Kwafela eedi odo da twalwatwalwa di alukile koshiunda nopehe na okwoongaonga!
“Otu ye kulyelye ngeno? Ove u neendjovo domwenyo waalushe.” — JOH. 6:68.
1. Petrus okwa ti ngahelipi eshi ovahongwa vahapu va li va fiya po Jesus?
POMHITO imwe, Jesus Kristus okwa li a fiwa po kovahongwa vaye vahapu ovo va li inava tambula ko ehongo laye limwe. Jesus okwa li a pula ovayapostoli vaye a ti: “Nanye yo mwa hala okuya?” Petrus okwa li e mu nyamukula a ti: “Omwene, otu ye kulyelye ngeno? Ove u neendjovo domwenyo waalushe.” (Joh. 6:51-69) Ovayapostoli kava li vali ve na apa tava dulu okuya, molwaashi elongelokalunga lOshijuda kala li li na ‘eendjovo domwenyo waalushe.’ Nokunena eendjovo da tya ngaho itadi hangika mo nandenande muBabilon Shinene, ouhamba wounyuni womalongelokalunga oipupulu. Keshe oo a twalwatwalwa okudja moshiunda shaKalunga ndele okwa hala oku mu hafifa, ‘otundi oya fika a penduke mo meemhofi’ noku alukile koshiunda. — Rom. 13:11.
2. Otu na okukaleka shike momadiladilo shi na sha noiholekwa ile oinima yopamhangu?
2 Jehova okwa li a ulika kutya oku na ko nasha needi daIsrael odo da li da kana. (Lesha Hesekiel 34:15, 16.) Ovakulunhuongalo Ovakriste kunena navo ove na oshinakuwanifwa shokukwafela eedi odo da twalwatwalwa okudja moshiunda, nove na ehalo oku shi ninga. Ngeenge ovakulunhuongalo ova pula omuudifi umwe a konakone nomunhu oo ine lipyakidila vali ndele okwa hala okukwafelwa, omuudifi oo oku na okuninga po shike ngeenge omunhu oo ine lipyakidila vali okwe mu lombwele kutya okwa nyona enyono la kwata moiti? Ponhele yokukundafana naye oshinima osho moule, omuudifi oo ta kwafele omunhu oo ine lipyakidila vali oku na mu ladipika a ka popye novakulunhuongalo. Ngeenge omunhu oo ine lipyakidila vali ina hala oku ka popya novakulunhuongalo, omuudifi oo oku na oku ka lombwela ovakulunhuongalo. — Lev. 5:1; Gal. 6:1.
3. Omulumenhu oo a li e na eedi 100 okwa li e udite ngahelipi eshi a li a mona odi yaye imwe oyo ya li ya kana?
3 Moshitukulwa sha tetekela, omwa kundafanwa kombinga yefaneko laJesus li na sha nomulumenhu oo a li e na eedi 100. Eshi a li a kanifa odi yaye imwe, okwa li a fiya po eedi dikwao 99 ndele ta ka konga oyo ya kana. Omulumenhu oo ka li tuu a hafa eshi a li a mona odi yaye oyo ya li ya kana! (Luk. 15:4-7) Nafye ohatu kala twa hafa ngeenge odi yaKalunga imwe oyo ya li ya kana mo moshiunda ya aluka. Ovakulunhuongalo nosho yo oilyo ikwao yeongalo otashi dulika ya li ya talela po omunhu oo ine lipyakidila vali, ve linyengifwa kohole. Ovakulunhuongalo nosho yo oilyo ikwao yeongalo nayo oya hala ovanhu ovo inave lipyakidila vali va alukile koshiunda opo va kale tava kwafelwa notava amenwa kuKalunga nova hafele omanangeko noupuna aye. (Deut. 33:27; Eps. 91:14; Omayel. 10:22) Ngeenge ovakulunhuongalo nosho yo oilyo ikwao yeongalo oi na okukwafela omunhu oo ine lipyakidila vali, oshike tava dulu okuninga po?
4. Oshike hatu dulu okulihonga mOvagalati 6:2, 5?
4 Omunhu oo ine lipyakidila vali ota dulu okutuwa omukumo a alukile keongalo moku mu lombwela kutya Jehova oku hole eedi daYe nota pula ashike di ninge oinima oyo tadi dulu okuninga. Oinima ya tya ngaho oya kwatela mo okukonakona Omishangwa, okukala pokwoongala kwopaKriste nosho yo okuudifa onghundana iwa yOuhamba. Oshiwa yo okulesha Ovagalati 6:2, 5 pamwe nomunhu oo ine lipyakidila vali, ndele to mu lombwele kutya Ovakriste otava dulu okukwafelafana ngeenge ve li momaudjuu, ndele ‘keshe umwe oku na okuhumbata omutengi waye mwene’ wopamhepo. Kape na oo ta dulu okukala omudiinini kuKalunga ponhele yamukwao.
Mbela vamwe ova twalwatwalwa ‘omolwoisho’?
5, 6. (a) Omolwashike sha fimana okupwilikina nawa ngeenge ovaitaveli vakwetu ovo inave lipyakidila vali tave tu lombwele kutya ove udite ngahelipi? (b) Ongahelipi to dulu okukwafela ovo inave lipyakidila vali va didilike kutya okweefa po okweendafana noshiwana shaKalunga okwa nyika oshiponga kuvo?
5 Opo ovakulunhuongalo nosho yo ovaudifi vakwao va pyokoka va dule okumona kutya ongahelipi tava dulu okukwafela omwiitaveli mukwao oo ine lipyakidila vali, ova pumbwa okupwilikina nawa ngeenge te va hokololele nghee e udite. Natu tye nee pamwe ou li omukulunhuongalo ta talele po ovalihomboli ovo ihava kala vali pokwoongala ‘omolwoisho’ oyo ye va ningifa va kale inave lipyakidila vali. (Luk. 21:34) Otashi dulika omaupyakadi opamaxupilo ile oinakuwanifwa ihapu youkwaneumbo oyo ye va ningifa va kale ihava kufa vali ombinga momalipyakidilo opaKriste. Otashi dulika ovalihomboli ovo va tye kutya ove udite va pumbwa olufuwo, ndele oto dulu oku va lombwela kutya okulitongola ko itaku va kwafele sha. (Lesha Omayeletumbulo 18:1.) Oto dulu oku va pula nelungi kutya: “Mbela omu na ngoo ehafo natango okudja eshi mwa hovela okukala ihamu i vali kokwoongala? Mbela onghalamwenyo youkwaneumbo weni oya xwepopala? Ehafo laJehova oli li ngoo natango eenghono deni?” — Neh. 8:10.
6 Ngeenge omunhu oo ine lipyakidila vali okwa dilonga komapulo oo ota dulu okudidilika kutya ke na vali oupamhepo muwa noina hafa vali molwaashi iha endafana vali neongalo. (Mat. 5:3; Heb 10:24, 25) Oshiwa okukwafela ovanhu ovo inave lipyakidila vali va didilike kutya ova kanifa ehafo lavo molwaashi ihava kufa vali ombinga mokuudifa onghundana iwa. (Mat. 28:19, 20) Ndele mbela ovo inave lipyakidila vali ova pumbwa okukatuka onghatu yopandunge ilipi?
7. Ohatu dulu okuladipika ovo va twalwatwalwa okudja moshiunda va ninge shike?
7 Jesus okwa ti: “Lipashukileni, omitima deni di ha lolokifwe koitendele nokokukolwa nokoshisho shoipalwifa . . . Pashukeni hano omafiku aeshe nokwiilikana, mu mone eenghono okuya onhapo ei aishe tai ka ningwa.” (Luk. 21:34-36) Ovo va twalwatwalwa okudja moshiunda ndele ova hala okukala vali va hafa otava dulu okuladipikwa va ilikane kuKalunga e va pe omhepo iyapuki noku va kwafele nokuladipikwa va katuke metwokumwe nomailikano avo. — Luk. 11:13.
Mbela vamwe ova twalwatwalwa molwaashi va pundukifwa?
8, 9. Ongahelipi to dulu okutomhafana nomunhu oo a pundukifwa?
8 Molwaashi inatu wanenena, omafimbo amwe ohapa holoka okuhaudafana, naasho otashi dulu okupundukifa vamwe. Vamwe ova punduka molwaashi omunhu wonhumba meongalo oo a li e shii okuhopaenenwa ina katuka metwokumwe nomafinamhango Ombibeli. Ngeenge oshinima sha tya ngaho osho sha ningifa omunhu wonhumba a kale ine lipyakidila vali, omukulunhuongalo oo te mu talele po ota dulu oku mu lombwela kutya Jehova iha pundukifa omunhu nandenande. Omolwashike e na okweefa omunhu wonhumba a nyone po ekwatafano laye naKalunga nosho yo noshiwana shaYe? Ponhele yaasho, omunhu oku na okutwikila okulongela Kalunga, e na elineekelo kutya “Omutokoli wedu alishe” oku shii osho sha ningwa po nota ka ungaunga noinima monghedi ya yuka. (Gen. 18:25; Kol. 3:23-25) Ngeenge omunhu a li ta ende ndele ta punduka, ita ka kala a nangala owina opo a wila nopehe na okuninga eenghendabala okulitoola po.
9 Omukulunhuongalo oo ta kwafele omunhu a alukile koshiunda, ota dulu okulombwela omunhu oo kutya ovanhu vamwe ovo va li va pundukifwa ohava ka mona konima yefimbo kutya oshinima osho sha li she va pundukifa kashi fi sha vali. Otashi dulika oshinima osho sha li she va pundukifa kashi po vali nokuli. Ngeenge omunhu oo ine lipyakidila vali okwa pundukifwa konima eshi a pewa outekuduliko, okudilonga pamwe neilikano otaku dulu oku mu kwafela a fike pexulifodiladilo kutya okwa li shili a pumbwa outekuduliko wa tya ngaho, noka li e na okweefa a pundukifwe koutekuduliko oo a li a pewa. — Eps. 119:165, NW; Heb. 12:5-13.
Mbela vamwe ova pundukifwa molwaashi vehe udite ko ehongo lonhumba?
10, 11. Okutomhafana kulipi taku dulu okukwafela ovo inava tambula ko omahongo onhumba Ombibeli?
10 Ovanhu vamwe otashi dulika va fiya po oshiunda shaKalunga molwaashi va li inava twa kumwe nehongo lonhumba lopamishangwa. Konima eshi Ovaisrael va li va mangululwa moupika waEgipti ova li va ‘dimbwa oinenelonga’ yaKalunga oyo a li e va ningila nokava li “va pula ewiliko laye.” (Eps. 106:13, yelekanifa OB-1986.) Otashi kwafa yo okudimbulukifa omunhu oo ine lipyakidila vali kutya “omupiya omudiinini nomunaendunge” oha yandje eendja dopamhepo da denga mbada. (Mat. 24:45) Omunhu a tya ngaho okwe lihonga oshili okupitila meendja da tya ngaho. Omolwashike omunhu oo ita tokola toko okutwikila okweenda moshili? — 2 Joh. 4.
11 Ngeenge ovakulunhuongalo tava kwafele ovo va twalwatwalwa okudja moshiunda shaKalunga, otava dulu oku va lombwela kombinga yovahongwa ovo va li va fiya po Jesus molwaashi va li inava tambula ko ehongo laye limwe. (Joh. 6:53, 66) Eshi va li va efa po okweendafana naKristus nosho yo ovashikuli vaye ovadiinini, ova li va kanifa olupandu lavo li na sha noinima yopamhepo nosho yo ehafo lavo. Mbela ovo va efa po okweendafana neongalo lopaKriste ova mona onhele yonhumba opo pe na eendja dopamhepo da denga mbada? Hasho nandenande, molwaashi kape na vali onhele imwe i na eendja dopamhepo da tya ngaho!
Mbela vamwe ova twalwatwalwa molwaashi va nyona sha kwata moiti?
12, 13. Ngeenge omunhu oo a twalwatwalwa okudja moshiunda okwa dimine kutya okwa nyona sha kwata moiti, ongahelipi hatu dulu oku mu kwafela?
12 Ovanhu vamwe ova efa po okuudifa nosho yo okuya kokwoongala molwaashi va nyona enyono la kwata moiti. Otashi dulika va kale ve udite kutya ngeenge ova hokololele ovakulunhuongalo omanyono avo otava ka kondwa mo meongalo. Ndele itava ka kondwa mo meongalo ngeenge ova efa po enyono la tya ngaho nove livela ombedi shili. (2 Kor. 7:10, 11) Ponhele yaasho, otava ka tambulwa ko meongalo, novakulunhuongalo otave ke va pa ekwafo lopamhepo olo va pumbwa.
13 Ngeenge ou li omuudifi a pyokoka nowa pewa oshinakuwanifwa shokukwafela omunhu oo ine lipyakidila vali, oto ka ninga po shike ngeenge okwe ku lombwele kutya okwa nyona enyono la kwata moiti? Ngaashi twe shi kundafana nale, ponhele yokuungaunga noshinima osho, mu ladipika a ka popye novakulunhuongalo. Ngeenge ina hala oku ka popya novakulunhuongalo, ulika okunakonasha kwoye nedina laJehova nosho yo nonghalonawa yopamhepo yeongalo mokukatuka metwokumwe newiliko laJehova li na sha nokuungaunga nomanyono a kwata moiti. (Lesha Leviticus 5:1.) Ovakulunhuongalo ove na owino wokukwafela keshe oo a hala okwaalukila meongalo nokwa hala okukala metwokumwe nehalo laKalunga. Omunhu a tya ngaho otashi dulika a kale a pumbwa okupewa outekuduliko wopahole. (Heb. 12:7-11) Ngeenge omunhu oo okwa dimine kutya okwa nyona kuKalunga nokwa efa po enyono la tya ngaho, ndele te livele ombedi shili, ovakulunhuongalo otave ke mu kwafela, nota dulu okudiminwa po kuJehova. — Jes. 1:18; 55:7; Jak. 5:13-16.
Omonamati oo a li a alukila keumbo okwa li a hafifa xe
14. Hokolola noitya yoye mwene kombinga yefaneko laJesus li na sha nomumati a kanene.
14 Ngeenge to kendabala okukwafela odi oyo ya twalwatwalwa, oto dulu oku i lombwela kombinga yefaneko laJesus olo li li muLukas 15:11-24. Mefaneko olo, omulumenhu omunyasha okwa li a hanauna po efyuululo laye mokukala nonghalamwenyo inai koshoka. Konima yefimbo okwa ka tonda onghalamwenyo inai koshoka ya tya ngaho. Okwa li ha kala a fya ondjala, okwa li a djuulukwa keumbo nokwa li e lialuluka ndele ta tokola okushuna keumbo. Fimbo a li ta alukile keumbo, xe okwa li e mu monena kokule ndele ta tondoka e ke mu shakeneke noku mu papatela ndele te mu xupita nokwa li a hafa. Okudilonga kefaneko olo otaku dulu okulinyengifa ovanhu ovo va twalwatwalwa va alukile koshiunda. Ovanhu ovo va twalwatwalwa ova pumbwa okwaalukila keongalo nopehe na okwoongaonga molwaashi onghalelo ei yoinima otai ka hanaunwa po mafiku.
15. Omolwashike ovanhu vamwe hava twalwatwalwa okudja meongalo?
15 Ovanhu vahapu ovo va twalwatwalwa okudja meongalo kave li filufilu monghalo ya fa yomumati a kanene. Vamwe ohava twalwatwalwa kanini nakanini, ngaashi ashike oshikepa oyo hai twalwatwalwa kanini nakanini kokule nomutunda. Vamwe ova wililwa po koisho ndele tava kanifa ekwatafano lavo naJehova. Vamwe ohava efa yo va pundukifwe koilyo ikwao yeongalo, ile hava fiye po eongalo molwaashi inava tambula ko omahongo onhumba opamishangwa. Vamwe ova ya momanyono. Ndele omayele oo twa kundafana kombinga yoinima oyo nae ku kwafele u kwafele ovo va fiya po oshiunda omolwomatomheno oo ile amwe e lili va aluke fimbo efimbo inali pwa po.
“Onawa eshi wa alukila keumbo mona wange!”
16-18. (a) Omukulunhuongalo umwe okwa li a kwafela ngahelipi omumwatate umwe oo a kala ine lipyakidila oule womido dihapu? (b) Oshike sha li sha ningifa omumwatate oo a kale ine lipyakidila vali, nokwa li a kwafelwa ngahelipi? (c) Okwa li a tambulwa ko ngahelipi meongalo?
16 Omukulunhuongalo umwe Omukriste okwa ti: “Ovakulunhuongalo vomeongalo letu ove na ohokwe inene mokutalela po ovanhu ovo inave lipyakidila vali. Onda li nde lipula shi na sha nomumwatate umwe oo nda li nda konakona naye nonde mu kwafela a mone eshiivo loshili. Okwa kala ine lipyakidila oule womido 25 lwaapo nokwa li moudjuu neenghono, onghee hano, onda li nde mu yelifila nghee omafinamhango Ombibeli taa dulu oku mu kwafela. Konima yefimbo, okwa li a hovela okuuya kOlupale lOuhamba nokwa li a dimina okukonakona Ombibeli opo i mu kwafele a dule okwaalukila koshiunda.”
17 Oshike sha li sha ningifa omumwatate oo a kale ine lipyakidila vali? Okwa ti: “Onda li nda yandja unene elitulemo koinima younyuni ponhele yokuyandja elitulemo koinima yopamhepo. Opo nee onda li nda efa po okukonakona, okuya moilonga yokuudifa nosho okuya kokwoongala. Eshi nda ka tala, onda li nda fiya po eongalo lopaKriste. Ndele onda li nda kwafelwa ndi alukile meongalo komukulunhuongalo umwe oo a li a ulikila nge ohokwe.” Omaupyakadi omumwatate oo okwa li a enda taa ninipala eshi a li a tambula ko ekonakonombibeli. Omumwatate oo okwa ti: “Onda li nda didilika kutya kanda li vali ndi na ekwatafano liwa naJehova, nokanda li handi landula ewiliko laye nosho yo lehangano laye.”
18 Omumwatate oo okwa li a tambulwa ko ngahelipi meongalo? Okwa ti: “Onda li ndi udite ngaashi omumati a kanene oo a popiwa kuJesus Kristus. Ndele omumwameme umwe omunamido oo a kala meongalo omo oule womido 30 da pita nota twikile natango okulongela Jehova noudiinini okwa ti kutya, ‘onawa eshi wa alukila keumbo mona wange!’ Osho osha li sha kuma omutima wange neenghono. Onda li ndi udite nda alukila keumbo shili. Onda hala yo okupandula nomutima aushe omukulunhuongalo oo [a kwafela nge] nosho yo eongalo alishe omolwohole yavo, ohamu, elidiiniko nosho yo okunakonasha kwavo. Ohole yavo yokuhola Jehova nosho yo ovanhu vakwao oya kwafela nge shili ndi alukile koshiunda.”
Ladipika ovo inave lipyakidila vali va katuke eenghatu paife!
19, 20. Ongahelipi to dulu okuladipika ovo inave lipyakidila vali va alukile koshiunda nopehe na okwoongaonga, nongahelipi to dulu oku va kwafela va mone kutya Kalunga ina teelela va longe shihapu shi dule pwaasho tava dulu okulonga?
19 Otu li momafiku axuuninwa, nexulilo longhalelo ei yoinima oli li pokuuya. Onghee hano, ladipika ovo inave lipyakidila vali va kale have uya kokwoongala kwopaKriste, ndele va ladipika va hovele nopehe na okwoongaonga. Va dimbulukifa kutya Satana ota kendabala okunyona po ekwatafano lavo naKalunga noku va ningifa va kale tava diladila kutya otava dulu okumona epepelelo komaupyakadi omonghalamwenyo ngeenge ova efa po elongelokalunga lashili. Va shilipaleka kutya okukala ovashikuli vaJesus ovadiinini oko ashike taku va kwafele va mone etulumuko lashili. — Lesha Mateus 11:28-30.
20 Dimbulukifa ovo inave lipyakidila vali kutya Kalunga okwa teelela tu mu longele ngaashi hatu dulu. Eshi Maria omumwaina waLasarus a li a kembaulwa kuvamwe omolwokuvaeka Jesus nomaadi ondilo edimba liwa okafimbo kanini fimbo Jesus ina fya, Jesus okwa ti: ‘Mu efeni, okwa ninga osho shi fike peenghono daye.’ (Mark. 14:6-8) Jesus okwa li yo a pandula omufiyekadi ohepele oo a li a yandja omayambidido manininini kotembeli. Omufiyekadi oo naye okwa li a longa osho shi fike peenghono daye. (Luk. 21:1-4) Vahapu vomufye ohatu dulu okuya kokwoongala kwopaKriste nokukufa ombinga moilonga yokuudifa Ouhamba. Ovanhu vahapu ovo inave lipyakidila vali navo otava dulu okuninga ngaho kekwafo laJehova.
21, 22. Ovo tava alukile kuJehova ohatu dulu oku va ladipika va kale noushili ulipi?
21 Ngeenge odi oyo ya twalwatwalwa okudja moshiunda oya tila oku ka shakena novamwatate, oto dulu oku i dimbulukifa shi na sha nanghee xe yomumati a kanene a li a hafa eshi omona waye a alukila keumbo. Ovo tava alukile keongalo navo ohava hafifa ovamwaxe. Va ladipika va kondjife Ondiaboli nova ehene popepi naKalunga. — Jak. 4:7, 8.
22 Ovo tava alukile kuJehova otava hambelelwa nehafo. (Omaimb.kemo. 3:40) Nopehe na omalimbililo, ova li va hafa neenghono eshi va li nale tava longele Kalunga. Ovo tava alukile koshiunda nopehe na okwoongaonga otava ka mona omanangeko noupuna mahapu monakwiiwa.
Oto nyamukula ngahelipi?
• Ongahelipi to dulu okukwafela Omukriste oo a pundukifwa ndele ta kala ine lipyakidila vali?
• Okutomhafana kulipi taku dulu okukwafela omunhu oo a fiya po oshiunda shaKalunga molwaashi ina tambula ko ehongo lonhumba?
• Ongahelipi hatu dulu okukwafela omunhu oo a tila okwaalukila keongalo?
[Efano pepandja 23]
Okudilonga kefaneko laJesus li na sha nomumati a kanene otaku dulu okulinyengifa ovo inave lipyakidila vali va alukile koshiunda