‘Likalekeni mohole yaKalunga’
‘Likalekeni mohole yaKalunga nokuteelela onghenda yOmwene wetu Jesus Kristus komwenyo waalushe.’ — JUD. 21.
1, 2. Jehova okwe tu ulikila ngahelipi ohole yaye, notu shi shii ngahelipi kutya ita dulu ashike oku tu kaleka mohole yaye ngahenya?
JEHOVA KALUNGA okwe tu ulikila ohole meenghedi dihapu. Nopehe na omalimbililo, okwe tu ulikila ohole inenenene eshi a ninga elongekido lekuliloyambo. Jehova oku hole ovanhu neenghono, nomolwaasho okwa li a tuma Omona waye omuholike kombada yedu opo e tu file. (Joh. 3:16) Osho Jehova okwe shi ninga molwaashi okwa hala tu ka kale nomwenyo fiyo alushe nokwa hala yo tu mone ouwa tau kalelele mohole yaye.
2 Ndele mbela otu na okudiladila kutya Jehova ote ke tu kaleka ashike mohole yaye ngahenya, kashi na nee mbudi kutya otwa hoolola okuninga shike? Hasho nandenande, molwaashi Judas 21 okwe tu kumaida a ti: ‘Likalekeni mohole yaKalunga nokuteelela onghenda yOmwene wetu Jesus Kristus komwenyo waalushe.’ Outumbulilo ‘likalekeni mohole yaKalunga’ otau ulike kutya otu na okukatuka eenghatu donhumba. Ndele mbela oshike twa pumbwa okuninga opo tu likaleke mohole yaKalunga?
Ongahelipi hatu dulu okulikaleka mohole yaKalunga?
3. Oshinima sha fimanenena shilipi Jesus a ti kutya osho she mu kwafela e likaleke mohole yaXe?
3 Eendjovo odo Jesus a li a popya moufiku waxuuninwa wonghalamwenyo yaye yokombada yedu otadi tu pe enyamukulo lepulo olo. Okwa ti: “Ngenge tamu diinine oipango yange, opo nee tamu kala mohole yange, ngaashi Ame nda diinina oipango yaTate ndele handi kala mohole yaye.” (Joh. 15:10) Ngaashi ovelishe oyo tai shi ulike, Jesus okwa li e shii kutya osha fimanenena okudiinina oipango yaJehova opo a kale a hokiwa kuYe. Ngeenge Omona waKalunga oo a wanenena okwa li e na okudiinina oipango yaXe, mbela nafye katu na oku i diinina?
4, 5. (a) Omonghedi ya fimanenena ilipi hatu dulu okuulika kutya otu hole Jehova? (b) Omolwashike inatu pumbwa okukala twa kenyanana eshi Jehova ta ti natu dulike koipango yaye?
4 Onghedi ya fimanenena omo hatu ulike kutya otu hole Jehova, omokukala hatu dulika kuye. Omuyapostoli Johannes okwa ti: “Ohole yokuhola Kalunga oyo tuu ei nokutya, tu diinine oipango yaye. Noipango yaye kai fi idjuu.” (1 Joh. 5:3) Mupya munene, ovanhu vahapu kunena kave hole okudulika kuvamwe. Ashike didilika outumbulilo oo tau ti: ‘Oipango yaye kai fi idjuu.’ Jehova ite tu pula tu ninge oshinima osho e shii kutya oshidjuu neenghono kufye.
5 Oku shi faneka: Ngeenge to diluka eumbo loye, mbela oto ka pula kaume koye omuholike a humbate omiti odo u shii kutya odidjuu unene? Hasho nandenande! Jehova oku na onghenda inene e tu dule noku shii nawa omangabeko etu e tu dule. Ombibeli otai tu shilipaleke kutya Jehova “ota dimbulukwa, nokutya fye ondwi yedu.” (Eps. 103:14) Jehova ke na nande efiku e tu pule tu ninge shihapu osho itatu dulu okuninga. Onghee hano, inatu pumbwa okukala twa kenyanana eshi Jehova ta ti natu dulike koipango yaye. Ndele ponhele yaasho, ohatu dulika molwaashi otu shii kutya otashi tu pe omhito iwa tu ulikile Tate yetu womeulu kutya otu mu hole shili notwa hala okulikaleka mohole yaye.
Oshali ye likalekelwa ya dja kuJehova
6, 7. (a) Eliudo oshike? (b) Yelifa to yandje efaneko li na sha nanghee eliudo tali dulu oku tu kwafela tu kale mohole yaKalunga.
6 Otwa pumbwa okuninga omatokolo mahapu oo a kwatela mo okudulika kuKalunga, molwaashi otu li mounyuni wa kitakana. Ongahelipi hatu dulu okushilipaleka kutya omatokolo oo hatu ningi oku li metwokumwe nehalo laKalunga? Jehova okwe tu pa oshali oyo tai dulu oku tu kwafela neenghono ngeenge tashi uya pokudulika. Oshali oyo oyo eliudo. Ndele mbela eliudo oshike? Eliudo olo oukwatya wokulishiiva mwene. Eliudo oli li ngaashi omutokoli momitima detu, oo he tu kwafele tu konakone omatokolo oo hatu ningi monghalamwenyo ile tu konakone eenghatu odo twa katuka nale, nokutala ngeenge otwa katuka ngoo pandunge ile inatu katuka pandunge. — Lesha Ovaroma 2:14, 15.
7 Ongahelipi hatu dulu okulongifa nawa eliudo letu? Natu ka taleni kefaneko limwe. Omulumenhu wonhumba okwa li ta kofa eemhofi daye nombili oufiku. Ombadilila, ombwa yaye oya uda omaweelelo onhumba ndele tai hovele okuweda. Ombudi oya faduka po. Omulumenhu oo a li a kofa okwa penduka divadiva ndele ta tale pondje ndele opa li pa mwena. Opo nee, okwa li a pepelelwa molwaashi ombudi oya ya nale. Ngeno ombwa yaye kaya li oupafi nokaya li ya weda, ngeno oinima yaye oya vakwa po notashi dulika ngeno a yahamekwa ile a dipawa. Sha faafana, ngeno otwa li tuhe na eliudo, ngeno itatu dulu okulihumbata monghedi ya yuka noitatu dulu okuninga omatokolo opandunge monghalamwenyo.
8, 9. (a) Omangabeko e na sha neliudo letu elipi twa pumbwa okukaleka momadiladilo? (b) Oshike hatu dulu okuninga po opo tu shilipaleke kutya eliudo letu otali longo monghedi oyo tai dulu oku tu kwafela?
8 Ngaashi ombwa, eliudo nalo oli na omangabeko. Ngeenge ombwa oya kala ihai weda, kai na ekwafo lasha. Sha faafana, ngeenge otwa kala hatu yandje unene elitulemo komahalo okuliholamwene omitima detu, mbela oshike tashi ka ningwa po? Omahalo etu okuliholamwene otaa dulu okupukifa eliudo letu. Ombibeli otai tu londwele tai ti: “Omutima wovene ou nomakoto u dule ashishe nowa nyonauka.” (Jer. 17:9; Omayel. 4:23) Kakele kaasho, ngeenge mwene wombwa okwe lipwililikile okuweda kwayo, otashi dulu okweetifa oshiponga. Sha faafana, ngeenge otwa kala inatu lineekela ewiliko lashili noli shii okulineekelwa olo li li mEendjovo daKalunga, Ombibeli, eliudo letu itali ke tu kwafela sha. (Eps. 119:105) Shinyikifa oluhodi, ovanhu vahapu mounyuni ohava yandje unene elitulemo komahalo omitima davo, ndele ihava yandje lela elitulemo komifikamhango odo tadi hangwa mEendjovo daKalunga, navamwe ihava yandje nandenande elitulemo kudo. (Lesha Ovaefeso 4:17-19.) Omolwetomheno olo, ovanhu vahapu ohava ningi oinima inyanyalifi nonande ove na eliudo. — 1 Tim. 4:2.
9 Otu na okukala twa tokola toko tuha kale ngaashi ovanhu ovo va tumbulwa mokatendo ka tetekela. Ponhele yaasho, natu twikileni okweefa Eendjovo daKalunga di tu honge nodi deule eliudo letu opo li dule oku tu kwafela. Otwa pumbwa okukala hatu pwilikine keliudo letu la deulwa kOmbibeli, ponhele yokweefa tu pangelwe keamo lokulihola mwene. Otu na yo okukendabala tu kale twa fimaneka eliudo lOvakriste vakwetu ovaholike. Ohatu ningi alushe eenghendabala tuha pundukife ovamwatate, molwaashi otu shii kutya eliudo lavo otashi dulika lihe va pitike va ninge oshinima shonhumba, ofimbo letu tashi dulika li tu pitike tu shi ninge. — 1 Kor. 8:12; 2 Kor. 4:2; 1 Pet. 3:16.
10. Ohatu ka kundafana eembinga nhatu dokukalamwenyo dilipi?
10 Natu ka kundafaneni eembinga nhatu dokukalamwenyo omo hatu dulu okuulika kutya otu hole Jehova mokukala hatu dulika kuye. Eliudo letu otali ka dana onghandangala mombinga keshe, ndele ola pumbwa okuwilikwa, unene tuu komifikamhango dOmbibeli dopaenghedi da nwefwa mo. Eenghedi nhatu omo hatu dulu okuulika kutya otu hole Jehova nohatu dulika kuye, odo: (1) Okukala tu hole ovanhu ovo Jehova e hole, (2) okukala hatu dulika kwaavo ve na eenghonopangelo, nosho yo (3) okukala twa koshoka koshipala shaKalunga.
Kala u hole ovanhu ovo Jehova e hole
11. Omolwashike tu na okukala tu hole ovanhu ovo Jehova e hole?
11 Yotete, otu na okukala tu hole ovanhu ovo Jehova e hole. Ngeenge tashi uya peendafano, ovanhu otava dulu okufaafanifwa nomundele, molwaashi ove na eamo lokutambula ko onghedi keshe oyo i li momudingonoko wavo. Omushiti wetu oku shii nawa kutya eendafano lovanhu inava wanenena ola nyika oshiponga shi fike peni, noku shii kutya onaini tali dulu okukala ekwafo. Onghee hano, okwe tu pa omayele opandunge a ti: “Kala nokweenda novanongo, opo nee naave yo u ninge omunongo. Ndelenee ou ha endafana novashima, ota ka laipala.” (Omayel. 13:20; 1 Kor. 15:33) Kape na nande umwe womufye a hala ‘okulaipala.’ Ndele ponhele yaasho, keshe umwe okwa hala a “ninge omunongo.” Jehova oku na ounongo wa shiya ko, noita dulu nande okunwefwa mo nai komunhu wonhumba. Ndele nande ongaho, okwe tu tulila po oshihopaenenwa shiwa shi na sha neendafano. Diladila kwaashi, mbela ovanhu inava wanenena velipi Jehova ha pange oukaume navo?
12. Jehova oha pange oukaume novanhu va tya ngahelipi?
12 Jehova okwa li a popya kutya tatekulululwa Abraham ‘okaume kaye.’ (Jes. 41:8) Abraham okwa li omulumenhu omudiinini, omuyuki, noha dulika, sha hala okutya, okwa li omulumenhu e na eitavelo. (Jak. 2:21-23) Jehova okwa li ha pange oukaume novanhu va tya ngaho, ndele nokunena osho ha ningi. Ngeenge Jehova oha pange oukaume novanhu va tya ngaho, mbela inashi fimanenena kufye okuhoolola ookaume pandunge, sha hala okutya, tu ende novanongo opo tu ninge ovanongo?
13. Ngeenge hatu pange oukaume, oshike tashi dulu oku tu kwafela tu ninge ehoololo liwa?
13 Oshike mbela tashi dulu oku ku kwafela u ninge ehoololo liwa ngeenge to pange oukaume? Okukonakona oihopaenenwa yopaMbibeli otaku ke ku kwafela. Diladila kombinga youkaume oo wa li pokati kaRut nainamweno Naomi nosho yo oo wa li pokati kaDavid naJonatan ile oo wa li pokati kaTimoteus naPaulus. (Rut 1:16, 17; 1 Sam. 23:16-18; Fil. 2:19-22) Etomheno la fimanenena eshi va li va panga oukaume wopofingo ololo kutya: Oukaume wavo owa li wa kanghamena kohole yashili yokuhola Jehova. Mbela ope na ovanhu ovo ve hole Jehova ngaashi ove, ovo to dulu okupanga oukaume navo? Kala wa shilipalekwa kutya oto dulu okumona ookaume vahapu va tya ngaho meongalo lopaKriste. Ookaume va tya ngaho itave ke ku laipika meityo lopamhepo. Ponhele yaasho, otave ke ku kwafela u kale to dulika kuJehova, u kule pamhepo nosho yo u kune pamhepo. (Lesha Ovagalati 6:7, 8.) Otave ke ku kwafela yo u likaleke mohole yaKalunga.
Kala ho dulika kwaavo ve na eenghonopangelo
14. Oinima ilipi hai shi ningi luhapu shidjuu kufye okudulika kwaavo ve na eenghonopangelo?
14 Onghedi onhivali omo hatu dulu okuulika kutya otu hole Jehova oya kwatela mo eenghonopangelo. Otu na okukala hatu dulika kwaavo ve na eenghonopangelo. Mbela omolwashike hashi kala shidjuu neenghono omafimbo amwe okudulika kwaavo ve na eenghonopangelo? Etomheno limwe ololo kutya ovanhu ovo ve na eenghonopangelo inava wanenena. Shimwe vali, nafye inatu wanenena. Ohatu kondjo neamo lounashibofa olo twa dalwa nalo.
15, 16. (a) Omolwashike sha fimana kufye okukala twa fimaneka ovanhu ovo Jehova a pa oshinakuwanifwa shokufila oshisho oshiwana shaye? (b) Oshilihongomwa sha fimana shilipi hatu lihongo shi na sha nanghee Jehova a li a tala ko Ovaisrael eshi va li va tukululila Moses oshibofa?
15 Otashi dulika u lipule kutya: ‘Ngeenge oshidjuu kufye okudulika kwaavo ve na eenghonopangelo, mbela omolwashike twa pumbwa oku shi ninga?’ Enyamukulo lepulo olo ola kwatela mo omhata i na sha nounamapangelo. Mbela olyelye to ka hoolola a ninge omupangeli woye? Ngeenge otwa hoolola Jehova oye a ninge Omupangeli wetu, otu na okudulika keenghonopangelo daye. Ngeenge ihatu dulika kudo, mbela ohatu dulu ngoo shili okupopya kutya Jehova oye Omupangeli wetu? Shikwao vali, Jehova oha ulike luhapu eenghonopangelo daye okupitila movanhu inava wanenena ovo a pa oshinakuwanifwa shokufila oshisho oshiwana shaye. Ngeenge otwa tukululile ovanhu va tya ngaho oshibofa, mbela Jehova ote ke tu tala ko ngahelipi? — Lesha 1 Ovatessaloniki 5:12, 13.
16 Pashihopaenenwa, eshi Ovaisrael va li tava ngongotele Moses noku mu tukululila oshibofa, Jehova okwa li e va tala ko kutya oye va li tava ngongotele nokutukululila oshibofa. (Num. 14:26, 27) Kalunga iha lunduluka. Onghee hano, ngeenge otwa tukululile oshibofa ovanhu ovo Kalunga a pa eenghonopangelo, havo hatu tukululile oshibofa ndele oye hatu tukululile oshibofa.
17. Otu na okukendabala tu kale tu na oikala ya yuka ilipi shi na sha naavo ve na eenghonopangelo meongalo?
17 Omuyapostoli Paulus okwa popya kutya otu na okukala tu na oikala ya yuka shi na sha naavo ve na oinakuwanifwa meongalo lopaKriste. Okwa ti: “[Dulikeni kovakwatelikomesho veni nokuliyandja, NW] kuvo, osheshi ovo ohava pashukile eemwenyo deni ngaashi ovo tave ke di pulwa, opo ve shi ninge nehafo, hanokukema, osheshi osho itashi mu wapalele.” (Heb. 13:17) Oshoshili kutya otu na okuninga eenghendabala opo tu kale tu na omhepo yeduliko nosho yo yeliyandjo. Ashike natu dimbuluke kutya otu na okulonga noudiinini opo tu likaleke mohole yaKalunga. Mbela inashi fimana okuninga eenghendabala opo tu hange elalakano olo?
Kala wa koshoka koshipala shaJehova
18. Omolwashike Jehova a hala tu kale twa koshoka?
18 Onghedi onhinhatu omo hatu ulike kutya otu hole Jehova oyo okuninga eenghendabala tu kale twa koshoka koshipala shaye. Ovadali luhapu ohava longo noudiinini opo va shilipaleke kutya ounona vavo ova koshoka. Omolwashike mbela? Oukoshoki owa fimanenena omolwoukolele nonghalo nawa yokaana. Kakele kaasho, oukoshoki wokaana ohau yandje efano liwa koukwaneumbo wavo, tau ulike kutya ovadali ove hole okaana nohave ka file oshisho. Jehova naye okwa hala tu kale twa koshoka omolwomatomheno a faafana. Oku shii kutya oukoshoki owa fimanenena omolwonghalonawa yetu. Oku shii yo kutya oukoshoki ohau yandje efano la tya ngahelipi li na sha naye, e li Tate yetu womeulu. Osha fimanenena okukala twa koshoka, molwaashi ovanhu otava dulu okunanenwa kuKalunga ngeenge ova didilike kutya otwa yooloka ko kovanhu vomounyuni ou inau koshoka.
19. Otu shi shii ngahelipi kutya oukoshoki wopalutu owa fimana?
19 Omeenghedi dilipi twa pumbwa okukala twa koshoka? Otwa pumbwa okukala twa koshoka meembinga adishe dokukalamwenyo kwetu. MuIsrael shonale, Jehova okwa li a lombwela oshiwana shaye kutya oukoshoki wopalutu owa fimanenena. (Lev. 15:31) Omhango yaMoses oya popya kombinga yoinima ngaashi okweekelwashi kwoimbodi, okuwapalekwa kwoiyuma, okulikosha keenyala nokeemhadi nosho yo okukosha oikutu. (Ex. 30:17-21; Lev. 11:32; Num. 19:17-20; Deut. 23:13, 14) Ovaisrael ova li va dimbulukifwa kutya Kalunga kavo Jehova, omuyapuki, sha hala kutya, okwa koshoka filufilu. Ovapiya vaKalunga omuyapuki navo ove na okukala vayapuki. — Lesha Leviticus 11:44, 45.
20. Omeenghedi dilipi twa pumbwa okukala twa koshoka?
20 Otwa pumbwa okukala twa koshoka momitima nosho yo palutu. Ohatu kendabala okukaleka omadiladilo etu a koshoka. Ohatu diinine filufilu omifikamhango daJehova di na sha noukoshoki wopaenghedi, nonande ounyuni oo we tu dingilila owa nyonauka ngeenge tashi uya pomilele. Ndele osho sha fimanenena, ohatu ningi eenghendabala opo tu kaleke elongelokalunga letu la koshoka mokuhenuka okunyatekwa komalongelokalunga oipupulu moshinima keshe. Ohatu kaleke alushe momadiladilo elondwelo la nwefwa mo olo li li muJesaja 52:11, tali ti: “Djeni ko, djeni ko! Tembukeni ko, inamu kuma oshipo; djeni mo mokati kavo, lifeteni.” Kunena, ohatu kaleke elongelokalunga letu la koshoka mokuhakufa nande ombinga moinima oyo i na ekwatafano nomalongelokalunga oipupulu. Nomolwaasho ohatu henuka okukufa ombinga moivilo nomomafiku omafudo omalongelokalunga oipupulu oo taa dana onghandangala mounyuni kunena. Oshoshili kutya oshi li eshongo okukala twa koshoka. Ndele nande ongaho, oshiwana shaJehova ohashi kendabala okukala sha koshoka, molwaashi kungaho otashi ke likaleka mohole yaye.
21. Oshike tashi ke tu kwafela tu likaleke mohole yaKalunga?
21 Jehova okwa hala tu kale mohole yaye fiyo alushe. Ndele atusheni pauhandimwe otwa pumbwa okushilipaleka ngeenge ohatu ningi ngoo ngaashi hatu dulu opo tu likaleke mohole yaKalunga. Osho ohatu dulu ashike oku shi ninga ngeenge otwa shikula oshihopaenenwa shaJesus nokuulika kutya otu hole Jehova mokukala hatu dulika koipango yaYe. Ngeenge otwa ningi ngaho, ohatu ka dula okukala noushili kutya kape na nande osha “tashi dulu oku tu tukula mohole yaKalunga yomuJesus Kristus, Omwene wetu.” — Rom. 8:38, 39.
Oto dimbuluka?
• Ongahelipi eliudo letu tali dulu oku tu kwafela tu likaleke mohole yaKalunga?
• Omolwashike tu na okukala tu hole ovanhu ovo Jehova e hole?
• Omolwashike sha fimanenena okukala hatu dulika kwaavo ve na eenghonopangelo?
• Oukoshoki owa fimana shi fike peni koshiwana shaKalunga?
[Oshimhungu/Efano pepandja 28]
OSHISHANGOMWA OSHO TASHI TU LADIPIKE TU KALE TU NA ELIHUMBATO LIWA
Poshoongalele shoshitukulwa shomo 2008-2009, opa li pa yandjwa embo lomapandja 224, li na oshipalanyole, ‘Likalekeni mohole yaKalunga.’ Mbela embo olo ola nyanyangidwa nelalakano lashike? Embo olo ola nyanyangidwa nelalakano lokukwafela Ovakriste va shiive omifikamhango daJehova nova kale ve di hole, nola yukifa unene elitulemo kelihumbato lopaKriste. Okukonakona nawa embo ‘Likalekeni mohole yaKalunga’ otaku ke tu kwafela tu kale twa tomwa filufilu kutya okulihumbata metwokumwe nomifikamhango daJehova oko onghedi ya denga mbada paife notaku ke tu pefa omwenyo waalushe monakwiiwa.
Kakele kaasho, embo olo ola nuninwa oku tu kwafela tu mone kutya okudulika kuJehova kaku fi omutengi. Ponhele yaasho, okudulika kuJehova oko onghedi oyo tai ulike kutya otu mu hole shi fike peni. Onghee hano, embo eli oli na oku tu linyengifa tu lipule kutya: ‘Mbela omolwashike handi dulika kuJehova?’
Luhapu ovanhu ovo hava fiye po Jehova ohave shi ningi omolwomanyono oo a kwatela mo elihumbato, ndele hamolwaashi ngeno vehe udite ko omahongo onhumba. Onghee hano, osha fimanenena okukulika ohole yetu yokuhola eemhango nomafinamhango aJehova, oo hae tu wilike monghalamwenyo yetu yakeshe efiku. Otu na yo okukala twa lenga eemhango nomafinamhango a tya ngaho. Otwe lineekela kutya oshishangomwa eshi shipe otashi ka kwafela eedi daJehova mounyuni aushe di kale da tokola toko okulonga osho sha yuka, di nyaneke pomutenya oipupulu yaSatana, naunene tuu, di likaleke mohole yaKalunga. — Jud. 21.