Onghedi yaSatana yokupangela kai na efiku i pondole nandenande
“Omuhenakalunga ita ka mona elao.” — OMUUD. 8:13.
1. Omolwashike okutokolwa kwovakolokoshi oko taku ka ningwa mafiku ku li oshinima tashi hekeleke?
MAFIKU ovakolokoshi otava ka tokolwa pauyuki, notava ka mona oilanduliko yoilonga yavo. (Omayel. 5:22; Omuud. 8:12, 13) Oshinima sha tya ngaho otashi hekeleke, unene tuu kwaavo ve hole ouyuki notava mono oixuna omolwokuhenouyuki nomolwokuningwa nai kovakolokoshi. Satana Ondiaboli xe yowii, oye omunawii a shiya ko oo ta ka tokolwa pauyuki. — Joh. 8:44.
2. Omolwashike pa li pa pumbwa okupita efimbo opo ku kandulwe po omhata oyo ya tukulwa muEden?
2 Nale moshikunino shaEden, Satana okwa li a hala okukala a fimana neenghono, ndele ta ningifa ovanhu va ekeleshi onghedi yaJehova yokupangela. Oshidjemo, ovadali vetu votete ove limbwanga mumwe naSatana mokushonga oufemba waJehova wokupangela, nokudja opo, ova ninga ovalunde koshipala shaJehova. (Rom. 5:12-14) Ashike Jehova oku shii kutya okuhadulika nosho yo ounashibofa wavo owa li tau ke va etela oilanduliko ya tya ngahelipi. Ndele oilanduliko younashibofa wavo oyo itai dulu okuhenukwa oya li i na okukala i liwetikile koishitwa aishe inaendunge. Onghee hano, opa li pa pumbwa okupita efimbo opo omhata oyo i kandulwe po nokuulika filufilu kutya ovanashibofa ovo ova puka filufilu.
3. Otu na okutala ko ngahelipi omapangelo opanhu?
3 Okudja eshi ovanhu va ekelashi ounamapangelo waJehova, ova tota po omapangelo omaludi e lili noku lili. Eshi omuyapostoli Paulus a li a shangela ovaitaveli vakwao muRoma, okwa li a popya kombinga yomapangelo opanhu, a longifa outumbulilo ‘ovapangeli.’ Pefimbo laPaulus, outumbulilo ‘ovapangeli’ owa li unene tau ulike kepangelo laRoma olo la li meke lomupangeli Nero, oo a li a pangela okudja mo 54-68 O.P. Paulus okwa ti kutya ovapangeli “ova tulwa po kuKalunga.” (Lesha Ovaroma 13:1, 2.) Mbela osho osha hala okutya shike? Mbela Paulus okwa li a hala okutya epangelo lopanhu oli dule onghedi yaKalunga yokupangela? Hasho nandenande, ndele ponhele yaasho okwa li ashike a hala okutya shimha ashike Jehova a efa ovapangeli vopanhu va kale po, Ovakriste ove na okufimaneka ‘omhangela yaKalunga’ nokutambula ko ovapangeli ovo.
Satana okwa katuka onghatu tai twala moshiponga
4. Omolwashike omapangelo opanhu itaa ka pondola?
4 Osha yela kutya omapangelo opanhu oo a nwefwa mo kuSatana kae na efiku a pondole. Omolwashike mbela? Etomheno limwe ololo kutya okupangela kwao inaku kanghamena kounongo wopakalunga. Jehova oye aeke e na ounongo wa wanenena. Onghee hano, oye ashike ta dulu okuyandja ewiliko li shii okulineekelwa li na sha nokupangela monghedi tai pondola. (Jer. 8:9; Rom. 16:27) Mepingafano novanhu ovo luhapu have lihongo mokuninga omapuko nosho yo okupitila momayeleko, Jehova oha kala alushe e shii onghedi ya denga mbada omo e na okukatuka. Epangelo keshe olo ihali landula ewiliko laJehova itali ka pondola. Omolwetomheno olo nosho yo oushili oo kutya Satana oku na omalinyengotomheno okulihola mwene, otu shi shii kutya onghedi yaye yokupangela okupitila movapangeli vopanhu kaya li tai ka pondola okudja pehovelo.
5, 6. Oshike tashi dulika she linyengifa Satana a pataneke Jehova?
5 Omunhu oo e na eendunge luhapu oha henuka okuninga eenghendabala okuninga oshinima shonhumba osho e shii kutya itashi ka pondola. Ngeenge okwa tokola kutya otai komesho nokuninga oshinima shaye, ota ka fininikwa a dimine epuko laye. Ondjokonona oya ulika lwoikando kutya itashi kwafa sha okukondjifa Omushiti omunaenghono adishe. (Lesha Omayeletumbulo 21:30.) Ndele Satana okwa pilamena Jehova omolwounhwa nosho yo okukala a hala efimano. Kungaho, Ondiaboli oya hoolola owina okukatuka onghatu oyo tai twala moshiponga.
6 Oikala yaSatana younhwa oya ka ulikwa lwanima komupangeli waBabilon oo a popya eendjovo edi te litade ta ti: “Ame nda hala okulonda meulu nohandi lidikile oshipundipangelo shange kombada yeenyofi daKalunga, nohandi ka kala omutumba komhunda yeongalo nondi kale komaxulilo oumbangalanhu. Ame onda hala okulonda kombada yoilemo ndi lifefe ou wokombadambada.” (Jes. 14:13-15) Eenghendabala domupangeli oo dihe li pandunge kada li da pondola, nouhamba waBabilon owa li wa xulifwa po monghedi ififohoni. Sha faafana, Satana nounyuni waye otau ka xulifwa po filufilu mafiku.
Omolwashike Kalunga a efa ovanhu va kale va manguluka ko kepangelo laye?
7, 8. Omauwa amwe elipi a etifwa kokweefa kwaJehova oukolokoshi u kale po oule wokafimbo?
7 Vamwe otashi dulika ve lipule kutya omolwashike Jehova ina kelela ovanhu vehe limbwange mumwe naSatana novaha landule omhangela yaye yokutota po epangelo olo itali pondola sha. Kalunga okwa li ta dulu filufilu okukelela osho shiha ningwe molwaashi oye Omunaenghono adishe. (Ex. 6:3) Ndele nande ongaho, Kalunga ka li e va kelela. Ounongo waye owe mu kwafela a mone kutya okuhaya olunyala mounashibofa wovanhu oule wokafimbo otaku ka eta oidjemo iwa. Xuuninwa, Jehova ota ka tumbalekwa e li Omupangeli omuyuki nomunahole, novanhu ovadiinini otava ka mona ouwa metokolo laYe.
8 Ngeno ovanhu kava tambulile ko omaheka aSatana nokuhenuka okukala va manguluka ko kepangelo laKalunga, ngeno inava henuka tuu oilanduliko inyikifa oluhodi! Ndele etokolo laJehova lokweefa ovanhu ve lipangele vo vene oule wefimbo ola eta ouwa. Osho osha kwafela neenghono ovanamitimadiwa va mone kutya oshi li pandunge okupwilikina kuKalunga noku mu lineekela. Oule womafelemido, ovanhu ova hetekela omapangelo omaludi e lili noku lili, ndele kape na olo la pondola. Osho osha kwafela ovapiya vaKalunga va kale va tomwa kutya onghedi yaKalunga yokupangela oyo ashike ya denga mbada. Ashike okweefa kwaJehova epangelo loukolokoshi laSatana li kale po okwa etifa okumona oixuna kwovanhu, mwa kwatelwa ovo tava longele Jehova noudiinini. Ndele nande ongaho, okweefa kwaKalunga oukolokoshi u kale po oule wokafimbo okwa etela yo ouwa ovo tave mu longele noudiinini.
Ounashibofa otau fimanekifa Jehova
9, 10. Ongahelipi onghedi yaSatana yokupangela ya tumbalekifa Jehova?
9 Okweefa ovanhu va nwefwe mo kuSatana nove lipangele vo vene inaku dinifa onghedi yaJehova yokupangela. Mepingafano naasho, ondjokonona oya koleka oushili weendjovo daJeremia da nwefwa mo odo da ti kutya ovanhu itava dulu okulipangela vo vene. (Lesha Jeremia 10:23.) Kakele kaasho, ounashibofa waSatana owa pa Jehova omhito yokuulika omaukwatya aYe mawa monghedi ididilikwedi. Ngahelipi mbela?
10 Nonande onghedi yaSatana yokupangela oya etifa oilanduliko inyikifa oluhodi, osho osha ningifa omaukwatya aJehova a wanenena a kale e liwetikile monghedi ididilikwedi neenghono. Naasho osha kwafela ovanhu ovo ve hole Jehova va kale ve mu tumbaleka. Paulelalela, onghedi yaSatana yokupangela otai fimanekifa Kalunga, nonande osho osha fa itashi shiiva. Otai ulike yo kutya onghedi omo Jehova a ungaunga nomhata i na sha nounamapangelo waye oya denga mbada. Opo tu koleke oushili oo, natu ka konakoneni pauxupi amwe omomaukwatya aJehova nokutala nghee onghedi yaSatana yokupangela ye linyengifa Jehova a ulike omaukwatya aye meenghedi de likalekelwa.
11. Jehova okwa ulika ngahelipi ohole yaye?
11 Ohole. Omishangwa otadi ti kutya “Kalunga Oye ohole.” (1 Joh. 4:8) Kalunga okwa ulika ohole yaye eshi a shita ovanhu. Natango, onghedi ikumwifi noya denga mbada omo twa shitwa otai yandje oumbangi kutya Kalunga oye ohole. Jehova okwa ulika yo ohole yaye mokupa ovanhu eduumbo liwa li na oinima aishe oyo va pumbwa opo va kale va hafa. (Gen. 1:29-31; 2:8, 9; Eps. 139:14-16) Ndele okudja eshi ovanhu va tukula oshibofa, Jehova okwa ulika ohole yaye meenghedi dimwe vali. Ngahelipi mbela? Omuyapostoli Johannes okwa popya eendjovo odo da popiwa kuJesus tadi ti: “Osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.” (Joh. 3:16) Mbela ngeno Kalunga okwa ulika ngoo ohole yaye yokuhola ovanhu monghedi ididilikwedi shi dule eshi a tuma Omona waye ewifa kombada yedu opo a kulile ovalunde? (Joh. 15:13) Okuulika ohole kwaKalunga monghedi ya tongomana ya tya ngaho okwa tulila po ovanhu oshihopaenenwa, taku va pe omhito va dilonge efiku keshe kohole yaKalunga yokuhelihola mwene, ngaashi Jesus a ninga. — Joh. 17:25, 26.
12. Omonghedi ilipi Jehova a ulika eenghono daye?
12 Eenghono. “Kalunga Omunaenghono adishe” oye aeke e na eenghono okushita oishitwa i na omwenyo. (Eh. 11:17, OB-1986; Eps. 36:10) Pedalo, onghalamwenyo yomunhu ohai kala ngaashi efo lombapila inali shangwa sha, ndelenee pefyo, omunhu oha yadifa ombapila oyo pafaneko nomatokolo, neenghatu noimoniwa yomonghalamwenyo oyo hai vyula ounhu waye nosho yo omaukwatya aye. Jehova ota dulu okutuvikila ouyelele oo medimbuluko laye, nopefimbo la wapala, ota ka dula okunyumuna omunhu oo e li naanaa ngaashi a li nale. (Joh. 5:28, 29) Onghee hano, nonande kasha li elalakano laKalunga ovanhu va kale hava fi, efyo ole mu pa omhito a ulike kutya oku na eenghono okunyumuna oonakufya. Osho otashi ulike kutya Jehova “Kalunga Omunaenghono adishe.”
13. Ekuliloyambo laJesus ola ulika ngahelipi kutya Jehova omuyuki monghedi ya wanenena?
13 Ouyuki. Jehova iha popi oipupulu noiha katuka eenghatu dihe li pauyuki. (Deut. 32:4; Tit. 1:2) Oha diinine alushe omifikamhango daye dopombada doshili nodouyuki, nokuli nonande haye lela ta mono ouwa. (Rom. 8:32) Jehova ka li tuu a nyemata eshi a li ta tale Omona waye omuholike ta fi komuti womahepeko ngaashi omunhu oo ha sheke Kalunga! Ndele omolwohole yaye yokuhola ovanhu inava wanenena, okwa li a efa nehalo liwa oshiningwanima shinyikifa oluhodi sha tya ngaho shi ningwe opo a diinine omufikamhango waye wouyuki wa wanenena. (Lesha Ovaroma 5:18-21.) Ounyuni ou u yadi ovanhu vehenouyuki owa pa Jehova omhito a ulike kutya ye omuyuki a shiya ko.
14, 15. Omeenghedi dimwe dilipi Jehova a ulika ounongo wa shiya ko nosho yo elididimiko?
14 Ounongo. Diva konima yokunyona kwaAdam naEva, Jehova okwa li a holola kutya ota ka ninga po shike opo a xulife po oilanduliko ii aishe oyo ya etifwa kounashibofa wavo. (Gen. 3:15) Eenghatu daJehova domeendelelo da tya ngaho nosho yo okuhololela ovapiya vaye kanini nakanini ouyelele u na sha nelalakano laye oda ulika kutya oku na ounongo wa shiya ko. (Rom. 11:33) Kape na osho tashi dulu okuya moshipala okudula kwaKalunga okuungaunga noinima nomupondo. Jehova okwa mona omhito ya wana okuulikila oishitwa yaye kutya ounongo washili oshike nonande mounyuni omu na oluhaelo, oita, ouhenouyuki, okuheneduliko, okuhenonghenda, onhondo noihelele. Omuhongwa Jakob okwa ti: “Ounongo ou hau di kombada, tete ou wa yela nopo nee u nombili nou nolukeno nowiitaveleli nou yadi onghenda noiimati iwa; kau nomalimbililo ile oihelele.” — Jak. 3:17.
15 Elididimiko nosho yo onheni. Oukwatya waJehova welididimiko nonheni ngeno inau limonikila neenghono ngeno ka li ta ungaunga nokuhawanenena nosho yo omanyono ovanhu. Ndele eshi Jehova a kala te lididimike nota ulike onheni oule womido omayovi otashi ulike kutya oku na omaukwatya oo makumwifi monghedi ya wanenena, notu na okukala tu na olupandu linene omolwaasho. Omuyapostoli Petrus okwa popya sha yuka eshi a ti kutya otu na ‘okutala ko onheni yOmwene wetu kutya oyo exupifo.’ — 2 Pet. 3:9, 15.
16. Omolwashike okukala kwaJehova a hala okudimina po ovanhu omatimba taku tu etele ehafo linene?
16 Jehova oha dimine po ovanhu nehalo liwa. Atusheni otu li ovalunde nohatu nyono luhapu. (Jak. 3:2; 1 Joh. 1:8, 9) Katu na tuu okukala tu na olupandu eshi Jehova a hala okudimina po ovanhu ‘omatimba mahapu’! (Jes. 55:7) Diladila yo koushili ou: Molwaashi otwa dalwa inatu wanenena, ohatu dulu okumona ehafo linene olo hatu kala tu udite ngeenge Kalunga e tu dimina po omanyono etu. (Eps. 51:7, 11, 19) Okuulikilwa oukwatya muwa waJehova wa tya ngaho pauhandimwe otaku tu kwafele tu kale tu mu hole nomutima aushe notaku tu tu omukumo tu landule oshihopaenenwa shaye eshi hatu ungaunga navamwe. — Lesha Ovakolossi 3:13.
Etomheno molwaashi ounyuni wa nyonauka neenghono
17, 18. Omeenghedi dilipi onghedi yaSatana yokupangela ya ponya?
17 Onghalelo aishe younyuni waSatana, oyo ya etifwa po konghedi yaye yokupangela, oya kala tai dopa lwoikando oule womafelemido. Mo 1991, oshifokundaneki shimwe shedina The European osha ti: ‘Hano ounyuni owa nyonauka? Heeno, owa nyonauka, ndele hamolwoilonga [yonhumba] yaKalunga; okunyonauka kwounyuni okwa etifwa kovanhu vo vene.’ Eendjovo odo kadi fi tuu doshili! Omolwokunwefwa mo kuSatana, ovadali vetu votete ova hoolola epangelo lopanhu ponhele yokuhoolola epangelo laJehova. Kungaho, ova li va tota po onghedi yokupangela itai pondola. Ouyahame noluhodi olo hali hange ovanhu mounyuni aushe otai ulike kutya omapangelo opanhu okwa nyonauka neenghono.
18 Onghedi yaSatana yokupangela ohai xumifa komesho oikala yokuliholamwene. Ndele nande ongaho, oikala yokuliholamwene kai na efiku i finde ohole, oko kwe likolelela onghedi yaJehova yokupangela. Onghedi yaSatana yokupangela oya nyengwa okweetela ovanhu engungumano, ehafo nosho yo eameno. Ndele onghedi yaJehova yokupangela oya yukipalifwa. Mbela otu na oumbangi kunena oo tau shi ulike? Heeno otu na, ngaashi hatu ke shi mona moshitukulwa tashi landula.
Owe lihonga shike kombinga yepangelo mokulesha . . .
[Omafano pepandja 25]
Onghedi yaSatana yokupangela inai etela nandenande ovanhu ouwa washa
[Eedjo domafano]
U.S. Army photo
WHO photo by P. Almasy
[Efano pepandja 26]
Eenghono daJehova otadi ka finda efyo
[Efano pepandja 27]
Jehova okwa ulika ohole nouyuki waye eshi a yamba po Omona waye