Fye ohatu ende moudiinini wetu!
“Ame ohandi ende mouyuki [“moudiinini,” NW] wange.” — EPS. 26:11.
1, 2. Job okwa ti shike shi na sha noudiinini waye, netukulwa 31 lembo laJob otali holola shike kombinga yaye?
MEFIMBO lonale, ovanhu luhapu okwa li hava vixi oinima tava longifa oshivixa sha longwa moshiti. Luhapu oshivixa osho ohashi kala shi na oshiti sha kambakana, pondingandinga yasho ohapa kala ombululu omo mu na ombosha. Keexulo doshiti osho sha kambakana ohaku kala kwa endjelelekwa oikwatelwa ivali. Ngeenge oshinima shonhumba tashi vixwa, okwa li hashi tulwa moshikwatelwa shimwe ofimbo oshinima shondjudo i shiivike hashi tulwa moshikwatelwa shikwao. Oshiwana shaKalunga okwa li shi na okulongifa oivixa nosho yo ondjudo i li pauyuki. — Omayel. 11:1.
2 Eshi omulumenhu omutilikalunga Job a li ta hepekwa kuSatana, okwa ti: “[Jehova] na yeleke nge noshiyelekifo sha yuka, Kalunga opo a shiive ouyuki wange.” (Job 31:6) Metwokumwe naasho, Job okwa li a tumbula eenghalo di lili noku lili omo oudiinini wetu tau dulu okuyelekwa. Ndele Job okwa li a pita mo momayeleko oo nomupondo, ngaashi eendjovo daye odo tadi hangwa metukulwa 31 laJob tadi shi ulike. Oshihopaenenwa shiwa shaJob otashi dulu oku tu linyengifa tu katuke eenghatu da faafana nohatu ka dula okupopya noushili ngaashi omupsalme David, hatu ti: “Ame ohandi ende mouyuki [“moudiinini,” NW] wange.” — Eps. 26:11.
3. Omolwashike sha fimana okukala ovadiinini kuKalunga moinima aishe kutya nee oya kula ile oinini?
3 Nonande Job okwa li a yelekwa neenghono, okwa kala omudiinini kuKalunga. Vamwe otashi dulika nokuli va tye kutya Job okwe tu tulila po oshihopaenenwa sha tongomana, molwaashi okwa li a kanyatela filufilu oudiinini waye nonande okwa li momayeleko manene. Itatu mono oixuna monghedi ya faafana filufilu naayo yaJob. Ndele opo tu ulike kutya otwa kanyatela shili oudiinini wetu nohatu yambidida ounamapangelo waJehova, otu na okukala ovadiinini kuye moinima aishe kutya nee oya kula ile oinini. — Lesha Lukas 16:10.
Osha fimana okukanyatela oukoshoki wopaenghedi
4, 5. E li omukanyateli woudiinini, Job okwa li a henuka elihumbato lilipi?
4 Opo tu kanyatele oudiinini wetu kuJehova, otu na okudiinina omifikamhango daye dopaenghedi, ngaashi ashike Job a li a ninga. Job okwa ti: “Ame nda udafana nomesho ange: ndi tale ngahelipi kokakadona? . . . Omutima wange ngenge wa hokwa omukainhu womukwetu ndele nda nangela poshivelo shomukwetu, [omwalikadi] wange na twile omunhu umwe navakwao nave mu papatele.” — Job 31:1, 9, 10.
5 Job okwa li a henuka okutala omukainhu nokahalu, molwaashi okwa li a tokola toko okukanyatela oudiinini waye kuKalunga. E li omushamane a hombola, Job ka li he lihumbatele oukadona monghedi tai kokele momilele, noka li ha lalakanene okukala noihole nomwalikadi wamukwao. MEudifo laye lokOmhunda, Jesus okwa li a popya eendjovo da kwata moiti di na sha noluhaelo, oshinima osho shihe na okudimbuwa kwaavo hava kanyatele oudiinini. — Lesha Mateus 5:27, 28.
Ino kala omukengeleledi
6, 7. (a) Ngeenge hatu tale koshihopaenenwa shaJob, Kalunga oha longifa shike opo a yeleke oudiinini wetu? (b) Omolwashike tu na okuhenuka oukengeleledi ile ekonda?
6 Katu na nande okukala ovakengeleledi ngeenge otwa hala okuvalulilwa mokati kaavo ve li ovadiinini. (Lesha Omayeletumbulo 3:31-33.) Job okwa ti: “Ngenge nda enda noipupulu neemhadi ngenge da endelela okukengelela: Ye [Jehova] na yeleke nge noshiyelekifo sha yuka, Kalunga opo a shiive ouyuki wange.” (Job 31:5, 6) Jehova oha yeleke ovanhu aveshe “noshiyelekifo sha yuka.” Ngaashi moshihopaenenwa shaJob, Kalunga oha longifa omifikamhango daye douyuki da wanenena opo a yeleke oudiinini wetu, tu li ovapiya vaye twe mu liyapulila.
7 Ngeenge otwa kala ovakengeleledi ile tu na ekonda, itatu ka dula okukanyatela oudiinini wetu kuKalunga. Tu li ovadiinini, “otwa efa oinima aishe yohoni yomeholeko, . . . ndele fye ihatu ende nekoto.” (2 Kor. 4:1, 2) Ndele mbela ongahelipi ngeenge otwa kengelele omwiitaveli mukwetu okupitila meendjovo ile meenghatu detu, ndele ta ka konga ekwafo kuKalunga? Ngeenge otwa ningi ngaho, ohatu ka ya moupyakadi. Omupsalme umwe okwa imba a ti: “Moudjuu wange onda kuwa onghuwo kOmwene, opo Ye a tondokela nge. Omwene, xupife nge komilungu domunaipupulu nokelaka lekonda!” (Eps. 120:1, 2) Oshiwa okudimbuluka kutya Kalunga ota dulu okukonakona ounhu wetu womeni, ta ‘konakona omitima neefiyo’ a tale ngeenge ohatu kanyatele ngoo oudiinini shili. — Eps. 7:9, 10.
Kala oshihopaenenwa shiwa ngeenge to ungaunga navamwe
8. Job okwa li ha ungaunga ngahelipi navamwe?
8 Ngeenge otwa hala okukanyatela oudiinini wetu, otwa pumbwa okuhopaenena Job oo a li omuyuki, omulininipiki noha yavelele vamwe. Job okwa ti: “Ngeenge nda dina ngeno ouyuki womupika wange omulumenhu ile omukainhu, eshi va hokololifa nge, ame ndi ninge shike Kalunga ngenge ta fikama? Ame ndi mu nyamukule ngahelipi ngenge a hovela okukonakona? Haye tuu ou ngeno a shita nge medimo lameme, e mu shita yo, haye tuu aeke e tu shita”? — Job 31:13-15.
9. Job okwa li a ulika omaukwatya elipi eshi a li ta ungaunga novapiya vaye, notu na okuninga po shike metwokumwe naasho?
9 Pefimbo laJob, osha yela kutya kapa li pe na omilandu da kitakana di na sha nokuungaunga noikoya paveta. Oihokolola okwa li hai ningwa monghedi iwa, novapiya okwa li nokuli ve na eemhangu davo. Job okwa li ha ungaunga novapiya vaye pauyuki nononghenda. Ngeenge otwa hala okweenda moudiinini wetu, otu na okuulika omaukwatya a tya ngaho, unene tuu ngeenge otu li ovakulunhuongalo meongalo lopaKriste.
Kala ho yandje, ndele hamunalwisho
10, 11. (a) Otu shi shii ngahelipi kutya Job okwa li ha yandje noha kwafele vamwe? (b) Job 31:16-25 ota dulu oku tu dimbulukifa omayele opamishangwa elipi oo a ka shangwa lwanima?
10 Job okwa li ha yandje noha kwafele vamwe. Ka li e lihole mwene noka li omunalwisho. Okwa ti: “[Omesho] ovafiyekadi onde a lolokifa tuu? Okapambu komungome ame andike mbela nde ka lile po, ofiye inandi mu tukulila yo? . . . Ngeenge nda mona omukwanaluhepo e he noshikutu, . . . ofiye ngeenge nde i takela ongonyo yange, eshi nda mona ko okupopilwa kwange moshivelo, opo nee ombeyo yange nai we mo mofingo yayo, nokwooko kwange naku liteeke po ponhele yako.” Natango, Job ngeno ina dula okukanyatela oudiinini waye kuJehova ngeno okwa li a lombwela oshingoldo, a ti: “Oshilineekelwa shange”! — Job 31:16-25.
11 Eendjovo odo da popiwa monghedi yoshitevo otadi dulu oku tu dimbulukifa eendjovo domuhongwa Jakob, odo tadi ti: “Elongelokalunga la yela noli he nedilo lasha koshipala shaKalunga naTate oleli: okutalela po eefiye novafiyekadi momaudjuu avo, nokuliamena [tuha] nyatekwe kounyuni.” (Jak. 1:27) Otashi dulika yo di tu dimbulukife elondwelo laJesus, olo tali ti: “Pashukeni onye mu lungame keshe tuu olwisho, osheshi omwenyo womunhu ihau xupifwa kouhapu weliko laye.” Opo nee, Jesus okwa li a hokolola efaneko li na sha nomulumenhu oshipuna nomunalwisho, oo a fya ndele “ke na oupuna puKalunga.” (Luk. 12:15-21) Opo tu kale ovadiinini, katu na okuliefela moulunde omolwokahalu ile olwisho. Olwisho olo elongelo loikalunga, molwaashi elalakano lomunalwisho olo okukala a hala okupewa elitulemo olo li na okupewa Jehova, nokungaho, ola ninga oshikalunga shaye. (Kol. 3:5) Onghee hano, oudiinini ihau longele kumwe nolwisho.
Dama kelongelokalunga lashili
12, 13. Oshihopaenenwa shilipi Job a tula po shi na sha nokuhenuka elongelo loikalunga?
12 Ovapiya vaKalunga ovadiinini ihava efa po elongelokalunga la koshoka. Job naye osho a li ngaho, nomolwaasho a ti: “Ngenge mokukala kwange ouyelele wetango, nhumbi tali yela, nohani, oyo tai ende nokuvadima, omutima wange ngeno wa hongaulwa meholeko neke lange le i fipifa omilungu ngeno oshilonga osho shii osha li shi nokuhandukilwa shili, osheshi nde liteeka ngeno Kalunga kokombada.” — Job 31:26-28.
13 Job ka li ha ilikana oinima ihe na omwenyo. Ngeno omutima waye owa li wa hokwa meholeko omaminikilo okeulu, ngaashi omwedi, ndele ‘eke laye te li fipifa omilungu,’ tashi dulika ngeno a xupita eke laye ndele ta molola omaminikilo okeulu monghedi yefimaneko, ngeno ngaho okwa longela oikalunga nokwe lidimbika Kalunga. (Deut. 4:15, 19) Onghee hano, opo tu kanyatele oudiinini wetu kuKalunga, otu na okuhenuka onghedi keshe yelongelo loikalunga. — Lesha 1 Johannes 5:21.
Ino kala u na onghone ile omunaihelele
14. Omolwashike hatu dulu okutya Job ka li e na onghone?
14 Job ka li e na onghone noka li omukwanyanya. Okwa li e shii kutya ngeenge okwa kala e na omaukwatya oo, otashi ka ulika kutya ke fi omudiinini, nomolwaasho okwa ti: “Ame nda hafela tuu omupya womutondadi wange ile nda shambukwa komwenyo oshiponga eshi she mu hanga? Inandi itavelela elaka lange li nyone, ndi mu tule omutima noku mu halela efyo.” — Job 31:29, 30.
15. Omolwashike sha puka okukala twa hafa ngeenge ovatondi vetu va hangwa koshiponga?
15 Omulumenhu omuyuki Job ka li ha kala a hafa ngeenge omutondi waye umwe a hangwa koshiponga. Eyeletumbulo limwe la ka shangwa lwanima ola londwela la ti: “Ino hafa, omutondadi woye ngenge ta wile po. Ndele ino kuwilila komwenyo, ye ngenge ta punduka, opo Omwene e he shi dimbulukwe, ndele sho itashi yuka momesho aye, ndee ta kandula po puye ehandu laye.” (Omayel. 24:17, 18) Molwaashi Jehova oha dulu okukonakona omitima, oku shii kutya ohatu kala twa hafa meholeko ngeenge vamwe va hangwa koshiponga ile hasho, noita hokwa nande oikala ya tya ngaho. (Omayel. 17:5) Ngeenge otwa ningi ngaho, Kalunga otashi dulika e tu katukile onghatu, molwaashi okwa ti: “Ehandu olange Ame handi futu.” — Deut. 32:35.
16. Nokuli nonande katu fi oipuna, ongahelipi hatu dulu okuyakula ovaenda?
16 Job okwa li ha yakula ovaenda. (Job 31:31, 32) Nonande fye katu fi oipuna, ohatu dulu ‘okukala hatu yakula ovaenda.’ (Rom. 12:13, NW) Ohatu dulu okulya pamwe navamwe eendja di li paunafangwa, hatu dimbuluka kutya “evelelo lombidi pe nohole li dule etomeno lohove ya ondoka ndele po pe netondafano.” (Omayel. 15:17) Ngeenge otwa kala hatu li pamwe novalongelikalunga vakwetu ovadiinini, hatu shi ningi pahole, ohatu ka tyapula eendja nonande odi li paunafangwa nosha yela kutya ohatu ka tungwa pamhepo.
17. Omolwashike tuhe na okukendabala okuholeka omanyono oo a kwata moiti?
17 Okuyakula ovaenda kwaJob oku na okukala kwa li haku tungu vamwe pamhepo, molwaashi Job ka li omunaihelele. Job ka li ngaashi ovalumenhu ovadinikalunga ovo va li ve livakela meongalo lomefelemudo lotete, nova li hava ‘tumbaleke ovanhu omolwouwa wavo vene.’ (Jud. 3, 4, 16, NW) Job ka li a holeka omanyono aye ile a ‘tuvika omatauluko aye monhulo yaye,’ molwaashi ngeno a tila vamwe ve mu tonde ngeenge ove shi mono mo. Okwa li a hala okukonakonwa kuKalunga, oo ta ka hokololela enyono keshe ngeenge sha pumbiwa. (Job 31:33-37) Ngeenge otwa nyono sha kwata moiti, inatu kendabala okuholeka enyono la tya ngaho nelalakano lokwaamena edina letu liwa. Mbela ongahelipi hatu dulu okuulika kutya ohatu kendabala okukanyatela oudiinini wetu moshinima osho? Omokudimina omapuko etu, hatu livele ombedi, hatu ka konga ekwafo lopamhepo nokuninga keshe osho hatu dulu opo tu yukife oinima. — Omayel. 28:13; Jak. 5:13-15.
Job okwa li e lilongekida okuyelekwa opo a ulike oudiinini waye
18, 19. (a) Omolwashike taku dulu okutiwa kutya Job ke na efiku a nyokoma omunhu? (b) Job okwa li a hala okuninga po shike ngeenge okwa monika etimba?
18 Job okwa li omunashili nomuyuki. Onghee hano, okwa li a dula okutya: “Epya lange ngenge la hokololifa nge neefola dalo adishe kumwe ngenge da lila, ngenge nda lya oimeno yalo, inandi i futa, nomwene walo ngeno nde mu kemifa, eeshosholo nadi mene ponhele yoilya, neengwena ponhele yomahangu.” (Job 31:38-40) Job ke na efiku a nyekele vamwe edu lavo, noka li ha hepeke ovanailonga vaye. Ngaashi Job, nafye otwa pumbwa okukanyatela oudiinini wetu kuJehova moinima aishe, kutya nee oya kula ile oinini.
19 Job okwa li a hokolola onghedi yaye yokukalamwenyo moipafi yookaume kaye vatatu nosho yo yomulumenhu omunyasha Elihu. Okwa li ta shivi keshe oo ta dulu oku mu pa oushima shi na sha nonghedi yaye yokukalamwenyo e mu tokole, e na elineekelo kutya ke na ondjo. Okwa li e lilongekida okukatukilwa onghatu ngeenge okwa monika etimba. Onghee hano, okwa li a tulifa mo oihokolola nokwa li a teelela Kalunga e mu tokole. Nomolwaasho, “eendjovo daJob oda xulila apa.” — Job 31:35, 40.
Oto dulu okukanyatela oudiinini woye
20, 21. (a) Omolwashike Job a li a dula okukanyatela oudiinini waye? (b) Ongahelipi hatu dulu okukulika ohole yokuhola Kalunga?
20 Job okwa li a dula okukanyatela oudiinini waye molwaashi okwa li e hole Jehova, na Jehova okwa li e mu hole nokwe mu kwafa. Job okwa ti: “Ove [Jehova] wa pa nge okukalamwenyo nonghenda [“ohole youdiinini”], noshisho shoye sha amena omhepo yange.” (Job 10:12, yelekanifa neshangelo lopedu mo-NW.) Kakele kaasho, Job okwa li e hole ovanhu vakwao, molwaashi okwa li e shii kutya keshe oo ehe na ohole youdiinini yokuhola ovanhu vakwao, ota ulike kutya iha tila Omunamapangelo aeshe. (Job 6:14) Ovo hava kanyatele oudiinini wavo ove hole Kalunga nosho yo ovanhu vakwao. — Mat. 22:37-40.
21 Ohatu dulu okukulika ohole yokuhola Kalunga mokukala hatu lesha Eendjovo daye efiku keshe nokudilonga kwaasho tadi tu lombwele kombinga yaye. Ohatu dulu okutanga nokupandula Jehova okupitila meilikano tali di komutima, omolwouwa oo he tu ningile. (Fil. 4:6, 7) Ohatu dulu yo okwiimbila Jehova nohatu ka mona ouwa mokukala hatu endafana noshiwana shaye. (Heb. 10:23-25) Opo nee, ohole yetu yokuhola Kalunga otai ka hapupala eshi hatu kufa ombinga moukalele naashi hatu “udifeni exupifo laye.” (Eps. 96:1-3) Kungaho, ohatu ka dula okukanyatela oudiinini wetu ngaashi omupsalme oo a imba ta ti: “Okukala popepi naKalunga, osho elao lange; elineekelo lange onde li tula mOmwene Kalunga.” — Eps. 73:28.
22, 23. Tu li ovayambididi vounamapangelo waJehova, omalipyakidilo etu okwa faafana ngahelipi naao ovadiinini vopefimbo lonale?
22 Momukokomoko womafelemido, Jehova okwa kala ta pe ovo va kanyatela oudiinini wavo oinakuwanifwa ihapu i lili noku lili. Pashihopaenenwa, Noa okwa li a tunga ongulu yomomeva nokwa li “omuudifi wouyuki.” (2 Pet. 2:5) Josua okwa li a kwatela komesho oshiwana shaIsrael eshi sha li tashi i mEdu lEudaneko, nokwa li a pondola molwaashi okwa li ha lesha “embo lomhango . . . omutenya noufiku” nokwa li a katuka metwokumwe naasho a lesha. (Jos. 1:7, 8) Ovakriste vomefelemudo lotete ova li hava ningi ovanhu ovahongwa nova li hava ongala pandjikilile opo va konakone Omishangwa. — Mat. 28:19, 20.
23 Ohatu ka ulika kutya ohatu yambidida ounamapangelo waJehova nonokutya otwa kanyatela oudiinini wetu, ngeenge otwa kala hatu udifa ouyuki, hatu ningi ovanhu ovahongwa, hatu tula moilonga omayele opamishangwa nokukala hatu ongala pamwe novaitaveli vakwetu pokwoongala nosho yo poyoongalele ya kula naai inini. Omalipyakidilo oo ohae tu kwafele tu kale ovaladi, twa pama pamhepo notu longe ehalo laKalunga nomupondo. Itashi ka kala shidjuu neenghono kufye okuninga ngaho molwaashi Tate yetu womeulu nosho yo Omona waye ohave tu yambidida. (Deut. 30:11-14; 1 Eeh. 8:57) Kakele kaasho, otwa nangekwa noupuna eshi tu na “oukumwe aushe wovamwatate,” ovo navo hava ende moudiinini nohava fimaneke Jehova e li Omwene wavo Omunamapangelo aeshe. — 1 Pet. 2:17, NW.
Oto nyamukula ngahelipi?
• Otu na okutala ko ngahelipi omifikamhango daJehova dopaenghedi?
• Omaukwatya aJob elipi mahokwifa unene kwoove?
• Ngaashi sha ulikwa muJob 31:29-37, Job okwa li he lihumbata ngahelipi?
• Oshike tashi dulu oku tu kwafela tu kanyatele oudiinini wetu kuKalunga?