Konakona Eendjovo daKalunga
Oshike tashi dulu oku ku kwafela opo u kale noukwaneumbo wa hafa?
Moshitukulwa eshi omu na omapulo oo tashi dulika ho kala to lipula kombinga yao nosha ulika kutya openi to dulu okuhanga omanyamukulo ao mOmbibeli yoye. Eendombwedi daJehova otadi ka kala da hafa okukundafana naave kombinga yomanyamukulo oo.
1. Omolwashike okuhombola kwa fimanenena opo oukwaneumbo u kale wa hafa?
Jehova Kalunga omunelao oye omutoti wohombo. Ohombo oya fimanenena opo oukwaneumbo u kale wa hafa molwaashi itai kwafele ashike ovalihomboli va kale ve na ekwatafano liwa ndele ounona otava tekulilwa yo momudingonoko wa amenwa. Kalunga okwa tala ko ngahelipi ohombo? Okwa hala i kalelele nokwa hala omulumenhu nomukainhu va kale va hombola paveta. (Lukas 2:1-5) Kalunga okwa hala ovashamane novakulukadi va kale ovadiinini kookaume kavo kopahombo. (Ovaheberi 13:4) Jehova okwa pitika ashike Ovakriste va teye ohombo nokuhombolulula ngeenge umwe womookaume kopahombo a ya momilele kondje yohombo. — Lesha Mateus 19:3-6, 9.
2. Omushamane nomukulukadi ove na okukalafana ngahelipi?
Jehova okwa shita omulumenhu nomukainhu opo va longele kumwe filufilu. (Genesis 2:18) E li omutwe woukwaneumbo, omushamane oku na oshinakuwanifwa shokufila oshisho oukwaneumbo waye palutu nosho yo oku u honga kombinga yaKalunga. Oku na okukala e na omhepo yeliyambo eshi ta ulikile omukulukadi waye ohole. Ovashamane novakulukadi ove na okukala ve holafane nova fimanekafana. Molwaashi ovashamane novakulukadi aveshe inava wanenena, osha fimanenena okulihonga okudiminafana po opo va kale va hafa meehombo davo. — Lesha Ovaefeso 4:31, 32; 5:22-25, 33; 1 Petrus 3:7.
3. Ngeenge kamu na ehafo mohombo yeni, mbela owa pumbwa okufiya po kaume koye kopahombo?
Ngeenge ove nakaume koye kopahombo omwa shakeneke omaupyakadi, keshe umwe na ungaunge namukwao pahole. (1 Ovakorinto 13:4, 5) Eendjovo daKalunga itadi ti kutya ovalihomboli ove na okutopoka opo ngeno va kandule po omaupyakadi mohombo yavo. Ndele nande ongaho, ngeenge ope na eenghalo da kwata moiti, Omukriste oku na okuninga etokolo ngeenge oshi li pandunge okutopoka ile hasho. — Lesha 1 Ovakorinto 7:10-13.
4. Ounona, mbela omu shii kutya Kalunga okwa hala mu ninge shike?
Jehova okwa hala mu kale mwa hafa. Ohe mu pe omayele a denga mbada e na sha nanghee tamu dulu okuhafela ounyasha weni. Okwa hala mu mone ouwa mounongo nomoimoniwa yovadali veni. (Ovakolossi 3:20) Jehova okwa lenga keshe osho tamu ningi opo mu mu tange. — Lesha Omuudifi 11:9–12:1; Mateus 19:13-15; 21:15, 16.
5. Ovadali, ongahelipi tamu dulu okukwafela ovana veni va kale va hafa?
Omu na okulonga noudiinini opo ovana veni va kale ve na oikulya, onhele yokukala nosho yo oidjalomwa. (1 Timoteus 5:8) Ndele opo ovana veni va kale va hafa, omwa pumbwa yo oku va honga va kale ve hole Kalunga nove lihonge kuYe. (Ovaefeso 6:4) Oshihopaenenwa sheni shi na sha nokuulika kutya omu hole Kalunga otashi dulu okukuma neenghono omitima dovana veni. Ngeenge ehongo leni ola kanghamena kEendjovo daKalunga, otali dulu okuvyula nokunwefa mo nawa omadiladilo ovana veni. — Lesha Deuteronomion 6:4-7; Omayeletumbulo 22:6.
Ounona ohava mono ouwa ngeenge oho va tu omukumo noku va pandula. Ova pumbwa yo okupukululwa nokupewa outekuduliko. Edeulo la tya ngaho otali ke va amena opo vehe lihumbate monghedi oyo tai dulu okunyona po ehafo lavo. (Omayeletumbulo 22:15) Ashike outekuduliko kau na okuyandjwa nonyanya. — Lesha Ovakolossi 3:21.
Eendombwedi daJehova ohadi nyanyangida omambo e lili noku lili nelalakano lokukwafela ovadali nounona. Omambo oo okwa kanghamena kOmbibeli. — Lesha Epsalme 19:8, 12.
Opo u mone ouyelele wa wedwa po, tala etukulwa 14 lembo olo la ulikwa opo Ombibeli otai hongo lela shike?, la nyanyangidwa kEendombwedi daJehova.