Ehongo lopakalunga ola denga mbada
‘Oinima aishe, eshi nde i shaameka nokushiiva Kristus Jesus Omwene wange, ohandi i tale oyo oshiponga.’ — FIL. 3:8.
1, 2. Ovakriste vamwe ohava ningi omahoololo elipi, nomolwashike?
ROBERT okwa li he lihongo nawa mofikola okudja kounona waye. Eshi Robert a li e na eedula hetatu, umwe womovahongi vaye okwa li a ka talela po onomenawina keumbo lavo nokwa li e mu lombwela kutya ota dulu okupondola mukeshe shimwe. Omuhongi oo okwa li yo e mu lombwela kutya efiku limwe ona ka ninge ndokotola wopaunamiti. Oitwa oyo a li a mona koshekundofikola oya li tai dulu oku mu tambulifa kuimwe yomeeunivesiti odo da denga mbada moshilongo shavo. Ashike Robert ka li a lalakanena ehongo olo ovanhu vahapu va tala ko kutya ola denga mbada, ndele ponhele yaasho okwa li a lalakanena okuninga omukokolindjila wondjikilile.
2 Ngaashi Robert, Ovakriste vahapu ovanyasha novakulunhu ove na omhito yokupondola moinima yomounyuni ou. Ndele Ovakriste vamwe ova hoolola okuhalongifa pauyadi eemhito odo opo va lalakanene omalalakano e na sha noinima yopamhepo. (1 Kor. 7:29-31) Mbela oshike hashi linyengifa Ovakriste ngaashi Robert, va longe noudiinini moilonga yokuudifa? Ovakriste ohave linyengifwa unene kohole yavo yokuhola Jehova, nove na yo olupandu li na sha nehongo lopakalunga la denga mbada. Mbela owe lipula ngoo nale kutya ngeno ku monene eshiivo lashili mbela ngeno onghalamwenyo yoye oya tya ngahelipi? Ngeenge otwa diladila komanangeko noupuna amwe manene oo twa mona molwaashi twa hongwa kuJehova, otashi ke tu kwafela tu kale tu na olupandu li na sha nonghundana iwa notashi ke tu kwafela tu kale hatu udifile vamwe nouladi.
Oshi li oufembanghenda okuhongwa kuKalunga
3. Omolwashike hatu dulu okukala noushili kutya Jehova okwa halelela okuhonga ovanhu inava wanenena?
3 Jehova okwa halelela okuhonga ovanhu inava wanenena, omolwoukwatya waye wouwa. Jesaja 54:13 okwa popya paxunganeko shi na sha nOvakriste ovavaekwa a ti: “Ovana voye aveshe [otava] ka kala va longwa kOmwene, nombili yovamwoye otai ka kala inene.” Efinamhango olo li li meendjovo odo otali dulu okuyukifwa ‘keedi dimwe’ daKristus. (Joh. 10:16, OB-1986) Osho oshi liwetikile yo mexunganeko limwe vali olo tali wanifwa kunena. Jesaja okwa li a mona memoniko ovanhu va dja moiwana aishe tava mbobolokele kelongelokalunga lashili. Jesaja okwa popya kutya ovanhu ovo otava lombwelafana tava ti: “Ileni tu ka londeni komhunda yOmwene, okongulu yaKalunga kaJakob, opo e tu longe eendjila daye, fye tu shiive okweenda momalila aye.” (Jes. 2:1-3) Kashi fi tuu oufembanghenda okuhongwa kuKalunga!
4. Jehova okwa teelela ovanhu ovo va hala okuhongwa kuye va kale va tya ngahelipi?
4 Oshike tu na okuninga po opo tu kale twa wana okuhongwa kuJehova? Oshiteelelwa sha fimanenena oshosho kutya otu na okukala ovalininipiki notu na ehalo okuhongwa. Omupsalme David okwa ti: ‘Omwene omuwa nomuyuki, ovalininipiki ote va hongo ondjila yaye.’ (Eps. 25:8, 9) Jesus naye okwa ti: ‘Ohandi ku hambelele Tate, Omwene weulu nowedu, osheshi oinima ei we i holeka ovanaendunge novanongo ndele owe i hololela ava va fa ouhanana.’ (Luk. 10:21) Mbela ku wete wa nanenwa kuKalunga oo ‘ha file onghenda ovalininipiki’? — 1 Pet. 5:5.
5. Oshike she shi ninga tashi shiiva opo tu shiive Kalunga?
5 Tu li ovapiya vaJehova, mbela otwa shiiva oshili omolwounongo wetu ile molwokudula kwetu vene? Hasho nandenande. Doshili, itatu dulu okushiiva Kalunga kufye vene. Jesus okwa ti: “Kape na ou ta dulu okuuya kuame okuninga Tate, ou a tuma nge, te mu shili.” (Joh. 6:44) Jehova oha nanene kuye oohandimwe ovo va fa eedi, sha hala okutya, “oinima iwaelela yoiwana aishe,” okupitila moilonga yokuudifa nosho yo momhepo yaye iyapuki. (Hag. 2:7, NW) Mbela ino hafa eshi u li umwe womwaavo Jehova a nanena kOmona waye? — Lesha Jeremia 9:23, 24.
Ehongo lopakalunga otali dulu okukwafela omunhu a lundulule onghalamwenyo yaye
6. “Eshiivo lokushiiva Omwene” ohali ningifa ovanhu va ninge omalunduluko elipi?
6 Jesaja okwa longifa eendjovo dopafaneko ta popi shi na sha nanghee omaukwatya ovanhu taa lunduluka kunena. Pashihopaenenwa, ovanhu ovo va li ve hole elongifo leenghono, paife ova ninga ovanambili. (Lesha Jesaja 11:6-9.) Ovanhu ovo va li ve tondafane omolwoukwamuhoko, oukwashiwana, ile omolweputuko, paife ove lihonga okukala moukumwe novanhu vakwao. Kungaho, ova fa va ‘hambula omaongamukonda avo omatemo.’ (Jes. 2:4) Oshike she va kwafela va ninge omalunduluko manene a tya ngaho? Omolwaashi ova mona “eshiivo lokushiiva Omwene” nove li tula moilonga monghalamwenyo yavo. Nonande ovapiya vaKalunga inava wanenena, ove li oumwainafana washili wopaiwana. Oushili oo kutya ovanhu vahapu ohava tambula ko onghundana iwa nosho yo kutya ohai i imike oiimati muvo otau yandje oumbangi kutya ehongo lopakalunga ola denga mbada. — Mat. 11:19.
7, 8. (a) Ehongo lopakalunga ola kwafela ovanhu va manguluke ‘keenguluhote’ dimwe dilipi? (b) Oshike tashi ulike kutya ehongo lopakalunga ohali fimanekifa Jehova?
7 Omuyapostoli Paulus okwa faafanifa oilonga yovapiya vaKalunga yokuyandja oundombwedi nolwoodi lopamhepo. Okwa ti: “Oilwifo yetu kai fi yopambelela, ndelenee oya pama koshipala shaKalunga okuhanauna po eenguluhote. Ohatu hanauna po omapopilongulu, nelinenepekifo keshe tali nenepekele okushiiva kwaKalunga.” (2 Kor. 10:4, 5) Mbela “eenguluhote” dimwe dilipi oko ovanhu va mangululwa ko kehongo lopakalunga? Eenguluhote odo ongaashi, omahongo oipupulu, oidila nosho yo omahongo opanhu, okutumbula po ashike imwe. (Kol. 2:8) Ehongo lopakalunga ohali kwafele ovanhu va efe po eenghedindjikilile dii nova kulike omaukwatya opakalunga. (1 Kor. 6:9-11) Ehongo olo ohali xwepopaleke onghalamwenyo yomaukwaneumbo. Ohali kwafele ovanhu ovo vehe na eteelelo va kale ve na onghalamwenyo i na eityo. Ehongo la tya ngaho ola pumbiwa kunena.
8 Oukwatya umwe oo Jehova ha kwafele ovanhu va kulike oo okukala ovanashili, ngaashi oshimoniwa tashi landula apa tashi shi ulike. (Heb. 13:18) Omukainhu umwe wokuIndia okwa li a tambula ko ekonakonombibeli, nokonima yefimbo okwa li a ninga omuudifi ina ninginifwa. Efiku limwe fimbo omukainhu oo a li ta shuna keumbo okudja koilonga yokutunga Olupale lOuhamba, okwa li a toola okalyenge koshingoli popepi nomatulilo eebesha, ke na ongushu yeedola daNamibia omayovi ahetatu. Nonande omukainhu oo okwa li omukwanaluhepo, okwa li a twala okalyenge oko koshitaasi yopolifi opo ka dule okumonenwa mwene wako. Ovapolifi ova li va kumwa. Lwanima, omupolifi umwe okwa li a pula omukainhu oo a ti: “Omolwashike okalyenge ina ka ninga po ashike koye?” Omukainhu oo okwa nyamukula a ti: “Ombibeli oya kwafela nge ndi ninge omunashili.” Omupolifi oo okwa li a kumwa ndele ta lombwele omukulunhuongalo Omukriste oo a li a ya pamwe nomukainhu oo a ti: “Moshilando omu omu na ovanhu omamiliyona 38, ndele ngeenge owa kwafele ovanhu omulongo va kale ngaashi omukainhu ou, otashi ka eta elunduluko linene moshilando.” Ngeenge hatu diladila shi na sha novanhu omamiliyona ovo va kwafelwa kehongo lopakalunga va lundulule onghalamwenyo yavo, mbela katu na omatomheno mahapu okutanga Jehova?
9. Oshike tashi dulu okukwafela ovanhu va ninge omalunduluko manene monghalamwenyo yavo?
9 Eendjovo daKalunga nosho yo omhepo yaye iyapuki oi na eenghono notai dulu okukwafela ovanhu va ninge omalunduluko manene monghalamwenyo yavo. (Rom. 12:2; Gal. 5:22) Ovakolossi 3:10 ova ti: ‘Djaleni omunhu mupe, ou ta shitilwa mokushiiva, pafano lOmushiti waye.’ Etumwalaka olo tali hangwa mEendjovo daKalunga, Ombibeli, oli na eenghono okuholola kutya omunhu oku na oikala yomutima ya tya ngahelipi, notali dulu okulundulula onghedi yaye yokudiladila nosho yo nghee ha tale ko oinima. (Lesha Ovaheberi 4:12.) Ngeenge omunhu okwa mono eshiivo lashili lOmishangwa nokwa kala metwokumwe nomifikamhango daJehova douyuki, ota dulu okuninga kaume kaKalunga nota kala e na eteelelo loku ka kala nomwenyo fiyo alushe.
Jehova ote tu longekidile onakwiiwa
10. (a) Omolwashike Jehova oye aeke ta dulu oku tu longekidila onakwiiwa? (b) Omalunduluko manene elipi taa ka kuma edu alishe mafiku?
10 Jehova oye aeke ta dulu oku tu longekidila onakwiiwa molwaashi oku shii osho tashi ka ningwa monakwiiwa. Oku shii kutya onakwiiwa yovanhu otai ka kala ya tya ngahelipi. (Jes. 46:9, 10) Ombibeli oya xunganeka ya ti: “Efiku linene lOmwene oli li popepi.” (Sef. 1:14) Eendjovo dOmayeletumbulo 11:4 otadi ka wanifwa shi na sha nefiku olo, odo tadi ti: “Emona itali kwafa sha mefiku loupyuhandu, ndelenee ouyuki tau xupifa mo mefyo.” Eshi efimbo laJehova lokutokola ounyuni waSatana tali ka fika, osho tashi ka kala sha fimanenena osho okukala twa hokiwa kuJehova. Oimaliwa itai ka kala i na ekwafo lasha. Hesekiel 7:19 okwa ti: “Oshisilveri shavo otave ke shi ekelashi meendjila, noingoldo yavo [otave] ke i nyonyodola.” Eshiivo la tya ngaho otali tu kwafele tu kale hatu ningi omatokolo e li pandunge paife.
11. Omonghedi imwe ilipi ehongo lopakalunga hali tu kwafele tu lilongekidile onakwiiwa?
11 Onghedi imwe ididilikwedi omo ehongo lopakalunga hali tu kwafele tu lilongekidile efiku laJehova olo li li popepi oyo oku tu kwafela tu litulile po omalalakano taa ti sha. Omuyapostoli Paulus okwa li a shangela Timoteus a ti: “Oipuna yomounyuni ou va kumaida, ve he linenepeke, navali va ha tule elineekelo lavo moupuna kau fi kulineekelwa, ndelenee nave lineekele Kalunga.” Nonande katu na oimaliwa ihapu, ohatu ka mona ouwa momayele oo a dja kuJehova. Mbela osho osha kwatela mo shike? Ponhele yokuliongelela oinima yopamaliko, natu kendabale ‘okulonga ouwa notu ninge oipuna yoilonga iwa.’ Ngeenge otwa pitifa komesho oinima yopamhepo monghalamwenyo yetu, ohatu “lituvikilile emona tali ningi ekanghameno liwa laayo yokomesho.” (1 Tim. 6:17-19) Okukala tu na omhepo yeliyambo otashi ulike kutya otu na ounongo, nomolwaasho Jesus okwa ti: “Otashi kwafa shike omunhu, nande ne lilikolele ounyuni aushe, ndee ta kanifa omwenyo waye?” (Mat. 16:26, 27) Molwaashi efiku linene laJehova ola ehena popepi, natu lipule pauhandimwe kutya: ‘Mbela openi handi liongelele omamona? Mbela ondi li omupiya waKalunga ile owemona?’ — Mat. 6:19, 20, 24.
12. Omolwashike tuhe na okuteka omukumo nonande vamwe inava fimaneka oukalele wetu?
12 Oilonga yokuudifa Ouhamba nokuninga ovanhu ovahongwa oyo tai xupifa eemwenyo, oyo tai longwa kOvakriste, oyo imwe ‘yomoilonga iwa’ ya fimanenena ya popiwa mEendjovo daKalunga. (Mat. 24:14; 28:19, 20) Ngaashi sha li mefelemudo lotete, ovanhu vamwe kunena otashi dulika va kale inava fimaneka oukalele wetu. (Lesha 1 Ovakorinto 1:18-21.) Ndele osho itashi ngushulula etumwalaka letu, nokashi na oku tu ningifa tu kale tu udite kutya inashi fimana okuudifila ovanhu etumwalaka la tya ngaho fimbo pe na efimbo. (Rom. 10:13, 14) Ohatu ka mona omanangeko noupuna mahapu eshi hatu kwafele vamwe va mone ouwa mehongo lopakalunga.
Jehova oha nangeke noupuna ovapiya vaye ngeenge tava ningi omaliyambo
13. Omuyapostoli Paulus okwa li a ninga omaliyambo elipi omolwonghundana iwa?
13 Fimbo omuyapostoli Paulus a li ina ninga Omukriste, okwa li a pewa edeulo olo la li tali dulu oku mu kwafela a pondole monghalelo yoinima yOshijuda. Eshi a li e na omido 13 lwaapo, okwa li a tembuka ko koshilando Tarsus oko a dalelwa, ndele ta i e ke lihonge kuJerusalem, oko a li a hongwa kuGamaliel, omuhongi wOmhango oo a li a fimanekwa neenghono. (Oil. 22:3) Pefimbo opo, Paulus okwa li a hovela okukala a fimana mokati kovanhu ovo va li ko pefimbo laye, nongeno okwa twikilile nehongo olo, otashi dulika ngeno a ka kala Omujuda a tumbala. (Gal. 1:13, 14) Ndele eshi a tambula ko onghundana iwa, okwa li e na ehalo okweefa po oinima aishe oyo. Mbela Paulus okwa li e lipa oushima omolwetokolo olo a li a ninga? Hasho nandenande. Okwa ti: “Oinima aishe, eshi nde i shaameka nokushiiva Kristus Jesus Omwene wange, handi i tale oyo oshiponga, osheshi omolwaye nda kanifa aishe nohandi i dini oyo oimbodi yongaho.” — Fil. 3:8.
14, 15. Tu li “ovalongi pamwe naKalunga,” omanangeko noupuna elipi hatu hafele?
14 Ngaashi Paulus, Ovakriste kunena ohava ningi omaliyambo omolwonghundana iwa. (Mark. 10:29, 30) Mbela otu wete twa pitililwa po kusha eshi twa ninga omaliyambo a tya ngaho? Robert, oo a tumbulwa moutendo va tetekela, oku udite ngaashi vahapu ve udite, eshi a ti: “Inandi lipa nande oushima moshinima shimwe. Oilonga yefimbo li yadi oya etela nge ehafo nembilipalelwo, noya kwafela nge ndi ‘makele ouwa wOmwene apa u fike.’ Ngeenge nda yamba po oinima yopamaliko opo ndi lalakanene oinima yopamhepo, Jehova oha nangeke nge noupuna alushe shi dulife pwaasho nda yamba po. Ohandi kala nda fa inandi yamba po sha, molwaashi ohandi likola ashike.” — Eps. 34:9; Omayel. 10:22.
15 Ngeenge owa kala to kufa ombinga moilonga yokuudifa nokuninga ovanhu ovahongwa oule wefimbo, kape na omalimbililo naave owa makela nowa mona ouwa waJehova. Mbela ope na efimbo limwe olo wa li wa mona nghee omhepo iyapuki ye ku kwafela eshi to udifa onghundana iwa? Mbela owa mona nghee Jehova a yeulula omitima dovanhu opo va yandje elitulemo ketumwalaka olo? (Oil. 16:14) Mbela Jehova okwe ku kwafela u finde omashongo onhumba, tashi dulika opo u dule okutamununa mo oukalele woye? Mbela okwe ku yambidida eshi wa li meenghalo didjuu, e ku kwafela u twikile oku mu longela eshi wa li u udite uhe na eenghono? (Fil. 4:13) Ngeenge Jehova e tu kwafela pauhandimwe eshi hatu wanifa po oukalele wetu, ohatu kala twa tomwa filufilu kutya oko e li nohatu ehene popepi elela naye. (Jes. 41:10) Mbela kashi fi oufembanghenda okukala “ovalongi pamwe naKalunga” eshi hatu kufa ombinga moilonga inene yokuhonga ovanhu ehongo lopakalunga? — 1 Kor. 3:9.
16. Ou uditile ngahelipi eenghendabala nosho yo omaliyambo oo wa ninga shi na sha nehongo lopakalunga?
16 Ovanhu vahapu ohava kala va hala okupondola moshinima osho tashi va etele ouwa tau kalelele monghalamwenyo yavo. Ndele otwa mona kutya okupondola kwomounyuni kunena luhapu ohaku dimbuwa. Ndele oilonga oyo Jehova ta wanifa po kunena i na sha nokuyapulifa edina laye, osha yela kutya itai ka dimbuwa nandenande mondjokonona yoshiwana shaye. Oilonga ya tya ngaho otai ka dimbulukiwa fiyo alushe. (Omayel. 10:7; Heb. 6:10) Onghee hano, natu kaleni twa lenga oufembanghenda wokukufa ombinga moilonga oyo itai ka dimbuwa yokuhonga ovanhu ehongo lopakalunga.
Oto nyamukula ngahelipi?
• Jehova okwa teelela ovanhu ovo va hala okuhongwa kuye va kale va tya ngahelipi?
• Ehongo lopakalunga ohali kwafele ngahelipi ovanhu va lundulule onghalamwenyo yavo?
• Omeenghedi dilipi twa nangekwa noupuna eshi hatu kwafele vamwe va mone ouwa mehongo lopakalunga?
[Efano pepandja 25]
Ovo va hongwa kuJehova ove li oumwainafana washili wopaiwana
[Efano pepandja 26]
Mbela kashi fi enangeko noupuna okukala “ovalongi pamwe naKalunga”?