Ehena popepi naKalunga
Kalunga okwe tu pa emanguluko lokuninga omatokolo
OVADALI ove na okutulila po ovana vavo oshihopaenenwa shiwa. Enwefemo liwa lovadali otali dulu okukwafela ovana vavo va kulike omaukwatya mawa nova ninge omatokolo e li pandunge monghalamwenyo. Ndele shinyikifa oluhodi, ovadali vahapu ihava tulile po ovana vavo oshihopaenenwa shiwa. Mbela osho osha hala kutya ounona va tya ngaho kave na fiku va ka pondole? Enyamukulo kepulo olo ohatu li hange mEendjovo daJehova Kalunga odo tadi tu shilipaleke kutya Jehova okwa pa keshe umwe womufye emanguluko lokuninga omatokolo. Natu ka taleni koshihopaenenwa shaHiskia osho tashi hangwa 2 Eehamba 18:1-7.
Hiskia okwa li omonamati ‘waAhas, ohamba yaJuda.’ (Ovelishe 1) Ahas okwa li a amuna ko ovapangelwa vaye kelongelokalunga la koshoka. Ohamba oyo ikolokoshi oya li hai longele Baal noya li ya landula onghedi yokuyambela ovanhu Baal. Ahas otashi dulika a li a dipaifa omumwainamati waHiskia umwe ile vahapu. Ahas okwa li a idilifa oivelo yotembeli “nokwe litungila oiyambelo monhele keshe yomuJerusalem.” Okwa li yo a “handukifa Omwene.” (2 Omafimbo 28:3, 24, 25) Osha yela kutya xe yaHiskia okwa li omukolokoshi neenghono. Ndele mbela Hiskia naye okwa li a endulula epuko olo la ningwa kuxe?
Eshi Hiskia a nangekwa po e li ohamba, okwa li a ulika diva kutya ka li ta ka hopaenena oshihopaenenwa shii shaxe. Hiskia okwa li a “ninga osho sha yuka momesho Omwene.” (Ovelishe 3) Ohamba Hiskia oya li ye lineekela muJehova, ‘nomokati keehamba daJuda inamu monika nande imwe ngaashi yo.’ (Ovelishe 5) Momudo wotete wepangelo lohamba oyo inyasha, ohamba oyo oya li ya ninga oshikonga shokutungulula elongelokalunga lashili, naasho osha li she i ningifa i hanaune po oikulundu oko kwa li haku longelwa oikalunga yovapaani. Otembeli oya li ya yeululwa, nelongelokalunga la koshoka ola li la tungululwa. (Ovelishe 4; 2 Omafimbo 29:1-3, 27-31) Hiskia okwa li a ‘kanyatela kOmwene, nOmwene okwa kala pamwe naye.’ — Ovelishe 6, 7.
Oshike sha li sha kwafela Hiskia aha landule oshihopaenenwa shii shaxe? Mbela Hiskia okwa li a tulilwa po oshihopaenenwa shiwa kuina, Abia, oo tuhe na ouyelele muhapu u na sha naye? Mbela oshihopaenenwa shiwa shaJesaja oo a kala omuprofeti fimbo Hiskia ina dalwa, osho sha li sha nwefa mo ohamba oyo inyasha?a Ombibeli inai tya sha shi na sha naasho. Ndele kashi na nee mbudi kutya oshike sha li she mu kwafela, osha yela kutya Hiskia okwa li a hoolola onghedi yokukalamwenyo ya yooloka ko filufilu kwaayo yaxe.
Oshihopaenenwa shaHiskia otashi tu omukumo keshe oo tashi dulika a li monghalo idjuu molwaashi ovadali vaye inave mu tulila po oshihopaenenwa shiwa fimbo a li okaana. Itatu dulu okulundulula onakudiwa yetu, noitatu dulu okudimbwa ouyehame oo twa pita muo. Ndele nande otwa li meenghalo da tya ngaho, osho inashi hala kutya itatu ka pondola. Omatokolo oo hatu ningi paife otae ke tu etela ehafo monakwiiwa. Ngaashi Hiskia, nafye ohatu dulu okuhoolola okukala tu hole Kalunga kashili Jehova noku mu longela. Ngeenge otwa ningi ngaho, ohatu ka kala tu na onghalamwenyo ihafifa paife nohatu dulu okukala netimaumbwile loku ka mona omwenyo waalushe mounyuni mupe waKalunga. (2 Petrus 3:13; Ehololo 21:3, 4) Katu na tuu olupandu eshi Kalunga omunahole a pa keshe umwe womufye oshali i na ondilo inene, sha hala okutya, emanguluko lokuninga omatokolo!
[Eshangelo lopedu]
a Jesaja okwa li a hovela okuxunganeka okudja mo 778 K.O.P. fiyo omo 732 K.O.P. lwaapo. Hiskia okwa li a hovela okupangela momudo 745 K.O.P., eshi a li e na omido 25.