Oupuna oo hau di kuKalunga
MBELA Kalunga ote ke ku pa oupuna ngeenge ou li omupiya waye omudiinini? Otashi dulika e ku nangeke noupuna, ndele hanoupuna oo tashi dulika wa teelela. Natu ka tale koshihopaenenwa shaMaria, ina yaJesus. Omweengeli Gabriel okwa li e lihololela Maria nokwe mu lombwela kutya oye “omufilwanghenda” waKalunga nonokutya ota ka dala Omona waKalunga. (Lukas 1:28, 30-32) Ashike Maria ka li e na oupuna woinima yopamaliko. Eshi Maria a li a ka yamba omayambo konima yokudalwa kwaJesus, okwa li a yamba “omaliamono avali ile ounghutiona vavali,” ovo va li hava yambelwa Jehova pandjikilile kovanhu ovo va li va hepa. — Lukas 2:24; Leviticus 12:8.
Oushili oo kutya Maria okwa li a hepa mbela owa hala okutya ka li a nangekwa noupuna kuKalunga? Hasho, molwaashi eshi Maria a li a ka talela po omupambele waye Elisabet, “Elisabet okwa yadifwa Omhepo Iyapuki. Ndele okwa popya mokule ta ti: Oove [Maria] omunangekwa noupuna mokati kovakainhu, ndele nakudalwa ou womuove omunangekwa noupuna!” (Lukas 1:41, 42) Maria okwa li a pewa oufembanghenda wokuninga ina wopanhu wOmona waKalunga omuholike.
Jesus naye ka li e na oupuna woinima yopamaliko. Ka li ashike a dalelwa nokuputukila moukwaneumbo wa hepa, ndele okwa li a hepa monghalamwenyo yaye aishe eshi a li kombada yedu. Okwa li a lombwela omulumenhu umwe oo a li a hala okuninga omuhongwa waye a ti: “Eembadje odi na omakwena, needila dokeulu odi na oihadi, ndelenee Omona wOmunhu ke na apa ta wilike omutwe waye.” (Lukas 9:57, 58) Ndele nande ongaho, eshi Jesus Kristus a li e uya kombada yedu okwe shi ninga tashi shiiva opo ovahongwa vaye va mone oupuna umwe munene. Omuyapostoli Paulus okwa ti: “A ninga ohepele molweni, opo mu punapale koluhepo laye.” (2 Ovakorinto 8:9) Jesus okwa li a pa ovahongwa vaye oupuna woludi lilipi? Oupuna woludi lilipi tu na kunena?
Ovahongwa ova li va pewa oupuna ulipi?
Luhapu oupuna ohau imbi omunhu a kale e na eitavelo, molwaashi oshipuna otashi dulika shi kale she lineekela moimaliwa yasho ponhele yokulineekela muKalunga. Jesus okwa ti: “Oipuna oi noudjuu u fike peni okuya mouhamba waKalunga.” (Markus 10:23) Onghee hano, osha yela kutya oupuna oo Jesus a pa ovashikuli vaye kau fi oupuna womaliko.
Ovakriste vahapu vomefelemudo lotete ova li va hepa. Eshi omulumenhu umwe oo a dalwa oshilema a li a ehela Petrus oimaliwa, Petrus okwa li e mu nyamukula a ti: “Oshisilveri noshingoldo nghi shi kwete, ndele eshi . . . ndi kwete, ohandi shi ku pe: Omedina laJesus Kristus, Omunasaret, fikama u ende!” — Oilonga 3:6.
Eendjovo domuhongwa Jakob nado otadi ulike kutya eongalo lopaKriste ola li la fikama po movanhu va hepa. Okwa ti: ‘Ovamwatate ovaholike, pwilikineni, Kalunga ina hoolola hamba ava va talwa kounyuni ou eehepele, va ninge oipuna meitavelo novafyuululi vouhamba ou wa udanekelwa ovo ve mu hole?’ (Jakob 2:5) Omuyapostoli Paulus naye okwa popya shi na sha naavo va ifanwa va ninge oshitukulwa sheongalo lopaKriste, a ti: “Havahapu ovanongo vopanhu, navahapu ovanaenghono, havahapu oidale.” — 1 Ovakorinto 1:26.
Ngeenge oupuna oo Jesus a li a pa ovashikuli vaye kau fi wopamaliko, mbela okwa li e va pa oupuna woludi lilipi? Jesus okwa popya monhumwafo yaye oyo a li a tumina eongalo lokuSmirna, a ti: “Oilonga yoye nokufininikwa kwoye noluhepo loye ondi lu shii — ndelenee oove oshipuna.” (Ehololo 2:8, 9) Nonande Ovakriste vokuSmirna ova li va hepa, ova li ve na oupuna u dule kokule oshisiliveli ile oshingoli. Ova li oipuna molwaashi ova li ve na eitavelo nova li ovadiinini kuKalunga. Eitavelo oshinima shi na ondilo molwaashi “kali fi lomunhu keshe.” (2 Ovatessaloniki 3:2) Paulelalela, ovanhu ovo vehe na eitavelo, Kalunga okwe va tala ko ve li eehepele. — Ehololo 3:17, 18.
Oupuna oo hau etifwa keitavelo
Ndele mbela omeenghedi dilipi eitavelo li li oshinima shi na ondilo? Ovo va itavela muKalunga ohava mono ouwa ‘mouyadi wouwa nowonheni nowomutimamule waye.’ (Ovaroma 2:4) Ohava ‘diminwa po yo omanyonauno’ avo molwaashi ove na eitavelo mekuliloyambo laJesus. (Ovaefeso 1:7) Ove na yo ounongo oo hava pewa ‘kondjovo yaKristus’ omolwokukala ve na eitavelo. (Ovakolossi 3:16) Ngeenge tava ilikana kuKalunga ve na eitavelo, ‘ombili yaKalunga ei i dule eendunge adishe’ ohai amene omitima nomadiladilo avo, nohai va etele ewaneno nehafo. — Ovafilippi 4:7.
Kakele komauwa aeshe oo, ovanhu ovo ve na eitavelo muKalunga okupitila mOmona waye, Jesus Kristus, ove na eteelelo likumwifi lomwenyo waalushe. Eendjovo daJesus Kristus da shiivika nawa otadi ti: ‘Osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.’ (Johannes 3:16) Eteelelo likumwifi la tya ngaho ohali kala la twa ngeenge omunhu okwa mono eshiivo lokushiiva Kalunga nosho yo Omona waye, molwaashi Jesus okwa ti vali: “Nomwenyo waalushe owo tuu ou, vo ve ku shiive, Oove auke Kalunga kashili, naau we mu tuma, Jesus Kristus.” — Johannes 17:3.
Nonande Kalunga oha nangeke ovanhu noupuna pamhepo, ohava mono yo ouwa pamaliudo nopalutu. Natu ka taleni koshihopaenenwa shaDalídio wokuBrasilia. Fimbo a li ina mona eshiivo lashili li na sha nelalakano laKalunga, okwa li ha nu oikunwa yoalkoholi sha pitilila. Osho osha li sha nyona po neenghono ekwatafano moukwaneumbo waye. Kakele kaasho, ouxupilo waye owa li wa naipala. Opo nee okwa li a hovela okukonakona Ombibeli nEendombwedi daJehova nokwa li a ninga omalunduluko manene.
Osho Dalídio a li e lihonga mOmbibeli, osha li she mu linyengifa a efe po eenghedindjikilile da nyika oshiponga. Okwa li a ninga exumokomesho lopamhepo linene, nokwa popya a ti: “Onda li handi ende nda lambalala eembaa, ndele paife ohandi i eumbo neumbo.” Dalídio okwa ninga omuhongi wEendjovo daKalunga wefimbo li yadi. Elunduluko la tya ngaho ka la li ashike la xwepopaleka oukolele waye ndele ola li yo la xwepopaleka ouxupilo waye. Okwa ti: “Oimaliwa oyo nda li handi longifa okulanda omalodu, paife ohandi i longifa okukwafela ovanhu vakwetu ile ndi i lande po oinima oyo nda pumbwa.” Okwa panga yo oukaume washili novanhu vahapu ovo hava tale ko oinima ngaashi Kalunga he i tale ko. Dalídio paife oku na ombili yopamadiladilo newaneno oyo a li ehe na nandenande fimbo a li ina shiiva Kalunga.
Natu ka taleni koshimoniwa shimwe vali shaRenato oo a mona oupuna monghalamwenyo yaye eshi a itavela muJehova Kalunga. Ngeenge owa mono nghee a hafa note limemesha kunena, ito hale okwiitavela kutya oye oo a li a ungaungwa naye shihe li pauyuki monghalamwenyo. Okwa li a ekelwashi kuina fimbo a li okahanana. Okwa li a fiwa koshi yoshipundi e li mondjato, nokwa li a kweywa neenghono nokutuwa, nonghowa yaye kaya li ya dja po natango. Opo nee, opa li pa enda ovakainhu vavali nova li va mona ondjato i li koshi yoshipundi tai linyenge. Potete ova li tava diladila kutya pamwe ope na oo a fiya po okambishona. Eshi va mona kutya okahanana, ove ka kufa po diva noku ka twala koshipangelo osho shi li popepi navo opo ka ka mone ouhaku.
Umwe womovakainhu ovo okwa li Ondombwedi yaJehova, nokwa li a lombwela Ondombwedi imwe yedina Rita kombinga yokaana oko. Rita okwa kala ta dala ounona va fya lwoikando, nokwa li ashike e na okaana kamwe kokakadona. Rita okwa li a hala neenghono okaana kokamati, onghee hano, okwa li a tokola a ninge ina omutekuli waRenato.
Fimbo Renato a li okaana natango, Rita okwa li e mu lombwela kutya haye ina oo e mu dala. Ashike Rita okwa li he mu file oshisho pahole nokwa li a longa noudiinini opo e mu honge omafinamhango Ombibeli. Eshi Renato a kula okwa li a hovela okuulika ohokwe moshili yOmbibeli. Okwa li yo e na olupandu linene li na sha nonghedi ikumwifi omo a xupifwa. Oha kala a kengela omahodi efimbo keshe ta lesha eendjovo domupsalme David odo tadi ti: “Osheshi tate [nameme], vo ova efa nge ngaho, ndelenee Omwene Oye ta kombelele nge.” — Epsalme 27:10.
Renato okwa li a ulika olupandu laye li na sha naashishe osho Jehova e mu ningila, eshi a ninginifwa mo 2002, nomomudo wa ka landula ko okwa ninga omulongi wefimbo li yadi. Renato ke shii ina naxe fiyo opaife, notashi dulika ke na efiku e va shiive. Ndele nande ongaho, Renato oku wete kutya okwa pewa oshali imwe yomeeshali di na ondilo eshi a shiiva Jehova nokukala e na eitavelo muye e li Xe omunahole nomufilishisho.
Otashi dulika wa hala okukala u na ekwatafano lopofingo nolopahole naKalunga, olo tali dulu oku ku etela oupuna washili monghalamwenyo yoye. Omhito yokukala nekwatafano la tya ngaho naJehova Kalunga nosho yo nOmona waye, Jesus Kristus, oya yeulukila ovanhu aveshe, oipuna nosho yo eehepele. Ekwatafano la tya ngaho itali tu etele oupuna wopamaliko, ndele otali tu etele ombili yokomutima nosho yo ewaneno olo itali dulu okulandwa noimaliwa aishe oyo i li mounyuni ou. Osho otashi koleke oushili weendjovo dOmayeletumbulo 10:22, odo tadi ti: “Enangeko noupuna lOmwene, olo tali likolifa, noshilonga shidjuu itashi wedele ko sha.”
Jehova Kalunga okwa hokwa neenghono ovanhu ovo tava ehene popepi naye, nomolwaasho okwa ti: “Akutu, ngeno ove wa li wa diinina oipango yange, ngeno ombili yoye oya kala ngaashi omulonga tau tondoka, nouyuki woye ngaashi omakufikufi omefuta.” (Jesaja 48:18) Jehova okwa udaneka kutya ovo tava ehene popepi naye ve na elinyengotomheno la yuka nove na oikala iwa otava ka nangekwa noupuna munene, a ti: “Ondjabi yelininipiko noyokutila Omwene oyo oupuna nefimano nomwenyo.” — Omayeletumbulo 22:4.
[Eendjovo dididilikwedi pepandja 5]
Nonande oukwaneumbo omo mwa putukila Jesus owa li wa hepa painiwe, owa li wa nangekwa noupuna munene kuKalunga
[Efano pepandja 6]
Eitavelo muKalunga ohali eta ombili, ewaneno nosho yo ehafo