Ehongo eti-2: Ovakolokoshi otava hepekwa moheli

Ehongo loipupulu olo ola dile peni?

Embo Histoire des enfers (Ondjokonona yOheli), la shangwa kuGeorges Minois, epandja 50, ola ti: “Plato oumwe womovafiloshofi aveshe Ovagreka vo venevene, oo a nwefwa mo neenghono omahongo opamifyuululwakalo e na sha nOheli.”

O-The New Encyclopædia Britannica (1988), Embo 25, epandja 890, oya ti: “Okudja mokati kefelemudo eti-2 AD, Ovakriste ovo va li va hongwa ounongo wonhumba wOshigreka ova li va hala okuyelifa eitavelo lavo metwokumwe noufilosofi oo . . . Ova li va hokwa unene oufilosofi waPlato [omahongo aPlato].”

O-Catechism of the Catholic Church, enyanyangido lomo 1994, epandja 270, oya ti: “Ehongo lOngeleka ola koleka kutya oheli oko i li nosho yo kutya oi li ko fiyo alushe. Diva konima yefyo, eemwenyo dovanhu ovo va fila moulunde ohadi i moheli, omo hadi handukilwa mokukala tadi hepekwa, ‘momundilo waalushe.’ Ehandukilo linene loheli olo okutukuka ko kuKalunga fiyo alushe.”

Ombibeli otai hongo shike?

‘Ovanamwenyo ove shi shii nokutya, ve nokufya. Ndelenee oonakufya inava shiiva nande sha, osheshi moshovafi oku to i, kamu na nande oshilonga, ediladilo neshiivo ile ounongo.’ — Omuudifi 9:5, 10.

Omushangwa oo otau ulike shike shi na sha nonghalo yoonakufya? Mbela ovafi ohava ka hepekwa moshovafi opo va futile po omatimba avo? Hasho nandenande, molwaashi moshovafi ‘kamu na eshiivo.’ Omolwetomheno olo, eshi tatekulululwa Job a li ta mono oixuna neenghono komukifi wa nyika oshiponga, okwa li a indila Kalunga a ti: “Holeke nge moshovafi.” (Job 14:13) Mbela eindilo laye ola li tali ka tya shike ngeenge ngeno oshovafi osha li onhele omo hamu hepekelwa ovanhu fiyo alushe? Paityo lOmbibeli, oshovafi osho onhele yopafaneko omo hamu i ovafi vahapu, noihamu longwa sha nandenande.

Mbela eyelifo olo kali li pandunge nosho yo metwokumwe nOmishangwa? Ndele mbela omunhu okwa longa owii munyanyalifi shi fike peni oo tau ningifa ngeno Kalunga omunahole a hepeke omunhu oo fiyo alushe? (1 Johannes 4:8) Ngeenge oheli ehongo loipupulu, mbela osho osha hala okutya oku ka kala nomwenyo meulu nako ehongo loipupulu?

Yelekanifa eevelishe dOmbibeli edi: Epsalme 146:3, 4; Oilonga 2:25-27; Ovaroma 6:7, 23