Ehena Popepi naKalunga

Ehekeleko kwaavo ve na omitima da teyauka

OMUKAINHU umwe Omukriste oo a kala e kwetwe kepolimano oule wefimbo, okwa ti: ‘Ame Jehova ke hole nge.’ Omukainhu oo okwa li a tomhwa kutya Jehova oku li kokule naye. Ndele mbela Jehova oku li ngoo shili kokule novalongeli vaye ovo tashi dulika va polimana? Eendjovo domupsalme David da nwefwa odo tadi hangwa mEpsalme 34:19 otadi yandje enyamukulo tali hekeleke kepulo olo.

David okwa li e shii kutya ovapiya vaJehova ohava dulu okukumwa kepolimano shi fike peni. Fimbo a li omunyasha, okwa li a ninga onhauki, molwaashi ohamba inandubo Saul oya li tai mu kongo nopehe na olufuwo ya hala oku mu dipaa. David okwa li a ka konga ouhondameno koshilando shOvafilisti ovo va li ovatondi vOvaisrael shedina Gat, molwaashi okwa li ta diladila kutya Saul ke na efiku a fekele ngeenge oko a ya. Konima eshi Ovafilisti va li va dimbuluka kutya mboli omunhu oDavid, David okwa li a hovela okuliningifa a fa elai nokwa li lela a xupila pokakangwa. Okwa li a pandula Jehova eshi e mu xupifa, nokwa ka shanga Epsalme 34, la kanghamena koshimoniwa shaye osho.

Ndele mbela David okwa li ngoo a itavela kutya Kalunga ke na ko nasha novanhu ovo va wililwa po keenghalo, ovo tava diladila kutya Kalunga ine va hokwa nokave na ongushu koshipala shaye? Okwa ti: “Omwene oku li popepi nomitima da teyauka, Ye oha xupifa ava ve nomhepo ya nyanyauka.” (Epsalme 34:19) Natu ka kundafaneni eendjovo odo nokutala nghee tadi dulu oku tu hekeleka noku tu pa eteelelo.

“Omwene oku li popepi.” Embo limwe lomauyelele ola ti kutya outumbulilo oo “owa hala okutya Omwene oha kala ta yandje elitulemo koshiwana shaye, he shi pashukile noha kala alushe e lilongekida oku shi kwafela noku shi xupifa.” Otashi hekeleke filufilu okushiiva kutya Jehova oha kala ta pashukile ovapiya vaye. Oku wete omaupyakadi oo tava shakeneke ‘momafimbo aa madjuu,’ noku shii kutya ohava kala ve udite ngahelipi. — 2 Timoteus 3:1; Oilonga 17:27.

‘Omitima da teyauka.’ Momalaka amwe, outumbulilo ‘omutima wa teyauka’ otau ulike kokukala u tondike. Ndele omuhongwanhu umwe okwa yelifa kutya eendjovo odo domupsalme otadi ulike “unene kokunyika oluhodi la kwalukeshe.” Oshoshili kutya omafimbo amwe nokuli novapiya vaKalunga ovadiinini ohava dulu okushakeneka omaupyakadi a kwata moiti oo haa teyaula omitima davo.

“Ava ve nomhepo ya nyanyauka.” Omunhu ngeenge a polimana otashi dulika a kale e litala ko kutya ke na ongushu nomafimbo amwe iha kala e na eteelelo lasha nandenande. Embo limwe olo hali kwafele ovatoloki vOmbibeli ola ti kutya outumbulilo oo otau dulu okutolokwa, “ovo vehe na etimaumbwile lasha.”

Ndele mbela Jehova ohe linyenge ngahelipi ngeenge a indilwa ekwafo kwaavo ve na ‘omitima da teyauka’ nosho yo ovo ve “nomhepo ya nyanyauka”? Mbela oha kala kokule navo nohe va tale ko kutya inava wana okuulikilwa ohole nokupewa elitulemo? Hasho nandenande! Ngaashi ashike omudali omunahole ha papatele okaana kaye noku ka hekeleka ngeenge ke li moupyakadi, Jehova naye oku li popepi novalongeli vaye ovo hava pula ekwafo kuye. Okwa halelela okuhekeleka nokupepaleka ovo ve na omitima da teyauka nomhepo ya nyanyauka. Ohe va pe ounongo neenghono odo va pumbwa opo va dule okuungaunga noupyakadi keshe va taalela. — 2 Ovakorinto 4:7; Jakob 1:5.

Omolwashike ito kongo ekwafo u mone kutya ongahelipi to dulu okweehena popepi elela naJehova? Kalunga ketu omunalukeno okwa udaneka a ti: ‘Ame ohandi kala puava ve na omhepo ya nyanyaulwa noye lininipika, opo ndi hekeleke omhepo yovalininipiki nondi tululule omwenyo momitima daava va nyanyaulwa.’ — Jesaja 57:15.