Natu twikileni okweenda mondjila oyo ya yuka!
“Ngenge tu nomwenyo ile hatu fi, ofye ovOmwene.” — ROM. 14:8.
1. Jesus okwa honga shike kombinga yonghedi yokukalamwenyo oyo ya denga mbada?
OVANHU otava dulu okuhoolola kutya ova hala okukala nonghedi yokukalamwenyo ya tya ngahelipi, ndele ope na ashike onghedi imwe yokukalamwenyo oyo ya denga mbada. Jehova okwa hala tu kale tu na onghedi yokukalamwenyo ya denga mbada. Ohatu dulu ashike okukala nonghedi yokukalamwenyo ya denga mbada ngeenge otwa kala metwokumwe nEendjovo daKalunga nosho yo okulihonga kOmona waye, Jesus Kristus. Jesus okwa honga ovashikuli vaye va longele Kalunga momhepo nomoshili, nokwe va lombwela va ninge ovanhu ovahongwa. (Mat. 28:19, 20; Joh. 4:24) Ngeenge otwa dulika komahongo aJesus, ohatu ka hafifa Jehova note ke tu nangeka noupuna.
2. Ovanhu vahapu ova li ve linyenga ngahelipi ketumwalaka lOuhamba mefelemudo lotete, noutumbulilo oonakweenda “nondjila” owa hala okutya shike?
2 Ngeenge ovo “ve na oikala iwa i na sha nomwenyo waalushe” ova ningi ovaitaveli ndele tava ninginifwa, ohatu kala tu na omatomheno mawa oku va lombwela kutya: “Ohatu mu hambelele eshi mwa hovela okweenda mondjila oyo ya yuka!” (Oil. 13:48, NW) Mefelemudo lotete Oshivalo sheedula doPaife, ovanhu omayovi va dja moiwana i lili noku lili ova li va tambula ko oshili nova ulika moipafi kutya ove liyapulila Kalunga okupitila meninginifo. (Oil. 2:41) Ovahongwa ovo vonale ova li oonakweenda “nondjila.” (Oil. 9:2; 19:23) Outumbulilo oo owa li tau wapalele molwaashi ovanhu ovo va li va ninga ovashikuli vaKristus ova li ve na onghedi yokukalamwenyo oyo tai ulike kutya ove na eitavelo muye nova li hava shikula oshihopaenenwa shaye. — 1 Pet. 2:21.
3. Omolwashike ovapiya vaJehova hava ninginifwa, novanhu vangapi va ninginifwa moule womido omulongo da pita?
3 Oilonga yokuninga ovanhu ovahongwa oya tamunuka mo neenghono momafiku aa axuuninwa notai longwa moilongo i dule po 230. Momukokomoko womido omulongo da pita, ovanhu ve dule po 2 700 000 ova tokola okulongela Jehova nova ninginifwa opo va ulike kutya ove mu liyapulila. Osho otashi ulike kutya ohapa ninginifwa oupokati wovanhu ve dule po 5 000 oshivike keshe. Omunhu oha tokola okuninginifwa she likolelela kohole yaye yokuhola Kalunga, keshiivo lOmishangwa nosho yo kokukala e na eitavelo mwaasho tadi hongo. Eninginifo olo onghatu ya fimanenena okukatuka monghalamwenyo yetu, molwaashi ohashi ulike kutya otwa hovela okupanga oukaume wopofingo naJehova. Ohashi ulike yo kutya otwe lineekela kutya Jehova ote ke tu kwafela tu dule oku mu longela noudiinini, ngaashi ashike a li a kwafela ovapiya vaye vonale va dule okweenda mondjila yaye. — Jes. 30:21.
Omolwashike u na okuninginifwa?
4, 5. Tumbula amwe omomanangeko noupuna nosho yo omauwa oo haa etifwa kokuninginifwa.
4 Otashi dulika wa mona eshiivo lokushiiva Kalunga, wa ninga omalunduluko monghalamwenyo yoye nopaife ou li omuudifi ina ninginifwa. Ngeenge osho ngaho, oto pandulwa eshi wa ninga exumokomesho la tya ngaho. Ndele mbela owe liyapulila ngoo Kalunga okupitila meilikano nowa hala okuninginifwa? Eshi wa konakona Ombibeli, otashi dulika wa mona kutya ou na okufimanekifa Jehova monghalamwenyo yoye, ndele hakuwanifa po omahalo oye mwene ile okulikongela oinima yopamaliko. (Lesha Epsalme 148:11-13; Lukas 12:15.) Ndele mbela oto ka mona omanangeko noupuna nomauwa elipi ngeenge owa ninginifwa?
5 U li Omukriste e liyapulila Jehova, onghalamwenyo yoye otai ka kala i na elalakano la denga mbada kuhe na vali. Oto ka kala wa hafa molwaashi oto longo ehalo laKalunga. (Rom. 12:1, 2) Omhepo iyapuki yaJehova otai ka imika mwoove omaukwatya opakalunga, ngaashi ombili neitavelo. (Gal. 5:22) Kalunga ota ka nyamukula omailikano oye note ke ku nangeka noupuna eshi to kendabala okukala metwokumwe nEendjovo daye. Oukalele woye otau ka kala uhafifa, nokukala nonghedi yokukalamwenyo oyo Kalunga a hokwa otaku ke ku kwafela u kale u na eteelelo lomwenyo waalushe la twa. Kakele kaasho, okuliyapulila Kalunga nokuninginifwa otaku ulike kutya owa hala shili okukala umwe womEendombwedi daJehova. — Jes. 43:10-12.
6. Eninginifo letu ohali ulike shike?
6 Ngeenge otwe liyapulile Kalunga nokuninginifwa, ohatu ulike moipafi kutya fye otwaye. Omuyapostoli Paulus okwa ti: “Kape na umwe womufye te likalele ye mwene, nokape na umwe te lifile ye mwene. Osheshi ngenge hatu kala tu nomwenyo, ohatu kalele Omwene, ile ngenge hatu fi, ohatu file Omwene. Osho hano ngenge tu nomwenyo ile hatu fi, ofye ovOmwene.” (Rom. 14:7, 8) Kalunga okwa ulika kutya okwe tu fimaneka eshi e tu pa emanguluko lokuninga omatokolo. Ngeenge otwa kala twa tokola toko okulalakanena onghedi yokukalamwenyo ya tya ngaho omolwohole yetu yokuhola Kalunga, ohatu ka hafifa omutima waye. (Omayel. 27:11) Okuninginifwa ohaku ulike kutya otwe liyapulila Jehova nohatu ulike moipafi kutya Jehova oye Omupangeli wetu. Otaku ulike yo kutya otwa ama kombinga yaye momhata i na sha nounamapangelo weshito alishe. (Oil. 5:29, 32) Kungaho, Jehova ota ka kala pamwe nafye. (Lesha Epsalme 118:6.) Eninginifo ohali tu pe yo omhito yokumona omanangeko noupuna amwe vali opamhepo paife nosho yo monakwiiwa.
Ovo va ninginifwa ova nangekwa noupuna noumwainafana wopahole
7-9. (a) Eshilipaleko lilipi Jesus a pa ovo va fiya po oinima aishe noku mu shikula? (b) Eudaneko laJesus olo li li muMarkus 10:29, 30 otali wanifwa ngahelipi?
7 Omuyapostoli Petrus okwa li a pula Jesus a ti: “Tala, fye otwa fiya ko oinima aishe, notwe ku shikula; ohatu mono shike?” (Mat. 19:27) Petrus okwa li a hala okushiiva kutya ye novahongwa vaJesus vakwao ova tuvikililwa shike monakwiiwa. Ova li va ninga omaliyambo manene opo va kale tava longo oilonga yokuudifa Ouhamba pauyadi. (Mat. 4:18-22) Jesus okwa li e va pa eshilipaleko lilipi?
8 Jesus okwa li a popya kutya ovahongwa vaye otava ka ninga oshitukulwa shoumwainafana wopamhepo, mehokololo la faafana naalo laMateus olo tali hangwa muMarkus. Jesus okwa ti: “Kape na ou a fiya po molwange nomolwevangeli eumbo ile ovamwaxe ile ina ile xe ile ounona ile omapya, ndele ye ita mono ngeno lwefele, paife mounyuni ou mokati komahepeko omaumbo novamwaina ovalumenhu novamwaxe ovakainhu nooina nounona nomapya nomounyuni tau uya omwenyo waalushe.” (Mark. 10:29, 30) Ovakriste vomefelemudo lotete, ngaashi Lidia, Akuila, Priskilla naGaius, ova li vamwe vomwaavo va li va yandja “omaumbo” nova ninga ‘ovamwaina ovalumenhu novamwaxe ovakainhu nooina’ vovaitaveli vakwao, ngaashi Jesus a li a udaneka. — Oil. 16:14, 15; 18:2-4; 3 Joh. 1, 5-8.
9 Eendjovo daJesus odo otadi wanifwa kunena monghedi ya tongomana. “Omapya” oo ovashikuli vaye va fiya po otaa ulike konghalamwenyo oyo ovanhu vahapu va fiya po nehalo liwa, ngaashi ovatumwa, oilyo youkwaneumbo waBetel, ovapiya vopaiwana nosho yo vamwe vali, opo va ka xumife komesho oinima yOuhamba moilongo i lili noku lili. Ovamwatate novamwameme vahapu ova fiya po omaumbo avo opo va kaleke onghalamwenyo yavo paunafangwa, nohashi tu hafifa okuuda oimoniwa yavo oyo tai ulike kutya Jehova ohe va file oshisho nosho yo nghee va hafa omolwoku mu longela. (Oil. 20:35) Ndele ovapiya vaJehova aveshe va ninginifwa otava dulu okumona omanangeko noupuna ‘omolwokukonga tete ouhamba waKalunga nouyuki waye’ ve li oshitukulwa shoumwainafana wopaKriste womounyuni aushe. — Mat. 6:33.
Ovo va ninginifwa ove li “meameno”
10, 11. ‘Eameno laau wOkombadambada’ otali ulike kushike, nongahelipi hatu dulu okukala meameno la tya ngaho?
10 Okuliyapulila Jehova nokuninginifwa ohaku etele omunhu enangeko noupuna limwe vali, oufembanghenda wokukala “meameno laau wOkombadambada.” (Lesha Epsalme 91:1.) Okukala “meameno laau wOkombadambada” otaku ulike konhele yeameno lopamhepo yopafaneko. Onhele ‘yeameno’ ya tya ngaho kai shiivike kovanhu ovo vehe na eudeko loinima yopamhepo noinave lineekela Kalunga. Okukala metwokumwe neliyapulo letu nokukala twe lineekela filufilu Jehova, otwa fa hatu mu lombwele hatu ti: “Eameno lange, nohotengulu yange, Kalunga kange, ou handi mu lineekele.” (Eps. 91:2) Jehova Kalunga oha ningi eameno letu. (Eps. 91:9) Openi vali hatu dulu okuhanga eameno la tya ngaho?
11 Okukala “meameno” laJehova otaku ulike yo kutya otwa nangekwa noupuna noufembanghenda wokukala nekwatafano lopofingo naye. Ohatu dulu okukala nekwatafano la tya ngaho ngeenge otwe liyapulile Jehova nokuninginifwa. Okudja opo, ohatu dulu okukoleka ekwatafano letu naKalunga mokweehena popepi naye okupitila mokukonakona Ombibeli, mokwiilikana tashi di komutima nosho yo mokukala twe mu lineekela filufilu. (Jak. 4:8) Kape na omunhu umwe nande onale a li e na ekwatafano lopofingo elela naJehova e dule Jesus, oo ha kala alushe e lineekela Omushiti waye. (Joh. 8:29) Onghee hano, natu kale twe lineekela kutya Jehova okwa hala nota dulu oku tu kwafela tu kale metwokumwe neano letu eshi twe mu liyapulila. (Omuud. 5:3) Omafiloshisho opamhepo oo Kalunga a pa oshiwana shaye oku li oumbangi uhe fi okupatanekwa oo tau ulike kutya oku tu hole shili nokwa hala tu pondole moku mu longela.
Natu kale twa lenga Oparadisa yetu yopamhepo
12, 13. (a) Oparadisa yopamhepo oshike? (b) Ongahelipi hatu dulu okukwafela ovo vape?
12 Okuliyapulila Jehova nokuninginifwa otaku tu pe yo omhito yokukala moparadisa yopamhepo. Oparadisa yopamhepo onhele ye likalekelwa yovaitaveli aveshe, ovo ve na ombili naJehova Kalunga nosho yo novaitaveli vakwao. (Eps. 29:11; Jes. 54:13) Kape na nande osha mounyuni tashi dulu okuyelekanifwa noparadisa yetu yopamhepo. Osho ohashi limonikila unene tuu poyoongalele yopaiwana, opo hapa kala ovamwatate novamwameme va dja koilongo ihapu, vomalaka e lili noku lili nosho yo vomihoko di lili noku lili, ovo hava ongala pamwe nombili nomoukumwe nove na ohole youmwainafana.
13 Oparadisa yopamhepo oyo hatu hafele oya yooloka ko filufilu keenghalo dii odo di li mounyuni kunena. (Lesha Jesaja 65:13, 14.) Otu na oufembanghenda wokushiva vamwe ve uye moparadisa yopamhepo eshi hatu udifa etumwalaka lOuhamba. Oshi li yo oufembanghenda okukwafela ovo opo va hovele okweendafana neongalo opo va kale va pyokoka moukalele. Ovakulunhuongalo otashi dulika ve tu pe oufembanghenda wokukwafela oohandimwe ovo vape, ngaashi Akuila naPriskilla va li va ‘honga Apollos noku mu shiivifila shili ondjila yaKalunga.’ — Oil. 18:24-26.
Twikila okulihonga kuJesus
14, 15. Otu na omatomheno mawa elipi oo tae tu kwafele tu twikile okulihonga kuJesus?
14 Otu na omatomheno mawa oo tae tu kwafele tu twikile okulihonga kuJesus. Manga Jesus a li ina ninga omunhu kombada yedu, okwa kala ta longo pamwe naXe oule womayovimido. (Omayel. 8:22, 30) Okwa li e shii kutya okulongela Kalunga nokuyandja oundombwedi u na sha noshili oko onghedi yokukalamwenyo ya denga mbada. (Joh. 18:37) Jesus okwa li e shii kutya okukala nonghedi yokukalamwenyo imwe ihe fi oyo otaku ulike okulihola mwene nokashi li pandunge. Okwa li e shii kutya ota ka pita momayeleko manene nokudipawa. (Mat. 20:18, 19; Heb. 4:15) E li Omuhopaenenwa wetu, okwe tu honga nghee hatu dulu okukanyatela oudiinini.
15 Diva konima eshi Jesus a ninginifwa, Satana okwa li te mu yeleke opo ngeno a efe po onghedi yokukalamwenyo ya denga mbada, ashike Satana ka li a pondola. (Mat. 4:1-11) Osho otashi tu hongo kutya ohatu dulu okukanyatela oudiinini wetu, kashi na nee mbudi kutya Satana ota ningi po shike. Oshi na oupu a ninge ovanhu ovo ve li pokuninginifwa oishonekwa yaye nosho yo ovo opo va ninginifwa. (1 Pet. 5:8) Oilyo yomaukwaneumbo etu otashi dulika i tu pataneke molwaashi ya uda ouyelele wa puka u na sha nEendombwedi daJehova, tai diladila kutya kungaho otai tu amene. Ndele nande ongaho, omayeleko a tya ngaho otae tu pe omhito yokuulika omaukwatya mawa opaKriste, ngaashi okukala tu na efimaneko nosho yo elungi ngeenge hatu nyamukula omapulo oo hatu pulwa nokuyandja oundombwedi. (1 Pet. 3:15) Eenghalo da tya ngaho otadi dulu okunwefa mo nawa ovo tave tu pwilikine. — 1 Tim. 4:16.
Twikila okweenda mondjila oyo ya yuka
16, 17. (a) Oiteelelwa itatu i na sha nomwenyo ilipi ya tumbulwa muDeuteronomion 30:19, 20? (b) Jesus, Johannes naPaulus ova yambidida ngahelipi eendjovo daMoses?
16 Omido 1 500 lwaapo fimbo Jesus a li ine uya kombada yedu, Moses okwa li a ladipika Ovaisrael va hoolole onghedi yokukalamwenyo ya denga mbada. Moses okwa ti: “Ame ohandi ifana eulu nedu li ninge nena eli eendombwedi oku mu vela ombedi. Onde mu hololela omwenyo nefyo, enangeko noupuna netulomutima. Hoololeni hano omwenyo, mu shiive okukala nomwenyo, nye noludalo leni, ngenge mu hole Omwene Kalunga keni nokupwilikina ondaka yaye nokukanyatela muye.” (Deut. 30:19, 20) Ovaisrael kava li va kanyatela oudiinini wavo kuKalunga, ndele nande ongaho, oiteelelwa itatu ya fimana i na sha nomwenyo oyo ya popiwa kuMoses inai lunduluka. Jesus novamwe ova li yo va popya kombinga yoiteelelwa oyo.
17 Oshiteelelwa shotete osho kutya, ‘otu na okukala tu hole Omwene Kalunga ketu.’ Ohatu ulike kutya otu hole Kalunga mokukala metwokumwe neendjila daye douyuki. (Mat. 22:37) Oshiteelelwa oshitivali osho kutya, ‘otu na okupwilikina kondaka yaKalunga’ okupitila mokukonakona Eendjovo daye nokudulika koipango yaye. (1 Joh. 5:3) Osho otashi pula tu kale hatu kala pokwoongala kwopaKriste nopehe na okufaula, molwaashi pokwoongala ohapa kundafanwa Ombibeli. (Heb. 10:23-25) Oshiteelelwa oshititatu osho kutya, ‘otu na okukanyatela kuKalunga.’ Natu kale alushe tu na eitavelo tali longo muKalunga nokushikula Omona waye, kashi na nee mbudi kutya ohatu shakeneke shike. — 2 Kor. 4:16-18.
18. (a) Oshungonangelo oya ti ngahelipi kombinga yoshili mo 1914? (b) Otu na okukala tu udite ngahelipi kombinga youyelele woshili kunena?
18 Kashi fi tuu enangeko noupuna okukala metwokumwe noshili yOmbibeli! Mo 1914, Oshungonangelo yOshiingilisha oya li ya popya eendjovo didilikwedi ya ti: “Mbela katu fi oshiwana sha nangekwa noupuna nosha hafa? Mbela Kalunga ketu ke fi omudiinini? Ngeenge ope na ou e shii oshinima shimwe shiwa, neshi diinine. Ngeenge ope na umwe womunye a mona po oshinima shimwe vali sha denga mbada, otwe lineekela kutya ote ke tu lombwela. Ndele fye katu shii vali oshinima shimwe shiwa ile tashi xumbile mwaasho twa mona mEendjovo daKalunga. . . . Itatu dulu okuhokolola ombili nehafo olo tu na nosho yo omanangeko noupuna oo twa mona mokukalamwenyo kwetu omolweshiivo la yela olo twa mona li na sha naKalunga kashili. Ounongo, ouyuki, eenghono nosho yo ohole yaKalunga oya wanifa po filufilu omhumbwe yetu yopamadiladilo nosho yo yopamaliudo. Katu na vali osho twa pumbwa. Otwa tomwa filufilu kutya kape na vali sha shimwe tashi dulu okuwanifa po omhumbwe yetu yopamhepo shi dule eshiivo olo twa mona mEendjovo daKalunga.” (Oshungonangelo yo 15 Desemba 1914, epandja 377-378) Olupandu letu li na sha nouyelele wopamhepo nosho yo oshili inali lunduluka. Otu na shili omatomheno mawa okukala twa hafa eshi hatu ‘ende mouyelele wOmwene.’ — Jes. 2:5; Eps. 43:3; Omayel. 4:18.
19. Omolwashike ovo va wana okuninginifwa ve na okutokola oku shi ninga nopehe na okwoongaonga?
19 Ngeenge owa hala ‘okweenda mouyelele wOmwene’ ndele ku fi natango Omukriste e liyapulila Jehova nokwa ninginifwa, ino ongaonga okuninga ngaho. Ninga eenghendabala u wanife po oiteelelwa yOmbibeli i na sha neninginifo olo li li onghatu ye likalekelwa yokuulika olupandu loye li na sha naasho Kalunga naKristus ve tu ningila. Pa Jehova oshiniwe shoye shi na ondilo inene, sha hala okutya, omwenyo woye. Ulika kutya owa tokola okulonga ehalo laKalunga mokulandula Omona waye. (2 Kor. 5:14, 15) Nopehe na omalimbililo, oyo oyo onghedi ya denga mbada yokukalamwenyo!
Oto nyamukula ngahelipi?
• Okuninginifwa kwetu ohaku ulike shike?
• Okuliyapulila Kalunga nokuninginifwa ohaku eta omanangeko noupuna elipi?
• Omolwashike sha fimanenena okulihonga kuJesus?
• Oshike tashi ke tu kwafela tu twikile okweenda mondjila ya yuka?
[Efano pepandja 29]
Eninginifo loye otali ulike kutya owa hoolola okweenda mondjila ya yuka
[Omafano pepandja 31]
Mbela ou li ngoo “meameno laau wOkombadambada”?