Natu kaleni tu tonde owii!

‘[Jesus] oku tonde oumbudi [ile owii].’ — HEB. 1:9.

1. Jesus okwa li a honga ovahongwa vaye shike kombinga yohole?

JESUS KRISTUS okwa li a twa omufindo efimano lohole eshi a li a lombwela ovahongwa vaye a ti: “Oshipango shipe handi shi mu pe: mu holafane ngaashi Ame nda kala ndi mu hole, osho nanye yo mu holafane. Opo tuu opo aveshe tave mu koneke kutya, nye ovalongwa vange, ngenge mu holafane.” (Joh. 13:34, 35) Jesus okwa li a lombwela ovahongwa vaye kutya ove na okukala hava ulikilafana ohole yokuheliholamwene. Ohole ya tya ngaho oyo ya li tai ke va didilikifa mo kutya vo ovahongwa vaye. Ndele Jesus okwa li yo e va kumaida a ti: “Holeni ovatondi veni, ilikaneneni ovahepeki veni.” — Mat. 5:44.

2. Ovashikuli vaKristus ove na okukala ve tonde shike?

² Jesus ka li ashike a honga ovahongwa vaye kombinga yohole, ndele okwa li yo e va honga kutya oshike ve na okukala ve tonde. Omishangwa oda popya shi na sha naJesus, da ti: “Ove u hole ouyuki ndele to tondo oumbudi [ile owii].” (Heb. 1:9; Eps. 45:8) Osho otashi ulike kutya katu na ashike okukala tu ohole ouyuki, ndele otu na yo okukala tu tonde oulunde ile owii. Shididilikwedi, omuyapostoli Johannes okwa popya kondadalunde a ti: “Keshe tuu ou ta longo oulunde, oye ta nyono yo omhango, osheshi oulunde oo okunyona omhango.” — 1 Joh. 3:4.

3. Oinima ilipi hatu ka kundafana moshitukulwa eshi oyo tai ke tu kwafela tu mone ngeenge otu tonde owii?

³ Tu li Ovakriste, otwa pumbwa okulipula epulo eli kutya: ‘Ondi tonde ngoo shili owii?’ Natu ka taleni kutya ongahelipi hatu dulu okuulika kutya otu tonde owii meembinga nhee dokukalamwenyo: (1) Etaleko letu li na sha nokulongifa nai oikolwifa, (2) etaleko letu li na sha noumhulile, (3) etaleko letu li na sha noluhaelo nosho yo (4) li na sha novanhu ovo ve hole owii.

Ino ninga omupika woikolwifa

4. Omolwashike Jesus a li ha popi a manguluka ngeenge ta londwele vamwe shi na sha nokunwa sha pitilila?

⁴ Peemhito dimwe, Jesus okwa li ha nu omaviinyu molwaashi okwe a tala ko kutya oku li oshali ya dja kuKalunga. (Eps. 104:14, 15) Ndele nande ongaho, Jesus ke na efiku a longifile nai oshali oyo mokunwa sha pitilila. (Omayel. 23:29-33) Nomolwaasho, okwa li ha popi a manguluka ngeenge ta pe vamwe omayele e na sha nokunwa sha pitilila. (Lesha Lukas 21:34.) Okulongifa nai oikolwifa otaku dulu oku tu ningifa tu ye momanyono amwe vali a kwata moiti. Onghee hano, omuyapostoli Paulus okwa ti: “Inamu kolwa komaviinyu omo hamu di eliefo, ndelenee yadifweni kOmhepo.” (Ef. 5:18) Okwa li yo a kumaida ovakainhu ovanamido meongalo lopaKriste vaha ninge ‘ovapika voikunwa ihapu.’ — Tit. 2:3.

5. Omapulo elipi taa dulu okulipulwa kwaavo va hoolola okulongifa oikolwifa?

⁵ Ngeenge owa hoolola okulongifa oikolwifa, oshiwa okulipula kutya: ‘Mbela ondi na ngoo etaleko la fa laJesus ngeenge tashi uya pokunwa sha pitilila? Mbela ohandi ka kala ngoo nda manguluka okupa vamwe omayele e na sha nokunwa sha pitilila? Mbela ohandi nu nelalakano lokudimbwa oisho yange? Ohandi nu oikunwa yoalkoholi i fike peni oshivike keshe? Ohandi linyenge ngahelipi ngeenge nda lombwelwa kutya ohandi nu sha pitilila? Mbela ohandi kongo omalipopilo ile handi handuka nokuli?’ Ngeenge otwa efa tu ninge ovapika voikolwifa, otashi dulika shi ke tu ningife tu kale ihatu tomhafana vali pandunge noihatu ningi omatokolo a diladilwa nawa. Ovashikuli vaKristus ove na okuninga eenghendabala opo va amene omadiladilo avo. — Omayel. 3:21, 22.

Henuka oumhulile

6, 7. (a) Jesus okwa li a ungaunga ngahelipi naSatana nosho yo neendemoni daye? (b) Omolwashike oumhulile wa hapupala neenghono kunena?

⁶ Eshi Jesus a li kombada yedu, okwa li a kondjifa nouladi Satana neendemoni daye. Okwa li a kondjifa Satana eshi a li e mu ponokela sha yukilila opo ngeno a nyone po oudiinini waye. (Luk. 4:1-13) Jesus okwa li yo a didilika mo nokwa kondjifa eenghendabala daSatana domonanguwi eshi a li ta kendabala okunwefa mo omadiladilo nosho yo eenghatu daye. (Mat. 16:21-23) Okwa li yo a kwafela oohandimwe ovo va li tava hepekwa keendemoni. — Mark. 5:2, 8, 12-15; 9:20, 25-27.

⁷ Konima eshi Jesus a nangekwa po meulu e li Ohamba mo 1914, okwa li a koshola eulu mokuumba mo Satana neendemoni daye. Oshidjemo, Satana paife ota kendabala neenghono ‘okuhongaula ounyuni aushe’ shi dulife nale. (Eh. 12:9, 10) Onghee hano, itashi tu kumwifa eshi oumhulile tau ende tau hapupala neenghono kombada yedu. Ndele mbela oshike hatu dulu okuninga po opo tu liamene kenwefemo la tya ngaho?

8. Omapulo elipi tu na okulipula ngeenge hatu hoolola omalihafifo?

⁸ Ombibeli oya londwela sha yukilila ya ti kutya osha nyika oshiponga okukala tu na ekwatafano noinima ya nyika oumhulile. (Lesha Deuteronomion 18:10-12.) Kunena, Satana neendemoni daye otava nwefa mo omadiladilo ovanhu okupitila moinima oyo tai xumifa komesho oumhulile, ngaashi eemuvi, omambo nosho yo omaudano opaelektronika. Onghee hano, ngeenge hatu hoolola omalihafifo, otu na okulipula kutya: ‘Mbela moule weemwedi da pita, onda kala handi hafele okutala eefilima, eeprograma doko-TV, omaudano opaelektronika, omambo ile eeprograma doiyolifa odo tadi ulike oumhulile? Mbela ondi udite ko ngoo kutya omolwashike sha fimana okuhenuka oumhulile ile ihandi u tale ko wa nyika oshiponga? Ohandi lipula ngoo shi na sha nanghee Jehova ha kala e uditile omalihafifo oo handi kufa ombinga muo? Ngeenge onda efa ndi nwefwe mo kuSatana meenghedi odo, mbela ohole yange yokuhola Jehova nosho yo omafinamhango aye ouyuki otai ke linyengifa nge ngoo ndi katuke eenghatu ndi efe po oinima ya tya ngaho?’ — Oil. 19:19, 20.

Dulika kelondwelo laJesus li na sha noluhaelo

9. Ongahelipi omunhu ta dulu okuulika kutya oku hole owii?

⁹ Jesus okwa li ha diinine omifikamhango daJehova dopaenghedi di na sha noluhaelo. Okwa ti: ‘Inamu lesha hamba, Omushiti okwe va shita pehovelo omulumenhu nomukainhu. Ndele ta ti: onghee hano omulumenhu e nokufiya po xe naina nokulimangela komukainhu waye, ndele ava vavali otava ningi omunhu umwe? Osho hano kave fi vali vavali, ndelenee ombelela imwe. Hano osho Kalunga e shi tula kumwe, inashi kufwa kumwe komunhu.’ (Mat. 19:4-6) Jesus okwa li e shii kutya osho hatu tale otashi dulu okunwefa mo omadiladilo etu. Nomolwaasho a popya mEudifo laye lokOmhunda a ti: “Onye mwe shi uda sha tiwa: Ino nyona ohombo. Ndelenee Ame ohandi mu lombwele: okeshe tuu ou ta tale omukainhu nokahalu, oye okwe mu haela momutima waye.” (Mat. 5:27, 28) Doshili, ovo tave lipwililikile omalondwelo aJesus otashi ulike kutya ove hole owii.

10. Hokolola oshimoniwa shimwe osho tashi ulike kutya omunhu ota dulu okweefa po filufilu okukala a pikwa komafano oipala.

¹⁰ Satana oha xumifa komesho oluhaelo okupitila momafano oipala. Omafano a tya ngaho ohaa ulikwa keshe pamwe monghalelo ei yoinima. Ovo hava tale omafano oipala ohava mono shidjuu okudimbwa oinima ii oyo va mona. Ovanhu va tya ngaho otava dulu okupikwa komafano oipala. Natu ka taleni koshimoniwa shOmukriste umwe. Okwa ti: “Onda li handi tale omafano oipala meholeko. Onda kala handi lihafifa mokutala oinima ya tya ngaho handi lifufya kutya osho itashi ka kuma okulongela kwange Jehova. Onda li ndi shii kutya okutala omafano oipala osha puka ndele onda li handi litungile ouumbo kutya Kalunga okwa hokwa ashike natango oilonga yange.” Ndele mbela oshike sha li sha kwafela omumwatate oo a lundulule etaleko laye? Okwa ti: “Nonande kasha li shipu kwaame okuya kovakulunhuongalo, onda li nda tokola oku ke va lombwela shi na sha noupyakadi wange.” Hauxuuninwa, omumwatate oo okwa ka efa po filufilu onghedindjikilile ii ya tya ngaho. Okwa dimina a ti: “Onda ka kala ndi na eliudo la koshoka shili konima eshi nda efa po filufilu enyono olo.” Aveshe ovo ve tonde owii ove na yo okulihonga okukala ve tonde omafano oipala.

11, 12. Ongahelipi hatu dulu okuulika kutya otu tonde owii ngeenge tashi uya pokuhoolola eemusika?

¹¹ Omusika nosho yo eendjovo dayo otashi dulika i nwefe mo omaliudo etu neenghono nosho yo omutima wetu wopafaneko. Omusika oi li oshali ya dja kuKalunga noya kala tai dana onghandangala ya fimana melongelokalunga lashili. (Ex. 15:20, 21; Ef. 5:19) Ashike eemusika domounyuni ou waSatana woukolokoshi ohadi xumifa komesho oluhaelo. (1 Joh. 5:19) Ndele mbela ongahelipi omunhu ta dulu okudidilika mo kutya omusika oyo ha pwilikine kuyo oya nyata ile hasho?

¹² Oto dulu okulipula kutya: ‘Mbela eemusika odo handi pwilikine kudo ohadi xumifa komesho omadipao, enyonohombo, oluhaelo ile okusheka Kalunga? Ngeenge ngeno ondi leshele omunhu wonhumba eendjovo domusika oyo, mbela ota ka mona ngoo kutya ondi tonde owii, ile ota ka mona kutya omutima wange owa nyata?’ Itatu dulu okupopya kutya otu tonde owii ndele pefimbo opo tuu opo ohatu hoolola okupwilikina keemusika odo tadi u xumifa komesho. Jesus okwa ti: “Keshe osho hashi di mokanya, hashi di komitima, ndee tashi nyateke omunhu. Osheshi momutima omo hamu di omadiladilo [mai], omadipao, omanyonohombo, oluhaelo, oulunga, omalundilafano, omasheko.” — Mat. 15:18, 19; yelekanifa naJakob 3:10, 11.

Kala ho tale ko ovalongi vowii ngaashi Jesus a li he va tale ko

13. Jesus okwa li a tala ko ngahelipi ovanyoni ovo inava hala okulivela ombedi?

¹³ Jesus okwa ti kutya okwa li e uya kombada yedu okwiifana ovalunde ile ovalongi vowii, opo ve lidilulule. (Luk. 5:30-32) Ndele mbela Jesus okwa li ha tale ko ngahelipi ovanhu ovo inava hala okweefa po okulonga oulunde? Jesus okwa londwela sha kwata moiti shi na sha nokukukuma ovanhu va tya ngaho. (Mat. 23:15, 23-26) Okwa li yo a popya sha yela a ti: “Hakeshe ou ta ti kuame: Omwene, Omwene! ta i mouhamba womeulu, ndelenee oye tuu ou ha longo ehalo laTate womeulu. Efiku olo [Kalunga ta ka tokola ovanhu] vahapu otava ti kuame: Omwene, Omwene, hafye tuu ovo twa xunganekele medina loye notwa [ta] mo eendemoni medina loye notwa longa oilonga ihapu yeenghono medina loye?” Ndelenee ota ka lombwela ovalongi vowii ovo inave livela ombedi, ta ti: “Djeni po puame, onye ovakolokoshi!” (Mat. 7:21-23) Mbela omolwashike oohandimwe ovo tava ka tokolwa monghedi ya tya ngaho? Omolwaashi ihava fimaneke Kalunga nohava yahameke vamwe omolwoilonga yavo ii.

14. Omolwashike ovanyoni ovo inava hala okulivela ombedi ve na okukondwa mo meongalo?

¹⁴ Eendjovo daKalunga oda ti kutya ovanyoni ovo inava hala okulivela ombedi ove na okukondwa mo meongalo. (Lesha 1 Ovakorinto 5:9-13.) Ovanhu va tya ngaho ova pumbwa okukondwa mo meongalo omolwomatomheno atatu: (1) opo edina laJehova liha shekifwe, (2) okwaamena eongalo liha nyatekwe nosho yo (3) opo omunyoni a kwafelwe e livele ombedi ngeenge otashi shiiva.

15. Omapulo a kwata moiti elipi tu na okulipula ngeenge otwa hala okukala ovadiinini kuJehova?

¹⁵ Mbela ohatu tale ko ngoo ovalongi vowii ngaashi Jesus a li he va tale ko? Otwa pumbwa okulipula omapulo a kwata moiti aa taa landula apa: ‘Mbela onda hoolola okukala handi endafana pandjikilile nomunhu oo a kondwa ile oo e litukula ko keongalo lopaKriste? Ongahelipi ngeenge omupambele wetu oo a kondwa ile e litukula ko keongalo ihatu di vali meumbo limwe naye?’ Onghalo ya tya ngaho otai dulu okuyeleka shili ohole yetu yokuhola ouyuki nosho yo oudiinini wetu kuKalunga.a

16, 17. Omudalakadi umwe Omukriste okwa li a taalela eshongo lilipi, noshike sha li she mu kwafela a ulike oudiinini waye kelongekido li na sha nokukonda mo ovanyoni meongalo ovo inave livela ombedi?

¹⁶ Natu ka taleni koshimoniwa shomumwameme umwe oo omonamati waye ou womukulunhu a li Ondombwedi yaJehova. Ndele lwanima, omumati oo okwa ka hoolola okulonga owii nopehe na okulivela ombedi. Nomolwaasho, okwa li a kondwa mo meongalo. Ina yomumati oo okwa li e hole Jehova, ndele okwa li yo e hole omona waye nokwa li e wete shidjuu neenghono okutula moilonga efinamhango lopamishangwa olo tali ti kutya katu na okweendafana nomunhu a tya ngaho.

¹⁷ Mbela ngeno omayele elipi wa pa omumwameme oo? Omukulunhuongalo umwe okwa li e mu kwafela a mone kutya Jehova oku shii ouyahame oo e udite. Omumwatate oo okwa li e mu lombwela a diladile kombinga youyahame oo Jehova a li e udite eshi vamwe vomovanamati vaye vopamhepo va li ve mu tukulila oshibofa. Omukulunhuongalo oo okwa li a tomhafana naye kutya nonande Jehova oku shii kutya onghalo oyo oiyahameka shi fike peni, okwa teelela omunyoni keshe oo ine livela ombedi a kondwe mo meongalo. Omumwameme oo okwa li a kumwa komutima komadimbulukifo oo nokwa li a ulika oudiinini waye kelongekido olo li na sha nokukonda mo ovanyoni meongalo.b Oudiinini wa tya ngaho ohau hafifa omutima waJehova. — Omayel. 27:11.

18, 19. (a) Ngeenge otwa xulifa po eendafano novalongi vowii, mbela kungaho ohatu ka ulika kutya otu tonde shike? (b) Oidjemo ilipi hatu dulu okumona ngeenge otwa kala ovadiinini kuKalunga nosho yo kelongekido laye li na sha nokukonda mo ovanyoni meongalo?

¹⁸ Ngeenge ou li monghalo ya faafana naayo yomumwameme oo, kala wa shilipalekwa kutya Jehova oku ku uditile oukwao wananghali. Ngeenge owa xulifa po eendafano nomunhu oo a kondwa ile oo e litukula ko keongalo, oto ka ulika kutya ou tonde elihumbato nosho yo eenghatu odo da etifa oilanduliko ya tya ngaho. Kungaho, oto ka ulika yo kutya ou hole omunyoni nowa hala okuninga osho tashi mu etele ouwa. Natango, ngeenge owa kala omudiinini kuJehova moshinima osho, oshi na oupu u linyengife omunyoni oo a kondwa e livele ombedi noku alukile kuJehova.

¹⁹ Umwe oo a li a kondwa ndele lwanima ta alulilwa meongalo, okwa ti: “Onda hafa eshi nda mona kutya Jehova oha kaleke ehangano laye la koshoka molwaashi oku hole ovapiya vaye. Nonande ovo vehe fi oilyo yeongalo lopaKriste ohava mono omunhu oo a kondwa meongalo a fa ta ningwa onyanya, elongekido la tya ngaho ola pumbiwa nolopahole.” Ndele mbela ngeno oilyo yeongalo nosho yo youkwaneumbo womunhu oo oya li hai endafana naye pandjikilile pefimbo olo a li a kondwa, mbela ngeno oto diladila kutya omunhu oo okwa ka fika ngoo pexulifodiladilo la tya ngaho? Okukala hatu yambidida elongekido lopamishangwa li na sha nokukonda mo ovanyoni meongalo otashi ka ulika kutya otu hole ouyuki notwa dimina kutya Jehova oye e na oufemba wokutula po omifikamhango dopaenghedi.

“Tondeni owii”

20, 21. Omolwashike sha fimana okulihonga okukala tu tonde owii?

²⁰ Omuyapostoli Petrus okwe tu londwela a ti: “Kaleni mu nelidiliko nomwa pashuka”! Omolwashike mbela? Okwa ti: “Omutondi weni, Satana, ohe mu dingilile ngaashi onghoshi hai kumbu, nota kongo ou te mu xwake po.” (1 Pet. 5:8) Mbela naave oto dulu okuninga oshihakanwa shaye? Enyamukulo kepulo olo otali likolelele unene kwaasho kutya ou tonde owii shi fike peni.

²¹ Ndele nande ongaho, kashipu okukala tu tonde owii, molwaashi otwa dalwa ovalunde notu li mounyuni ou tau tu ladipike tu shikule omahalo etu opambelela. (1 Joh. 2:15-17) Onghee hano, ohatu ka dula ashike okukala tu tonde owii ngeenge otwa hopaenene Jesus Kristus nokukala tu hole Jehova Kalunga nohole yomoule. Natu kaleni twa tokola toko okukala tu ‘tonde owii,’ nokukala twe lineekela filufilu kutya Jehova ota ‘amene ovakoshoki vaye, note va xupifa momake ovadinikalunga.’ — Eps. 97:10.

[Omashangelo opedu]

Oto nyamukula ngahelipi?

• Oshike tashi ke tu kwafela tu mone kutya otwa tala ko ngahelipi oikolwifa?

• Oshike tu na okuninga po opo tu dule okuhenuka oumhulile?

• Omolwashike sha nyika oshiponga okutala omafano oipala?

• Ongahelipi hatu dulu okuulika kutya otu tonde owii ngeenge oo tu hole okwa kondwa mo meongalo?

[Efano pepandja 29]

Ngeenge owa hoolola okukala ho nu oikolwifa, mbela oshike osho u na okukaleka momadiladilo?

[Efano pepandja 30]

Kala wa angala omalihafifo oo taa xumifwa komesho kuSatana

[Efano pepandja 31]

Ngeenge oho tale omafano oipala, mbela osho otashi ka ulika kutya ou hole shike?