Konakona Eendjovo daKalunga
Mbela oonakufya ove na ngoo eteelelo lasha?
Moshitukulwa eshi omu na omapulo oo tashi dulika wa kala to lipula nosha ulika kutya omanyamukulo omapulo oo otaa hangwa peni mOmbibeli. Eendombwedi daJehova otadi ka kala da hafa okukundafana naave omanyamukulo omapulo oo.
1. Oonakufya ove na eteelelo lashike?
Eshi Jesus a li a fika muBetania osho sha li popepi naJerusalem, okwa hanga pa pita omafiku ane okudja eshi kaume kaye Lasarus a fya. Jesus ova li va ya kombila yanakufya pamwe naMarta nosho yo Maria. Diva konima yaasho, eemhunga dovanhu oda li yo de uya kuvo. Diladila ashike kunghee Marta naMaria va li va hafa konima eshi Jesus a nyumuna Lasarus! — Lesha Johannes 11:20-24, 38-44.
Marta okwa li a itavela kutya oonakufya otava ka nyumuka. Okudja nale, ovapiya vaJehova ovadiinini ova kala va itavela kutya monakwiiwa Kalunga ota ka nyumuna ovafi opo va ka kale vali nomwenyo kombada yedu. — Lesha Job 14:14, 15.
2. Oonakufya ove li monghalo ya tya ngahelipi?
Nonande eenghono domwenyo ile tu tye ‘omufudo’ odo hadi mwenyopaleke ovanhu noinamwenyo, fye katu fi oishitwa yopamhepo oyo ngeno hai kala ashike nomalutu opambelela oule wefimbo lonhumba. (Omuudifi 3:19; Genesis 7:21, 22, NW) Fye otu li oishitwa yopambelela, twa shitwa okudja mondwi yedu. (Genesis 2:7; 3:19) Onghee hano, omadiladilo etu ihaa dulu okulonga monghedi yonhumba ngeenge ouluvi wetu owa fya. Pashihopaenenwa, eshi Lasarus a li a nyumunwa ka li a hokololela ovanhu kutya okwa li meulu ile moheli, molwaashi oonakufya kave na eshi ve shii. — Lesha Epsalme 146:4; Omuudifi 9:5, 10.
Osha yela kutya oonakufya ihava mono oixuna, nehongo olo kutya Kalunga oha hepeke oonakufya momundilo woheli kali fi loshili. Ovo hava hongo ehongo la tya ngaho otava lundile Kalunga filufilu. Ediladilo olo lokuhepeka oonakufya momundilo woheli oli li oshinima shinyanyalifi kuye. — Lesha Jeremia 7:31.
3. Mbela ohatu dulu ngoo okupopya noonakufya?
Itatu dulu okupopya noonakufya nandenande. (Epsalme 115:17) Ndele ovo hava popi novanhu ovaengeli ovakolokoshi, ovo tashi dulika ve liningife va fa nakufya. (2 Petrus 2:4) Jehova okwa indika ovanhu vaha ka konge ekwafo koonakufya. — Lesha Deuteronomion 18:10, 11.
4. Oolyelye tava ka nyumunwa?
Ovanhu omamiliyona ovo ve li meembila otava ka nyumunwa mounyuni mupe oo twa teelela. Nokuli novanhu vamwe ovo kwa li hava longo owii molwaashi kave shii Jehova otava ka nyumunwa. — Lesha Lukas 23:43; Oilonga 24:15.
Ovanyumunwa ovo otava ka pewa omhito ve lihonge oshili kombinga yaKalunga nokuulika kutya ove na eitavelo tali longo muJesus mokukala hava dulika kuye. (Ehololo 20:11-13) Ngeenge ovanyumunwa ovo ova kala tava longo ouwa, otava ka dula okukala nomwenyo waalushe kombada yedu. Ashike vamwe vomwaavo tava ka nyumunwa otava ka twikila natango okulonga owii. Onghee hano, molwaashi oohandimwe va tya ngaho otava ka tokolwa she likolelela koilonga yavo oyo ii, otaku dulu okutiwa kutya otava ka ‘nyumukila etokolo.’ — Lesha Johannes 5:28, 29.
5. Elongekido li na sha nenyumuko otali tu hongo shike kombinga yaJehova?
Ovanhu otava ka dula okunyumunwa molwaashi Kalunga okwa yandja Omona waye a yambe po omwenyo waye omolwetu. Onghee hano, elongekido lenyumuko oli li oshalinghenda ya dja kuJehova noli li yo euliko kutya oku tu hole. — Lesha Johannes 3:16; Ovaroma 6:23.
Opo u mone ouyelele wa wedwa po, tala etukulwa 6 nosho yo 7 lembo olo la ulikwa opo Ombibeli otai hongo lela shike?, la nyanyangidwa kEendombwedi daJehova.
[Efano pepandja 26]
Adam okwa shitwa okudja mondwi yedu