Ombibeli ohai lundulula onghalamwenyo yovanhu
Osha enda ngahelipi opo omukainhu oo a li ehe na eitavelo momalongelokalunga a kale paife ta longifa efimbo lihapu mokukwafela vamwe ve lihonge kombinga yaKalunga? Oshike she linyengifa omulumenhu oo a li e hole omaudano elongifo leenghono a kale e hole ombili? Osha enda ngahelipi opo omulumenhu oo a li ha longifa oingangamwifi, ha nu sha pitilila noha lu momapandavanda a dule okulundulula onghedi yaye yokukalamwenyo? Natu ka leshe osho va ti.
OUYELELE PAUXUPI
EDINA: PENELOPE TOPLICESCU
OMIDO: 40
OSHILONGO OMO A DALELWA: AUSTRALIA
ONAKUDIWA: OKWA LI A KANIFA OHOKWE MOMALONGELOKALUNGA
ONGHALAMWENYO YANGE YONALE: Onda dalelwa muSydney, shomuAustralia, ndele eshi nda li ndi na omido mbali, oukwaneumbo wetu owa li wa tembukila koNew Guinea. Otwa li twa kala hanga omido mbali muRabaul, opo nee otwa ka kala omido hetatu koBougainville. Eshi twa li ovanyasha, muNew Guinea kamwa li ee-TV, nomolwaasho ame nomumwamememati katwa li hatu kala unene meumbo, ndele okwa li hatu ka yowa nosho yo okuya keenhele oko haku nangalwa meetenda.
Eshi nda li ndi na omido omulongo, onda li nda hovela okukala ndi na ohokwe melongelokalunga. Meme okwa li Omukatolika, nokwa li a ninga omalongekido opo ndi kale handi i keetundimbibeli, odo da li hadi kwatelwa komesho kuumwe womovalikaleli vomoshitukulwa shetu. Onda li nda tokola okuninga Omukatolika ndele handi shashwa eshi nda li ndi na omido omulongo.
Ndele eshi twa ka shuna koAustralia, nonda li ndi na omido omulongo nasha, onda li nda kwatwa komalimbililo shi na sha naasho nda li nda hongwa kombinga yelongelokalunga. Eshi nda li kofikola yopombada, onda li nde lihonga kombinga yondjokonona yonale, nonda li handi kundafana natate oule wefimbo kombinga youdilo welongelokalunga, notwa li twa fika pexulifodiladilo kutya omahokololo oo e li mOmbibeli eengano ashike. Lwanima, onda li nda dja mo melongelokalunga laKatolika.
Ovadali vange ova li va topoka eshi nda li ndi na omido 16. Meme okwa li monghalo idjuu, nokonima yefimbo onda li nda tembuka opo ndi ka kale pamwe natate nomuvalekwa waye. Omumwamememati okwa li a fyaala nameme, nova li va tembukila koshitukulwa shimwe muAustralia. Onda li ndi udite owike neenghono pefimbo opo. Konima yeedula mbali, opo ashike nda ka dula okupanga vali oukaume wopofingo nameme. Onda li nda hovela okunwa, okulongifa oingangamwifi nokuya koivilo. Onda li nda efa po ofikola, ndele handi mono oilonga, nonda li nda hepifa onghalamwenyo yange fimbo nda li ndi na omido 20 nasha mokukala nonghalamwenyo inai koshoka paenghedi.
Eshi nda wanifa omido 25, onda li vali nda hovela okudiladila kombinga yOmbibeli. Onda li nda hovela oilonga ipe nonda li nda shakena naLiene, okakadona oko ka li ke na eenghedi diwa noka li haka popi alushe nefimaneko nomuyandji woilonga wako nonande okwa li ha ungaunga nako nai. Eshi nde ka pula kutya omolwashike nako iha ka ungaunga naye nai, oka ti kutya oha ka konakona Ombibeli nEendombwedi daJehova noka hala okukala metwokumwe nomafinamhango Ombibeli monghalamwenyo yako. Liene okwa li a pula nge tu konakone Ombibeli naye. Molwaashi kanda li nda uda ko nawa osho a ti, onda li ndi shii okwa hala okutya ohandi dulu okushiiva ashishe osho e shii kombinga yOmbibeli moule ashike wovili imwe. Onguloshi oyo, Liene okwa li a longifa eevili nhatu opo a nyamukule omapulo ange e na sha nOmbibeli. Onda li nda kumwa neenghono molwaashi omanyamukulo aeshe oo a li a pange okwa li taa yambididwa komishangwa dOmbibeli.
Ohandi dimbuluka eshi nda li handi shuna keumbo onguloshi oyo konima yeenghundafana detu naLiene, nda handukila Kalunga molwaashi ina kwafela nge ndi lihonge oshili kombinga yaye diva. Onda li ndi shii kutya Eendombwedi odi na onghalamwenyo yopaenghedi ya koshoka nonda li handi diladila kutya itandi dulu vali okulundulula onghedi yange yokukalamwenyo. Onda li yo handi diladila kutya itandi dulu oku ka udifa eumbo neumbo ngaashi Eendombwedi hadi ningi. Onda twikila okukonakona Ombibeli nEendombwedi, ndele onda li handi shi ningi nelalakano okumona epuko lonhumba momahongo ado opo ngeno ndi kale ndi na etomheno liwa okweefa po okukonakona nado. Ashike efiku limwe onda li nda didilika kutya nghi na efiku ndi mone mo epuko momahongo ado.
NGHEE OMBIBELI YA LUNDULULA ONGHALAMENYO YANGE: Eshi nda twikila okulihonga shihapu kombinga yomifikamhango dopaenghedi dOmbibeli, eliudo lange nalo ola kala tali pe nge oushima. Onda li nda efa po okulongifa oingangamwifi opo ndi kale ndi na eliudo la yela. Opo nee onda li nda tembukila koshilongo shimwe oule wefimbo lonhumba nonda li vali nda hovela okuya koivilo nosho yo okunwa. Eshi ngoo ngeno nda fa handi ningi exumokomesho lonhumba ndi kale metwokumwe nomafinamhango Ombibeli, konima yefimbo ohandi shuna vali konghedi yange yokukalamwenyo yonale. Ohandi ilikana kuJehova nda fya ohoni, ndele natango ohandi kala ndi udite nai.
Eshi nde lihonga kombinga yoshiningwanima shohamba David naBatseba nosho yo nghee Jehova li a ungaunga navo nonghenda, osha li sha kwafela nge. David okwa li a dimina enyono laye nopehe na okwoongaonga eshi a li a pukululwa, noka li a kendabala okuliyukipalifa. Ndele okwa li a tambula ko nelininipiko outekuduliko oo a li a pewa. (2 Samuel 12:1-13) Efimbo keshe ngeenge nda dopa okukala metwokumwe nomifikamhango daJehova, onda li handi dimbuluka oshiningwanima osho, nosha li hashi kala shipu kwaame okupa Jehova ombili. Onda tokola okukala handi ilikana fimbo inandi ya meyeleko lonhumba ponhele yoku pa Jehova ombili konima eshi nda ya nale meyeleko, naasho osha kwafela nge neenghono.
OUWA OO NDA MONA: Luhapu onda li handi handuka diva. Ndele omushangwa wOvaefeso 4:29-31 owa li wa kwafela nge ndi mone kutya onda pumbwa okuhenuka ‘ekeshuko, ehandu nefulakato.’ Eshi nde lihonga okupangela ehandu, onda li yo nde lihonga okupangela elaka lange. Kakele kaasho, omayele oo Jesus a li a yandja a ti kutya ‘oheeno yeni nai kale heeno’ okwa li a kwafela nge ndi kale handi katuka metwokumwe nomatokolo ange. — Mateus 5:37.
Meme oo pehovelo a li ha pataneke nge molwaashi handi endafana nEendombwedi, konima yefimbo okwa ka lombwela nge kutya oku udite etumba omolwange. Okwa li yo a lombwela nge a ti: “Ondi shi shii kutya paife owa ninga omukainhu e na eenghedi diwa ndele hamolwaashi ngeno wa tekulwa nawa ndele osheshi we lihonga kombinga yaJehova.” Onda li nda hafa neenghono eshi nda uda eendjovo odo.
Paife ondi wete kutya onghalamwenyo yange oi na elalakano noi na eityo. Omido omuwoi da pita, ame nomushamane wange otwa kala tu li ovahongi vOmbibeli vefimbo li yadi. Ohandi udifa eumbo neumbo, nondi udite kutya ei oyo oilonga ya fimanenena i dule oilonga keshe oyo nda longa.
OUYELELE PAUXUPI
EDINA: DENIS BUSIGIN
OMIDO: 30
OSHILONGO OMO A DALELWA: RUSSIA
ONAKUDIWA: OKWA LI E HOLE OKARATE
ONGHALAMWENYO YANGE YONALE: Onda dalelwa moshilando shedina Perm, nonda putukila moshilando shedina Furmanov, osho shi li moshitukulwa shaIvanovo, muRussia, noshi na ovakalimo ve fike po 40 000 lwaapo. Furmanov oshilando shi na omutalelo muwa molwaashi oshi na omiti diwa dihapu odo di na omafo haa pembe pokufu taa ningi mashunga nosho yo matilyana. Mo 1980 fiyo omo 1990 nasha, ominyonena oda li da hapupala neenghono moshilando osho. Oukwaneumbo wetu owa li hau mono oyuuyemo inini lela. Otwa li hatu kala meumbo limwe novadali vange nosho yo omumwamememati, neumbo olo ola li la finana neenghono molwaashi ola li li na ashike onduda imwe yokunangala.
Onda li nda hovela okulihonga okarate fimbo nda li ndi na omido 7. Onda li ndi hole neenghono oudano wokarate nonda li nde u lenga monghalamwenyo yange. Efimbo keshe nda li inandi lipyakidila noinima imwe, onda li handi i alushe konhele yokulideulila. Onghee hano, ookaume kange aveshe ova li yo hava kufa ombinga momaudano. Onda li nda wina ekwamo lange litilyana lokarate fimbo nda li ndi na omido 15, nonda ka wina vali ekwamo litwima ediya konima yomudo umwe. Onda li mongudu yokudana okarate oyo ya li ya kufa ombinga momafiyafano omaudano omanyakwa muRussia nomoilongo yaEuropa naAsia. Pefimbo opo, onakwiiwa yange oya li tai monika tai timaumbwilifa, ndele onghalamwenyo yange aishe oya ka lunduluka eshi nda li ndi na omido 17.
Otwa li twa longa omunyonena nookaume kange vamwe, ndele hatu kwatwa po. Ame onda li nda tokolelwa eedula mbali modolongo. Onghalamwenyo yomodolongo oya li idjuu neenghono. Ndele fimbo nda li modolongo, onda li nda mona Ombibeli oshikando shotete. Onda li nda lesha embo laGenesis, Omapsalme nosho yo Etestamenti Lipe. Onda li nde lihonga momutwe eindilo lOmwene Wetu, nonda li handi li endulula onguloshi keshe fimbo inandi ka nangala, handi diladila kutya otashi ka kwafela nge monghedi yonhumba.
Onda li nda mangululwa modolongo mo 2000, ndele kanda li ndi shii kutya nandi ninge shike nonghalamwenyo yange nokanda li ndi wete i na eityo. Okudja opo, onda li nda hovela okulongifa oingangamwifi, nameme okwa fya lwopefimbo opo. Onda li ndi hole meme neenghono, nosha li shidjuu okulididimikila oluhodi. Ndele onda li nda dula okweefa po oingangamwifi kwaame mwene, nonda li nda hovela okuya vali konhele yokulideulila. Onda li yo nda tembukila koshilando shedina Ivanovo, ndele handi mono oilonga mofitola yokulandifa oikulya. Omuponhele womukulunhu wofitola okwa li umwe womEendombwedi daJehova. Omukainhu oo okwa li a yelifila nge eeshili dimwe dOmbibeli dopehovelo nokwa li a ninga elongekido opo Ondombwedi imwe i kale hai konakona naame Ombibeli pandjikilile.
NGHEE OMBIBELI YA LUNDULULA ONGHALAMWENYO YANGE: Eshi nda li handi konakona Ombibeli, onda li nda tunhukwa neenghono eshi nde lihonga kutya Kalunga okwa lalakanena oku ka ninga edu oparadisa, nonda li nda hala okuwanifa po oiteelelwa yaye opo naame monakwiiwa ndi ka kale moparadisa. Onda li nda mona diva kutya Jehova Kalunga oku na omifikamhango dopombada odo a hala ovanhu va kale metwokumwe nado. Onda kala efimbo lile monghalamwenyo handi lipula ashike shi na sha nouwa wange mwene. Ndele onde ke lihonga kutya Jehova okwa hala ndi kale handi diladila kombinga youwa wavamwe nosho yo okukulika omaukwatya oo nda li ndihe na, mwa kwatelwa olune nombili.
Eshi nda hovela okudiladila moule kombinga yoinima aishe oyo Jehova a ningila nge, ngaashi eshi a yamba po Omona waye omolwomanyono ange, olupandu lokupandula Kalunga omolwohole yaye ola li le linyengifa nge ndi lundulule onghalamwenyo yange. Pashihopaenenwa, onde lihonga mEpsalme 11:5, (NW) kutya Jehova okutonde elongifo leenghono. Onghee hano, onda li nda efa po okutala eeprograma do-TV odo da kwatela mo elongifo leenghono noutondwe. Onda li yo nda kondja neenghono opo ndi efe po omaudano elongifo leenghono. Efinamhango olo li li mo 1 Ovakorinto 15:33 ola kwafela nge ndi mone kutya ovanhu ovo handi hoolola va ninge ookaume kange otava ka nwefa nge mo neenghono. Efinamhango olo otali yandje oumbangi kutya omolwashike nda li nda tulwa modolongo. Onghee hano, onda li nda tokola okuxulifa po eendafano novanhu ovo ve hole omaudano elongifo leenghono.
OUWA OO NDA MONA: Okweendafana nEendombwedi daJehova nosho yo okukonakona Ombibeli okwa kwafela nge ndi ninge omunashili. Pashihopaenenwa, onde lihonga mOvaheberi 13:5 kutya onda pumbwa okukala nda wanenwa kwaasho ndi na nondi na okukondjifa ohole yokuhola oimaliwa. Okutula moilonga omayele oo okwa kwafela nge ndi efe po okupopya oipupulu nosho yo okuvaka.
Ondi hole alushe okukala ndi na ookaume. Monakudiwa, onda li nda mona nghee oukaume wa li wa nyonwa po kolwisho ile koumbada. Nonande Eendombwedi daJehova inadi wanenena, onda mona kutya oda fimaneka omifikamhango daKalunga nohadi kendabala neenghono okutula moilonga omayele aye ngeenge tadi ungaunga navamwe. Paife onda panga oukaume washili nadimwe domudo.
Nghi shii kutya ngeno onghalamwenyo yange oya tya ngahelipi ngeno nghi lihongele okukala metwokumwe nomifikamhango dOmbibeli. Otashi dulika ngeno nda shuna modolongo ile handi yahameke vamwe noku va monifa oixuna. Ndele paife ondi na omukulukadi wange e na omaukwatya mawa novanamati vavali. Tu li oukwaneumbo, ohatu hafele neenghono oilonga yokukwafela vamwe ve lihonge oshili kombinga yaKalunga.
OUYELELE PAUXUPI
EDINA: JOSÉ CARLOS PEREIRA DA SILVA
OMIDO: 31
OSHILONGO OMO A DALELWA: BRASILIA
ONAKUDIWA: OKWA LI HA LU MOMAPANDAVANDA
ONGHALAMWENYO YANGE YONALE: Onda putukila molukanda la kaka muSão Paulo, shomuAmerika. Katwa li tu na omeva mayela okunwa nokatwa li tu na oundjuwo ve li monghalo iwa. Oshitukulwa osho osha li sha shiivikila elongifo leenghono nosha li shi yadi ominyonena.
Eshi nda li handi kulu, onda li ndi hole omapove nosho yo elongifo leenghono. Onda li handi kufa ombinga luhapu momalwoodi omomapandavanda, onghee hano, ovanhu vopoushiinda shetu ova li hava tila nge. Okudjala neholokepo lange oya li tai ulike kutya onda nyika oshiponga. Onda li handi nu neenghono, naluhapu kanda li handi kala ndi shii apa ndi li. Naame onda li yo handi longifa oingangamwifi ngaashi ovamwamememati. Ashike umwe womuvo okwa fya omolwokulongifa oingangamwifi sha pitilila.
NGHEE OMBIBELI YA LUNDULULA ONGHALAMWENYO YANGE: Eshi nda shakena nEendombwedi daJehova, oda li da ulikila nge mOmbibeli kutya Kalunga ota ka ninga edu alishe Oparadisa. (Lukas 23:42, 43; Ehololo 21:3, 4) Onda li yo nde lihonga kutya oonakufya kave na eshi ve shii, nomolwaasho Kalunga iha hepeke ovakolokoshi momundilo woheli. (Omuudifi 9:5, 6) Osho osha li sha etela nge epepelelo neenghono. Osho nde lihonga kombinga yaKalunga osha li she linyengifa nge ndi kale nda halelela okulundulula onghedi yange yokukalamwenyo. Ashike kasha li shipu okuninga omalunduluko, ngaashi okweefa po okulongifa oingangamwifi, okunwa, okulwa nosho yo okutukana oko nda li nda ikilila.
Ndele nande ongaho, onda li nda tuwa omukumo neenghono keendjovo domuyapostoli Paulus odo da shangwa mo 1 Ovakorinto 6:9-11. Omushangwa oo otau ulike kutya Ovakriste vamwe vomefelemudo lotete ova li ve na eenghedindjikilile dii da fa odo nda li ndi na, fimbo va li inava ninga Ovakriste. Ashike omushangwa oo owa ti yo: “Mwa li mu li ngaha, vamwe vomunye; ndelenee nye mwe liyelifa, mwa yapulwa nomwa yukipalifwa omedina lOmwene Jesus Kristus nokOmhepo yaKalunga ketu.” Eendjovo odo oda kwafela nge ndi kale ndi na omukumo kutya naame ohandi dulu okuninga omalunduluko a pumbiwa monghalamwenyo yange opo ndi hafife Kalunga.
Eshi nda hovela okweendafana nEendombwedi daJehova, onda li nda tomwa ndi itavele kutya odi li melongelokalunga lashili. Eendombwedi odi shii kutya onda li ndi hole elongifo leenghono nosho yo omapove, ndele nande ongaho, oda tambula nge ko nohamu nonohole.
OUWA OO NDA MONA: Ngeno nghi konakonene Ombibeli ndele handi lundulula onghedi yange yokukalamwenyo, otashi dulika ngeno osho onda fya nale. Ashike onda hafa eshi nda kwafela umwe womovamwamememati e lihonge kombinga yOmbibeli ndele ta efa po okulongifa oingangamwifi oyo ya li ye mu pika. Onda li yo nda ladipika ovapambele vange vamwe va hovele okukonakona Ombibeli. Onda hafa yo neenghono eshi nde liyapulila Kalunga oo he tu file oshisho, opo ndi mu longele.
[Eendjovo dididilikwedi pepandja 23]
“Onda tokola okukala handi ilikana fimbo inandi liyandja keyeleko ponhele yoku ka ilikana eshi nde liyandja nale, naasho osha kwafela nge neenghono”