholo, onda hala oku i shingila oita noku shi xwika po ashishe mumwe, okuninga tava kongo eameno lange, ndee tava popi nombili naame, ombili naame.” (Jesaja 27:4, 5) Opo a shilipaleke kutya eeviinyu daye otadi twikile okwiima ‘omaviinyu mawa’ mahapu, Jehova ota nyanyaula nota hanauna po enwefemo keshe la fa eu olo tali dulu oku di nyonauna. Onghee hano, ino pitika nande oumwe a tule onghalonawa yeongalo lopaKriste moshiponga! Aveshe nava ‘konge eameno laJehova’ nokukonga okuhokiwa kuye. Moku shi ninga, ohatu ningi ombili naKalunga—oshinima osho sha fimana ngaashi Jesaja e shi tumbula luvali.—Epsalme 85:1, 2, 8; Ovaroma 5:1.
21. Omonghedi ilipi edu olo hali imike la li la yadifwa ‘oiimati’?
21 Omanangeko noupuna otaa twikile: “Momafiku okomesho Jakob ota ka twama, Israel ota ka temuna eenhemo, ndee ta tutuma nota yadifa ounyuni aushe noiimati.” (Jesaja 27:6) Ovelishe oyo oya wanifwa okudja mo 1919 notai yandje euliko likumwifa leenghono daJehova. Ovakriste ovavaekwa ova yadifa edu “noiimati,” oikulya yopamhepo tai palula. Mokati kounyuni wa nyonauka, ova hafa okudiinina omifikamhango daKalunga da denga mbada. Na Jehova ota ka twikila oku va nangeka noupuna nehapupalo. Oshidjemo, omamiliyona makwao, eedi dimwe, “otaa longele [Kalunga] oilonga iyapuki omutenya noufiku.” (Ehololo 7:15, NW) Inatu dimbwa nande oufembanghenda wa kula wokulya ‘moiimati’ oyo noku i pa vamwe!
22. Omanangeko noupuna ashike tae ya kwaavo va tambula ko ouyelele?
22 Momafimbo aa madjuu, eshi omilaulu da tuvika edu nosho yo eshi omilaulu fokofoko da tuvika oiwana, mbela inatu hafa tuu eshi Jehova ta yandje ouyelele wopamhepo koshiwana shaye? (Jesaja 60:2; Ovaroma 2:19; 13:12) Kwaaveshe ovo tave u tambula ko, ouyelele wa tya ngaha otau ka tya ombili yopamadiladilo nehafo paife nomonakwiiwa omwenyo waalushe nokuli. Netomheno liwa, fye ovo tu hole ouyelele ohatu yelula omitima detu mokutanga Jehova nokupopya pamwe nomupsalme: “Omwene, oye ohote yokukalamwenyo kwange; olyelye ta mbadapalifa nge vali? Teelela kOmwene! Kala wa yombama, omutima woye inau mbadapala; heeno, teelela kOmwene.”—Epsalme 27:1b, 14.
OSHISHANGOMWA SHIPE
Ouyelele muhapu wa kundafanwa moitukulwa ei ivali yokukonakonwa owa yandjelwe nale molupe loshipopiwa moprograma yoshoongalele shoshitukulwa sho 2000/2001. Pexulilo loshipopiwa, embo lipe ola yandjwa, li na oshipalanyole Isaiah’s Prophecy—Light for All Mankind I. Embo eli lomapandja 416 ola yelifa ovelishe novelishe yomatukulwa otete 40 embo laJesaja.
1. Jehova okwa ninga omafiloshisho elipi taa yandje omwenyo?
[Efano pepandja 26]
Ovayuki ovo ashike va pitikilwa ‘moshilando sha pama’ shaJehova, ehangano laye
[Efano pepandja 27]
Jesaja okwa konga Jehova “oufiku”
[Efano pepandja 29]
Jehova ota amene ‘oshikokola shaye shomiviinyu’ note shi imike oiimati
[Efano pepandja 30]
Oto dimbuluka?
• Onakwiiwa oyashike i li po kwaavo tava fininike oshiwana shaJehova?
• Ehapupalo lashike la xunganekwa muJesaja?
• Otu na okukala ‘meenduda’ dilipi, nomolwashike?
• Omolwashike onghalo yoshiwana shaJehova tai mu fimanekifa?