Kelididimiko leni wedei ko eliyandjo lometilokalunga

OKUKULA oshinima sha fimana kokaana, ndelenee opa pumbiwa shihapu shi he fi ashike okukula kwopalutu. Okukula pamadiladilo nosho yo pamaliudo nako okwa pumbiwa yo. Mokweendela ko kwefimbo, okaana otaka efa po eenghedi dako dokounona notaka kulu ka ninge omulumenhu ile omukainhu a kula. Omuyapostoli Paulus okwa ulika kwaasho eshi a shanga ta ti: “Ame eshi nda li okaana, onda tonga ngaashi okaana, nda shipununa ngaashi okaana, nonda diladila ngaashi okaana; ndelenee eshi nda ninga omukulunhu, onda efa ei yopakanona.”—1 Ovakorinto 13:11.

1, 2. (a) Okukula kulipi kwa teelelwa shi na sha nokaana? (b) Okukula kwopamhepo okwa fimana shi fike peni?

² Eendjovo daPaulus otadi divilike oshitwa sha fimana shi na sha nokukula pamhepo. Ovakriste ova pumbwa okuninga exumokomesho okudja mokukala ounona pamhepo nokuninga ‘ovakulunhu meendunge.’ (1 Ovakorinto 14:20, OB-1954) Ove na okukondja nokukendabala va fike “kewano louyadi waKristus.” Opo nee itava ka kala “ouhanana hava telaanifwa nohava fungaafungifwa keemhepo adishe delongo.”—Ovaefeso 4:13, 14.

3, 4. (a) Otu na okuninga shike opo tu kule pamhepo? (b) Omaukwatya opakalunga elipi tu na okuulika, nokwa fimana shi fike peni?

³ Mbela ongahelipi hatu dulu okukula pamhepo? Nonande okukula kwopalutu ohaku ningwa konyala pautomatika meenghalo dopaushitwe, okukula kwopamhepo otaku pula eenghendabala da diladilwa nawa. Ohaku tameke nokumona eshiivo lashili lEendjovo daKalunga nosho yo okukatuka metwokumwe naasho hatu lihongo. (Ovaheberi 5:14; 2 Petrus 1:3) Eshi otashi tu kwafele yo tu ulike omaukwatya opakalunga. Sha faafana nokukula kwopalutu nosho yo kwomaukwatya e lili noku lili oo a kwatelwa mokukula oko, okukula momaukwatya e lili noku lili opakalunga luhapu ohaku ningwa pefimbo limwe alike. Omuyapostoli Petrus okwa shanga ta ti: “Mokuyandja kweni hano neenghono adishe, keitavelo leni wedei ko ouwa, kouwa weni eshiivo, keshiivo leni elipangelo, kelipangelo leni elididimiko, kelididimiko leni eliyandjo lometilokalunga, keliyandjo leni lometilokalunga ohole yokuhola ovamwatate, kohole yeni yokuhola ovamwatate ohole yokuhola aveshe.”—2 Petrus 1:5-7, NW.

⁴ Oukwatya keshe wa tumbulwa kuPetrus owa fimanenena, nokape na umwe tau dulu okunukwa po. Okwa weda ko ta ti: “Oinima ei ngenge i li munye notai tane, itai mu efa, mu kale noundede ile mu he na oiimati yomokushiiva Omwene wetu Jesus Kristus.” (2 Petrus 1:8) Natu divilike omhumbwe yokuweda eliyandjo lometilokalunga kelididimiko letu.

Omhumbwe yelididimiko

5. Omolwashike twa pumbwa elididimiko?

⁵ Petrus naPaulus ova kwatakanifa eliyandjo lometilokalunga nelididimiko. (1 Timoteus 6:11, yelekanifa NW.) Okukala nelididimiko otashi ti shihapu shi he fi ashike okulididimikila oudjuu nokukala wa tokola toko. Okwa kwatela mo elidiiniko, ouladi nosho yo oudiinini, oku ha kanifa eteelelo ngeenge wa taalela omayeleko, omandangalati ile omahepeko. Molwaashi otu li “[meliyandjo lometilokalunga, NW] muKristus Jesus,” otwa teelela okuhepekwa. (2 Timoteus 3:12) Otu na okulididimika ngeenge otwa hala okuulika ohole yetu yokuhola Jehova nokukulika omaukwatya oo a pumbiwa omolwexupifo. (Ovaroma 5:3-5; 2 Timoteus 4:7, 8; Jakob 1:3, 4, 12) Ngeenge katu na elididimiko, itatu ka mona omwenyo waalushe.—Ovaroma 2:6, 7, NW; Ovaheberi 10:36.

6. Okulididimika fiyo exulilo otashi ti okuninga shike?

⁶ Kashi na nee mbudi kutya otwa tameka nawa ngahelipi, oshinima sha fimanenena okukala tu na elididimiko. Jesus okwa ti: “Ou te lididimike fiyo exulilo, oye ta xupifwa.” (Mateus 24:13) Heeno, otu na okulididimika fiyo exulilo, kutya nee pamwe exulilo longhalamwenyo yetu yopaife ile exulilo longhalelo ei yoinima youkolokoshi. Kashi na nee mbudi kutya omushike, otu na okukaleka po oudiinini wetu kuKalunga. Ndelenee, ngeenge itatu weda ko eliyandjo lometilokalunga kelididimiko letu, itatu dulu okuhafifa Jehova noitatu ka mona omwenyo waalushe. Ndelenee mbela eliyandjo lometilokalunga oshike?

Osho eliyandjo lometilokalunga tali ti

7. Eliyandjo lometilokalunga oshike, notali tu linyengifa tu ninge shike?

⁷ Eliyandjo lometilokalunga olo okufimaneka Jehova Kalunga, oku mu ilikana nosho yo oku mu longela paumwene u li omudiinini kounamapangelo waye weshito alishe. Okutula moilonga eliyandjo lometilokalunga shi na sha naJehova, otwa pumbwa eshiivo lashili loku mu shiiva nosho yo eendjila daye. Otu na okukala twa hala okushiiva nawa Kalunga. Eshi otashi ke tu linyengifa tu kulike ohole yoku mu hola tai di komutima, oyo hai ulikwa koilonga nokonghedi yetu yokukalamwenyo. Otu na okukala twa hala okukala twa fa Jehova ngaashi tashi shiiva—okuhopaenena eendjila daye nosho yo okuulika omaukwatya nosho yo ounhu waye. (Ovaefeso 5:1) Doshili, eliyandjo lometilokalunga otali tu linyengifa tu kale twa hala okuhafifa Kalunga mwaaishe oyo hatu ningi.—1 Ovakorinto 10:31.

8. Eliyandjo lometilokalunga nosho yo okuliyandjela Kalunga oye aeke oya kwatafana ngahelipi?

⁸ Opo tu tule moilonga eliyandjo lometilokalunga lashili, otu na okulongela Jehova oye aeke, noka tu na okweefa nande osha shi kale ponhele yaye momitima detu. E li Omushiti wetu, oku na oufemba okuliyandjelwa kufye oye aeke. (Deuteronomion 4:24; Jesaja 42:8) Ndelenee nande ongaho, Jehova ihe tu fininike tu mu longele. Okwa hala okuliyandja kwetu kwehalo liwa. Ohole yetu yokuhola Kalunga ya kanghamena keshiivo lashili loku mu shiiva, oyo tai tu linyengifa tu koshole okukalamwenyo kwetu noku mu liyapulila filufilu nokukala metwokumwe neliyapulo letu.

Kulika ekwatafano naKalunga

9, 10. Ongahelipi hatu dulu okukulika nokukaleka po ekwatafano lopofingo naKalunga?

⁹ Konima yokuninginifwa shi li euliko lokuliyapulila kwetu Kalunga, otwa pumbwa natango okukulika ekwatafano lopofingo naye. Onghee hano, ehalo letu loku shi ninga nosho yo lokulongela Jehova noudiinini otali tu linyengifa tu twikile okukonakona Eendjovo daye noku di dilonga. Eshi hatu efa omhepo yaKalunga i longe momadiladilo nomomitima detu, ohole yetu yokuhola Jehova otai ningi yomoule. Ekwatafano letu naye otali twikile okukala oshinima sha fimanenena monghalamwenyo yetu. Otwa tala ko Jehova e li Kaume ketu kopofingo notwa hala oku mu hafifa efimbo alishe. (1 Johannes 5:3) Ehafo letu lokuhafela ekwatafano letu liwa naKalunga otali kulu, notwa hafa eshi te tu hongo note tu pukulula pahole opo sha pumbiwa.—Deuteronomion 8:5.

¹⁰ Ngeenge itatu twikile okukatuka eenghatu tu pameke ekwatafano letu naJehova li na ondilo, otali dulu okunghundipala. Ngeenge eshi osha ningwa, itashi ka kala ondjo yaKalunga, omolwaashi “Oye ina kala kokule nafye nande oumwe.” (Oilonga 17:27) Inatu hafa tuu eshi Jehova ina ninga okupopya naye ku kale oshinima shidjuu! (1 Johannes 5:14, 15) Doshili, otu na okukendabala tu kaleke po ekwatafano lopofingo naJehova. Ndelenee, ote tu kwafele tu ehene popepi naye moku tu pa omafiloshisho aeshe oo twa pumbwa opo tu kulike notu kaleke po eliyandjo lometilokalunga. (Jakob 4:8) Ongahelipi hatu dulu okulongifa pauyadi omafiloshisho aeshe oo opahole?

Kala wa pama pamhepo

11. Oilonga imwe i na sha neliyandjo letu lometilokalunga oilipi?

¹¹ Ohole yetu yomoule yokuhola Kalunga otai ke tu linyengifa tu ulike ounene weliyandjo letu lometilokalunga metwokumwe nomayele aPaulus oo taa ti: “Diinina, u monike kuKalunga oove omufindani [momayeleko], omulongi ita fi ohoni oshilonga shaye, e shii okutukula nawa ondjovo yoshili.” (2 Timoteus 2:15) Okuninga ngaho otashi tu pula tu kaleke po elandulafano liwa lokukonakona Ombibeli alushe, okukala pokwoongala nokukufa ombinga moilonga yomomapya pe he na okufaula. Ohatu dulu yo okukala popepi naJehova ‘mokwiilikana tu he nedimbuko.’ (1 Ovatessaloniki 5:17) Oyo, oyo oilonga tai ti sha yokuulika eliyandjo letu lometilokalunga. Okweefa po shimwe shomuyo otashi dulika shi ete ouyahame wopamhepo noku tu ninga oihakanwa yoinheya yaSatana.—1 Petrus 5:8.

12. Ongahelipi hatu dulu okupondola mokukondjifa omayeleko?

¹² Okukala twa pama notwe lipyakidila pamhepo otashi tu kwafele yo tu kondjife omayeleko mahapu oo tae tu hange. Omayeleko otaa dulu okudja keedjo odo tadi dulu okutu yeleka neenghono. Okuhenakonasha, epataneko nosho yo omahepeko otaa dulu okukala madjuu okulididimikilwa ngeenge otaa etwa koilyo youkwaneumbo, kovapambele ile kovashiinda. Omafininiko opamakoto oo tae tu fininike tu efe omafinamhango etu opaKriste otaa dulu okuholoka po koilonga yetu ile keefikola. Etekomukumo, omikifi nosho yo epolimano otai dulu oku tu nghundipaleka palutu noku shi ninga shidjuu unene okukondjifa omayeleko eitavelo. Ndelenee ohatu dulu okupondola mokukondjifa omayeleko aeshe ngeenge ohatu diinine “meengeda diyapuki nomoilonga yomeliyandjo lometilokalunga, mokuteelela nokukaleka okukala po kwefiku laJehova momadiladilo.” (2 Petrus 3:11, 12, NW) Nohatu dulu okukaleka po ehafo letu moku shi ninga, twe lineekela omanangeko noupuna aKalunga.—Omayeletumbulo 10:22.

13. Oshike tu na okuninga ngeenge otwa hala okutwikila okutula moilonga eliyandjo lometilokalunga?

¹³ Nonande Satana ota lalakanene okuponokela ovo tava tula moilonga eliyandjo lometilokalunga, inatu pumbwa okukala twa tila. Omolwashike? Omolwaashi “Omwene e shii kuxupifa [ovanhu vometilokalunga, NW] momahongaulo.” (2 Petrus 2:9) Opo tu lididimikile omayeleko nopo tu mone exupifo la tya ngaho, otu na “[okweefa] okudina Kalunga nouhalu wopaunyuni, fye tu kale tu neendunge nouyuki [neliyandjo lometilokalunga, NW] fimbo tu li mounyuni ou wopaife.” (Titus 2:12) Tu li Ovakriste, otu na okukala twa lungama opo ounghundi keshe u na sha nouhalu nosho yo nomalipyakidilo opambelela u ha ye moshipala eliyandjo letu lometilokalunga noku li nyona po. Paife natu konakoneni amwe omomafininiko oo.

Lungamena omafininiko oo taa fininike eliyandjo lometilokalunga

14. Oshike tu na okudimbuluka ngeenge otwa kokwa tu ye momwiyo wokuhola omaliko?

¹⁴ Ohole yokuhola omaliko oi li omwiyo kuvahapu. Otashi dulika tu lifufye nokuli fye vene, “[hatu diladila kutya, eliyandjo lometilokalunga, NW] olo oshilikolifo shemona lomounyuni.” Nokungaha otashi tu ladipike tu lile ovaitaveli vakwetu ovo tava ulike elineekelo mufye. (1 Timoteus 6:5) Otashi dulika nokuli tu fike pexulifodiladilo la puka kutya oshi li nawa okufininika Omukriste oo e na omaliko e tu pe omukuli oo tashi dulika itatu ka dula oku u futa. (Epsalme 37:21) Ndelenee eliyandjo lometilokalunga olo “li neudaneko lomwenyo wopaife nowokomesho” ndele hakulimonena oinima yopamaliko. (1 Timoteus 4:8) Molwaashi ‘inatu eta mo sha mounyuni noitatu dulu okudja mo nasha,’ natu kale twa tokola toko okulalakanena ‘eliyandjo lometilokalunga nokukala twa wana naai tu na,’ tu kale ‘twa wanenwa koipalwifa noikutu.’—1 Timoteus 6:6-11, yelekanifa NW.

15. Ohatu dulu okuninga shike ngeenge okulalakanena omalihafifo otaku i moshipala eliyandjo letu lometilokalunga?

¹⁵ Okulalakanena omalihafifo otaku dulu okuya moshipala eliyandjo lometilokalunga. Mbela otashi dulika twa pumbwa okuninga omalunduluko omeendelelo moshinima eshi? Doshili, omauwa amwe ohaa monika medeulo lolutu nosho yo momalihafifo. Ndelenee, omauwa oo omanini noku a yelekanifa nomwenyo waalushe. (1 Johannes 2:25) Kunena, vahapu “ohole yavo yokuhola [omalihafifo oi] dule ei yokuhola Kalunga; ovo ve nemoniko longaho [leliyandjo lometilokalunga], ndelenee tava shilike eenghono dalo,” notwa pumbwa okukuma ovanhu va tya ngaho. (2 Timoteus 3:4, 5, yelekanifa NW.) Ovo va tula komesho eliyandjo lometilokalunga ove “[lituvikilila] emona tali ningi ekanghameno liwa laayo yokomesho, opo va mone omwenyo waalushe.”—1 Timoteus 6:19.

16. Omahalo oulunde elipi haa imbi vamwe va kale metwokumwe noiteelelwa yaKalunga youyuki, nongahelipi hatu dulu okufinda omahalo oo?

¹⁶ Oikolwifa, elongifo loingangamifi, oluhaelo nosho yo omahalo oulunde otai dulu okunyona po eliyandjo letu lometilokalunga. Okuliyandja koinima oyo otaku dulu oku tu imba okukala metwokumwe noiteelelwa yaKalunga iyuki. (1 Ovakorinto 6:9, 10; 2 Ovakorinto 7:1) Nokuli naPaulus okwa li e na okulididimikila ekondjo tali twikile lokukondjifa ombelela youlunde. (Ovaroma 7:21-25) Eenghatu da mana mo oda pumbiwa opo tu kufe po omahalo a puka. Oshinima shimwe sha fimana oshosho kutya otu na okukala twa tokola toko okukala twa koshoka paenghedi. Paulus ote tu lombwele ta ti: “Dipaeni . . . oinhimbu yeni yopadu: oluhaelo, onyata, olwisho loipala, okahalu [kai], nolwisho leliko olo elongelo loikalunga.” (Ovakolossi 3:5) Okudipaa oinhimbu yetu yolutu shi na sha noinima oyo youlunde otashi pula etokolotoko opo tu i kufe po. Eilikano la mana mo omolwekwafo laKalunga otali ke tu kwafela tu ekeleshi omahalo mai nokulalakanena ouyuki nosho yo eliyandjo lometilokalunga mokati konghalelo ei yoinima youkolokoshi.

17. Otu na okutala ko ngahelipi outekuduliko?

¹⁷ Etekomukumo otali dulu okunghundipaleka elididimiko letu nokweetela eliyandjo letu lometilokalunga oshiponga. Vahapu vomovapiya vaJehova ova li va teka omukumo. (Numeri 11:11-15; Esra 4:4; Jona 4:3) Etekomukumo otali dulu unene tuu oku tu etela oidjemo inyikifa oluhodi ngeenge otali endele pamwe nokukwatela onghone molwaashi tu udite twa nyematekwa ile molwaashi twa hanyenwa ile twa pewa outekuduliko wa kwata moiti. Ndelenee, okuhanyenwa nokupewa outekuduliko oyo euliko lohokwe nolukeno laKalunga lopahole. (Ovaheberi 12:5-7, 10, 11) Outekuduliko kau na okutalika ko u li ashike ehandukilo ndelenee onghedi yoku tu deula tu kale mondjila youyuki. Ngeenge otu li ova lininipiki, ohatu ka pandula nokutambula ko epukululo, twa dimina kutya “[ehanyeno] lomoutekuduliko olo ondjila yomwenyo.” (Omayeletumbulo 6:23) Eshi otashi dulu oku tu kwafela tu ninge exumokomesho liwa lopamhepo mokulalakanena eliyandjo lometilokalunga.

18. Otu na oshinakuwanifwa shilipi ngeenge tashi uya pokuhandukifwa?

¹⁸ Okuhaudafana nosho yo okuhandukifwa otai dulu okweeta eshongo keliyandjo letu lometilokalunga. Otai dulu okweeta oisho ile i linyengife vamwe va katuke eenghatu di he li pandunge dokulitongola ko vo vene kovamwaxe nokovamwaina vopamhepo. (Omayeletumbulo 18:1) Ndelenee oshiwa okudimbuluka kutya okukwatela onghone ile okukala noikala youtondwe shi nasha navamwe otaku dulu okunyona po ekwatafano letu naJehova. (Leviticus 19:18) Doshili, “ou e he hole omumwaxe, nande e mu wete, oye ita dulu okuhola Kalunga e he mu wete.” (1 Johannes 4:20) MEudifo laye lokOmhunda, Jesus okwa divilika omhumbwe yokukatuka eenghatu diva opo ku kandulwe po omaupyakadi momakwatafano navamwe. Okwa lombwela ovapwilikini vaye ta ti: “Onghee hano, ove ngenge to twala oshali shoye koaltari, ndele oko wa dimbulukila omumwanyoko nokutya, e na sha naave, fiya ko oshali shoye koaltari, u ye manga mu ka pafane ombili nomumwanyoko, ove u aluke u ka yandje oshali shoye.” (Mateus 5:23, 24) Okuyandja ombili otaku dulu okukwafa mokuvelula oshipute osho sha etwa keendjovo ile koilonga yoku he na onghenda. Outondwe otau dulu okukufwa po nekwatafano lopambili otali tungululwa ngeenge otwa pula ediminepo nokudimina kutya otwa ninga oinima inai yuka. Jesus okwa yandja yo omayele amwe e na sha nokupongolola po omaupyakadi. (Mateus 18:15-17) Itatu ka kala tuu twa hafa ngeenge eenghendabala dokukandula po omaupyakadi tadi pondola!—Ovaroma 12:18; Ovaefeso 4:26, 27.

Shikula oshihopaenenwa shaJesus

19. Omolwashike sha fimana okuhopaenena oshihopaenenwa shaJesus?

¹⁹ Omayeleko otae ke tu hanga shili, ndelenee kae na oku tu koka mo mefiyafano lokumona omwenyo waalushe. Dimbuluka kutya Jehova ota dulu oku tu xupifa momayeleko. Eshi hatu ‘lidula keshe eshi tashi tu findile poshi nokulotoka nelididimiko mefiyafanepo li li komesho yetu,’ natu ‘tale kuJesus, omuhoveli nomuwanifi weitavelo.’ (Ovaheberi 12:1-3, yelekanifa NW.) Okukonakona noukeka oshihopaenenwa shaJesus nosho yo okukendabala oku mu hopaenene meendjovo nomoilonga otashi ke tu kwafela tu kulike eliyandjo lometilokalunga noku li ulika filufilu.

20. Omanangeko noupuna elipi taa di mokulalakanena elididimiko nosho yo eliyandjo lometilokalunga?

²⁰ Elididimiko neliyandjo lometilokalunga ohai longele kumwe moku tu kwafela tu kwashilipaleke exupifo letu. Mokuulika omaukwatya oo e na ondilo, ohatu dulu okutwikila noudiinini moilonga yetu iyapuki yokulongela Kalunga. Nokuli nongeenge tu li momayeleko, ohatu ka kala twa hafa eshi hatu mono olukeno lopahole nomanangeko noupuna aJehova molwaashi otwe lididimika nohatu tula eliyandjo lometilokalunga moilonga. (Jakob 5:11) Kakele kaasho, Jesus okwe tu shilipaleka ta ti: “[Okelididimiko] leni otamu lixupifile eemwenyo deni.”—Lukas 21:19.

[Efano pepandja 8]

Eliyandjo lometilokalunga ohali ulikwa meenghedi di lili noku lili

[Efano pepandja 10]

Lungamena omafininiko oo taa fininike eliyandjo loye lometilokalunga

[Efano pepandja 11]

Oto nyamukula ngahelipi?

• Omolwashike elididimiko la fimana?

• Eliyandjo lometilokalunga oshike, nohali ulikwa ngahelipi?

• Ongahelipi hatu dulu okukulika nokukaleka po ekwatafano lopofingo naKalunga?

• Omafininiko amwe elipi oo taa fininike eliyandjo letu lometilokalunga, nongahelipi hatu dulu oku a henuka?