Omalihafifo oo ho kufa ombinga muo ohae ku etele ngoo ouwa?
“Shipaashipeni eshi tashi wapalele Omwene.” — EF. 5:10.
1, 2. (a) Eendjovo daKalunga otadi ulike ngahelipi kutya Jehova okwa hala tu kale hatu hafele onghalamwenyo? (b) Okukala twa tala ko omalihafifo e li ‘oshali ya dja kuKalunga’ oshi na oku tu linyengifa tu ninge shike?
MOMBIBELI aishe ohatu hange mo omautumbulilo oo taa ulike kutya Jehova ina hala ashike tu kale nomwenyo, ndele okwa hala yo tu kale hatu hafele onghalamwenyo. Pashihopaenenwa, Epsalme 104:14, 15 ola ti kutya Jehova oha “[menifa] eendya medu, nomaviinyu, aa taa hafifa omutima womunhu, opo a vemife oshipala shaye komaadi, Ye a pameke omutima womunhu neendya.” Jehova oha menifa shili oimeno opo tu mone mo oinima ngaashi oilya, omaadi nosho yo omaviinyu opo tu dule okuhafela onghalamwenyo. Ashike omaviinyu nao ohaa “hafifa omutima.” Ndele nande omaviinyu hao twa pumbwa opo tu dule okukala nomwenyo, ohaa weda ko kehafo letu. (Omuud. 9:7; 10:19) Jehova okwa hala shili tu kale twa nyakukwa nomitima detu di kale di yadi ‘ehafo.’ — Oil. 14:16, 17.
2 Onghee hano, inatu pumbwa okukala tu udite etimba ngeenge pomhito imwe twe liunganeka opo tu ka ‘tale eedila dokeulu neenhemo domoixwa’ ile tu ka ninge oinima ikwao oyo tai tu tulumukifa notai tu etele ouwa mokukalamwenyo kwetu. (Mat. 6:26, 28; Eps. 8:4, 5) Okudula kwetu okukala hatu hafele onghalamwenyo oku li ‘oshali ya dja kuKalunga.’ (Omuud. 3:12, 13) Ngeenge otwa kaleke momadiladilo kutya efimbo olo hatu longifa mokukufa ombinga momalihafifo oli li oshali ya dja kuKalunga, osho otashi ke tu linyengifa tu li longife monghedi oyo ya hokiwa kuye.
Ovanhu ove hole omalihafifo a yoolokafana, ashike otu na okulitulila po omangabeko
3. Omolwashike ovanhu hava hoolola omalihafifo a yoolokafana?
3 Ovanhu ovo ve na etaleko li li pandjele li na sha nomalihafifo ove shii kutya ove na emanguluko lokuhoolola omalihafifo oo va hala, ndele ove shii yo kutya ove na okulitulila po omangabeko. Omolwashike mbela? Opo tu mone enyamukulo kepulo olo, natu faafanife omalihafifo noikulya. Pashihopaenenwa, oikulya oyo hai hafelwa kovanhu vahapu moshitukulwa shonhumba hayo hai hafelwa moitukulwa ikwao mounyuni. Sha faafana, omalihafifo oo Ovakriste vomoshitukulwa shimwe shounyuni va tala ko kutya omahokwifa otashi dulika Ovakriste vokoitukulwa ikwao hasho ve a tala ko. Nokuli nOvakriste ovo hava kala moshitukulwa shimwe otashi dulika umwe a kale a tala ko oshinima shonhumba shihafifa (ngaashi okulesha embo liwa), ofimbo mukwao e shi tala ko shififa oudja, ile osho umwe a tala ko kutya otashi tulumukifa (ngaashi nande okushinga ombasikela), mukwao otashi dulika a kale e shi tala ko shi li oshinima shilolola. Onghee hano, ngaashi ashike ovanhu tava dulu okuhoolola oikulya oyo va hala, otava dulu yo okuhoolola omalihafifo oo ve hole pauhandimwe. — Rom. 14:2-4.
4. Omolwashike twa pumbwa okulitulila po omangabeko ngeenge tashi uya pokuhoolola omalihafifo? Yelifa to yandje efaneko.
4 Otu na yo okudimbuluka kutya nonande otu na emanguluko lokuhoolola omalihafifo, osho inashi hala okutya otu na okukufa ombinga muo nopehe na omangabeko asha. Oku shi faneka, natu diladile vali koshihopaenenwa shi na sha noikulya. Nonande otashi dulika tu kale tu na emanguluko lokulya oikulya i lili noku lili, itatu ka lya owina oikulya oyo ya ola. Itashi ka kala pandunge nandenande okulya oikulya ya ola, molwaashi otai dulu okutula oukolele wetu moshiponga. Sha faafana, nonande ohatu dulu okukufa ombinga momalihafifo e lili noku lili oo mawa, katu na nande okukufa ombinga mwaao taa tula eemwenyo detu moshiponga, oo a kwatela mo elongifo leenghono ile inaa koshoka paenghedi. Ngeenge otwa kufa ombinga momalihafifo a tya ngaho, itatu ka katuka metwokumwe nomafinamhango Ombibeli nohatu ka tula oukolele wetu wopalutu nosho yo wopamhepo moshiponga. Opo tu dule okulitulila po omangabeko ngeenge tashi uya pomalihafifo, otu na okukonakona komesho yefimbo tu tale ngeenge omalihafifo oo twa hala okukufa ombinga muo otae ke tu etela ngoo ouwa ile hasho. (Ef. 5:10) Ndele mbela ongahelipi hatu dulu okuninga ngaho?
5. Ongahelipi hatu dulu okumona kutya omalihafifo oo twa hala okukufa ombinga muo oku li metwokumwe nomifikamhango daKalunga ile hasho?
5 Ngeenge otwa hala okukufa ombinga momalihafifo oo tae tu etele ouwa nokwa hokiwa kuJehova, oku na okukala e li metwokumwe nomifikamhango odo di li mEendjovo daKalunga. (Eps. 86:11) Opo u mone kutya omalihafifo elipi e li metwokumwe nomifikamhango daJehova, ou na okulipula omapulo aa e li paunafangwa: Mbela okwa kwatela mo naanaa shike? Onaini ndi na okukufa ombinga muo? Oolyelye hatu ka kufa navo ombinga muo? Paife natu ka kundafaneni omapulo oo koolimwe.
Mbela omalihafifo oo okwa kwatela mo naanaa shike?
6. Otu na okuhenuka omalihafifo oludi lilipi, nomolwashike?
6 Fimbo ino kufa ombinga momalihafifo onhumba, ou na tete okulipula kutya okwa kwatela mo shike. Pashihopaenenwa oto dulu okulipula kutya, ‘Mbela ondi hole omalihafifo oludi lilipi?’ Eshi to kongo enyamukulo kepulo olo otashi ka kala shiwa okukaleka momadiladilo kutya omalihafifo oku li meengudu dopavali. Omalihafifo omongudu yotete oyoo tuhe na nandenande okukufa ombinga muo, ofimbo omongudu onhivali hatu dulu ngoo okukufa mo ombinga muo. Ndele mbela omalihafifo oo omongudu yotete oelipi? Omalihafifo mahapu omounyuni ou wa nyonauka ohaa kala a kwatela mo oinima oyo i li omhinge filufilu nomafinamhango Ombibeli ile oyo itai tu kumwe neemhango daKalunga. (1 Joh. 5:19) Ovakriste vashili ove na okukala va tokola toko vaha kufe ombinga momalihafifo a tya ngaho. Omalihafifo a tya ngaho okwa kwatela mo oinima ngaashi okuyahameka vamwe palutu ile pamaliudo, oumhulile, oushenge, omafano oipala, elongifo leenghono, oluhaelo ile oinima ikwao oyo tai xumifa komesho oukolokoshi. (1 Kor. 6:9, 10; lesha Ehololo 21:8.) Ngeenge otwa kala twa tokola toko okuhakufa ombinga momalihafifo a tya ngaho, kashi na nee mbudi kutya otu li peni, ohatu ka ulikila Jehova kutya otu ‘tonde osho shii.’ — Rom. 12:9, OB-1986; 1 Joh. 1:5, 6.
7, 8. Oshike tashi ke tu kwafela tu mone kutya omalihafifo onhumba omawa ile omai? Yelifa to yandje oshihopaenenwa.
7 Omalihafifo omongudu onhivali okwa kwatela mo oinima oyo inai tokolwa odikilila kEendjovo daKalunga. Ndele fimbo inatu hoolola omalihafifo oo e li mongudu oyo, otu na tete okutala noukeka ngeenge oinima oyo ya kwatelwa mo oi li ngoo shili metwokumwe nomafinamhango aJehova e na sha naasho shiwa, oo taa hangwa meendjovo daye Ombibeli. (Omayel. 4:10, 11) Opo nee, otu na okuninga omatokolo opaumwene oo tae ke tu kwafela tu kaleke po eliudo letu liwa. (Gal. 6:5; 1 Tim. 1:19) Ndele mbela ongahelipi hatu dulu okuninga ngaho? Diladila koshinima eshi: Ofimbo inatu lya oikulya yonhumba oshikando shotete, ohatu ka kala twa hala okushiiva tete kutya moikulya oyo omwa tulwa shike nashike. Sha faafana, ofimbo ino kufa ombinga momalihafifo onhumba, owa pumbwa okutala tete kutya okwa kwatela mo naanaa shike. — Ef. 5:17.
8 Pashihopaenenwa, otashi dulika u kale u hole omaudano onhumba noshi shii okuudiwa ko molwaashi ovanhu vahapu navo ove a hole. Omaudano otaa dulu okukala mahafifa nomatunhula. Ndele mbela ongahelipi ngeenge ou hole oudano wonhumba molwaashi ovakufimbinga muo ve na omhepo yefiyafanepo, hava tula eemwenyo davo moshiponga, hava mono oiponga ihapu, hava longo ominyonena ngeenge tava tyapula efindano lavo, hava xumifa komesho omhepo youkwashiwana ile oinima ikwao ya yukila oko? Konima eshi wa konakona kutya omalihafifo okwa kwatela mo shike, otashi dulika u ka fike pexulifodiladilo kutya otae ke shi ninga shidjuu kwoove okukala u na etaleko la fa laJehova nosho yo okukala metwokumwe netumwalaka lombili nolohole olo hatu udifile vamwe. (Jes. 61:1; Gal. 5:19-21) Ndele mepingafano naasho, ngeenge omalihafifo onhumba okwa kwatela mo oinima oyo ya hokiwa kuJehova, osha yela kutya otae ke ku etela ouwa notae ke ku tulumukifa. — Gal. 5:22, 23; lesha Ovafilippi 4:8.
Onaini ndi na okukufa ombinga momalihafifo onhumba?
9. Enyamukulo kepulo olo kutya onaini ndi na okukufa ombinga momalihafifo otali ka holola shike?
9 Epulo etivali olo tu na okulipula fimbo inatu kufa ombinga momalihafifo onhumba ololo kutya, ‘Onaini ndi na okukufa ombinga momalihafifo aa? Mbela ohandi ka longifa efimbo li fike peni momalihafifo?’ Enyamukulo kepulo olo kutya omalihafifo onhumba oo twa hala okukufa ombinga muo okwa kwatela mo shike otali ka holola kutya otu hole shike notu tonde shike. Ndele enyamukulo kepulo olo kutya onaini ndi na okukufa ombinga momalihafifo olo tali ka holola kutya oshike twa pitifa komesho ile osho twa lenga neenghono. Ndele mbela oshike tashi ke tu kwafela tu mone kutya otwa tula omalihafifo pondodo ilipi mokukalamwenyo kwetu?
10, 11. Ongahelipi eendjovo daJesus odo tadi hangwa muMateus 6:33 tadi dulu oku tu kwafela tu mone kutya otwa pumbwa okulongifa efimbo li fike peni momalihafifo?
10 Jesus Kristus okwa li a lombwela ovashikuli vaye a ti: “Hola Omwene Kalunga koye nomutima woye aushe nomwenyo woye aushe neenghono doye adishe.” (Mark. 12:30) Onghee hano, otu na okukala tu hole Jehova komesho yoinima aishe. Osho ohatu ke shi ulika mokudulika kekumaido laJesus olo kutya: “Kongeni tete ouhamba waKalunga nouyuki waye, opo tamu wedelwa ko ei aishe.” (Mat. 6:33) Ongahelipi eendjovo odo tadi dulu oku tu kwafela tu mone kutya otu na okulongifa efimbo li fike peni momalihafifo nonokutya otu na oku a tula pondodo ilipi?
11 Didilika kutya Jesus okwe tu ladipika tu ‘konge tete ouhamba,’ ndele ina tya kutya otu na ‘ashike okukonga ouhamba.’ Onghee hano, Jesus okwa li e shii kutya kakele kokukonga Ouhamba, ohatu ka pumbwa yo okukonga oinima ihapu mokukalamwenyo kwetu. Pashihopaenenwa, otwa pumbwa onhele yokukala, oikulya, oikutu, ehongo lopehovelo, oilonga, omalihafifo naikwao ihapu. Ndele mokati koinima aishe oyo hatu kongo ile hatu lalakanene, omu na shimwe osho tu na okupitifa komesho, sha hala okutya, oinima yOuhamba. (1 Kor. 7:29-31) Oinima oyo i li pondodo onhivali oya kwatela mo omalihafifo. Ndele oushili wa fimanenena oo kutya otu na okupitifa oinima yOuhamba komesho ou na oku tu linyengifa tu lalakanene oinima yopondodo onhivali monghedi oyo itai tu imbi nandenande tu lalakanene oinima yOuhamba. Onghee hano, ohatu ka mona ouwa momalihafifo ngeenge otwa kala twe litulila po ongaba.
12. Ngeenge tashi uya pomalihafifo, ongahelipi hatu dulu okutula moilonga efinamhango olo li li muLukas 14:28?
12 Fimbo inatu kufa ombinga momalihafifo onhumba, otwa pumbwa okutala tete kutya otae ke tu pula shi fike peni. (Luk. 14:28) Otwa pumbwa okutala kutya omalihafifo oo otae ke tu pula efimbo letu li fike peni. Opo nee, otu na okutala kutya otwa pumbwa ngoo shili okulongifa efimbo li fike opo momalihafifo ile hasho. Ngeenge okukufa ombinga momalihafifo onhumba ohaku tu imbi tu ninge oinima ngaashi ekonakonombibeli lopaumwene, elongelokalunga loukwaneumbo, okuya kokwoongala kwopaKriste, ile okukufa ombinga moilonga yokuudifa Ouhamba, otwa pumbwa okweefa po omalihafifo a tya ngaho. (Mark. 8:36) Ndele ngeenge okukufa ombinga momalihafifo onhumba ohaku tu nghonopaleke opo tu dule okulalakanena oinima yOuhamba, osha yela kutya inashi puka okulongifa efimbo letu lonhumba mokukufa ombinga muo.
Oolyelye hatu ka kufa navo ombinga momalihafifo?
13. Omolwashike tu na okudiladila nawa kutya oolyelye hatu ka kufa navo ombinga momalihafifo?
13 Epulo etitatu olo u na okulipula ololo kutya, ‘Oolyelye nda hala oku ka kufa navo ombinga momalihafifo?’ Osha fimana okudiladila kombinga yepulo olo. Omolwashike mbela? Omolwaashi ouwa oo hatu ka mona momalihafifo owe likolelela unene kwaavo hatu ka kufa navo ombinga muo. Ngaashi ashike hashi kala shihafifa neenghono ngeenge to li oikulya yonhumba pamwe nookaume vawa, ohashi kala yo shihafifa neenghono ngeenge to kufa ombinga momalihafifo onhumba pamwe nookaume vawa. Onghee hano, oshi shii okuudiwa ko eshi vahapu vomufye, unene tuu ovanyasha, hatu hafele okukufa ombinga pamwe navamwe momalihafifo. Ndele opo tu shilipaleke kutya omalihafifo onhumba otae ke tu etela ouwa, otashi ka kala pandunge okutokola komesho yefimbo kutya oolyelye hatu ka kufa navo ombinga muo noolyelye tu na okuhenuka. — 2 Omaf. 19:2; lesha Omayeletumbulo 13:20; Jak. 4:4.
14, 15. (a) Jesus okwe tu tulila po oshihopaenenwa shilipi ngeenge tashi uya pokuhoolola ookaume ovo tava wapalele? (b) Omapulo elipi tu na okulipula shi na sha naavo twa hala va ninge ookaume ketu?
14 Jesus okwe tu tulila po oshihopaenenwa sha denga mbada shi na sha nokuhoolola ookaume. Jesus okwa kala e hole ovanhu okudja kehovelo leshito. (Omayel. 8:31) Eshi a li kombada yedu, okwa li ha ulike kutya oku na ko nasha novanhu vomaludi aeshe. (Mat. 15:29-37) Ndele Jesus ka li ha pange oukaume wopofingo nakeshe umwe. Nonande okwa li ha ungaunga novanhu vakwalukeshe nomhepo youkaume, okwa li ashike ha pange oukaume wopofingo naavo va li va wanifa po oiteelelwa yonhumba yokondadalunde. Jesus okwa li a lombwela ovayapostoli vaye ovadiinini 11, a ti: ‘Onye ookaume kange, ngenge tamu ningi eshi handi shi mu lombwele.’ (Joh. 15:14; tala yo Joh. 13:27, 30.) Hano Jesus okwa li ashike a panga oukaume wopofingo naavo va li ovashikuli vaye nohava longele Jehova.
15 Onghee hano, otashi ka kala pandunge okukaleka momadiladilo eendjovo daJesus ngeenge to hoolola omunhu wonhumba oo wa hala a ninge kaume koye kopofingo. Lipula omapulo ngaashi aa taa landula: ‘Mbela omunhu ou oha ulike ngoo okupitila meendjovo nomoilonga kutya oha dulika koipango yaJehova naJesus? Okwa lenga ngoo omifikamhango dOmbibeli noha kala metwokumwe nomifikamhango dopaenghedi da faafana naado handi dulika kudo? Ngeenge onda kala handi endafana naye, mbela ota ka ladipika nge ngoo ndi kale nda pitifa komesho Ouhamba mokukalamwenyo kwange nondi kale omudiinini kuJehova?’ Ngeenge ou shii kutya omanyamukulo omapulo oo oheeno, osha yela kutya owa mona kaume muwa oo tamu dulu okukala hamu hafele pamwe naye. — Lesha Epsalme 119:63; 2 Kor. 6:14; 2 Tim. 2:22.
Mbela omalihafifo oo nda hala okukufa ombinga muo oku li ngoo metwokumwe nomifikamhango dOmbibeli?
16. Oshike twa pumbwa tete okulipula kombinga yasho fimbo inatu kufa ombinga momalihafifo onhumba?
16 Otwa kundafana pauxupi kombinga yeembinga nhatu domalihafifo: efimano lao, efimbo olo tu na okulongifa nosho yo ovo tu na okukufa navo ombinga muo. Omalihafifo okwa pumbwa okukala filufilu metwokumwe nomifikamhango dOmbibeli meembinga adishe odo nhatu opo e tu etele ouwa. Onghee hano, fimbo inatu kufa ombinga momalihafifo onhumba, otwa pumbwa tete okutala ngeenge oku li ngoo metwokumwe nomifikamhango dOmbibeli. Ngeenge tashi uya pefimano lao, otwa pumbwa okushiiva kutya ‘okwa kwatela mo shike. Mbela okwa hokiwa ngoo kuJehova ile pamwe okwa kwatela mo oinima inai koshoka?’ (Omayel. 4:20-27) Otwa pumbwa okushiiva kutya ‘otu na okulongifa efimbo li fike peni momalihafifo. Mbela efimbo olo hatu longifa momalihafifo oli li ngoo pandjele ile hasho?’ (1 Tim. 4:8) Otwa pumbwa yo okutala kutya oolyelye ‘tu na okukufa navo ombinga momalihafifo. Mbela ovanhu ovo handi kufa ombinga navo ove li ngoo ookaume vawa ile ovai?’ — Omuud. 9:18; 1 Kor. 15:33.
17, 18. (a) Ongahelipi hatu dulu okumona kutya omalihafifo onhumba oku li metwokumwe nomifikamhango daKalunga ile hasho? (b) Owa tokola toko okuninga po shike pauhandimwe ngeenge tashi uya pokuhoolola omalihafifo?
17 Ngeenge omalihafifo onhumba itaa tu kumwe nomifikamhango dOmbibeli mushimwe shomoinima itatu oyo twa dja nokukundafana, osha yela kutya itaa wapalele Omukriste. Ndele ngeenge otwa mono kutya omalihafifo oo twa hala okukufa mombinga muo oku li metwokumwe nomifikamhango dOmbibeli moinima aishe oyo yopatatu, omalihafifo a tya ngaho otaa ka fimanekifa Jehova notae ke tu etela ouwa. — Eps. 119:33-35.
18 Onghee hano, ngeenge tashi uya pomalihafifo, natu kendabaleni okulonga osho sha yuka, hatu shi ningi pefimbo la wapala nosho yo novanhu ovo tava wapalele. Keshe umwe womufye na kale a tokola toko okudulika komayele Ombibeli oo taa ti: “Ngenge tamu li ile tamu nu, ile keshe tuu eshi tamu shi ningi, ashishe shi ningeni okufimanekifa Kalunga.” — 1 Kor. 10:31.
Oto dulu okuyelifa?
Ongahelipi to dulu okutula moilonga omafinamhango oo e li momishangwa edi tadi landula apa ngeenge tashi uya pomalihafifo . . .
[Efano pepandja 9]
(Opo u mone nghee ouyelele wa unganekwa, tala oshishangomwa sho vene)
✔Okwa kwatela mo naanaa shike?
[Efano pepandja 10]
(Opo u mone nghee ouyelele wa unganekwa, tala oshishangomwa sho vene)
✔Onaini ndi na okukufa ombinga muo?
[Efano pepandja 12]
(Opo u mone nghee ouyelele wa unganekwa, tala oshishangomwa sho vene)
✔Oolyelye hatu ka kufa navo ombinga muo?
[Efano pepandja 10]
Ongahelipi hatu dulu okushikula oshihopaenenwa shaJesus ngeenge hatu hoolola ookaume nosho yo omalihafifo?