Ovanyasha ovo tava hafifa omutima waJehova
Oitukulwa ei yokukonakonwa oya longekidilwa unene tuu ovanyasha ovo ve li mokati kEendombwedi daJehova. Onghee hano, ohatu ladipike ovanyasha va konakone oitukulwa ei noukeka nosho yo va yandje omatyekosha va manguluka eshi tai konakonwa pokwoongala kwEkonakono lOshungonangelo.
“[Kala] u neendunge, omumwange, hafifa omutima wange, opo nee handi dulu okunyamukula [ou ta lundile nge, NW].” —Omayeletumbulo 27:11.
1, 2. (a) Yelifa ngeenge okunanwa kwongaho koinima younyuni okwa hala okutya ino wana okuninga Omukriste. (Ovaroma 7:21) (b) Oshike to lihongo moshihopaenenwa shaAsaf? (Tala oshimhungu, pepandja 7.)
NATU tye nee ngeno oto lande oikutu. Fimbo to talaatala owa mona oshikutu osho shihokwifa kwoove. Oluvala nomushingo oo sha hondjwa otau monika naanaa u li nawa kwoove nokambapila kondado otaka ulike kutya oshi na ondado i li nawa lela. Opo nee to shi tale nawanawa. Oshe ku kumwifa, eshi wa mona kutya oshikutu osha kulupa keemwooyo, nomuhondjo inau hondjwa noukeka. Nonande oshikutu osho otashi monika shi li nawa, kashi na ongushu. Mbela oto ka longifa oimaliwa yoye moshilongomwa osho shi he na ongushu?
2 Yelekanifa onghalo oyo ya tongwa metetekelo nonghalo oyo to dulu okushakeneka u li Omukriste omunyasha. Mokutala neendelelo kwotete, oinima younyuni ou—ngaashi oshikutu osho—otai dulu okumonika tai hokwifa unene. Pashihopaenenwa, ovanafikola vakweni otava dulu okuya koivilo ihafifa, okulongifa oingangamifi, okunwa, okweendelafana ashike ngahenya nokukufa ombinga momilele komesho yohombo. Mbela omafimbo amwe oho kala to nanwa konghedi yokukalamwenyo ya tya ngaho? Mbela oho kala wa hala okukufa ombinga nande okanini mwaasho tashi ifanwa vati emanguluko lavo? Ngeenge osho shi li ngaho, ino fika divadiva pexulifodiladilo kutya omutima woye omwii, nonokutya ino wana okukala Omukriste. Doshili, Ombibeli otai dimine kutya ounyuni otau dulu okukala tau koko ovanhu neenghono—nokuli nomunhu oo a hala okuhafifa Kalunga.—2 Timoteus 4:10.
3. (a) Omolwashike shi li oshimha okulalakanena oinima yomounyuni? (b) Ongahelipi Omukriste umwe a hokolola oshimha yokulalakanena oinima younyuni?
3 Paife tala nawanawa, ngaashi naanaa to tale oshikutu osho wa li wa hala okulanda. Lipula kutya: ‘Mbela onghalelo ei yoinima oi na ongushu yashike?’ Ombibeli otai ti kutya “ounyuni otau xulu po.” (1 Johannes 2:17) Ehafo keshe tali di muo otali ka kala ashike lopakafimbo. Natango, elihumbato li he fi lopakalunga oli na oilanduliko ya kwata moiti. Doshili, kali na ouwa washa. Omukriste umwe oo kwa li e na okulididimikila osho a ifana kutya “ouyahame oo wa dja mokulongifa nai ounyasha waye,” ota ti: “Ounyuni otau dulu okumonika uhafifa notau nane. Nowa hala u itavele kutya oto dulu okuhafela onghedi yao yomalihafifo nope he na okweehama. Ndelenee doshili, osho itashi shiiva. Ounyuni otau ku longifa, ndele eshi wa mana oku ku longifa tau ku ekeleshi.”a Omolwashike u na okuhepifa ounyasha woye nokukalamwenyo kwa tya ngaho ku he na ongushu?
Owa amenwa “kOmunawii”
4, 5. (a) Okafimbo kaxupi fimbo Jesus ina fya, okwa ninga eindilo lashike meilikano kuJehova? (b) Omolwashike eindilo olo la li la wapala?
4 Molwaashi ova mona kutya onghalelo ei yoinima kai na sha shokuyandja osho shi na ongushu, ovanyasha mokati kEendombwedi daJehova otava kendabala okuhenuka oukaume nounyuni ou. (Jakob 4:4) Mbela ou li umwe womovanyasha ovo ovadiinini? Ngeenge osho, ou shii okupandulwa. Doshili, kashipu okukondjifa omafininiko oomakula nosho yo okukala u liwetikile mo wa yooloka ko, ndele ou na ekwafo.
5 Okafimbo kaxupi fimbo Jesus ina fya, okwa ilikana opo Jehova a “amene” ovahongwa vaye “kOmunawii.” (Johannes 17:15, yelekanifa OB-1986.) Jesus okwa ninga eindilo olo omolwetomheno liwa. Okwa li e shi shii kutya onghatu youdiinini itai ka kala ipu kovashikuli vaye, kashi na nee mbudi kutya ove na omido ngapi. Omolwashike mbela? Ngaashi Jesus a dimina, etomheno limwe ololo kutya ovahongwa vaye otava ka shakeneka omutondi omunaenghono noiha monika—‘Omunawii,’ Satana Ondiaboli. Ombibeli otai ti kutya oshishitwa shopamhepo osho shii ‘ohashi dingilile ngaashi onghoshi hai kumbu, tashi kongo ou tashi xwake po.’—1 Petrus 5:8.
6. Otu shi shii ngahelipi kutya Satana ke na onghenda novanyasha?
6 Mondjokonona aishe, Satana okwa kala a hafa okuhepeka nokweetela ovanhu oixuna inyanyalifa. Diladila koixuna inyanyalifi oyo Satana a etela Job noukwaneumbo waye. (Job 1:13-19; 2:7) Otashi dulika to dimbuluka oiningwanima yomeenghundana pefimbo longhalamwenyo yoye oyo tai ulike omhepo yaSatana yelongifo leenghono. Ondiaboli otai kondouwala nelalakano i xwake po umwe, noihai file ovanyasha onghenda. Pashihopaenenwa, petameko lefelemudo lotete O.P., Herodes okwa li a konga po ondunge yokudipaifa ounona aveshe oumati muBetlehem ovo va li ve na omido mbali okuyuka pedu. (Mateus 2:16) Okwa li sha yela kutya Satana oye e linyengifa Herodes—sha li eenghendabala dokuhanauna po okaana oko efiku limwe kwa li taka ka ninga Messias waKalunga a udanekwa nokutokola Satana netokolo laKalunga. (Genesis 3:15) Osha yela kutya Satana ke na onghenda novanyasha. Elalakano laye olo okuxwaka po ovanhu vahapu ngaashi tashi dulika. Osho oshoshili unene tuu paife, molwaashi Satana okwa umbwa mo meulu a ekelwa kedu, e ‘na ehandu linene, osheshi e shi shii oku na okafimbo kaxupi kongaho.’—Ehololo 12:9, 12.
7. (a) Ongahelipi Jehova a yooloka ko neenghono kuSatana? (b) Jehova oku udite ngahelipi shi na sha nokuhafela kwoye onghalamwenyo?
7 Mepingafano naSatana, oo e “nehandu linene,” Jehova oku na ‘onghenda.’ (Lukas 1:78) Okwa denga mbada mohole. Doshili, oukwatya oo munene otau didilikifa Omushiti wetu nomolwaasho Ombibeli tai ti: “Kalunga Oye ohole.” (1 Johannes 4:8) Kape na tuu eyooloko pokati kakalunga konghalelo ei yoinima naKalunga oo u na oufembanghenda okulongela! Ofimbo Satana a hala okuxwaka po ovanhu, Jehova “ina hala pa kane nande umwe.” (2 Petrus 3:9) Oha tale ko omwenyo womunhu keshe u na ondilo—mwa kwatelwa nowoye. Eshi Jehova te ku kumaida mEendjovo daye u ha kale oshitukulwa shounyuni, ita kendabala okufifa oshuunguungu okuhafela kwoye onghalamwenyo ile okungabeka emanguluko loye. (Johannes 15:19) Mepingafano naasho, ote ku amene komunawii. Xo yomeulu okwa hala u kale u na osho sha denga mbada shi dule omalihafifo opakafimbo ounyuni ou. Ehalo laye olo kutya u mone “omwenyo washili”—omwenyo waalushe moparadisa kombada yedu. (1 Timoteus 6:17-19, OB-1954) Jehova okwa hala u pondole note ku ladipikile elalakano olo. (1 Timoteus 2:4) Natango, Jehova ote ku shivi neshivo le likalekelwa. Mbela olilipi po?
“Hafifa omutima wange”
8, 9. (a) Omaano ashike to dulu okupa Jehova? (b) Ongahelipi Satana ta lundile Jehova, ngaashi sha fanekwa moshinima shi na sha naJob?
8 Mbela owa landela nale kaume koye kopofingo omaano ndele to tale koshipala shakaume koye tashi limemesha nonghumwe nosho yo nolupandu eshi te a tambula? Otashi dulika wa diladila unene oule wefimbo shi na sha nomaano oo taa ka kala a wapalela omunhu oo. Paife diladila kepulo eli: Mbela omaano oludi lilipi to dulu okupa Omushiti woye, Jehova Kalunga? Tete otashi dulika ediladilo olo li kale la fa li he fi lopandunge. Mbela Omunaenghono adishe okwa pumbwa shike osho tashi di komunhu wongaho? Mbela oshike to dulu oku mu pa osho e he na nale? Ombibeli otai nyamukula mOmayeletumbulo 27:11 tai ti: “[Kala] u neendunge, omumwange, hafifa omutima wange, opo nee handi dulu okunyamukula [ou ta lundile nge, NW].”
9 Ngaashi u shi shii nale okudja eshi wa konakona Ombibeli, Satana Ondiaboli oye ta lundile Jehova. Ota ti kutya keshe omunhu oo ta longele Kalunga ite shi ningi mohole, ndele onomatomheno okulihola mwene. Satana ota ti yo kutya ngeenge ovapiya vaKalunga ova shakeneke omaudjuu otava ka efa po diva elongelokalunga lashili. Pashihopaenenwa, diladila kwaasho Satana a ti kuJehova shi na sha nomulumenhu omuyuki Job: “Ove mwene, ndi shii, we mu amena keembinga adishe neumbo laye naaishe e i kwete. Ove wa nangeka noupuna oilonga yomake aye noimuna yaye ya hapupala neenghono moshilongo. Ndelenee nana eke loye u kume aishe e i kwete: ye ote ke ku liteeka shili moipafi yoye.”—Job 1:10, 11.
10. (a) Otu shi shii ngahelipi kutya Satana okwa tula momalimbililo oudiinini wavahapu u he fi ashike waJob? (b) Ongahelipi wa kwatelwa mo momhata i na sha nounamapangelo?
10 Ngaashi sha ulikwa mehokololo lOmbibeli, Satana ina twa ashike eemhata di na sha noudiinini waJob ndele odi na sha yo naaveshe ovo hava longele Kalunga—naave yo wa kwatelwa mo. Doshili, Satana okwa popya shi na sha novanhu aveshe, eshi a lombwela Jehova ta ti: “Omunhu keshe [haJob ashike ndele keshe umwe] osho e shi na, te shi yandjele omwenyo waye.” (Job 2:4) Mbela ou wete onghandangala oyo to dana momhata oyo ya fimanenena? Ngaashi sha ulikwa mOmayeletumbulo 27:11, Jehova ota ti kutya ope na sha osho to dulu oku mu pa—ekanghameno lokunyamukula omulundili waye, Satana. Diladila—Omunamapangelo aeshe ote ku ifana u kufe ombinga momhata inenenene mondjokonona aishe. Ku na tuu oshinakuwanifwa noufembanghenda ukumwifi! Mbela oto dulu okuwanifa po osho Jehova te ku pula? Job osho a ninga. (Job 2:9, 10) Jesus naye osho a ninga nosho yo vahapu vamwe mondjokonona aishe, mwa kwatelwa ovanyasha vahapu. (Ovafilippi 2:8; Ehololo 6:9) Naave oto dulu okuninga sha faafana. Ndelenee osho u na okukala u na oushili musho oshosho kutya kape na oupokati momhata oyo. Melihumbato loye oto ka ulika kutya oto yambidida elundilo laSatana ile enyamukulo laJehova. Mbela oto ka hoolola okuyambidida ombinga ilipi?
Jehova oku na ko nasha naave
11, 12. Mbela otashi ti sha ngoo kuJehova kutya nee owa hoolola oku mu longela ile hasho? Shi yelifa.
11 Mbela oshi na ngoo oshilonga kuJehova kutya ehoololo lilipi to ningi? Mbela ovanhu inava wana nale ovo va kala ovadiinini kuye nokuyandja enyamukulo la wana kuSatana? Doshili, Ondiaboli oya ti kutya kape na oo ta longele Jehova molwohole, elundilo olo ola ulikwa nale kutya kali fi loshili. Ndele nande ongaho, Jehova okwa hala u kale kombinga yaye momhata i na sha nounamapangelo molwaashi oku na ko nasha naave pauhandimwe. Jesus okwa ti: “Kashi fi ehalo laXo yeni meulu, pa kane nande okamwe komuava vanini.”—Mateus 18:14.
12 Osha yela kutya Jehova oku na elitulemo shi na sha nonghatu oyo to hoolola. Osho sha fimana unene oshosho kutya otai mu kumu. Ombibeli otai shi yelifa kutya Jehova oku na omaliudo a ya moule oo hae linyengifwa keenghatu dovanhu diwa ile dii. Pashihopaenenwa, eshi Ovaisrael va kala nokutukula oshibofa, Jehova okwa li ‘a handuka.’ (Epsalme 78:40, 41) Fimbo Eyelu lopefimbo laNoa inali uya, eshi ‘owii wovanhu wa li uhapu’ Jehova okwa li a “yahama momutima waye.” (Genesis 6:5, 6) Diladila kutya osho otashi ti ngahelipi. Ngeno owa landulile onghatu ya puka, ngeno owa handukifa Omushiti woye. Osho inashi hala okutya Kalunga omunghundi ile kutya oha pangelwa komaliudo. Ponhele yaasho, oku ku hole noku na ko nasha nonghalonawa yoye. Mepingafano naasho, ngeenge oto longo osho sha yuka, omutima waJehova otau hafe. Ina hafa ashike molwaashi e na enyamukulo okunyamukula natango Satana ndele omolwaashi yo ta dulu okuninga Omuyandji wondjabi yoye. Naasho osho a hala okuninga. (Ovaheberi 11:6) Ku na tuu Xo omunahole Jehova Kalunga!
Omanangeko noupuna mahapu paife
13. Ongahelipi okulongela Jehova taku eta omanangeko noupuna paife ngaha nokuli?
13 Omanangeko noupuna oo haa di mokulongela Jehova itaa ka monika ashike monakwiiwa. Ovanyasha vahapu mokati kEendombwedi daJehova ova nangekwa noupuna nehafo nosho yo embilipalelo paife omolwetomheno la fimana. Omupsalme okwa shanga ta ti: “Omalombwelo Omwene okwa yuka, taa hafifa omutima.” (Epsalme 19:9) Jehova oku shii osho shiwa kufye e dule omunhu keshe. Okupitila momuprofeti Jesaja, Jehova okwa ti: “Aame Omwene Kalunga koye, ou handi ku longo eshi tashi ku wapalele, ndele handi ku tula mondjila ei u nokweenda nayo. Akutu, ngeno ove wa li wa diinina oipango yange, ngeno ombili yoye oya kala ngaashi omulonga tau tondoka, nouyuki woye ngaashi omakufikufi omefuta.”—Jesaja 48:17, 18.
14. Ongahelipi omafinamhango Ombibeli taa dulu oku ku kwafela u henuke ouyahame weengunga?
14 Okudulika komafinamhango Ombibeli otashi ke ku kwafela u henuke ouyahame noluhodi lihapu. Pashihopaenenwa, Ombibeli otai ti kutya ovo va kulika ohole yokuhola oimaliwa ove ‘lityuulifa nomaudjuu mahapu.’ (1 Timoteus 6:9, 10) Mbela ope na vamwe vomoomakula voye va mona oilanduliko ii oyo ya popiwa momushangwa oo? Ovalumenhu vamwe novakainhu vamwe ovanyasha ove na eengunga dihapu molwaashi ashike tava diladila kutya ove na okukala ve na oikutu oyo ipe elela i na omadina a tumbala nosho yo oilongifo yopauteknologi oyo opo ya ndulukwa. Okukala wa wililwa po keefuto defimbo lile doinima oyo i na oishoshela ya londa, oyo ito dulu lela oku i futa oshi li oludi loupika uyahameka.—Omayeletumbulo 22:7.
15. Omeenghedi dilipi omafinamhango Ombibeli tae ku amene kouyahame oo hau di moluhaelo?
15 Diladila yo vali koshinima shi na sha noluhaelo. Mounyuni aushe omudo keshe, ovanyasha vahapu inava hombolwa ohava miti. Vamwe ohava dala ounona inave va hala nove he na owino woku va tekula. Vamwe ohave liefele mokukufa mo omadimo nokuhepekwa keliudo tali ehama. Ope na yo ovalumenhu novakainhu ovanyasha ovo tava kwatwa komikifi hadi di momilele, ngaashi oAIDS. Doshili, kwaao e shii Jehova, oshilanduliko shii unene osho okunyona po ekwatafano laye naJehova.b (Ovagalati 5:19-21) Omolwetomheno liwa eshi Ombibeli tai ti: “Kukumeni oluhaelo.”—1 Ovakorinto 6:18.
Longela ‘Kalunga omunelao’
16. (a) Otu shi shii ngahelipi kutya Jehova okwa hala u hafele ounyasha woye? (b) Omolwashike Jehova e ku tulila po omifindalandu u di landule?
16 Ombibeli otai hokolola Jehova e li ‘Kalunga omunelao.’ (1 Timoteus 1:11, OB-1954) Okwa hala u kale yo u na elao. Doshili, Eendjovo daye otadi ti: “Omunyasha ove, kala wa nyakukwa nounyasha woye, nomutima woye nau ku hafife momafiku omounyasha woye.” (Omuudifi 11:9) Ndele Jehova oha tale komesho, hapefimbo ashike olo nota dulu okumona oilanduliko yelihumbato liwa nolii oyo tai ke uya konima yefimbo. Omolwaasho te ku londwele ta ti: “Dimbulukwa Omushiti woye momafiku ounyasha woye, fimbo omafiku [mai] inae uya, nomido tadi uya, odo ove to di popi, to ti: ‘Odo inadi wapalela nge.’ ”—Omuudifi 12:1.
17, 18. Ongahelipi omunyasha umwe Omukriste a popya shi na sha nehafo laye molwokulongela Jehova, nongahelipi to dulu okumona ehafo la faafana?
17 Kunena, ovanyasha vahapu ova mona elao linene mokulongela Jehova. Pashihopaenenwa, Lina womido 15 ota ti: “Inandi fya nande ohoni. Ondi na olutu li na oukolele molwaashi onde lidilika okunwa omakaya nokulongifa oingangamifi. Ondi na epukululo li na ondilo olo nda pewa okupitila meongalo olo tali kwafele nge ndi lwife omafininiko manyanyalifi aSatana. Oshipala shange osha hafa omolweendafano tali tungu olo hali monika kOlupale lOuhamba. Komesho yaaishe, ondi na etimaumbwile dingi lomwenyo waalushe kombada yedu.”
18 Ngaashi Lina, ovanyasha vahapu Ovakriste otava kondjo neenghono ekondjo leitavelo, naasho otashi va etele ehafo. Ova dimina kutya onghalamwenyo yavo—nonande oi na omaupyakadi omafimbo amwe—otai ti sha shili noi na onakwiiwa yashili. Onghee hano, twikila okulongela Kalunga oo e na ko nasha shili nonghalonawa yoye. Hafifa omutima waye, note ke ku hafifa paife nosho yo fiyo alushe!—Epsalme 5:12.
[Omashangelo opedu]
a Tala oshitukulwa “Oshili oya alulila nge omwenyo wange,” shi li moshifo shoAwake! yo 22 Kotoba 1996.
b Otashi hekeleke okushiiva kutya ngeenge omunhu okwe livele ombedi ndele ta efa okulonga osho sha puka nokuhepaulula omanyono aye, Jehova ote mu ‘dimine po omatimba mahapu.’—Jesaja 55:7.
Oto dimbuluka?
• Oshiponga shashike she ku taalela okudja ‘kOmunawii’ Satana?
• Ongahelipi to dulu okuhafifa omutima waJehova?
• Ombibeli otai ulike ngahelipi kutya Jehova oku na ko nasha naave?
• Omanangeko noupuna amwe elipi taa di mokulongela Jehova?
[Efano pepandja 10]
Omulumenhu omuyuki oo hanga a punduka
Asaf okwa li Omulevi omushiki wouxumba a fimana motembeli yaJehova muIsrael shonale. Okwa li nokuli a tota omaimbilo oo kwa li haa longifwa mokulongela Kalunga moipafi. Ndele nande okwa li e na omaufembanghenda e likalekelwa, opa li efimbo limwe olo Asaf kwa li a nanwa kelihumbato li he fi lopakalunga loomakula vaye, ovo va li tava monika tava teya eemhango daKalunga nope he na okuhandukilwa. Konima Asaf okwa dimina ta ti: “Hanga eemhadi dange da punduka; okokangodi kanini, mokukatuka kwange ndi fenungute po. Osheshi nda li [nda fila ovalinenepeki efupa, OB-1986] eshi nda mona ovakolokoshi ve li nawa.”—Epsalme 73:2, 3.
Konima yefimbo, Asaf okwa ya kouyapuki waKalunga ndele ta ilikana omolwoshinima osho. Eshi etaleko laye la pepalekwa pamhepo, okwa uda ko kutya Jehova oha tondo owii nonokutya konima yefimbo ovakolokoshi novayuki otava ka teya osho va kuna. (Epsalme 73:17-20; Ovagalati 6:7, 8) Doshili, ovakolokoshi ove li pomufenhu. Xuuninwa, otava ka wila po eshi Jehova ta ka hanauna po onghalelo ei yovahenakalunga.—Ehololo 21:8.
[Efano pepandja 15]
Jehova oku na ko nasha nonghalonawa yoye, omanga elalakano laSatana olo oku ku xwaka po
[Efano pepandja 16]
Ovanyasha vahapu otava mono elao linene mokulongela Jehova pamwe nOvakriste vakwao