Osho Jesus a honga ovanhu kombinga yaye mwene

OMUSHANGI UMWE WOISHANGOMWA HERBERT LOCKYER okwa ti: “Jesus ka li e na omalimbililo kutya oye lyelye, kutya okwa dile peni, kutya omolwashike e u yile kombada yedu nosho yo kutya okwa li e na etimaumbwile lilipi.”

OMANGA inatu itavela osho Jesus a honga noku shi tambula ko, otwa pumbwa tete okushiiva oinima yonhumba i na sha naye. Jesus okwa li naanaa lyelye? Okwa dile peni? Elalakano laye ola li shike monghalamwenyo? Ohatu ka mona omanyamukulo omapulo oo meendjovo daJesus mwene odo di li mEvangeli laMateus, laMarkus, laLukas nolaJohannes.

Jesus okwa kala ko nale fimbo a li ina dalwa e li omunhu kombada yedu Jesus okwa ti: “Abraham fimbo ina dalwa, Ame opo ndi li.” (Johannes 8:58) Abraham okwa li ko omido 2000 lwaapo fimbo Jesus ina dalwa e li omunhu kombada yedu. Ndele nande ongaho, Jesus okwa kala ko nale nokuli fimbo tatekulululwa omudiinini Abraham ina dalwa. Mbela Jesus okwa li peni fimbo a li ine uya kombada yedu? Jesus okwa ti: “Ame nda dja keulu.” — Johannes 6:38.

Omona waKalunga Jehova oku na ovanamati vahapu vopamhepo, ndele Jesus okwe likalekelwa. Jesus okwa ti kutya oye ‘Omona Ewifa laKalunga.’ (Johannes 3:18) Outumbulilo oo otau ti kutya Jesus oye aeke a shitwa odikilila kuKalunga. Kalunga okwa shita oinima ikwao aishe okupitila mOmona waye oo Ewifa. — Ovakolossi 1:16.

“Omona wOmunhu” Jesus okwa longifa outumbulilo oo shi dulife omautumbulilo amwe te lipopi ye mwene. (Mateus 8:20) Kungaho, okwa li a ulika kutya ka li omweengeli a djala olutu lopanhu noka li omunhu wonhumba wopamhepo. Ndele ponhele yaasho, Jesus okwa li omunhu wolela. Kalunga okwa li a longifa omhepo yaye iyapuki okulundululila omwenyo wOmona waye moshidalelo shokakadona Maria okudja meulu. Oshidjemo, Jesus okwa li a dalwa e li omunhu a wanenena, ina fyuulula nande oulunde. — Mateus 1:18; Lukas 1:35; Johannes 8:46.

Messias omuudanekwa Omukainhu umwe Omusamaria okwa li a lombwela Jesus a ti: ‘Ondi shi shii, Messias, ote ke uya.’ Jesus okwa li e mu nyamukula a ti: “Aame tuu ou, ou ta tongo naave.” (Johannes 4:25, 26) Oshitya “Messias” nosho yo “Kristus” otai ti “Omuvaekwa.” Jesus okwa li a vaekwa ile a nangekwa po kuKalunga opo a dane onghandangala ye likalekelwa mokuwanifwa kwomaudaneko aKalunga.

Etomheno la fimanenena molwaashi Jesus e uyile kombada yedu Jesus okwa li a popya pomhito imwe a ti: “Ondi na okuudifila oilando imwe yo evangeli louhamba waKalunga, osheshi olo tuu eli [nde] li tuminwa.” (Lukas 4:43) Nonande Jesus okwa li a ningila ovanhu ovo ve na omhumbwe omauwa mahapu, okuudifa kombinga yOuhamba waKalunga oko kwa li oshinima sha fimanenena monghalamwenyo yaye. Osho a honga kombinga yOuhamba waKalunga otashi ka kundafanwa moitukulwa tai landula ko.

Osha yela kutya Jesus ka li omunhu wongaho.a Ngaashi hatu ke shi mona, onghalamwenyo yaJesus yomeulu oya ningifa yo eendjovo odo a popya eshi a li kombada yedu di kale di na eityo. Mbela otu na okukala twa kumwa eshi etumwalaka olo a li a udifa la kuma ovanhu omamiliyona mounyuni aushe?

[Eshangelo lopedu]