Omolwashike u na okuliyapulila Jehova?

“Oufiku wonena puame pa li omwengeli waKalunga, ou e kwete nge.” — OIL. 27:23.

1. Ovo have liyapulile Jehova va ninginifwe ohava katuka tete eenghatu dilipi, nomapulo elipi a holoka po?

OPE na epulo limwe lomomapulo avali oo haa nyamukulwa kovaninginifwa pexulilo loshipopiwa sheninginifo, tali ti: “Pakanghameno leyambo laJesus Kristus, mbela omwe livela ombedi omolwomatimba eni nomwe liyapulila Jehova mu longe ehalo laye?” Omolwashike Ovakriste va pumbwa okuliyapulila Jehova? Okuliyapulila Kalunga otaku tu etele ouwa washike? Omolwashike omunhu ita dulu okulongela Kalunga monghedi oyo a hokwa ngeenge ine mu liyapulila? Opo tu ude ko omanyamukulo omapulo oo, otwa pumbwa tete okushiiva kutya eliyapulo oshike.

2. Okuliyapulila Jehova osha hala okutya shike?

² Okuliyapulila Kalunga osha hala okutya shike? Natu tale nghee omuyapostoli Paulus a popya kombinga yekwatafano laye naKalunga. Paulus okwa li a popya moipafi yovanhu ovo a li pamwe navo moshikepa oyo ya li ya teka shi na sha naJehova a ti: ‘Kalunga ou e kwete nge.’ (Lesha Oilonga 27:22-24.) Ovakriste aveshe ove kwetiwe kuJehova, sha hala okutya, ovaJehova. Mepingafano naasho, ounyuni aushe “ou li mepangelo lomunawii.” (1 Joh. 5:19) Ovakriste ohava ningi vaJehova ngeenge ve mu liyapulila monghedi oyo ta hokwa okupitila meilikano. Omunhu ngeenge te liyapulile Jehova oha ningi eano lopaumwene. Opo nee, omunhu oha ninginifwa momeva.

3. Eninginifo laJesus otali ulike shike, nongahelipi ovashikuli vaye tava dulu okushikula oshihopaenenwa shaye?

³ Jesus okwe tu tulila po oshihopaenenwa eshi a li a ninga etokolo paumwene opo a longe ehalo laKalunga. Jesus okwa li e liyapulila nale Kalunga molwaashi okwa dalwa moshiwana shaIsrael osho sha li she liyapulila Kalunga. Ndele nande ongaho, okwa li a ninga shihapu pokuninginifwa kwaye shihe fi ashike osho kwa li tashi pulwa kOmhango. Eendjovo daKalunga oda popya osho Jesus a li popya, da ti: ‘Tala, onde uya okulonga ehalo loye, Kalunga.’ (Heb. 10:7; Luk. 3:21) Onghee hano, okuninginifwa kwaJesus otaku ulike kutya okwe liyandja kuKalunga opo a longe ehalo laYe. Ovashikuli vaJesus ohava landula oshihopaenenwa shaye ngeenge tave liyandje va ninginifwe. Mepingafano naJesus, ovashikuli vaye ohava ninginifwa momeva moipafi yavamwe opo va ulike kutya ove liyapulila Kalunga meilikano.

Nghee okuliyapulila Jehova taku dulu oku tu etela ouwa

4. Oukaume oo wa li pokati kaDavid naJonatan otau ulike shike shi na sha nokuninga eudafanotwokumwe?

⁴ Okuliyapulila kwetu Kalunga tu li Ovakriste oku li oshinima sha kwata moiti. Okwa kwatela mo shihapu shihe fi ashike okuninga eudaneko ile eudafanotwokumwe. Ndele mbela ongahelipi okuliyapulila Kalunga taku tu etele ouwa? Oku shi faneka, natu tale kunghee okuninga eudafanotwokumwe momakwatafano ovanhu haku eta ouwa. Oshihopaenenwa shimwe shi na sha naasho osho oukaume. Opo u mone ouwa mokukala kaume kaumwe, ou na okutambula ko oshinakuwanifwa shokukala kaume. Osho osha kwatela mo okuninga eudafanotwokumwe, sha hala okutya, okukala u udite u na oshinakuwanifwa shokufiloshisho kaume koye. Oukaume oo wa li pokati kaDavid naJonatan ou li umwe womoihopaenenwa youkaume wa tongomana neenghono oo wa tumbulwa mOmbibeli. David naJonatan ova li nokuli va ninga ehangano ile eudafanotwokumwe li na sha noukaume wavo. (Lesha 1 Samuel 17:57; 18:1, 3.) Nonande oukaume wa tya ngaho owa pumba, luhapu ovanhu ohava kala ve na oukaume wa kola ngeenge ove udite ve na oshinakuwanifwa shonhumba kookaume kavo. — Omayel. 17:17; 18:24.

5. Ongahelipi omupika a li ta dulu okumona ouwa tau kalelele mokukalela omwene waye muwa?

⁵ Omhango oyo Kalunga a li a pa Ovaisrael oya popya kombinga yekwatafano limwe vali omo ovanhu hava mono ouwa ngeenge va ningi eudafanotwokumwe. Ngeenge omupika a li a hala okukala a amenwa mokukalela omwene waye muwa fiyo alushe, okwa li ta dulu okuninga eudafano tali kalelele nomwene waye. Omhango oya ti: “Omupika ngenge ta ti shili: Ame ndi hole omwene wange, nomwalikadi wange novana vange, ndele inandi hala ndi efwe, opo nee omwene waye ne mu twale kovatokoli veendjovo noku mu kaleka ofika ngenge poshivelo ile polumhango loshivelo, nomwene waye na tyuule okutwi kwaye nonhisho, ndele ye na kale alushe omupika waye.” — Ex. 21:5, 6.

6, 7. (a) Ongahelipi okuninga eudafanotwokumwe haku etele ovanhu ouwa? (b) Okuninga eudafanotwokumwe ohaku holola shike kombinga yekwatafano letu naJehova?

⁶ Ohombo oyo oshinima osho tashi pula okuninga eano ile eudafanotwokumwe la kwata moiti. Ohombo kai fi ashike okukala metwokumwe neano olo wa ninga, ndele okukala u udite u na oshinakuwanifwa komunhu wonhumba. Ovanhu vavali ovo ve li pamwe inava hombola kave na efiku va kale ve udite va amenwa shili nosho yo ounona vavo navo ihava kala ve udite va amenwa. Ndele ovalihomboli ovo va ninga eano ile eudafanotwokumwe mohombo i shii okufimanekwa ohave linyengifwa kouyelele wOmishangwa va kandule po omaupyakadi pahole oo haa holoka po. — Mat. 19:5, 6; 1 Kor. 13:7, 8; Heb. 13:4.

⁷ Pefimbo lOmbibeli, ovanhu ova li hava mono ouwa mokushanga omikanda domaudafanotwokumwe meengeshefa nosho yo novayandji voilonga. (Mat. 20:1, 2, 8) Kunena, ovanhu ohava mono yo ouwa mokuninga ngaho. Pashihopaenenwa, ohatu mono ouwa mokushanga omikanda domaudafanotwokumwe fimbo inatu hovela okuninga ongeshefa yonhumba ile okulonga mofeema yonhumba. Ndele ngeenge okuninga eano ile eudafanotwokumwe ohaku pameke omakwatafano ovanhu, ngaashi oukaume, ohombo nosho yo oilonga, itashi pameke tuu ekwatafano lomunhu naJehova neenghono ngeenge okwe mu liyapulile filufilu! Natu ka kundafaneni kombinga yanghee ovanhu vonale va li va mona ouwa omolwokuliyapulila Jehova Kalunga nonokutya omolwashike okuninga ngaho kuhe fi ashike okuninga eudafanotwokumwe.

Nghee okuliyapulila Kalunga kwa li kwa etela Ovaisrael ouwa

8. Okuliyapulila Kalunga kwOvaisrael okwa li kwa kwatela mo shike?

⁸ Oshiwana shaIsrael ashishe osha li she liyapulila Jehova eshi sha li sha ninga eano kuye. Jehova okwa li e va ongela popepi nomhunda yaSinai, ndele te va lombwele ta ti: “Nye ngenge tamu pwilikine ondaka yange ndee tamu diinine ehangano lange, nye mokati koiwana aishe, mu nokukala oshiwana shange mwene.” Ovaisrael aveshe ova li va nyamukula oshita va ti: “Ashishe osho Omwene e shi tonga fye ohatu shi ningi.” (Ex. 19:4-8) Okuliyapulila Jehova kwOvaisrael okwa li kwa kwatela mo shihapu shihe fi ashike okukala ve na oshinakuwanifwa shokuninga oshinima shonhumba. Ova li va ninga vaJehova, na Jehova okwa li e va tala ko ve li ‘oshiwana shaye mwene.’

9. Ongahelipi Ovaisrael va li va mona ouwa mokukala ve liyapulila Kalunga?

⁹ Ovaisrael ova li va mona ouwa eshi va li vaJehova. Jehova okwa li omudiinini kuvo nohe va file oshisho, ngaashi ashike omudali omunahole ha file oshisho ovana. Kalunga okwa li a lombwela Ovaisrael a ti: “Ope na tuu omwalikadi ta dulu okudimbwa okahanana kaye, ye ita file ngeno okaana komolutu laye onghenda? Nande ngeno ye te ka dimbwa, Ame itandi ku dimbwa.” (Jes. 49:15) Jehova okwa li a pa Ovaisrael ewiliko okupitila mOmhango, etwomukumo okupitila movaprofeti nosho yo eameno lovaengeli. Omupsalme umwe okwa ti: “Okwa udifila Jakob eendjovo daye, naIsrael eemhango daye nomapangelo aye. Kape na nande oiwana yoilongo a ningila ngaha.” (Eps. 147:19, 20; lesha Epsalme 34:7, 19; 48:14.) Ngaashi ngoo Jehova a li a fila oshisho oshiwana shaye shonale, ota ka fila yo oshisho ovo ve mu liyapulila kunena.

Omolwashike tu na okuliyapulila Kalunga?

10, 11. Otwa dalelwa ngoo moukwaneumbo waKalunga womeshito alishe? Shi yelifa.

¹⁰ Ngeenge vamwe tava diladila kombinga yeliyapulo neninginifo lopaKriste, otashi dulika ve lipule kutya: ‘Omolwashike itandi dulu okulongela Kalunga ngeenge inandi mu liyapulila?’ Ohatu ka mona enyamukulo la yela ngeenge otwa shiiva kutya otu na omufika wa tya ngahelipi kunena koshipala shaKalunga. Dimbuluka kutya atusheni otwa dalelwa kondje youkwaneumbo waKalunga omolwokunyona kwaAdam. (Rom. 3:23; 5:12) Okuliyapulila Kalunga oku li oshiteelelwa sha fimanenena opo omunhu a dule okutambulwa ko moukwaneumbo waYe womeshito alishe. Natu ka taleni kutya omolwashike.

¹¹ Kape na oo ta dulu okupewa omwenyo waalushe kuxe wopambelela ngaashi Kalunga a li a lalakanena. (1 Tim. 6:19) Inatu dalwa tu li ovana vaKalunga molwaashi eshi ovalihomboli votete va nyona, ovanhu ova tukuka ko kuXe nOmushiti wavo omunahole. (Yelekanifa naDeuteronomion 32:5.) Okudja opo fiyo okunena, ovanhu aveshe mounyuni ove li kondje youkwaneumbo waJehova womeshito alishe, va tukuka ko kuye.

12. (a) Ongahelipi ovanhu inava wanenena tava dulu okuninga oilyo youkwaneumbo waKalunga? (b) Omunhu oku na okukatuka eenghatu dilipi fimbo ina ninginifwa?

¹² Ohatu dulu okwiilikana pauhandimwe opo Kalunga e tu tambule ko moukwaneumbo waye wovapiya vaye ovo a hokwa.a Osho otashi shiiva ngahelipi kovanhu inava wanenena ngaashi fye? Omuyapostoli Paulus okwa ti: “Fimbo twa li ovatondi vaKalunga twa kwatakanifwa naye molwefyo lOmona waye.” (Rom. 5:10) Ngeenge hatu ninginifwa, ohatu ilikana kuKalunga e tu pe eliudo liwa opo tu kale twa hokiwa kuye. (1 Pet. 3:21) Ndele fimbo omunhu ina ninginifwa, oku na okukatuka eenghatu donhumba. Oku na okushiiva Kalunga, okulihonga okukala e mu lineekela, okulivela ombedi nokulundulula eenghedi daye. (Joh. 17:3; Oil. 3:19; Heb. 11:6) Oku na yo okuninga oshinima shimwe vali fimbo ina tambulwa ko kuKalunga moukwaneumbo waye. Oshike mbela osho e na okuninga?

13. Omolwashike sha yuka komunhu okuninga eano okupitila mokuliyapulila Kalunga opo a dule okuninga oshitukulwa shoukwaneumbo wovalongeli vaye ovo a hokwa?

¹³ Fimbo omunhu oo a tukuka ko kuKalunga ina ninga oshilyo shoukwaneumbo waKalunga wovapiya vaye ovo a hokwa, oku na tete okuningila Kalunga eudaneko la kwata moiti. Opo tu ude ko kutya omolwashike, diladila nee ngeno xe omudali e shii okulineekelwa oo a hokwa ofiye yonhumba inyasha nokwa hala a ninge xe omutekuli wayo i li oshilyo shoukwaneumbo waye. Xe oo okwa shiivika kutya oku li omulumenhu e na eenghedi diwa. Ndele nande ongaho, fimbo ina tambula ko omunyasha oo a ninge omona waye, omulumenhu oo ota ka kala a hala omunyasha oo a ninge eudaneko lonhumba. Onghee hano, omulumenhu oo okwa ti kutya “fimbo inandi ku tambula ko u ninge omona wange, onda hala okushiiva ngeenge oto ka kala ngoo u hole nge nowa fimaneka nge ndi li xo.” Omulumenhu oo ota ka tambula ko ashike omunyasha oo moukwaneumbo waye ngeenge okwa hala okuninga eudaneko la kwata moiti. Mbela osho kashi li pandunge? Sha faafana, Jehova oha tambula ko ashike ovanhu moukwaneumbo waye ovo va hala okuninga eano okupitila moku mu liyapulila. Ombibeli oya ti: ‘Yandjeni omalutu eni eyambo liyapuki li nomwenyo, la wapalela Kalunga nye mu kale mwe mu liyapulila.’ — Rom. 12:1, yelekanifa OB-1986.

Okuliyapulila Kalunga oku li onghatu yopahole noyeitavelo

14. Omonghedi ilipi eliyapulo li li euliko lohole?

¹⁴ Okuninga eano lokuliyapulila Kalunga oku li euliko lohole yetu yokuhola Kalunga nomutima aushe. Eano la tya ngaho ola faafana hanga neano lohombo. Ngeenge omulumenhu Omukriste ta hombola oha ulike kutya oku hole omufuko waye mokwaana kutya ota ka kala omudiinini kuye, kashi na nee mbudi kutya oshike tashi ningwa po. Eano la tya ngaho ohali ningilwa omunhu ndele kali fi ashike eudaneko lokuninga oshinima shonhumba. Omuhomboli Omukriste oku shii kutya ita dulu okumona oufembanghenda wokukala pamwe nomuhombolwa waye ngeenge ina ninga eano lohombo. Monghedi ya faafana, itatu dulu okuhafela filufilu omauwa oo haa hafelwa koilyo youkwaneumbo waJehova nopehe na okuninga eano okupitila moku mu liyapulila. Onghee hano, ohatu liyapulile Kalunga nonande inatu wanenena molwaashi otwa hala okukala twaye notwa tokola toko okukala ovadiinini kuye, kashi na nee mbudi kutya oshike tashi ningwa po. — Mat. 22:37.

15. Omolwashike eliyapulo hali ulike kutya omunhu oku na eitavelo?

¹⁵ Ngeenge hatu liyapulile Kalunga, ohatu ulike kutya otu na eitavelo. Omolwashike mbela? Eitavelo letu muJehova ohali tu kwafele tu kale tu na elineekelo kutya okweehena popepi naye otashi tu etele ouwa. (Eps. 73:28) Otu shii kutya itashi ka kala alushe shipu okweenda pamwe naKalunga ofimbo tu li “mokati koludi eli la pilalala nola ngolyoka,” ndele otwe lineekela meudaneko laKalunga olo kutya ote ke tu kwafela eshi hatu ningi eenghendabala. (Fil. 2:15; 4:13) Otu shii kutya inatu wanenena, ndele otu na elineekelo kutya Jehova ota ka ungaunga nafye nonghenda, nokuli nongeenge twa ninga omapuko onhumba. (Lesha Epsalme 103:13, 14; Ovaroma 7:21-25.) Otwa itavela kutya Jehova ota ka nangeka noupuna etokolo toko letu lokukala ovadiinini kuye. — Job 27:5.

Okuliyapulila Kalunga ohaku eta ehafo

16, 17. Omolwashike okuliyapulila Jehova haku etele omunhu ehafo?

¹⁶ Okuliyapulila Jehova ohaku etele omunhu ehafo molwaashi okwa kwatela mo okuliyandja. Jesus okwa popya oshili ya fimana eshi a ti: “Okuyandja oku nelao komesho yokutambula.” (Oil. 20:35) Jesus okwa li a mona filufilu ehafo olo hali di mokuyandja pefimbo loukalele waye wokombada yedu. Peemhito dimwe ngeenge eenghalo da li tadi shi pula, Jesus ka li ha fuda po, okwa li he lidilike oikulya nosho yo omauwa makwao opo a dule okukwafela vamwe va mone ondjila oyo tai twala komwenyo. (Joh. 4:34) Jesus okwa li a hafela okuhafifa omutima waXe. Okwa ti: “Ohandi longo ashishe eshi she mu wapalela.” — Joh. 8:29; Omayel. 27:11.

¹⁷ Kungaho, Jesus okwa li a ladipikila ovashikuli vaye onghedi iwa yokukalamwenyo eshi a ti: “Ngenge ku na ou a hala okushikula nge, oye ne lixupule ye mwene.” (Mat. 16:24) Ngeenge otwa ningi ngaho, ohatu ka ehena popepi elela naJehova. Mbela ope na ngoo vali omunhu umwe e lili oo hatu dulu okuliyandja kuye nota dulu oku tu fila oshisho pahole?

18. Omolwashike okukala metwokumwe neliyapulo letu kuJehova haku eta ehafo linene shi dule okuliyapulila oshinima shonhumba ile omunhu wonhumba?

¹⁸ Okuliyapulila Jehova nokukala hatu longo ehalo laye opo tu kale metwokumwe neliyapulo olo, ohaku etele omunhu ehafo linene shi dule okuliyapulila oshinima shonhumba ile omunhu wonhumba. Pashihopaenenwa, ovanhu vahapu ohava longifa onghalamwenyo yavo aishe mokulalakanena oupuna woinima yopamaliko nopehe na okumona ehafo nosho yo embilipalelo lashili. Ndele ovanhu ovo have liyapulile Jehova ohava mono ehafo tali kalelele. (Mat. 6:24) Oufembanghenda wokukala “ovalongi pamwe naKalunga” ohau va hafifa. Ndele nande ongaho, inave liyapulila oshilonga shonhumba ndele ove liyapulila Kalunga ketu oo e na olupandu. (1 Kor. 3:9) Kape na vali umwe oo ta dulu oku va pandula neenghono omolweliyambo lavo ehe fi Kalunga. Kalunga ota ka alulila nokuli ovadiinini vaye kounyasha opo e va file oshisho fiyo alushe. — Job 33:25; lesha Ovaheberi 6:10.

19. Ovo ve liyapulila Jehova ohava hafele oufembanghenda ulipi?

¹⁹ Okuliyapulila kwoye Jehova otaku ke ku kwafela u kale u na ekwatafano lopofingo naye. Ombibeli oya ti: “Eheneni kuKalunga, opo nee Ye ta ehene kunye.” (Jak. 4:8; Eps. 25:14) Moshitukulwa tashi landula, ohatu ka kundafana kutya omolwashike hatu dulu okukala tu na oushili kombinga yokuninga ehoololo li na sha nokukala twaJehova.

[Eshangelo lopedu]

Oto nyamukula ngahelipi?

• Okuliyapulila Kalunga otashi ti shike?

• Okuliyapulila Kalunga otaku tu etele ouwa ulipi?

• Omolwashike Ovakriste va pumbwa okuliyapulila Jehova?

[Efano pepandja 12]

Okukala metwokumwe neliyapulo letu ohaku tu etele ehafo tali kalelele