Owa ya mo ngoo metulumuko laKalunga?
“Ondjovo yaKalunga oi nomwenyo neenghono.” — HEB. 4:12.
1. Ongahelipi hatu dulu okuya metulumuko laKalunga kunena, na omolwashike tashi dulu okukala shidjuu okudulika?
MOSHITUKULWA sha tetekela, otwe lihonga kutya ohatu dulu okuya metulumuko laKalunga kunena ngeenge ohatu dulika kuye nokehangano laye. Ngeenge hatu dulika kuJehova, otashi ulike kutya otwa hala elalakano laye li wanifwe po. Ndele haalushe hashi kala shipu okudulika. Pashihopaenenwa, ngeenge twe lihongo kutya Jehova okwa hala tu efe po oshinima shonhumba osho tu hole, petameko otashi dulika shi kale shidjuu okudulika. Naashi ngeenge oshe tu ningilwa, otwa pumbwa okulihonga okukala twe ‘lilongekida okudulika.’ (Jak. 3:17, NW) Moshitukulwa eshi ohatu ka kundafana eenghalo dimwe odo tadi tu pe omhito yokuulika kutya otwe lilongekida ngoo shili okudulika pomhito keshe.
2, 3. Otu na okutwikila okuninga shike opo tu hafife Jehova?
2 Mbela owe lilongekida ngoo okudulika ngeenge owa mono kutya owa pumbwa okuninga omalunduluko monghalamwenyo yoye eshi to konakona Ombibeli? Diladila kombinga yaashi: Ombibeli otai ti kutya ovanhu ovo Jehova a hala okweeta mehangano laye okwe va tala ko ve li ‘omamona omoiwana.’ (Hag. 2:7) Osho otashi ti kutya Kalunga oha hoolola ovanhu ovo a tala ko ve na ondilo kuye molwaashi ove hole ouyuki. Vahapu vomufye fimbo inatu konakona Ombibeli otwa li hatu longo osho sha puka koshipala shaKalunga. Ndele eshi twa konakona Ombibeli, otwa ka kala tu hole Kalunga nOmona waye. Otwa li twa halelela okuninga omalunduluko a fimanenena monghedi yetu yokukalamwenyo noyokudiladila opo tu hafife Jehova. Otwa li twa pula ekwafo kuye meilikano nokulonga noudiinini opo tu ninge omalunduluko oo a pumbiwa. Nolwanima, otwa ninginifwa opo tu kale twa hokiwa kuye. — Lesha Ovakolossi 1:9, 10.
3 Ashike nande ongaho, inatu wanenena. Otwa pumbwa natango okuninga omalunduluko monghalamwenyo yetu nokukondja opo tu longe osho sha yuka. Ndele Jehova okwa udaneka kutya ote ke tu kwafela ngeenge otwa twikile okulonga noudiinini opo tu mu hafife.
Oshike twa pumbwa opo tu dule okuninga omalunduluko monghalamwenyo yetu?
4. Eenghedi nhatu dilipi odo Jehova ha longifa oku tu ulikila kutya otwa pumbwa okuninga omalunduluko?
4 Fimbo inatu ninga omalunduluko monghalamwenyo yetu, otwa pumbwa okushiiva kutya openi tu na okuninga omalunduluko. Jehova ohe tu kwafele meenghedi di lili noku lili opo tu dule okuninga omalunduluko a tya ngaho. Otashi dulika e tu ulikile kutya ope na sha sha puka momadiladilo etu ile melihumbato letu okupitila moshipopiwa osho tashi yandjwa pOlupale lOuhamba ile moishangomwa yetu. Peemhito dimwe, otashi dulika tu kale tu udite inatu pumbwa okuninga omalunduluko nokuli nokonima eshi twa uda oshipopiwa ile twa lesha oshileshomwa osho kwa li shi na oku tu kwafela, nomolwaasho Jehova ota dulu okulongifa omumwatate ile omumwameme e tu pukulule pahole. — Lesha Ovagalati 6:1.
5. Ohatu linyenge ngahelipi omafimbo amwe ngeenge umwe ta kendabala oku tu pukulula, na omolwashike ovakulunhuongalo Ovakriste ve na okutwikila oku tu pukulula?
5 Ngeenge omunhu mukwetu ina wanenena te tu pukulula, otashi dulika shi kale shidjuu okutambula ko epukululo laye nonande otashi dulika ta popi nafye nombili. Ndele Jehova okwa lombwela ovakulunhuongalo ve tu ‘pukulule nomhepo yonheni,’ sha hala kutya, ve tu yukife pahole. (Gal. 6:1) Ngeenge otwa tambula ko ekwafo lavo, ohatu ka kala tu li “omamona” e na ondilo elela kuJehova. Luhapu momailikano etu ohatu lombwele Jehova kutya otu li ovanhu inava wanenena nonokutya ohatu nyono luhapu. Ndele ngeenge omukulunhuongalo e tu lombwele kutya otwa ninga epuko, otashi dulika tuhe shi tambule ko. Otashi dulika tu konge omalipopilo ile tu tye epuko letu inali kwata moiti. Otashi dulika tu tye omunhu oo te tu pukulula ke tu hole ile tu tye ina popya nafye nombili. (2 Eeh. 5:11) Ngeenge omukulunhuongalo okwe tu lombwele oshinima osho inatu hala okuuda, otashi dulika tu handuke neenghono. Pashihopaenenwa, otashi dulika ovakulunhuongalo ve tu lombwele kutya oshilyo shimwe shoukwaneumbo wetu otashi ningi oshinima sha puka ile kutya ihatu djala monghedi i shii okufimanekwa. Otashi dulika ve tu lombwele kutya otwa pumbwa okukala twa koshoka palutu ile kutya Jehova oku tonde omalihafifo oo hatu kufa ombinga muo. Ngeenge otwa handuka, otashi dulika tu ka popye oinima oyo twa li tuhe na okupopya. Osho otashi ke tu udifa nai nosho yo omumwatate oo a li ta kendabala oku tu kwafela. Ndele otashi dulika hatu ka dimina konima yefimbo, shimha twa handukuluka, kutya osho omumwatate a li ta popi oshi li mondjila.
6. Ongahelipi ondjovo yaKalunga tai dulu ‘okutokola omadilongo nomadiladilo omutima’?
6 Dimbuluka kutya Ovaheberi 4:12, oo u li omushangwa woshipalanyole, ova ti kutya ondjovo yaKalunga ‘oi na eenghono.’ Osho osha hala okutya Eendjovo daKalunga, Ombibeli, odi na eenghono, sha hala okutya, otadi dulu okukwafela ovanhu va lundulule onghalamwenyo yavo. Ombibeli oye tu kwafela tu ninge omalunduluko oo twa li twa pumbwa okuninga fimbo inatu ninginifwa. Otai dulu yo oku tu kwafela tu twikile okuninga omalunduluko monghalamwenyo yetu nokonima eshi twa ninginifwa. MOvaheberi ovo tuu ovo, Paulus okwa ti kutya ondjovo yaKalunga “otai tu, ndele tai tongola omwenyo nomhepo, eengolo nomungo; ndele i shii kutokola omadilongo nomadiladilo omutima.” (Heb. 4:12) “Omwenyo” otau ulike kwaasho tu li kombada, osho ovanhu tava dulu okumona ngeenge tave tu tale. ‘Omhepo’ otai ulike kwaasho tu li lela meni, osho ovanhu itava dulu okumona ngeenge tave tu tale. Onghee hano, Paulus okwa li a hala okutya ngeenge otu udite ko osho Kalunga te tu lombwele okupitila mOmbibeli shi na sha naasho a hala tu ninge, eenghatu detu otadi ka ulika osho tu li lela meni. Mbela omafimbo amwe otashi dulika pa kale pe na eyooloko pokati kaasho ovanhu tava dulu okumona naasho tu li lela meni? (Lesha Mateus 23:27, 28.) Mbela oto ka ninga po shike meenghalo tadi landula?
Twikila okukala to endele pamwe nehangano laJehova
7, 8. (a) Omolwashike Ovakriste vamwe Ovaheberi va li va hala okutwikila okuwanifa po oiteelelwa imwe yOmhango yaMoses? (b) Omolwashike hatu dulu okutya ova li tava katuka ve li omhinge nelalakano laJehova?
7 Vahapu otu shii nawa Omayeletumbulo 4:18 oo taa ti: “Elila lovayuki [oli] li ngaashi eluwa tali tende, lo tali eta ouyelele tau hapupala fiyo omutenya tau tu.” Omushangwa oo owa hala okutya mokweendela ko kwefimbo ohatu ende hatu udu ko nawa osho sha kwatelwa mo mokulonga ehalo laJehova nohatu ende hatu xwepopala monghedi omo hatu tula moilonga oiteelelwa yaye.
8 Otwe lihonga nale kutya Ovakriste vahapu Ovaheberi ova li va hala okutwikila okukala tava diinine Omhango yaMoses nokuli nokonima eshi Jesus a fya. (Oil. 21:20) Paulus okwa li a yelifila nawa Ovakriste kutya kava li ve na okukala vali tava diinine Omhango yaMoses, ashike Ovakriste vamwe kava li va didilika osho Jehova a li a teelela va ninge. (Kol. 2:13-15) Otashi dulika va li tava diladila kutya ngeenge ova twikile okuwanifa po oiteelelwa imwe yOmhango yaMoses, otava ka henuka okuhepekwa koilyo yelongelokalunga lOshijuda. Ndele Paulus okwa li a yelifila nawa Ovakriste ovo Ovaheberi kutya ngeenge ova twikile okukatuka ve li omhinge nelalakano laKalunga, itava i mo metulumuko laKalunga.a (Heb. 4:1, 2, 6; lesha Ovaheberi 4:11.) Opo va kale va hokiwa kuJehova, ova li ve na okudimina oushili oo kutya Jehova okwa li a hala okukala ta longelwa monghedi imwe i lili.
9. Mbela ohatu kala tu udite ngahelipi ngeenge omupiya omudiinini nomunaendunge ta pepaleke omayelifilo e na sha neudeko letu lomahongo Ombibeli?
9 Kunena, omupiya omudiinini nomunaendunge ohe tu kwafele omafimbo amwe tu ude ko omahongo Ombibeli monghedi oyo twa li inatu i diladila nale. Onghee otwa pumbwa okukala twa hafa omolwomayelifilo a tya ngaho. Osho otashi tu ulikile kutya Jehova ota longifa omupiya omudiinini nomunaendunge oku tu honga oshili. Omafimbo amwe Olutuwiliki, olo li lile po omupiya omudiinini nomunaendunge, ohali talulula onghedi omo tu udite ko eeshili donhumba. Ngeenge ovamwatate ovo ve li mOlutuwiliki ova mono kutya opa pumbiwa omalunduluko onhumba, ihava kala ve na oumbada wokupukulula omayelifilo e na sha nomahongo oo va li inave a uda ko mondjila konale ile okuyelifa nawa omahongo oo ve udite ko nawa paife. Ove shi shii kutya vamwe otashi dulika va ka kembaule omupiya omudiinini nomunaendunge omolwomalunduluko a tya ngaho, ndele osho hasho sha fimana unene kuvo. Oshinima sha fimanenena kuvo osho okulonga metwokumwe nelalakano laJehova. Mbela ove oho kala u udite ngahelipi ngeenge omupiya omudiinini nomunaendunge ta pepaleke omayelifilo e na sha neudeko letu lomahongo Ombibeli? — Lesha Lukas 5:39.
10, 11. Ovakonakoni vOmbibeli vamwe ova li ve linyenga ngahelipi eshi ehangano la li le va lombwela va hetekele eenghedi dimwe di lili dokuudifa, noshike hatu lihongo moshihopaenenwa shavo?
10 Natu ka taleni koshihopaenenwa shimwe shi na sha naasho sha ningilwe po omido efele lwaapo da pita. Ovakonakoni vOmbibeli vamwe ovo va li ovapopi vomoipafi ovanekeka ova li tava diladila kutya okuyandja oipopiwa yomoipafi oko onghedi ya denga mbada yokuudifa. Ova li hava kala tave shi hafele okuyandja oipopiwa moipafi yeemhunga dovanhu. Vamwe ova li hava kala va tunhukwa lela eshi ovanhu tave va pandula omolwoipopiwa yavo. Ndele lwanima oshiwana shaJehova osha ka mona kutya oilonga yokuudifa inai kwatela mo ashike okuyandja oipopiwa yomoipafi. Osha li sha mona kutya Jehova kwa hala oshiwana shaye shi kale hashi udifa eumbo neumbo nokulongifa yo eenghedi dimwe vali. Vamwe ovo va li ovapopi vawa kava li va hala okukufa ombinga meembinga da tya ngaho doukalele. Oipopiwa yavo oya li ya ningifa vamwe va diladile kutya ovapopi va tya ngaho ove hole Jehova nohava dulika kuye, ndele eenghatu davo eshi pe uya omalunduluko oo oda ka ulika kutya ihava dulika. Ndele otu shii kutya Jehova ka li a hokwa eenghatu davo. Hauxuuninwa, ova ka fiya po ehangano laye. — Mat. 10:1-6; Oil. 5:42; 20:20.
11 Ovakonakoni vOmbibeli vamwe navo kava li ve wete shipu okuudifa eumbo neumbo, unene tuu petameko. Ndele ova kala tava dulika nova kala ovadiinini kehangano laJehova. Lwanima, ova ka kala tava hafele oilonga yokuudifa eumbo neumbo, na Jehova okwa li e va nangeka noupuna. Ove oho kala udite ngahelipi ngeenge omupiya omudiinini nomunaendunge te tu lombwele tu hetekele eenghedi dimwe dokuudifa odo inatu hetekela nale? Mbela oho dulika ngoo komalombwelo a tya ngaho nonande oho kala u wete shidjuu oku a tula moilonga?
Ngeenge omupambele wetu a fiya po Jehova
12, 13. (a) Omolwashike Jehova e tu lombwela kutya natu ‘konde mo ou mwii’ mokati ketu? (b) Eshongo lilipi ovadali Ovakriste tashi dulika va shakeneke?
12 Opo tu hafife Jehova, otu na okudulika koshipango shokukala twa koshoka moinima aishe. (Lesha Titus 2:14.) Ndele ope na eenghalo dimwe odo tashi dulika tadi shi ningifa shi kale shidjuu okudulika koshiteelelwa osho. Pashihopaenenwa, diladila konghalo ei tai landula: Natu tye nee ngeno Ovakriste ovalihomboli ove na ashike omonamati umwe, nomonamati oo okwa fiya po oshili. Omonamati oo okwa pilamena Jehova nosho yo ovadali vaye nokwa hoolola “ouwa wopakafimbo womoulunde.” Omolwokukatuka eenghatu da tya ngaho, ka li vali a wana okukala oshitukulwa sheongalo. Onghee okwa kondwa mo meongalo. — Heb. 11:25.
13 Osho osha yahameka neenghono ovadali ovo. Ovadali ovo ove shii elombwelo olo li li mOmbibeli tali ti: ‘Ngenge ope na ou ha ifanwa omumwaxo, ndele ye omuhaeli ile omunalwisho ile omukaleli woikalunga ile omusheki ile ongholwe ile omunyeki, inamu endafane naye, nye mu ha lye nandenande naye.’ Ove shii kutya Ombibeli oya ti: “Kondeni mo ou mwii womokati keni.” (1 Kor. 5:11, 13) Ove shii yo kutya oshitya “ou” otashi dulu yo okuulika kovapambele ovo va kondwa ovo hava di pamwe pe lili. Ndele omolwohole yavo yokuhola omona wavo, ovadali ovo otashi dulika va tomhafane tava ti: “Otwa pumbwa okupopya nomona wetu luhapu shi dulife nale. Itatu ka dula oku mu kwafela a alukile kuJehova ngeenge otwa kala ihatu popi naye.”b
14, 15. Oshike osho ovadali ve na okudimbuluka ngeenge tava tokola shi na sha nokupopya nomona wavo oo a kondwa?
14 Oshi etifa onghenda okudiladila kombinga yanghee ovadali ovo omona wavo a kondwa ve udite. Omona wavo okwa li ta dulu okulialuluka, ndele okwa hoolola okutwikila okunyona ponhele yokukendabala a kale e na ekwatafano liwa novadali vaye nosho yo neongalo. Ovadali ova halelela oku mu kwafela, ndele ye ke na ko nasha. Onghee hano, oshi shii okuudiwa ko eshi tava yahama komutima.
15 Mbela oshike ovadali ovo tava ka ninga po? Mbela otava ka dulika ngoo kelombwelo laJehova la yela li na sha nokuhaendafana naavo va kondwa? Oshoshili kutya otashi dulika pa holoke eemhito dinini opo tava ka kala va pumbwa okupopya nomonamati wavo omolwoinima i na sha noukwaneumbo. Ndele mbela otava ka lalakanena okukala tava popi luhapu nomona wavo? Ngeenge tava tokola shi na sha naasho, ove na okudimbuluka kutya oshike osho Jehova a hala va ninge. Ove na okudimbuluka kutya Jehova okwa hala oshiwana shaye shi kale sha koshoka, nomolwaasho a yandja elombwelo kutya “kondeni mo ou mwii” meongalo. Okwa hala yo okukwafela omunhu oo a nyona opo e lialuluke noku alukile meongalo. Ongahelipi ovadali Ovakriste tava dulu okuulika kutya otava longo metwokumwe nehalo laJehova meenghalo da tya ngaho?
16, 17. Oshike hatu lihongo moshimoniwa shaAron?
16 Omumwainamati waMoses, Aron, okwa li yo a shakeneka eshongo li na sha novanamati vaye vavali, Nadab naAbihu. Ovanamati ovo ova li va ninga osho inashi yuka koshipala shaJehova. Onghee Jehova okwa li a tuma omundilo okudja meulu ndele tau va lungwinifa po. Diladila nee kutya Aron okwa li e udite ngahelipi. Ka li vali ta dulu okupopya novana vaye ovo molwaashi ova fya. Ndele opa li yo vali eshongo linene olo la li la palamena Aron noukwaneumbo waye. Moses okwa li a lombwela Aron nosho yo ovanamati vaye ovo va xupa po kutya Jehova ina hala va ulike kutya ova nyika oluhodi. Moses okwa ti: ‘Inamu efa eexwiki dokomutwe di endjelele, ndele inamu pombaula oikutu yeni [shi li onghedi yokuulika oluhodi], opo muha fye, nehandu [laJehova] liha hange eongalo alishe.’ (Lev. 10:1-6) Oshike hatu lihongo moshiningwanima osho? Oshilihongomwa oshosho kutya otu na okukala tu hole Jehova shi dulife eshi tu hole ovapambele vetu ovo vehe fi ovadiinini kuye.
17 Kunena, Jehova iha katukile onghatu ovo ihava dulika keemhango daye moku va dipaa. Ponhele yaasho, ohe va ulikile ohole moku va pa omhito opo va efe po omanyono avo. Ndele mbela oha kala e udite ngahelipi ngeenge ovadali tava nyono oshipango shaye shi na sha nokuhaendafana naavo va kondwa, tava diladila kutya ova pumbwa okukala tava popi luhapu novanamati vavo ile novanakadona vavo ovo va kondwa?
18, 19. Omanangeko noupuna elipi oukwaneumbo tau dulu okumona ngeenge owa kala udiinini kuJehova?
18 Ovanhu vahapu ohava popi kutya ova alukila meongalo molwaashi ookaume kavo novapambele vavo ova kala ovadiinini kuJehova nokuhenuka okupopya navo. Pashihopaenenwa, omukainhu umwe omunyasha okwa lombwela ovakulunhuongalo kutya oshinima shimwe osho she mu kwafela a ninge omalunduluko mokukalamwenyo kwaye osha li onghedi omo omumwainamati a li he lihumbata. Omumwainamati oo okwa kala omudiinini kuJehova, sha hala okutya, okwa kala ta dulika kelombwelo laJehova li na sha nokuhaendafana naavo va kondwa. Osho osho sha li sha ningifa omukainhu oo a kale a hala okwaalukila meongalo.
19 Mbela oshike tashi ka kala pandunge okuninga meenghalo da tya ngaho? Otu na okukala hatu dulika kuJehova monghalo keshe hatu shakeneke monghalamwenyo. Oshoshili kutya molwaashi inatu wanenena otashi ka kala shidjuu okudulika omafimbo amwe. Ndelenee otu na okukala twa tomhwa tu itavele kutya osho Jehova te tu lombwele oshi na sha alushe nouwa wetu.
“Ondjovo yaKalunga oi nomwenyo”
20. Omeenghedi mbali dilipi tu na okuuda ko Ovaheberi 4:12? (Tala yo eshangelo lopedu.)
20 Eshi Paulus a ti kutya “ondjovo yaKalunga oi nomwenyo,” ka li ta popi shi na sha nOmbibeli.c (Heb. 4:12) Eevelishe dikwao metukulwa olo tuu olo otadi ulike kutya Paulus okwa li ta popi shi na sha nomaudaneko aKalunga. Okwa li a hala okutya omaudaneko aKalunga ohaa wanifwa alushe. Jehova okwa popya ye mwene a ti: ‘Ondjovo yange itai alukile kwaame oshimha, ndele otai wanifa eshi nde i tumina.’ (Jes. 55:11) Onghee hano, otu na okukala hatu teelele nelididimiko ngeenge omaudaneko aKalunga inaa wanifwa pefimbo olo twa li twa hala e a wanife po. Osho sha yela oshosho kutya Jehova ota longo opo a wanife po elalakano laye. — Joh. 5:17.
21. Ovaheberi 4:12 otava tu ngahelipi omukumo ovanamido opo va twikile okulongela Jehova?
21 Oilyo ihapu ‘yongudu inene’ oya kala tai longele Jehova oule womido dihapu. (Eh. 7:9) Kaya li ya teelela okukulupila monghalelo ei youkolokoshi. Ndele nande ongaho, otai twikile okulongela Jehova noudiinini. (Eps. 92:15) Oi shii kutya omaudaneko ile tu tye “ondjovo yaKalunga oi nomwenyo” nonokutya oi na ashike okuwanifwa po. (Heb. 4:12) Oi shii yo kutya Jehova ota longo opo a wanife po elalakano laye li na sha nedu nosho yo ovanhu. Molwaashi Kalunga okwa lenga elalakano laye, ohashi mu hafifa ngeenge nafye otwe li tala ko la fimana. Kape na sha osho tashi ka imba Jehova a wanife po elalakano laye momukokomoko wefiku etiheyali letulumuko laye. Oku na yo elineekelo kutya oshiwana shaye shi li ongudu otashi ka twikila okulonga metwokumwe nelalakano laye. Ndele ongahelipi shi na sha naave pauhandimwe? Mbela ove owa ya ngoo metulumuko laKalunga?
[Omashangelo opedu]
a Ovawiliki vahapu velongelokalunga lOshijuda ova li tava kendabala okudiinina okanima keshe ke li mOmhango yaMoses. Ndele eshi Jesus e uya kombada yedu, kava li va itavela kutya oye a li Messias. Kungaho, ova li va katuka ve li omhinge nelalakano laKalunga.
b Tala embo ‘Likalekeni mohole yaKalunga,’ epandja 207-209.
c Kunena, Kalunga oha popi nafye okupitila mOmbibeli, nOmbibeli oi na eenghono okulundulula onghalamwenyo yetu. Onghee hano, eendjovo odo di li mOvaheberi 4:12 otadi dulu yo okuyukifwa kOmbibeli aishe.
Oto dimbuluka?
• Otwa pumbwa okuninga shike opo tu ye metulumuko laKalunga?
• Ngeenge otu udite ko osho Kalunga te tu lombwele okupitila mOmbibeli shi na sha naasho a hala tu ninge, ongahelipi hatu dulu okuulika kutya otwa hala oku mu hafifa?
• Omeenghalo dilipi tashi dulika shi kale shidjuu okudulika kuJehova, ndele omolwashike sha fimanenena okudulika?
• Omeenghedi mbali dilipi hatu dulu okuuda ko Ovaheberi 4:12?
[Efano pepandja 31]
Ovadali ohava yahama komutima ngeenge omona wavo a fiya po Jehova