Mbela omalongelokalunga aeshe ooshili?
OTU li mounyuni omo mu na omalongelokalunga mahapu e lili noku lili. Omakonakono amwe opo a ningwa okwa ulika kutya mounyuni aushe omu na omalongelokalunga oo a talika ko manene e li 19 nosho yo omalongelokalunga manini e li 10 000 lwaapo. Osho osha ningifa ovanhu va kale tava hoolola omalongelokalunga oo va hala. Ndele mbela oshi na ngoo oshilonga kutya omunhu okwa hoolola elongelokalunga la tya ngahelipi?
Ovanhu vamwe ohava popi kutya omalongelokalunga okwa fa ashike eendjila da yoolokafana ndele adishe oda finda komhunda imwe. Ove wete kutya okweenda mondjila keshe kashi na oupyakadi washa, molwaashi eendjila adishe oda finda konhele imwe. Ohava tomhafana kutya oku na ashike Kalunga Omunaenghono adishe umwe, onghee hano, omalongelokalunga aeshe otaa longele ashike Kalunga umwe.
Mbela omalongelokalunga aeshe otaa longele ngoo Kalunga?
Mbela Jesus Kristus oo a li omuhongi welongelokalunga a fimanekwa neenghono mondjokonona okwa ti ngahelipi shi na sha naasho? Jesus okwa lombwela ovahongwa vaye a ti: “Indeni mu pite moshivelo sha finana.” Omolwashike mbela a li e va lombwela ngaho? “Osheshi oshivelo oshinene, nondjila oya mbwalangadja ei tai twala mekano, ndele ava tava i mo ovahapu; ndele oshivelo oshinini nondjila oya finana ei tai twala momwenyo, novanini vongaho ovo tave i mono.” — Mateus 7:13, 14.
Mbela Jesus okwa li ngoo shili a hala okutya omalongelokalunga amwe otaa twala “mekano”? Ile okwa li ashike ta hongo ovanhu kutya ovo tava ende mondjila ya mbwalangadja ovovo ashike vehe fi ovaitaveli, ofimbo ovo va itavela muKalunga kashi na nee mbudi kutya ove li melongelokalunga lilipi, otava ende mondjila ya finana oyo tai twala komwenyo?
Diva konima eshi Jesus a popya kutya oku na ashike eendjila mbali, okwa ti: “Lungameni ovaprofeti ovanaipupulu, ava have uya kunye moikafa yeedi, ndele meni lavo ovo omambungu haa [lyana].” (Mateus 7:15) Konima yefimbo okwa ti vali: “Hakeshe ou ta ti kuame: Omwene, Omwene! ta i mouhamba womeulu, ndelenee oye tuu ou ha longo ehalo laTate womeulu.” (Mateus 7:21) Ngeenge omunhu oha ulwa omuprofeti ile ha ti kutya Jesus “Omwene” waye, osha yeleka okutya kutya oku li melongelokalunga lonhumba. Onghee hano, osha yela kutya Jesus okwa li ta londwele kutya hamalongelokalunga aeshe oshili nonokutya havahongi vomalongelokalunga aveshe ve shii okulineekelwa.
Mbela ohatu dulu ngoo okudidilika mo elongelokalunga lashili?
Molwaashi hamalongelokalunga aeshe taa longele Kalunga, mbela ongahelipi hatu dulu okudidilika mo elongelokalunga lashili olo tali twala komwenyo? Natu taleni kefaneko eli: Natu tye nee ngeno owa kanena moshilando shinene, nowa tokola okupula vamwe ve ku pukulule. Opo nee, omunhu umwe oo e udite kutya oku shii nawa ondjila okwe ku lombwela u yuke koushilo. Umwe vali ote ku ladipike u yuke kouninginino. Ofimbo umwe vali ote ku lombwele kutya hoolola ondjila oyo u wete kutya oye ku wapalela. Hauxuuninwa, omweendanandjila mukweni umwe okwa kufa okaalita ke shii okulineekelwa, ndele te ku ulikile ondjila oyo u na okuya nayo. Opo nee okwe ku pa okaalita opo u dule oku ka longifa fimbo u li mondjila. Mbela ito ka kala u na oushili kutya oto ka fika oko to i?
Sha faafana, ngeenge tashi uya pokuhoolola elongelokalunga lashili, otwa pumbwa okaalita kopamhepo ke shii okulineekelwa. Mbela ope na ngoo okaalita ka tya ngaho? Heeno, opo ke li, nokaalita oko oko Ombibeli. Ombibeli oya ti: “Omishangwa adishe da yandjwa keenghono dOmhepo yaKalunga odi shii kulonga nokukumaida nokupukulula nokutekula mouyuki.” — 2 Timoteus 3:16.
Otashi dulika u na Ombibeli i li melaka loye oyo to dulu okulongifa ngaashi okaalita kopamhepo. Eendombwedi daJehova odo hadi nyanyangida oshifo eshi, ohadi nyanyangida yo Ombibeli i shii okulineekelwa, hai ifanwa New World Translation of the Holy Scriptures. Ashike ngeenge kufi umwe womEendombwedi daJehova, oto dulu okulongifa Eembibeli dimwe eshi to konakona oshikundafanwa eshi shi na sha nanghee to dulu okudidilika mo elongelokalunga lashili nosho yo elongelokalunga loipupulu.
Eshi to ka lesha oitukulwa oyo tai landula ko, yelekanifa osho u shii nale naasho Ombibeli tai ti. Kaleka eendjovo daJesus momadiladilo odo tadi popi shi na sha nanghee hatu dulu okuyoolola mo elongelokalunga lashili momalongelokalunga oipupulu. Jesus okwa ti: “Omuti keshe muwa ohau ima oiimati iwa, ndele omuti mwii ohau ima oiimati ii; Omuti muwa itau dulu okwiima oiimati ii, ngaashi omuti mwii itau dulu okwiima oiimati iwa.” (Mateus 7:17, 18) Natu ka kundafaneni oiimati iwa itatu yomwaayo Ombibeli ya ti kutya otai ka didilikifa mo “omuti muwa.”
[Efano pepandja 3]
[Eendjovo dididilikwedi pepandja 3]
Ombibeli oi li ngaashi okaalita ke shii okulineekelwa oko taka dulu okukwafela omunhu a didilike mo elongelokalunga lashili