Honga ounona voye

Jeremia ka li a efa po okulongela Jehova

MBELA ope na omafimbo amwe oo ho kala wa teka omukumo nowa hala okweefa po okulongela Jehova? — a Haave auke ho kala u udite ngaho. Omunyasha Jeremia naye osho a li e udite ngaho efimbo limwe. Ndele nande ongaho, Jeremia ka li a efa osho vamwe tava popi ile tava ningi shi mu shololife filufilu. Natu ka kundafaneni kombinga yanghee Jeremia a li omunhu e likalekelwa kuKalunga, nonande okwa li hanga a sholole filufilu.

Fimbo Jeremia a li ina dalwa, Kalunga kashili Jehova okwa li e mu hoolola a ninge omuprofeti a londwele ovanhu kutya osho va li tava ningi Kalunga ine shi hokwa. Mbela ou shii kutya Jeremia okwa li a lombwela Jehova shike konima yomido donhumba? — Okwa li e mu lombwela a ti: “Ame kandi shii kupopya, osheshi aame omunyasha.”

Mbela Jehova okwa li a nyamukula Jeremia ngahelipi? —  Okwa li e mu nyamukula nombili ndele ine mu lila okafima koluko, a ti: ‘Ino tya: Aame omunyasha, osheshi keshe apa handi ku tumu ou nokuya ko, nakeshe eshi handi shi ku lombwele ou noku shi popya. Ino va tila.’ Omolwashike mbela? Jehova okwa ti: “Ame ondi li pamwe naave ndele handi ku xupifa.” — Jeremia 1:4-8.

Ngaashi sha popiwa nale metetekelo, Jeremia osho a ka teka omukumo lwanima. Okwa li a teka omukumo molwaashi okwa li ta shekwa eshi ta longele Kalunga. Okwa ti: ‘Ame ohandi yolwa omutenya aushe, aveshe tava sheke nge.’ Onghee hano, Jeremia okwa li a tokola okweefa po okulongela Jehova. Okwa ti: “[Jehova] ame inandi hala vali oku mu diladila noinandi hala vali okupopya medina laye.” Mbela Jeremia okwa li ngoo a efa po shili okulongela Jehova?

Jeremia okwa ti: ‘Ondjovo yOmwene oya fa omundilo wa xwama momutima wange tau xwike wa kwatelelwa momakipa ange, nonda loloka oku u lididimikila.’ (Jeremia 20:7-9) Nonande Jeremia okwa li ha kala a tila omafimbo amwe, ohole yaye yokuhola Jehova oya li ye mu kwafela aha efe po oku mu longela. Natu ka kundafaneni kutya Jeremia okwa li a amenwa ngahelipi eshi a li ina efa po okulongela Jehova.

Jehova okwa li a lombwela Jeremia a londwele ovanhu kutya Jerusalem otashi ka hanaunwa po ngeenge itava lundulula eendjila davo dii. Eshi Jeremia a li a londwela ovanhu, ova li va handuka ndele tava ti: “Omulumenhu ou okwa tula etimba lokudipawa.” Ndele nande ongaho, Jeremia okwa li e va pula va “pwilikine ondaka yOmwene Kalunga.” Opo nee okwa ti: ‘Ngeenge tamu dipaa nge, otamu litwike ohonde ihe netimba, osheshi Omwene okwa tuma nge shili kunye.’ Mbela ou shii kutya oshike sha li sha ningwa po konima yaasho? — 

Ombibeli oya ti: “Opo nee ovakulunhu novanhu aveshe ova lombwela ovapristeri novaprofeti ndee tava ti: Omulumenhu ou ke netimba lokufya. Osheshi ye okwe tu lombwela medina lOmwene Kalunga ketu.” Molwaashi Jeremia ka li a efa oumbada u mu efife po okulongela Jehova, Jehova okwa li e mu amena. Paife natu ka kundafaneni shi na sha naasho sha li sha ningilwa Uria, omuprofeti waJehova umwe vali oo a li a katuka monghedi ya yooloka ko kwaayo yaJeremia.

Ombibeli oya ti: ‘Uria okwa xunganeka medina lOmwene ta popi okuhandukilwa kwaJerusalem ngaashi Jeremia.’ Ndele mbela eshi ohamba Jojakim ya li ya handukila Uria, ou shii kutya Uria okwa li a ninga po shike? — Okwa li a tila, ndele ta efa po okulonga ehalo laKalunga nokuya onhapo kuEgipti. Opo nee ohamba oya li ya tuma ovalumenhu ve ke mu tale ko. Mbela ou shii kutya ohamba oyo ii oya li ya ninga po shike eshi Uria a etwa? — Oya li ye mu dipaa neonga. — Jeremia 26:8-24.

Omolwashike to dulu okutya kutya Jeremia okwa li a amenwa kuJehova ndele Uria ka li a amenwa? — Oshoshili kutya Jeremia otashi dulika naye a li a tila ngaashi Uria, ashike Jeremia ka li a efa po okulongela Jehova noka li a ya onhapo. Ka li a efa po okulongela Jehova nandenande. Oshilihongomwa shilipi hatu lihongo moshihopaenenwa shaJeremia? —  Oshilihongomwa oshosho kutya omafimbo amwe otashi dulika shiha kale shipu okulonga ehalo laKalunga, ndele otu na okukala alushe twe lineekela Kalunga nokudulika kuye.

[Omashangelo opedu]

Omapulo:

○ Jeremia okwa li a pewa oilonga ilipi kuKalunga?

○ Omolwashike Jeremia a li a hala okweefa po okulongela Jehova?

○ Omolwashike Jeremia a li a amenwa, ndele Uria ka li a amenwa?

○ Owe lihonga shike moshihopaenenwa shaJeremia?