Oolyelye hava udifa onghundana iwa?
“ . . . otali udifilwa ounyuni aushe.” — MATEUS 24:14.
ONGHUNDANA iwa otai udifwa kEendombwedi daJehova mounyuni aushe. Ohadi udifa meenghedi di lili noku lili. Onghedi imwe oyo okupitila . . .
Mokupopya novanhu. Ngaashi Jesus novahongwa vaye, Eendombwedi daJehova ohadi twaalele ovanhu onghundana iwa. (Lukas 8:1; 10:1) Ihadi kala da teelela ovanhu ovo ve uye kudo. Eendombwedi adishe di dule pomamiliyona aheyali ohadi udifa kombinga yOuhamba waKalunga. Ohadi udifa eumbo neumbo, momapandavanda, okupitila mongodi nosho yo meenghedi dimwe vali. Omudo wa ya, Eendombwedi oda longifa eevili di dule pebiliyona limwe netata moilonga yokuudifa.
Ohadi hongo vamwe kombinga yOuhamba waKalunga nosho yo ‘aishe oyo Jesus e di lombwela.’ (Mateus 28:20) Ohadi ningi pandjikilile omakonakonombibeli opeumbo oshali e dule pomamiliyona ahetatu.
Eendombwedi otadi udifa mounyuni aushe, moilongo 236. Ohadi udifile ovanhu vomaludi aeshe. Ohadi udifile moilongo nomoilando, meefuka daAmazon nokeenhele daSiberia oko ku na outalala wamatutu nosho yo meembuwa domuAfrika nomeemhunda daHimalaya. Ihadi futwa omolwoilonga yado ndele ohadi udifa tadi longifa oiniwe yado nefimbo lado, tadi linyengifwa kohole yado yokuhola Kalunga nosho yo ovanhu vakwao. Ohadi udifa yo onghundana iwa okupitila . . .
Moishangomwa. Oshifo eshi, osho shi na oshipalanyole, Oshungonangelo tai shiivifa Ouhamba waJehova, ohashi nyanyangidwa paife momalaka 185, nohaku tandavelifwa eemiliyona di dule po 42 doshifo keshe. Oshungonangelo ohai endele pamwe noshifo shikwao shedina Awake! oyo nayo hai shiivifa Ouhamba. O-Awake! ohai nyanyangidwa momalaka 83 nohaku tandavelifwa oifo eemiliyona 40 lwaapo.
Ope na yo omambo, oubroshure, outraktate, ou-CD nou-CD molupe lo-MP3 nosho yo ou-DVD momalaka 540 lwaapo oyo tai yelifa omahongo Ombibeli. Eendombwedi oda nyanyangida noda tandavelifa oishangomwa ya tya ngaho i dule pomabiliyona 20 moule womido omulongo da pita, osho tashi ulike kutya omunhu keshe kombada yedu okwa mona oishangomwa itatu lwaapo.
Eendombwedi daJehova oda nyanyangida yo ile da nyanyangidifa Ombibeli momatoloko e lili noku lili. O-New World Translation of the Holy Scriptures oyo ya tolokwa, ya pilindwa noya tandavelifwa kEendombwedi, paife oi li momalaka 96, ya wana po ile moitukulwa yayo. Opa tandavelifwa Eembibeli eemiliyona di dule po 166. Eendombwedi ohadi udifa yo onghundana iwa yOuhamba okupitila . . .
Mokwoongala kwado kwopaKriste. Okwoongala oko haku ningwa oshivike keshe pOmalupale Ouhamba kaku fi ashike elongelokalunga longahenya, ndele oku li elongekido lokuhonga ovanhu. Ohapa yandjwa oipopiwa ya kanghamena kOmbibeli nohapa konakonwa Ombibeli taku longifwa oshifo shOshungonangelo nosho yo oishangomwa imwe vali. Eendombwedi ohadi lihongo yo pokwoongala kwado nghee di na okuudifa onghundana iwa nomupondo.
Eendombwedi ohadi konakona ouyelele wa faafana momaongalo e dule po 107 000 mounyuni aushe, naasho ohashi xumifa komesho oukumwe wado. Ovanhu aveshe ova manguluka okuya kokwoongala oko. Ihapa umbwa ongalo. Ngeno Eendombwedi kada li hadi kala metwokumwe naasho hadi udifa, ngeno oinima aishe oyo itai ti sha. Onghee hano, ohadi kendabala okukala metwokumwe nonghundana iwa okupitila . . .
Moshihopaenenwa shado. Ohadi kendabala okutula po oshihopaenenwa shiwa shi na sha nelihumbato lopaKriste nosho yo okuungaunga navamwe monghedi omo da hala di ungaungwe nado. (Mateus 7:12) Nonande inadi wanenena nohadi ningi omapuko omafimbo amwe, ohadi kendabala da mana mo opo di kale di hole ovanhu vakwao moku va udifila onghundana iwa nosho yo oku va kwafela meenghedi dimwe vali ngeenge otadi dulu.
Eendombwedi daJehova itadi kendabala okulidilululifa ounyuni okupitila moilonga yado yokuudifa. Ndele ngeenge oilonga oyo oya longwa ngaashi Jehova a hala, exulilo otali ke uya, ngaashi Jesus a xunganeka. Mbela osho otashi ka kuma ngahelipi edu nosho yo ovanhu ovo ve li ko?
[Efano pepandja 7]
Onghundana iwa otai udifwa mounyuni aushe kEendombwedi daJehova