“Tala, Kalunga ketu”

Omauyelele oo a kundafanwa moitukulwa ei ivali yokukonakonwa okwe likolelela kembo Draw Close to Jehovah, olo la li la yandjwa poyoongalele yoitukulwa oyo ya ningwa mounyuni aushe mo 2002-2003.—Tala oshitukulwa “Ola yadifa omwaka momutima wange,” pepandja 29.

“Tala, Kalunga ketu Oye ou, twe mu teelela, e tu kwafe; Omwene Oye ou.”—JESAJA 25:9.

1, 2. (a) Jehova okwa ifana ngahelipi tatekulululwa Abraham, naasho otashi dulika shi tu lipulife shike? (b) Ongahelipi Ombibeli tai tu shilipaleke kutya ohatu dulu okukala tu na ekwatafano lopofingo naKalunga?

‘KAUME kange.’ Osho osho Jehova, Omushiti weulu nedu a ifana tatekulululwa Abraham. (Jesaja 41:8) Diladila ashike—omunhu wongaho ta hafele oukaume nOmwene Omunamapangelo aeshe! Otashi dulika u lipule to ti: ‘Mbela ohai dulu ngoo okukala popepi naKalunga ngaho?’

² Ombibeli otai tu shilipaleke kutya ohatu dulu okukala tu na ekwatafano lopofingo naKalunga. Abraham okwa li e na ekwatafano lopofingo la tya ngaho molwaashi “okwa itavela Kalunga.” (Jakob 2:23) Jehova oku li yo “omushiivikile wovayuki” kunena. (Omayeletumbulo 3:32) MuJakob 4:8, Ombibeli otai tu ladipike tai ti: “Eheneni kuKalunga, opo nee Ye ta ehene kunye.” Osha yela kutya, ngeenge otwa katuka eenghatu tu ehene kuJehova, ote ke linyenga. Doshili, ota ka ehena kufye. Ndele mbela eendjovo odo da nwefwa mo otadi ti kutya fye, tu li ovanhu ovalunde noinatu wanenena, otu na okukatuka onghatu yotete? Hasho nande. Ohatu dulu ashike okukala neendafano naKalunga ketu omunahole molwaashi okwa katuka eenghatu mbali da fimana.—Epsalme 25:14.

3. Jehova okwa katuka eenghatu mbali dilipi opo e shi ninge tashi shiiva kufye tu hafele oukaume naye?

³ Onghatu yotete, Jehova okwa unganeka opo Jesus a “[yandje] omwenyo waye u ninge oikulila yavahapu.” (Mateus 20:28) Ekuliloyambo olo ole shi ninga tashi shiiva opo tu kale popepi naKalunga. Ombibeli otai ti: “Ofye otu mu hole osheshi Oye a kala e tu hole tete.” (1 Johannes 4:19) Heeno, molwaashi Kalunga oye “a kala e tu hole tete,” okwe tu tulila po ekanghameno tu pange oukaume naye. Onhivali, Jehova okwe tu lihololela. Oukaume keshe hatu pange, ekwatafano ole likolelela kokushiiva shili omunhu, okuhokwa nokupandula omaukwatya aye e likalekelwa. Diladila kutya osho otashi ti ngahelipi. Ngeno Jehova okwa li oKalunga iha dulu okushiivika, ngeno itatu dulu nande okweehena kuye. Ndele ponhele yokukala a hondama, Jehova okwa hala tu mu shiive. (Jesaja 45:19) MEendjovo daye Ombibeli, ote liholola monghedi oyo hatu dulu okuuda ko—osho shi he fi ashike oumbangi kutya oku tu hole ndele okwa hala tu mu shiive nokukala tu mu hole e li Tate yetu womeulu.

4. Ohatu ka kala tu udite ngahelipi shi na sha naJehova eshi hatu shiiva nawa omaukwatya aye?

⁴ Mbela owa mona nale okaana kanini taka ulikile ookaume kako xe ndele taka popi nehafo lashili nosho yo netumba taka ti: “Ou otate”? Ovalongeli vaKalunga ove na omatomheno mahapu okukala ve udite sha faafana shi na sha naJehova. Ombibeli otai xunganeke efimbo olo eshi ovanhu ovadiinini tava ka tya: “Tala, Kalunga ketu.” (Jesaja 25:8, 9) Apa ngoo pe fike eudeko letu okuuda ko omaukwatya aJehova, opo ngoo pe fike hatu kala tu udite kutya otu na Tate a denga mbada nosho yo Kaume kopofingo elela a shiya ko. Heeno, okuuda ko omaukwatya aJehova otashi tu pe omatomheno mahapu okweehena popepi naye. Onghee hano, natu konakone nghee Ombibeli tai holola omaukwatya aJehova a tongomana—eenghono, ouyuki, ounongo nohole. Moshitukulwa eshi, ohatu ka kundafana omaukwatya atatu otete omwaao.

“Omunene weenghono”

5. Omolwashike sha yeleka eshi Jehova oye aeke ta ifanwa “Omunaenghono adishe,” nomeenghedi dilipi ha longifa eenghono daye dikumwifi?

⁵ Jehova oye “omunene weenghono.” (Job 37:23) Jeremia 10:6 ota ti: “Kape na ou e ku fa, Omwene, Oove omunene, edina loye linene, li neenghono.” Jehova ina fa oshishitwa nande oshimwe, oku na eenghono inadi ngabekwa. Omolwetomheno olo, oye aeke ta ifanwa “Omunaenghono adishe.” (Ehololo 15:3, OB-1986) Jehova oha longifa eenghono daye dikumwifi okushita, okuhanauna, okwaamena nosho yo okutungulula. Konakona ashike oihopaenenwa ivali—eenghono daye dokushita nosho yo eenghono daye dokwaamena.

6, 7. Etango oli na eenghono di fike peni, naasho otashi yandje oumbangi woshili ya fimana ulipi?

⁶ Ngeenge to fikama pondje momutenya wokwenye wa twa, oshike ho kala u udite koshipa shoye? Oupyu wetango. Ndele doshili, oho kala u udite oidjemo yeenghono daJehova dokushita. Mbela etango oli na eenghono di fike peni? Exuku lalo, oli na oupyu u fike peedigili doCelsius omamiliyona 15. Ngeno okwa li to dulu okukufa okapambu kexuku letango ke fike pomutwe wokanetwe noku ka tula kombada yedu, ngeno ito ka dula okufikama meni leekilometa 140 okudja kokadjo koupyu oko. Osekonde keshe, etango ohali yandje eenghono di fike pomitopelo deeboma dolute omamiliyona omafele. Ndelenee ondjila yokudingonoka yedu oi li ashike poshinano sha yeleka okudja keminikilo olo likumwifi hali yandje eenghono doupyu. Ngeno etango ola li li li popepi, ngeno omeva edu otaa pwiinine po; nongeno ola li kokule unene ngeno otaa ningi oikangwa. Okukala kwalo popepi unene ile kokule unene ngeno otaku ningi opulaneta yetu i he na omwenyo.

⁷ Ndele nande okukalamwenyo kwovanhu okwe likolelela ketango, vahapu ohave li tale ko li li longaho. Kungaha, ova dopa okushiiva osho etango tali tu hongo. Epsalme 74:16 (OB-1954) otali popi shi na sha naJehova tali ti: “[Oove] wa shita ouyelele netango.” Heeno, etango otali fimanekifa Jehova, “omushiti weulu nedu.” (Epsalme 146:6) Ndelenee lo oli li ashike shimwe shomoishitwa ihapu oyo tai tu hongo kombinga yeenghono dinene daJehova. Mokulihonga shihapu kombinga yeenghono daJehova dokushita, omo ngoo etilofimaneko letu tali ningi lomoule.

8, 9. (a) Efano leendjovo dolukeno lilipi tali tu ulikile ehalo laJehova lokwaamena nokufila oshisho ovalongeli vaye? (b) Omufita wopefimbo lOmbibeli okwa li ha amene ngahelipi eedi daye, naasho otashi tu hongo shike shi na sha nOmufita wetu Munenenene?

⁸ Jehova ota longifa yo eenghono daye dinene okwaamena ovapiya vaye noku va fila oshisho. Ombibeli otai longifa eendjovo donhumba da twa ndele eendjovo domafaneko tae linyengifa, tadi hepaulula omaudaneko aJehova okufila oshisho. Pashihopaenenwa, tala Jesaja 40:11. Omo Jehova okwe lifaafanifa ye mwene nomufita noshiwana shaye ongaashi eedi. Ohatu lesha taku ti: “Ngaashi omufita ta lifa oimuna yaye, [ota] ongele oudjona momaoko aye ndee te va upatele ponhulo yaye, neenyali ote di findaeke nawa.” Mbela oto dulu okukala wa fa u wete osho tashi popiwa movelishe oyo?

⁹ Kape na oinamwenyo ihapu oyo ihai dulu okuliamena ngaashi eedi. Omufita wopefimbo lOmbibeli okwa li e na okukala a nyatipala opo a amene eedi daye kookavandje, komamwangha nosho yo keenghoshi. (1 Samuel 17:34-36; Johannes 10:10-13) Ndele opa li omafimbo oo okwaamena nokufila oshisho eedi kwa li taku pula olukeno. Pashihopaenenwa, ngeenge odi oya dalele kokule noshiunda, mbela ongahelipi omufita kwa li ha amene okadjona oko ke he na eameno? Ote ka humbata po, tashi dulika oule womafiku “ponhulo yaye”—sha hala okutya, e ka homeka mondjafa yaye. Ndele ongahelipi okadjona kwa li haka dulu okuuya ponhulo yomufita? Okadjona otashi dulika ka ehene pomufita noku mu kuma nokuli kokuulu. Ndelenee omufita oye e na okupetama noku ka toola po noku ka amena ponhulo yaye. Kali fi tuu efano lolukeno tali faneke ehalo lOmufita wetu Munenenene lokwaamena nokufila oshisho ovapiya vaye!

10. Eameno lilipi Jehova ha yandje kunena, nomolwashike eameno olo la fimana unene?

¹⁰ Jehova okwa ninga shihapu shi he fi ashike okuudaneka eameno. Mefimbo lOmbibeli, okwe shi ulika meenghedi dopashikumwifilonga kutya ota dulu ‘okuxupifa ovayuki momahongaulo.’ (2 Petrus 2:9) Ongahelipi kunena? Otu shi shii kutya iha longifa eenghono daye oku tu amena koiponga aishe kunena. Ndelenee oha yandje oshinima shonhumba osho sha fimanenena—eameno lopamhepo. Kalunga ketu omunahole ohe tu amene koiponga yopamhepo moku tu pa osho twa pumbwa opo tu lididimikile omayeleko nokwaamena ekwatafano letu naye. Pashihopaenenwa, Lukas 11:13 ota ti: “Nye [ovai], ngenge omu shii okupa ovana veni oipewa iwa, unene Xo yeni yomeulu ta yandje Omhepo Iyapuki kuava tave mu indile.” Eenghono odo dinene otadi dulu oku tu longekidila eyeleko ile oupyakadi keshe hatu ka shakeneka. (2 Ovakorinto 4:7) Kungaha, Jehova ota amene eemwenyo detu, hamolwomido dinini ashike, ndelenee ofiyo alushe. Tu na etimaumbwile olo momadiladilo, ohatu ka tala ko shili okumona oixuna keshe monghalelo ei ku li ‘kupu nokwepakumo.’ (2 Ovakorinto 4:17) Mbela inatu nanenwa kuKalunga oo ha longifa eenghono daye pahole omolwetu?

“Omwene oku hole ouyuki”

11, 12. (a) Omolwashike ouyuki waJehova tau tu ehenifa kuye? (b) David okwa fika pexulifodiladilo lilipi shi na sha nouyuki waJehova, nongahelipi eendjovo odo da nwefwa mo tadi tu hekeleke?

¹¹ Jehova oha ningi osho sha yuka nohe shi ningi noudiinini noku he na onhondo. Ouyuki waKalunga kau fi okuhenakonasha ile oukwatya wokungwenyauka oo tau tu ehenifa kokule naye, ndele ou li oukwatya muwa oo tau tu ehenifa kuYe. Ombibeli otai hepaulula nawa oukwatya oo tau hafifa omutima. Natu konakoneni hano eenghedi nhatu omo Jehova a tula moilonga ouyuki waye.

¹² Yotete, ouyuki waJehova ohau mu linyengifa a ulike oudiinini kovapiya vaye. Omupsalme David okwa pandula eshi a ulikilwa ombinga oyo youyuki waJehova. Okudja moshimoniwa shaye nosho yo mokukonakona eenghedi daKalunga, David okwe uya pexulifodiladilo lilipi? Okwa ti: “Omwene oku hole ouyuki, novadiinini vaye ite va efa nande. [Otava amenwa fiyo alushe, OB-1954].” (Epsalme 37:28) Kali fi tuu eshilipaleko tali hekeleke! Kalunga ketu ita ka efa nande ovo ve li ovadiinini kuye. Onghee hano, ohatu dulu okulineekela okukala popepi naye nosho yo efiloshisho laye lopahole. Ouyuki waye otau shi shilipaleke.—Omayeletumbulo 2:7, 8.

13. Ongahelipi okunakonasha kwaJehova omolwaavo ve li moudjuu ku liwetikile mOmhango oyo a li a pa Ovaisrael?

¹³ Onhivali, ouyuki waKalunga ohau yavelele eemhumbwe daavo va fininikwa. Okukala kwaJehova e na ko nasha naavo ve li moudjuu, oku liwetikile mOmhango oyo a li a yandja kOvaisrael. Pashihopaenenwa, Omhango oya shilipaleka kutya eefiye novafiyekadi ove na okufilwa oshisho. (Deuteronomion 24:17-21) Molwaashi okwa li e wete kutya onghalamwenyo otai dulu okukala idjuu komaukwaneumbo a tya ngaho, Jehova okwa ninga xe yavo Omupanguli nOmwaameni. (Deuteronomion 10:17, 18) Okwa londwela Ovaisrael kutya ngeenge ova yahameke ovakainhu nounona ovo ve he na eameno, ota ka uda onghuwo yavo. Okwa popya osho sha shangwa muExodus 22:22-24, a ti: “[Ehandu] lange tali ka xwama.” Nonande ehandu kali fi umwe womomaukwatya aKalunga a tongomana, ohe linyengifwa koilonga yowina i he li pauyuki a handuke pauyuki, unene tuu ngeenge oihakanwa kai na eameno.—Epsalme 103:6.

14. Oumbangi ukonekwedi shili ulipi wokuhenonhondo kwaJehova?

¹⁴ Onhinhatu, muDeuteronomion 10:17 Ombibeli otai tu shilipaleke kutya Jehova “iha tale oshipala shomunhu ndee ita tambula ombubo.” Mepingafano novanhu vahapu ovo ve na eenghono nenwefemo, Jehova iha nwefwa mo koupuna wopainiwe ile kemoniko lokombada. Ke na nande olwaamambinga. Oumbangi ukonekwedi shili wokuhenonhondo kwaye oyoo kutya: Omhito yokuninga omulongeli waye washili neteelelo lomwenyo waalushe, inai ngabekelwa ashike ovahoololwa vanini. Ponhele yaasho, Oilonga 10:34, 35 otai ti: “Kalunga iha tale omunhu kombada. Ndele moshiwana keshe, keshe ou he mu tila ndee ta diinine ouyuki, ote mu wapalele.” Eteelelo olo ola yeulukila ovanhu aveshe kashi na nee mbudi kutya omufika wavo moulipamwe wovanhu oulipi, oluvala loshipa shavo olilipi ile oshilongo omo hava kala oshilipi. Osho kashi fi mbela ouyuki washili wa denga mbada? Doshili, eudeko liwa louyuki waJehova otali tu ehenifa kuye!

‘Oule ou fike peni wounongo waKalunga!’

15. Ounongo oshike, nongahelipi Jehova he u ulike?

¹⁵ Omuyapostoli Paulus okwa li e linyengifwa a popye ngaashi sha shangwa mOvaroma 11:33, taku ti: ‘Oule ou fike peni weendunge nowounongo waKalunga!’ Heeno, eshi hatu diladila oitukulwa i lili noku lili younongo muhapu waJehova, ohatu kala twa kumwa. Ndele ohatu dulu ngahelipi okuyelifa oukwatya oo? Ounongo ohau eta kumwe eshiivo, eendunge dokuyoolola nosho yo eudeko notau i tula moilonga. Mokulongifa eshiivo laye linene nosho yo eudeko laye la ya moule, Jehova oha ningi alushe omatokolo a denga mbada noku a wanifa okupitila monghedi iwa ku he na vali.

16, 17. Ongahelipi eshito laJehova tali yandje oumbangi wounongo waye munene? Yandja oshihopaenenwa.

¹⁶ Omauliko amwe elipi okondadalunde ounongo munene waJehova? Epsalme 104:24 otali ti: “Omwene, oilonga yoye oi fike peni! Aishe owe i shita nounongo, edu oli yadi oishitwa yoye.” Doshili, apa ngoo pe fike hatu lihongo kombinga yoinima oyo Jehova a shita, opo ngoo pe fike hatu kumwifwa kounongo waye. Diladila ashike kwaasho kutya ovanongononi ove lihonga shihapu mokukonakona eshito laJehova! Ope na nokuli oludi louindjinia olo hali ifanwa mOshiingilisha biomimetics, olo tali kendabala okuhopaenena omidutilo domoushitwe.

¹⁷ Pashihopaenenwa, otashi dulika owa talele nale kewapalo longodi yeluviluvi nonghumwe. Omudutilo ukumwifa shili. Eengodi odo tadi monika da fa inadi kola, pakuyeleka nawa odi na eenghono dihapu di dulife oshivela, noda pama di dulife eengodi omo mwa hondjwa oumbidja vokukelela eeholo. Mbela osho otashi ti naanaa ngahelipi? Diladila ashike ongodi yeluviluvi ya nenepekwa fiyo ya fika pounene wongodi omo mwa longwa onete oyo hai longifwa mowato yokukwata eeshi. Ongodi ya tya ngaho otai ka kala ya kola nokukanghameka odila yokuhumbata ovanhu tai tuka. Heeno, Jehova okwa shita oinima ya tya ngaho “nounongo.”

18. Ounongo waJehova otau limonikila ngahelipi mokulongifa kwaye ovanhu va shange Eendjovo daye, Ombibeli?

¹⁸ Oumbangi munene wounongo waJehova otau hangika mEendjovo daye, Ombibeli. Omayele opandunge oo taa hangika momapandja ayo otae tu ulikile shili onghedi yokukalamwenyo ya denga mbada. (Jesaja 48:17) Ndelenee ounongo waJehova u he fi okuyelekwa otau limonikila yo monghedi omo Ombibeli ya shangwa. Ongahelipi mbela? Mounongo waye, Jehova okwa hoolola okulongifa ovanhu okushanga Eendjovo daye. Ngeno okwa li a longifa ovaengeli va shange Eendjovo da nwefwa mo, ngeno Ombibeli oya ka kala ngoo ihokwifi ngaashi i li paife? Doshili, ovaengeli ngeno ova hepaulula Jehova sha kanghamena ketaleko lavo la denga mbada nokuhepaulula eliyandjo lavo kuye. Ndelenee ngeno otwa ka uda ko ngoo etaleko loishitwa yopamhepo ya wanenena, oyo eshiivo, owino nosho yo eenghono dayo di dule detu kokule?—Ovaheberi 2:6, 7.

19. Oshihopaenenwa shilipi tashi ulike kutya okulongifa ovanhu ve li ovashangi osha ningifa Ombibeli i kale tai kumu omutima noihokwifa?

¹⁹ Elongifo lovanhu ve li ovashangi ola ningifa Ombibeli i kale tai kumu omutima noihokwifa. Ovashangi vayo ova li ovanhu ve na omaliudo ngaashi etu. Omolwokuhawanenena, ova shakeneka omayeleko nomafininiko a faafana nao etu. Peemhito dimwe, ova shanga shi na sha nomaliudo avo vene nosho yo omaudjuu avo. (2 Ovakorinto 12:7-10) Ova shanga eendjovo odo pe he na omweengeli ta dula oku di popya. Pashihopaenenwa, tala keendjovo daDavid odo da shangwa mEpsalme 51. Pavelishe yotete nonhivali, David okwa tota po epsalme olo konima eshi a ya menyono la kwata moiti. Okwa mbubula omutima waye, ta ulike oluhodi laye linene nokwiindila ediminepo kuKalunga. Movelishe 4 no 5, ohatu lesha taku ti: “Koshe nge owii wange, ndi koshoke Ove u fetele nge po etimba lange. Osheshi enyono lange, ame mwene ondi li shii nawa, nomatimba ange alushe e li momesho ange.” Didilika ovelishe 7, tai ti: “Tala, ame onda dalwa moulunde, nameme okwa dala nge moulunde.” Ovelishe 19 oya weda ko tai ti: “Omayambo aa a halika kuKalunga, oo omhepo ya teyauka. Omutima, ou wa teyauka nowa alamekwa, o nee, Kalunga ito u dini.” Mbela ou udite ouyahame womushangi oo? Olyelye ta dulu okuholola omaliudo taa di komutima a tya ngaho e he fi omunhu ina wanenena?

20, 21. (a) Omolwashike taku dulu okutiwa kutya nande pa longifwa ovashangi vovanhu, Ombibeli oi na ounongo waJehova? (b) Oshike tashi ka kundafanwa moshitukulwa tashi landula?

²⁰ Mokulongifa kwaye ovanhu inava wanenena va tya ngaho, Jehova okwe tu pa naanaa osho twa pumbwa—eshangelo olo la “nwefwa mo kuKalunga” ndele oli na oukwatya wopanhu. (2 Timoteus 3:16, NW) Heeno, ovashangi ovo okwa li tava wilikwa komhepo iyapuki. Kungaha ova shanga ounongo waJehova, ndele hawavo vene. Ounongo oo otau dulu okulineekelwa filufilu. Ounongo oo ou dule wetu kokule nomolwaasho Kalunga te tu kumaida pahole ta ti: “Nomutima woye aushe lineekela Omwene, ino liameka keendunge doye mwene. Mu shiiva meendjila doye adishe, opo nee Ye ota ka lalakanifa omalila oye.” (Omayeletumbulo 3:5, 6) Mokudulika komayele oo opandunge, ohatu ka ehena popepi naKalunga ketu oo a shiya ko mounongo.

²¹ Oukwatya muwa unene nowa denga mbada momaukwatya aeshe aJehova oo ohole. Oshitukulwa tashi landula otashi ka kundafana nghee Jehova ha ulike ohole.

Oto dimbuluka?

• Eenghatu dilipi Jehova a katuka opo e shi ninge tashi shiiva kufye tu pange oukaume wopofingo naye?

• Oihopaenenwa imwe ilipi i na sha neenghono daJehova dokushita nosho yo dokwaamena?

• Omeenghedi dilipi Jehova ha ulike ouyuki waye?

• Ongahelipi ounongo waJehova tau limonikila meshito laye nosho yo mOmbibeli?

[Efano pepandja 20]

Ngaashi omufita ta humbata okadjona ponhulo yaye, Jehova ota file oshisho eedi daYe nolukeno

[Efano pepandja 22]

Ounongo waJehova otau limonikila monghedi omo Ombibeli ya shangwa