Natu hopaeneneni Jesus mokukala hatu hongo ovanhu nohole
“Kapa li omunhu noshito, a popya ngaashi winya.” — JOH. 7:46.
1. Ovanhu ova li ve linyenga ngahelipi konghedi yaJesus yokuhonga?
DILADILA ashike nghee sha li shihafifa okupwilikina komahongo aJesus! Ombibeli otai tu lombwele kutya ovanhu ovo Jesus a li a honga ova li ve udite ngahelipi. Pashihopaenenwa, omushangi wEvangeli Lukas, okwa popya kutya ovanhu vomoshilando omo mwa li hamu di Jesus ‘ova li va kuminwa eendjovo donghenda odo da dja mokanya kaye.’ Mateus okwa popya kutya ovo va li va pwilikina komahongo aJesus omEudifo laye lokOmhunda ova li va “kuminwa elongo laye.” Johannes naye okwa popya kutya ovakwaita ovo va li va tumwa va ka kwate po Jesus ova li va dja ko eenyala dongaho, nova popya va ti: “Kapa li omunhu noshito, a popya ngaashi winya ta popi.” — Luk. 4:22; Mat. 7:28; Joh. 7:46.
2. Jesus okwa li ha longifa eenghedi dokuhonga dilipi?
2 Ovakwaita ovo kava li va puka eshi va popya eendjovo odo, molwaashi Jesus oku li shili Omuhongi munene oo a li ko nale. Okwa li ha hongo ovanhu monghedi ya yela noi li paunafangwa nokwa li ha tomhafana monghedi itai dulu okupatanekwa. Okwa li ha longifa noukeka omafaneko nosho yo omapulo. Okwa li ha lundulula onghedi yaye yokuhonga, she likolelela kovanhu ovo ta hongo, kutya nee ovanhu ovo ve na eendodo dopombada ile ovanhu vongaho. Eeshili odo Jesus a li a honga oda li dipu okuudiwa ko ndele odomoule. Ndele osho hasho ashike sha li sha ningifa Jesus a kale Omuhongi munene.
Ohole oyo oukwatya wa fimanenena
3. E li omuhongi, ongahelipi Jesus a li a yooloka ko kovawiliki vomalongelokalunga vopefimbo laye?
3 Nopehe na omalimbililo, mokati kovanongo vomishangwa nOvafarisai omwa li ovalumenhu ovanaendunge ovo va li ve na eshiivo nounghulungu wokuhonga. Ndele mbela oshike sha li sha ningifa Jesus a kale a yooloka ko kuvo? Ovawiliki vomalongelokalunga kava li ve hole ovanhu vongaho. Ponhele yaasho, ova li ve va tonde nove va tala ko kutya “ova fingwa.” (Joh. 7:49) Mepingafano naasho, Jesus okwa li ha kala a etela ovanhu ovo onghenda molwaashi ‘ova li va hepekwa nova loloka va fa eedi dihe na omufita.’ (Mat. 9:36) Jesus okwa li omunahole, omunalukeno nokwa li ha udile ovanhu oukwao wananghali. Ndele ovawiliki vomalongelokalunga kava li ve hole shili Kalunga. (Joh. 5:42) Ashike Jesus okwa li e hole Xe nokwa li a hafela okulonga ehalo laYe. Ovawiliki vomalongelokalunga ova li va pengifa eendjovo daKalunga omolwouwa wavo vene, ndele Jesus okwa li e hole “eendjovo daKalunga,” nokwa li ha hongo ovanhu kombinga yado, he di yelifile vamwe, he di popile noha kala metwokumwe nado. (Luk. 11:28) Ohole yaKristus yokuhola ovanhu oi liwetikile mwaasho a li a honga nosho yo monghedi omo a li ha ungaunga novanhu.
4, 5. (a) Omolwashike sha fimana okukala hatu hongo ovanhu nohole? (b) Omolwashike twa pumbwa yo eshiivo nosho yo ounghulungu mokuhonga kwetu?
4 Mbela ongahelipi shi na sha nafye? Tu li ovashikuli vaKristus, otwa hala oku mu hopaenena moukalele wetu nosho yo mokukalamwenyo kwetu. (1 Pet. 2:21) Onghee hano, elalakano letu kali fi ashike okuhonga ovanhu oshili yOmbibeli, ndele otwa hala yo okuhopaenena omaukwatya aJehova, unene tuu ohole. Ngeenge otwa kala hatu ulike ohole, ohatu ka dula okuhanga omitima daavo hatu udifile, kashi na nee mbudi kutya otu na eshiivo lihapu ile olinini, otu na ounghulungu wokuhonga muhapu ile omunini. Opo tu pondole moilonga yetu yokuninga ovanhu ovahongwa, otwa pumbwa okuhopaenena Jesus mokukala hatu hongo vamwe nohole.
5 Opo tu ninge ovahongi vawa, otwa pumbwa okukala tu shii nawa osho hatu hongo nokukala tu na ounghulungu wokuhonga. Jesus okwa li a kwafela ovahongwa vaye va kale ve na eshiivo nounghulungu wokuhonga. Kunena, Jehova ohe tu kwafele tu kale tu na eshiivo nounghulungu wokuhonga okupitila mehangano laye. (Lesha Jesaja 54:13; Lukas 12:42.) Ndele nande ongaho, otu na okukala hatu hongo ovanhu nomutima aushe. Ohatu ka mona oidjemo ihafifa neenghono ngeenge otwa kala tu na eshiivo, ounghulungu nosho yo ohole. Ndele mbela ongahelipi hatu dulu okuulika ohole ngeenge hatu hongo vamwe? Jesus nosho yo ovahongwa vaye ova li ve shi ninga ngahelipi? Natu ka konakoneni kombinga yaasho.
Natu kale tu hole Jehova
6. Ohatu kala tu udite ngahelipi ngeenge hatu popi kombinga yomunhu oo tu hole, nohashi tu linyengifa tu ninge shike?
6 Ohatu kala twa hafa okupopya kombinga yoinima oyo tu hole ile oyo twa lenga, novanhu ohava kala ve wete nghee hatu shi ningi nondjungu nonexwamo. Osho ohatu shi ningi unene tuu ngeenge hatu popi kombinga yomunhu oo tu hole. Luhapu, ohatu kala twa halelela okulombwela vamwe osho tu shii kombinga yomunhu oo. Omunhu a tya ngaho ohatu mu tange, hatu mu fimaneke nohatu mu popile. Ohatu ningi ngaho molwaashi otwa hala vamwe navo va kale va hokwa omunhu oo nosho yo omaukwatya aye.
7. Ohole yaJesus yokuhola Kalunga oya li ye mu linyengifa a ninge shike?
7 Otwa pumbwa okukala tu shii nawa Jehova notu mu hole, opo tu dule yo okukwafela vamwe va kale ve mu hole. Komesho yaaishe, elongelokalunga lashili ola kanghamena kohole yokuhola Kalunga. (Mat. 22:36-38) Jesus okwe tu tulila po oshihopaenenwa sha wanenena. Oku hole Jehova nomutima waye aushe, nomadiladilo aye aeshe, nomwenyo waye aushe nosho yo eenghono daye adishe. Jesus oku shii nawa Xe, molwaashi otashi dulika a kala pamwe naye meulu oule womido omamiliyona omayovi. Osho osha li sha etifa oshidjemo shilipi? Jesus okwa ti: “Ame ondi hole Tate.” (Joh. 14:31) Ohole ya tya ngaho oya li i liwetikile meendjovo daye nosho yo moilonga yaye. Oya li ye mu linyengifa a ninge alushe oinima oyo tai hafifa Kalunga. (Joh. 8:29) Ohole oya li ye mu linyengifa a tokole ovawiliki vomalongelokalunga ovanaihelele, ovo va li have liti kutya otava longele Kalunga. Oya li yo ye mu linyengifa a lombwele vamwe kombinga yaKalunga noku va kwafela ve mu shiive nova kale ve mu hole.
8. Ohole yokuhola Kalunga oya li ye linyengifa ovahongwa vaJesus va ninge shike?
8 Ngaashi Jesus, ovahongwa vaye vomefelemudo lotete ova li ve hole Jehova, nohole oyo oya li ye ve linyengifa va udife onghundana iwa nouladi nonondjungu. Ova li va yadifa Jerusalem nehongo lavo, nonande ova li tava patanekwa kovawiliki vomalongelokalunga ovanaenghono. Ovahongwa kava li va efa po okupopya kombinga yoinima oyo va mona nova uda. (Oil. 4:20; 5:28) Ova li ve shii kutya Jehova oku li pamwe navo note ke va nangeka noupuna, na Jehova okwa li e va nangeka noupuna shili. Konima eshi pa pita hanga omido 30 okudja pefyo laJesus, omuyapostoli Paulus okwa li a popya kutya onghundana iwa oya udifilwa “ovashitwa aveshe vokoshi yeulu.” — Kol. 1:23.
9. Ongahelipi hatu dulu okukala tu hole Kalunga nohole ya xwama?
9 Ngeenge otwa hala shili okupondola mokuhonga kwetu, otwa pumbwa okutwikila okukala tu hole Kalunga nohole ya xwama. Mbela osho ohatu dulu oku shi ninga ngahelipi? Omokukala hatu popi luhapu naKalunga okupitila meilikano. Ohatu kala yo tu hole Kalunga nohole yomoule okupitila mokukonakona Eendjovo daye, mokulesha oileshomwa ya kanghamena kOmbibeli nosho yo okukala pokwoongala kwopaKriste. Ngeenge otwa kala tu na eshiivo lihapu lokushiiva Kalunga, ohatu ka kala tu mu hole nomutima aushe. Ngeenge otwa ulike kutya otu hole Kalunga meendjovo nomoilonga, vamwe otave ke shi didilika notashi dulika va ehene popepi naJehova. — Lesha Epsalme 104:33, 34.
Natu kale tu hole osho hatu hongo
10. Oshike hashi ningifa omunhu a kale omuhongi muwa?
10 Oshinima osho hashi ningifa omunhu a kale omuhongi muwa osho okukala e hole osho ta hongo. Oku na okukala a itavela kutya osho ta hongo oshoshili, otashi ti sha nosha fimana. Ngeenge omuhongi okwa lenga osho ta hongo, ovanhu otava ka didilika noupu exwamo laye, nehongo laye otali ka nwefa mo neenghono ovo ta hongo. Ndele ngeenge omuhongi ina lenga osho ta hongo, mbela ota dulu ngoo okuteelela ovahongwa vaye va kale va lenga osho tava hongwa? Osha fimana okutula po oshihopaenenwa shiwa u li omuhongi wEendjovo daKalunga. Jesus okwa ti: “Omuhongwa oo a hongekeka ota ka kala a fa omuhongi waye.” — Luk. 6:40, The New Berkeley Version in Modern English.
11. Omolwashike Jesus a li e hole osho a li ta hongo?
11 Jesus okwa li e hole osho a li ta hongo. Okwa li e shii kutya oku na sha shi na ongushu osho e na okulombwela vamwe, oshili kombinga yaXe womeulu, sha hala okutya, “eendjovo daKalunga” nosho yo ‘eendjovo domwenyo waalushe.’ (Joh. 3:34; 6:68) Ngaashi ouyelele wa twa, oshili oyo Jesus a li a honga oya li ya nyaneka pomutenya oinima oyo ii nokudivilika osho shiwa. Oshili oyo oya li ya kwafela ovalininipiki va kale ve na eteelelo noye va hekeleka molwaashi ova li va pukifwa kovawiliki vomalongelokalunga oipupulu nova li va hepekwa kOndiaboli. (Oil. 10:38) Ohole yaJesus yokuhola oshili kaya li ashike i liwetikile mwaasho a honga, ndele oya li yo i liwetikile moilonga yaye.
12. Omuyapostoli Paulus okwa li e udite ngahelipi shi na sha nonghundana iwa?
12 Ngaashi Jesus, ovahongwa vaye navo ova li ve hole nova lenga neenghono oshili kombinga yaJehova nosho yo yaKristus, novapataneki vavo kava li va dula oku va mweneka vaha lombwele vamwe kombinga yoshili. Paulus okwa li a shangela Ovakriste vakwao vokuRoma a ti: ‘Onda hala ndi mu udifile evangeli, osheshi ame ihandi fi ohoni evangeli, osheshi olo eenghono daKalunga okuxupifa keshe tuu ou ta itavele.’ (Rom. 1:15, 16) Paulus okwa li e shi tala ko shi li oufembanghenda okuudifa oshili. Okwa ti: ‘Ame onda pewa efilonghenda eli, okuudifila ovapaani evangeli loupuna waKristus uhe fi kukonakonwa.’ (Ef. 3:8) Onghee hano, ohatu dulu okumona kutya Paulus okwa li e na ouladi eshi a li ta hongo ovanhu kombinga yaJehova nosho yo omalalakano aYe.
13. Omatomheno elipi tu na okukala tu hole onghundana iwa?
13 Onghundana iwa oyo tai hangwa mEendjovo daKalunga oye tu kwafela tu shiive Omushiti wetu notu kale tu na ekwatafano lopofingo naye. Onghundana iwa otai dulu oku tu kwafela tu mone omanyamukulo taa mbilipaleke komapulo a fimanenena monghalamwenyo noi na eenghono dokulundulula onghalamwenyo yetu. Otai tu kwafele tu kale tu na eteelelo notai tu pameke ngeenge tu li momaudjuu. Kakele kaasho, onghundana iwa otai kwafele ovanhu va ende mondjila oyo tai twala komwenyo waalushe. Kape na eshiivo limwe li na ondilo neenghono ile la fimanenena li dule onghundana iwa. Onghundana iwa oi li oshali i na ondilo ihe fi okuyelekwa notai tu etele ehafo linene. Otai tu pe yo ehafo la wedwa po ngeenge otwa kala hatu lombwele vamwe kombinga yayo — Oil. 20:35.
14. Ongahelipi hatu dulu okukulika ohole yokuhola osho hatu hongo?
14 Oshike to dulu okuninga po opo u kulike ohole yoye yokuhola onghundana iwa shi dulife nale? Ngeenge to lesha Eendjovo daKalunga, kala ho kanghama po ndele to diladila kwaasho wa lesha. Pashihopaenenwa, kala nee ngeno wa fa u wete u li pamwe naJesus moukalele pefimbo loukalele waye wokombada yedu ile wa fa to ende pamwe nomuyapostoli Paulus. Kala wa fa u liwete u li mounyuni mupe nokudiladila kunghee onghalamwenyo tai ka kala ya yooloka ko kwaayo i li ko kunena. Diladila komanangeko noupuna oo wa mona nale eshi wa dulika konghundana iwa. Ngeenge owa kala u hole onghundana iwa, ovo to hongo navo otava ka didilika ohole yoye. Otwa pumbwa okudilonga twa mana mo kwaasho twe lihonga nokuyandja elitulemo kwaasho hatu hongo. — Lesha 1 Timoteus. 4:15, 16.
Natu kale tu hole ovanhu
15. Omolwashike omuhongi a pumbwa okukala e hole ovahongwa vaye?
15 Omuhongi muwa oha ningifa ovahongwa vaye va kale ve udite va manguluka opo va kale ve na ehalo okuninga omatyekosha e na sha naasho tave lihongo nokukufa ombinga nehafo, tashi di komutima. Omuhongi omunahole oha kwafele ovahongwa vaye va mone eshiivo, molwaashi oku na ko nasha navo shili. Oha lundulula onghedi yaye yokuhonga she likolelela keemhumbwe nosho yo keudeko lovahongwa vaye. Oha yavelele okudula kwavo nosho yo eenghalo davo. Ngeenge omuhongi oku na ohole ya tya ngaho, ovahongwa vaye otave ke shi didilika notava ka hafela ehongo laye nosho yo okulihonga kwavo.
16. Omeenghedi dilipi Jesus a li a ulika ohole yokuhola ovanhu?
16 Jesus okwa li a ulika kutya oku hole ovanhu. Okwa li a ulika ohole inenenene mokuyandja omwenyo waye wopanhu wa wanenena opo vamwe va dule okuxupifwa. (Joh. 15:13) Pefimbo loukalele waye, Jesus okwa li ha kala alushe e lilongekida okukwafela ovanhu palutu noku va honga kombinga yaXe. Jesus ka li ha teelele ovanhu ovo ve uye kuye, ndele ponhele yaasho, okwa li ha ende eekilometa omafele kolupadi opo a ka udifile ovanhu onghundana iwa. (Mat. 4:23-25; Luk. 8:1) Okwa li omulididimiki nokwa li e shii omangabeko ovanhu. Ngeenge ovahongwa vaye va li va pumbwa epukululo, okwa li he liyandje pahole. (Mark. 9:33-37) Okwa li e va twa omukumo eshi a popya nelineekelo kutya otava ka pondola mokuudifa onghundana iwa. Kape na vali omunhu umwe a li omuhongi omunahole ngaashi Jesus. Ohole oyo a li a ulikila ovahongwa vaye oya li ye ve linyengifa va kale ve mu hole nokudiinina oipango yaye. — Lesha Johannes 14:15.
17. Ovahongwa vaJesus ova li va ulika ngahelipi ohole yavo yokuhola ovanhu?
17 Ngaashi Jesus, ovahongwa vaye navo ova li ve hole neenghono ovanhu ovo va li tava udifile nova li ve na ko nasha navo. Ovahongwa vaJesus ova li ve lididimikila omahepeko nova li va tula eemwenyo davo moshiponga opo va yakule vamwe nova li va pondola okuudifa onghundana iwa. Ova li ve hole neenghono ovanhu ovo va li va tambula ko onghundana iwa. Omuyapostoli Paulus okwa li a shanga eendjovo tadi kumu omutima neenghono, tadi ti: “Otwa holoka mokati keni nombili ngaashi ina omunyamifi ha tekula ouhanana vaye; osho nafye yo moku mu djuulukwa neenghono twa hala oku mu pa yo havangeli laKalunga alike, ndelenee eemwenyo detu vene yo, osheshi onye omwa ninga ovaholike vetu.” — 1 Tes. 2:7, 8.
18, 19. (a) Omolwashike hatu kala twa hala okuninga omaliyambo opo tu wanife po oilonga yokuudifa? (b) Hokolola oshimoniwa osho tashi ulike kutya ohole oyo hatu ulike ohai didilikwa kuvamwe.
18 Eendombwedi daJehova kunena nado otadi udifa mounyuni aushe nokukonga ovanhu ovo va hala okushiiva Kalunga noku mu longela. Moule womido 17 da landulafana, otwa longa eevili di dule pomamiliyona eyovi omudo keshe moilonga yokuudifa nokuninga ovanhu ovahongwa, nohatu twikile natango noilonga ya tya ngaho. Ohatu udifa nehalo liwa, nonande oilonga yokuudifa otai pula tu yambe po efimbo letu, eenghono detu nosho yo oiniwe yetu. Ngaashi Jesus, otu shii kutya Tate yetu womeulu omunahole okwa hala ovanhu va mone eshiivo olo tali twala komwenyo waalushe. (Joh. 17:3; 1 Tim. 2:3, 4) Ohole ohai tu linyengifa tu kwafele ovanamitimadiwa va shiive Jehova nova kale ve mu hole ngaashi fye.
19 Ohole oyo hatu ulike ohai didilikwa kuvamwe. Pashihopaenenwa, omumwameme umwe omukokolindjila wokOilongo yaHangana oha shange eenhumwafo opo a hekeleke ovo va filwa ovaholike vavo. Omulumenhu umwe okwa li a alulila omumwameme oo onhumwafo a shanga a ti: “Tete onda li nda kumwa eshi omunhu a ninga eenghendabala a shangele omunhu oo ehe shii nandenande opo e mu kwafele e lididimikile omaudjuu. Ndele onda fika ashike pexulifodiladilo kutya ou hole ovanhu vakweni nosho yo Kalunga oo ha wilike ovanhu va ende mondjila oyo tai twala komwenyo.”
20. Omolwashike sha fimana okuhonga nohole?
20 Ohaku tiwa kutya ngeenge omunhu oku hole oshilonga shonhumba noku na ounghulungu, ota dulu oku shi longa noukeka. Mokuhonga kwetu, ohatu kwafele ovakonakoni vetu va shiive Jehova nova kale ve mu hole nomutima aushe. Opo tu kale ovahongi hava pondola shili, otu na okukala tu hole Kalunga, tu hole oshili nosho yo ovanhu. Ngeenge otwa kulike ohole ya tya ngaho noku i ulika moukalele wetu, itatu ka mona ashike ehafo olo hali di mokuyandja ndele ohatu ka kala yo twa mbilipalelwa okushiiva kutya ohatu hopaenene Jesus nohatu hafifa Jehova.
Oto nyamukula ngahelipi?
• Eshi hatu udifile vamwe onghundana iwa, omolwashike sha fimana okukala . . .
tu hole Kalunga?
tu hole osho hatu hongo?
tu hole ovanhu ovo hatu hongo?
[Efano pepandja 17]
Oshike sha li sha ningifa onghedi yaJesus yokuhonga i kale ya yooloka ko kwaayo yovanongo vomishangwa nOvafarisai?
[Efano pepandja 20]
Omuhongi muwa oku na okukala e na eshiivo, ounghulungu, nokomesho yaaishe, oku na okukala e na ohole