Ehongo 1: Omwenyo womunhu ihau fi

Ehongo loipupulu olo ola dile peni?

O-The New Encyclopædia Britannica (1988), Embo 11, epandja 25, oya ti: “Ovafilosofi vOukriste vonale ova li va tambula ko ehongo lOshigreka li na sha nomwenyo ihau fi nosho yo ediladilo olo kutya omwenyo owa shitwa kuKalunga nohe u tula moshidalelo pokufimbapala kwomukainhu.”

Ombibeli otai hongo shike?

“Omwenyo tau nyono u nokufya.” — Hesekiel 18:4.

Ombibeli oya popya shi na sha nokushitwa kwomwenyo womunhu wotete ya ti: ‘Omwene Kalunga okwa mele omunhu mondwi yedu ndele okwa fudila meyulu laye omufudo womwenyo. Osho ngaha omulumenhu okwa ninga omwenyo u nomwenyo [mOshiheberi, neʹphesh].’ — Genesis 2:7.

Oshitya shOshiheberi neʹphesh osho sha tolokwa “omwenyo,” otashi ti ‘oshishitwa osho hashi fuda.’ Eshi Kalunga a shita omunhu wotete Adam, ka li e mu pa omwenyo ihau fi, ndele okwa li e mu pa eenghono domwenyo odo hadi kalekwa po kokufuda. Onghee hano, meityo lopaMbibeli, “omwenyo” otau ulike komunhu ye mwene e li omunamwenyo. Ngeenge eenghono domwenyo odo da li da yandjwa kuKalunga pehovelo oda di mo momunhu, kungaho omwenyo owa fya. — Genesis 3:19; Hesekiel 18:20.

Ehongo li na sha nokuhafya kwomwenyo ola etifa po omapulo aa kutya: Omwenyo ohau i peni konima yefyo? Oshike hashi ningilwa eemwenyo dovakolokoshi? Eshi ovo have liti kutya Ovakriste va tambula ko ehongo loipupulu li na sha nomwenyo ihau fi, oshe va ningifa va tambule ko ehongo vali limwe loipupulu, ehongo li na sha nomundilo woheli.

Yelekanifa eevelishe dOmbibeli edi: Omuudifi 3:19; Oilonga 3:23