Osho hatu lihongo kuJesus

shi na sha nonghalamwenyo youkwaneumbo

Etaleko lohombo lilipi hali kwafele omaukwaneumbo a kale a hafa?

Ohombo oi li elongekido liyapuki. Eshi Jesus a li a pulwa ngeenge osha yuka ngoo okuteya ohombo, okwa li a nyamukula a ti: “Inamu lesha hamba, Omushiti okwe va shita pehovelo omulumenhu nomukainhu. ndee ta ti: [onghee] hano omulumenhu e nokufiya po [xe] naina nokulimangeleka komukainhu waye, ndele ava vavali otava ningi omunhu umwe? Osho hano kave fi vali vavali, ndelenee ombelela imwe. Hano osho Kalunga e shi tula kumwe, inashi kufwa kumwe komunhu. . . . Ou ta henge po omukainhu waye oshinima shimwe shi he fi oluhaelo, ndele ta hombola umwe, oye ta haele; naau ta hombola po omuhengwa, ye ota haele.” (Mateus 19:4-6, 9) Ngeenge ovalihomboli ova dulika komayele aJesus nokukala va diininafana, aveshe moukwaneumbo ohava kala ve udite va amenwa nova hafa.

Omolwashike ohole yokuhola Kalunga hai kwafele omaukwaneumbo a kale a hafa?

Jesus okwa ti: “Hola Omwene Kalunga koye nomutima woye aushe nomwenyo woye aushe neendunge doye adishe. Oshipango shinene noshotete osho tuu eshi.” Mbela oshipango shinene oshitivali oshilipi? Jesus okwa ti: “Hola omukweni [mwa kwatelwa ovo hava kala popepi elela naave, oukwaneumbo woye] ngaashi ove u lihole mwene.” (Mateus 22:37-39) Onghee hano, oshinima sha fimanenena osho hashi kwafele oukwaneumbo u kale wa hafa osho okukala u na ekwatafano liwa naKalunga molwaashi ohole yoku mu hola ohai tu linyengifa tu kale tu holafane.

Ongahelipi omushamane nomukulukadi tava dulu okulihafifa?

Ovashamane ohava hafifa ovakulukadi vavo ngeenge tava shikula oshihopaenenwa shaJesus. Jesus oha ulikile eongalo, omukulukadi waye wopafaneko, ohole yokuhelihola mwene. (Ovaefeso 5:25) Jesus okwa ti: ‘Omona wOmunhu ine uya okuyakulwa, ndele okuyakula.’ (Mateus 20:28) Jesus ka li kanyamukulwa ile omukwanyanya eshi a li ta ungaunga novanhu ovo kwa li ha file oshisho ndele okwa li he va tulumukifa. (Mateus 11:28) Onghee hano, ovashamane ove na okulongifa eenghonopangelo davo monghedi iwa oyo tai etele ouwa oilyo aishe youkwaneumbo.

Ovakulukadi navo otava dulu yo okumona ouwa moshihopaenenwa shaJesus. Ombibeli oya ti: ‘Omutwe waKristus oKalunga.’ Oya ti yo kutya ‘omutwe womukainhu omulumenhu.’ (1 Ovakorinto 11:3) Jesus ka li a tala ko okudulika kuKalunga ku li oshinima shidinifa, ndele ponhele yaasho, okwa kala e mu fimaneka neenghono. Jesus okwa ti: “Ohandi longo ashishe eshi she mu wapalela.” (Johannes 8:29) Omukulukadi oo ha dulika koukwamutwe womushamane waye omolwohole nomolwefimaneko lokufimaneka Kalunga oha xumifa komesho ehafo moukwaneumbo wavo.

Ovadali otava dulu okulihonga shike monghedi omo Jesus ha tale ko ounona?

Jesus okwa li ha longifa efimbo okukala nounona nokwa li e na ohokwe mwaasho tava diladila nosho yo momaliudo avo. Ombibeli oya ti: “Jesus okwe va ifana ve uye kuye ndee ta ti: Efeni ounona ve uye kuame.” (Lukas 18:15, 16) Pomhito imwe, ovanhu ova li va kembaula oumati vamwe ovo va li va popya shi na sha neitavelo lavo muJesus. Ashike Jesus okwa li a pandula ovanyasha ovo nokwa li a lombwela ovakembauli ovo a ti: “Inamu lesha hamba nande lumwe: Omomakanya ounona nouhanana we lilongela ehambelelo?” — Mateus 21:15, 16.

Ounona otava dulu okulihonga shike kuJesus?

Jesus okwa tulila po ounona oshihopaenenwa shiwa shokukala nohokwe moinima yopamhepo. Eshi Jesus a li e na omido 12, okwa li a hangwa ‘motembeli, e li omutumba mokati kovalongindjovo ta pwilikine kuvo noku va pula.’ Osho osha li sha etifa shike? ‘Aveshe ovo ve mu uda ova li va kuminwa eendunge daye nomanyamukulo aye.’ (Lukas 2:42, 46, 47) Ndele nande ongaho, eshiivo laJesus kala li le mu ningifa e linenepeke. Ponhele yaasho, ola li le mu ningifa a kale ha dulika kovadali vaye. Ombibeli oya ti: “Okwa li ha dulika kuvo.” — Lukas 2:51.

Opo u mone ouyelele muhapu, tala etukulwa 14, lembo Ombibeli otai hongo lela shike?a

[Eshangelo lopedu]