Konakona Eendjovo daKalunga
Omolwashike Kalunga a efa oukolokoshi nokumona oixuna ku kale po?
Moshitukulwa eshi omu na omapulo oo tashi dulika ho kala to lipula kombinga yao nosha ulika kutya openi to dulu okuhanga omanyamukulo ao mOmbibeli yoye. Eendombwedi daJehova otadi ka kala da hafa okukundafana naave kombinga yomanyamukulo oo.
1. Oukolokoshi owa hovela naini?
Oukolokoshi owa hovela kombada yedu okudja eshi Satana a li a popya oipupulu yotetetete. Kalunga ka li a shita omunawii Satana. Satana okwa li omweengeli a wanenena, ndele mupya munene, “ina kala moshili.” (Johannes 8:44) Okwa li a hala okukala oye ta longelwa kovanhu ponhele yokulongela Kalunga. Satana okwa li a heka omukainhu wotete, Eva, opo a kale ta dulika kuye ponhele yokukala ta dulika kuKalunga. Ngaashi Eva, Adam naye ka li a dulika kuKalunga, netokolo olo a li a ninga ola etifa okumona oixuna nosho yo efyo. — Lesha Genesis 3:1-6, 17-19.
Satana okwa tukulila ounamapangelo waKalunga oshibofa eshi a heka Eva aha dulike kuKalunga. Lwanima, ovanhu vahapu navo ova li va hovela okuyambidida ounashibofa waSatana, va ekelashi Kalunga e li Omupangeli wavo. Onghee hano, Satana okwa ninga “omupangeli wounyuni.” — Lesha Johannes 14:30; Ehololo 12:9.
2. Mbela eshito laKalunga kala li la wanenena?
Ovanhu nosho yo ovaengeli ovo Kalunga a shita ova li tava dulu okudulika koiteelelwa yaye monghedi ya wanenena. (Deuteronomion 32:5) Kalunga okwe tu shita tu na emanguluko, hatu dulu okuhoolola okulonga osho shiwa ile shii. Emanguluko la tya ngaho ole tu pa omhito yokuulika kutya otu hole Kalunga ile hasho. — Lesha Jakob 1:13-15; 1 Johannes 5:3.
3. Omolwashike Kalunga a efa okumona oixuna ku kale po?
Jehova okwa kala te lididimikile ovanhu ovo va tukululila ounamapangelo waye oshibofa fiyo opaife. Omolwashike mbela? Okwe shi ninga opo a kwafele ovanhu va mone kutya itava dulu okulipangela vo vene nopehe na ekwafo laye. (Jeremia 10:23) Oushili oo kutya ovanhu itava dulu okulipangela kuvo vene ou liwetikile mokutala komido 6 000 odo ovanhu va kala tava pangele. Ovapangeli vopanhu ova nyengwa okuxulifa po oinima ngaashi oita, ominyonena, okuhenouyuki nosho yo omikifi. — Lesha Omuudifi 7:29; 8:9; Ovaroma 9:17.
Ndele mepingafano naasho, ovo tava yambidida ounamapangelo waKalunga ohava mono ouwa. (Jesaja 48:17, 18) Mafiku Jehova ota ka xulifa po omapangelo aeshe opanhu, nokombada yedu otaku ka kala ashike ovo tava yambidida ounamapangelo waye. — Jesaja 2:3, 4; 11:9; lesha Daniel 2:44.
4. Elididimiko laKalunga ole tu pa omhito yashike?
Satana okwa ti kutya kape na omunhu ta ka kala omudiinini kuJehova. Ndele elididimiko laKalunga ola pa keshe umwe omhito a ulike kutya ota yambidida ounamapangelo waYe ile ovapangeli vopanhu. Onghedi yetu yokukalamwenyo oyo tai ufa kutya otwa ama kombinga yalyelye. — Lesha Job 1:8-11; Omayeletumbulo 27:11.
5. Ongahelipi hatu dulu okuulika kutya ohatu yambidida ounamapangelo waKalunga?
Ohatu ka ulika kutya otwa hala Jehova oye a kale Omupangeli wetu ngeenge otwa kala tu li melongelokalunga lashili nokuninga oinima metwokumwe naasho sha popiwa mEendjovo daye, Ombibeli. (Johannes 4:23) Ngaashi Jesus, nafye otu na okuhenuka okukufa ombinga moinima yopapolitika nosho yo moita. — Lesha Johannes 17:14.
Satana oha longifa eenghono daye opo a xumife komesho oluhaelo nosho yo eenghedi dikwao da nyata. Ookaume ketu nosho yo ovapambele vetu vamwe otashi dulika ve tu kembaule ile ve tu pataneke ngeenge otwa kala ihatu kufa ombinga moinima ya tya ngaho. (1 Petrus 4:3, 4) Onghee hano, otu na okukala twa tokola kutya oshike hatu ka ninga po. Mbela ohatu ka endafana ngoo novanhu ovo ve hole Kalunga? Ohatu ka dulika ngoo keemhango daye dopahole nodi li pandjele? Ngeenge osho twa ningi ngaho, ohatu ka ulika kutya Satana okwa li a popya oipupulu eshi a ti kutya kape na omunhu ta ka kala omudiinini kuKalunga. — Lesha 1 Ovakorinto 6:9, 10; 15:33.
Opo u mone ouyelele wa wedwa po, tala etukulwa 11 lembo olo la ulikwa opo Ombibeli otai hongo lela shike?, la nyanyangidwa kEendombwedi daJehova.
[Efano pepandja 16]
Adam okwa li a ninga etokolo lihe li pandunge
[Efano pepandja 17]
Omatokolo oo hatu ningi oo taa ka ufa kutya otwa hala Kalunga oye a kale Omupangeli wetu ile hasho